A RETEDEI el ngeasek el sechal el ngar er a Central Africa a mle sorir el mo er a district convention el ngar er a belurir. Engdi te mekerang e mo sebechir el mong? Sel rael el mo er a basio er a district convention a mle mekngit e dechudech e mle bekord el 60 el mael a cherridel e dimlak a mlirir. Me ngmle sorir el mo meleng a kldei el rrat engdi ngdimlak el sebechir el metik a ungil el rrat el bo lousbech.

A ta er a elder el ngar er a ongdibel er tir a mlo medengelii tia el mondai me ngmilsterir a rrat er ngii​—el mle mechut engdi ngsebechel el merael. Nguluuchais er tir er a rolel a lebo er a convention ngii me a rebebil er a ngar er a mong. Ngii el elder a millekoi er tir el kmo ngsebechir el tedei el ousbech er tia el di chimo el rrat. Ngkora kmal beot el tekoi engdi meringel a loruul er ngii. Ngmekerang e sebechir tirka el tedei el ousbech er a di chimo el rrat el mo er a convention?

Tirka el ngeasek el odam a mle kirir el omekokl er a dirk tutau e otak a kloklir er tia el rrat er a uchei er a bo el meringel a sils. A ta er tir a mle kirel el ourrat e tirke el terung a mle kirir el mereched el merael el okiuellel. A uriul er a lourrat el 500 el meter e ngike el ourrat a kirel el stob e osisii tia el rrat er a uchul a kerrekar. Ngulterekokl el milecherei tia el rrat er a basio el sebechir tirke el terung el mesang me lak a chad el mo rucherechii. E seikid e ngike el kot el ourrat a melemolem el di merael.

Me tirke el terung sel lemerma er tia el rrat, e a ta er tir a mo ngmasech er ngii e ourrat, e ngike el chimong a di melemolem el merael el 500 el meter e ngmochu temel el ourrat. Tirke el tedei a kmal mle ungil el mengetmokl er tir e mle blak a rengrir a uchul me te di mirrael el 40 el mael alta e tia el rael el mo er a convention a mle 60 el mael a cherridel. Tiang a mlo uchul a mera el ungil el tekoi. Te mlo sebechir el mo obengterir a rudam me a rudos er tir el Kristiano e mo oldeu a rengrir el ngar er a convention. (Dut. 31:12) Kau ke mo melasem er a tkul er a bab el sebechem el mo er a district convention el mo er ngii er a beluam er a chelecha el rak?