John: a A uchei er a lollach er ngak a rechad er a blik el kirel a cheleuid el tekoi el krirellii, e te sorir el mo medengei el kmo ngera uchul me ak mirruul er ngii. Me ak melasem el ousbech er tia el rolel el olengeseu e mellach er a rengelekek. A bechik el Alison a kuk mle ngodech a okurulel. A demal me a delal a mle blechoel el mereched el oungeroel e dimlak a ultutelel er tir a bo lodengelii a uchul a omerellir a rengelekir. A lebebil er a taem e ak melechesuar el kmo ngtelkib el mo meringel el mellach er a rengelekam el ua rechad er a blil.

Carol: A demak a chilitemam er a dirk el eim a rekik e dimlak lomekerreu er ngak me a retedei el merrengek. A delak a kmal mle meringel el oureor el mesiou er kemam, me ak mlo olengeseu er ngii el omekerreu er tirka el merrengek. Ngkmal mle meringel a klengeasek er ngak e le ngmle kirek el mo ua chedil. Me a chelechang, e ngkmal meringel er ngak el oungelakel, e di blechoel el soak a lemereched el meketmokl a tekoi el kulatk er ngii. A lsekum a rengelekek a ousbech a omellach e ak blechoel el melatk er a cheleuid el omerellir el kmal mo meketeket, e blechoel el soak el mo medengei el kmo ngera dilubech e ngera uchul me ngdilubech. Engdi a bechik el Mark a kuk diak leuaisei a blekerdelel. Ngmlukeroul el demal a uluubltikerreng, e ungil el mellach, e kmal ulemekerreu er a telungalek er ngii me a bechil. Me sel lollach er a rengelekam e ngblechoel el mereched el smodii a mondai e sumecheklii el mo ungil e dikea lluut el melatk er ngii.

EL UA lolecholt a tekingel a John me a Carol, a okurulem a sebechel el ngar er ngii lerellii er a rolel a omollach er a rengelekem. A lsekum a chedam me a chedil a kakerous a rolel a ulekurulir e te blechoel el kakerous a uldesuir sel lolisechakl er a rengelekir. A lebebil er a taem e a kakerous el uldasu a sebechel el mo uchul a mondai er a chebechiil.

A mondai a sebechel el meleketek sel bocha lemesaul a rengud me a bedenged. A rechad el dirk mlo oungalek a mo melechesuar el kmo a dolisechakl er a rengalek e ngkmal lousbech er a klou el taem. A Joan el ngii me a bechil el Darren el mla mekuruleterir a reteru el ngalek el redil a kmo: “Ak kmal betik a renguk er a rengelekek, engdi te blechoel el chetirir el mo mechiuaiu er sel taem el ngak a soak a bo lemechiuaiu.  Te dirrek el blechoel el mekiis er sel taem el diak el kirir el mekiis er ngii, e blechoel el oleau sel kungedecheduch, e di berriid a oecherir me a bilir me kloklir, e kmal diak el lotungii a bata er a chaisbaks.”

A Jack el bechil a mlo smecher er a uriul er a lochellii a ongeru el ngelekir a kmo: “Ak blechoel el mesaul a bedengek sel be krei er a uriul er a ureor, engdi ngkirek el di mekar el mo osoi el omekerreu er a ngelekek el tolechoi. Tiang a rirellii el mo meringel er ngak el mellach er a klou el ngelekek el redil, el ngii a blechoel el mechechei el soal el di mengerechir er a kemam el mo orrenges er ngii.”

A rebechiil el chad sel bo lekautoketok el kirel a rolel a lomekeroul er a rengelekir e ngsebechel a mekekerei el tekoi el mo uchul a meklou el klautoketok. Me a mondai el diak lemesmechokl a sebechel mo uchul a klsiberreng el msang a techellel a ngalek el mo ousbech er a ta er tir el omtok er a tang. Ngera el omellach er a Biblia a sebechel el ngosuterir a rebechiil el olekes a chebechiielir e dirrek el ungil el olisechakl er a rengelekir?

Mocheuekl a Taem el Kiriu el Terung

A chebechiil a kirel el moak er a uchei er a lebo er ngii a rengalek, e melemolem er a uriul er a bo lemeklou el tobed er a delengchokl. A Biblia a melekoi el kirel a chebechiil el kmo: “A ikel bla lodak a Dios, lak a chad el smaod.” (Matteus 19:6) A tekingel a dirrek el olecholt el kmo a Dios a mle soal a ngalek bo leklou e “mecherei a demal ma delal e mo obengkel a bechil.” (Matteus 19:5) Me nguaisei a okurulir a rengalek a ta er a telengtengil a chebechiil, engdi ngdiak el uchetemel a chebechiil. A rechedam me a rechedil a kirir el ousbech er a klou el taem el olisechakl er a rengelekir, engdi ngkirir el medengei el kmo a mesisiich el chebechiil a kot el ungil el uchetemel a okurulir a rengalek.

Ngerang a ta er a rolel e a rebechiil el chad a sebechir el olekes er a deluill er tir er a taem el omekeroul er a rengelekir? A lsekum e ngsebechel, e mocheuekl a taem el kiriu el terung. A omoruul el uaisei e ngmo sebechiu el mesaod a meklou a ultutelel el tekoi el kirel a telungalek, e dirrek el mo ungil el chadecheduch el terung. Tiang a diak el beot el tekoi. A Alison el dulsaod er ngii er a uchei a kmo, “Ngblechoel el sel taem el ki mchadecheduch ngak me a bechik e ngike el kekerei el ngelekam el redil a oleau er kemam, me a lechub e ngike el elolem a rekil a lmangel e le ngdikea lebetik a kureong er ngii.”

A Joan me a Darren el dulsaod er tir er a uchei a riruul a taem el di kirir el terung, e le te ulterekeklii a temir a rengelekir el mo mechiuaiu. A Joan a kmo, “Ngar er ngii a ulterekokl el temel a cheliuir a rengelekam. Me ngoeak itiang e ngmlo sebecham el olengull e chadecheduch el terung.”

Me a doterekeklii a temir a rengeleked el mo mechiuaiu e ngdiak di bo lebeskid a mededaes el temed, e ngdirrek el ngosuterir a rengalek el mo diak di lolatk el di ‘kirir.’ (Rom 12:3) Me nguaisei a rengalek el mo ulterekokl a temel a cheliuir a mo medengei el kmo ngdiak di el tir el tang a chedal tia el telungalek​—ngkmal kirir el mo oltirakl a llechul a telungalek, e diak lomdasu el kmo te merreder er a telungalek.

MOLASEM ER TIANG: Moterekeklii a temel a cheliuaiu e molisiich er ngii. A lsekum a ngelekem a mesaod el kmo ngkirel el di mekar me a lechub e ngsoal el melim a ralm, e ngsebechem el kongei er ngii er a kot el ongtil. Engdi lak becherei me lolemolem el osiik a uchul e di lemekar. A lsekum e ngolengit el di mekar e bsang a eim el bung, e moterekeklii el di eim el bung, e lak becherei me lluut el mo betok a ongtil. “Chomelekingiu a di kirel el di ‘Choi,’ malechub e ngdi ‘Diak.’”​—Matteus 5:37.

Bo Moba Ta el Tekoi

A osisechakl a kmo: “Rungalek, morrenges a lolisechakl er kau a demam, e bo le blak a rengum er a ikel le dung a delam.” (Osisechakl 1:8) Tia el bades er a Biblia a melekoi el kmo a chedam me a chedil a ngar er ngii a llemeltir el mengedereder er a rengelekir. A rubekel el  kmeed el osisiu a rolel a okurulir, me ngulterekokl el mo kakebosech a uldesuir el kirel a lollach er a rengelekir, me a lechub e te melib a llechul a telungalek. Te mekerang a rubekel a losmechokl er a chetituokel el tekoi?

A John el dulsaod er ngii er a uchei a kmo, “Ak melechesuar el kmo ngkmal klou a ultutelel el diak dekautoketok er a mederir a rengalek.” Ngii a kongei el kmo a dolasem el oldak er kid e ngbeot a omesodel er a omerellel. Ngdirrek el dilu el kmo, “A rengalek a kot el meduch el omtab a tekoi, te mereched el melechesuar a tekoi el ketouch el oeak a omerelled.”

Te mekerang e mesaod a chetituokl el tekoi a John me a Alison? A Alison a kmo: “Ak blechoel el choilii a ngelekek el mo cheroid er a uchei er a kuuchais er a bechik el kmo ngdiak kengei er sel omellach el ledillii. Ngdiak el soak a ngelekek a bo lomdasu el kmo ngsebechel el omesiul er kemam el mo meruul a soal el ousbech aike el kakebosech el uldesuam. Sel bo lodengei el kmo ngdiak kim kengei er a ongtil, e a kuuchais er ngii el kmo a rebek el chedal a telungalek a kirir el oltirakl er a ulekrael er a Jehovah el kirel a dereder, me ngak a kongei el mo chederedall er a demal el bdelul a delengchokl el ua ngii el kirel el mo chederedall er a demal me a delal.” (1 Korinth 11:3; Efesus 6:1-3) A John a kmo: “Sel ki mdak el telungalek e ak blechoel el mellach er a rengelekam, engdi a lsekum e a kumes er a Alison el medengelii a tekoi el losaod er ngii, e ak mecherei me ngmellach er tir. A lsekum e ngar er ngii a mo diak kengei er ngii, e ak mo mesaod er ngii er a uriul.”

Ke mekerang e sebechem el diak bechei a kakebosech el uldasu el kirel a omellach er a rengelekiu me bo luchul a ngasecherreng er a delongeliu​—el mo uchul e ngrulleterir a rengelekiu el mo diak longull er kemiu?

MOLASEM ER TIANG: Moterekeklii a taem er a bek el sandei el chadecheduch el kirel aike el ousbech a rengalek me a tekoi el mle kakebosech a uldesiu el kirel. Ka molebedebek er a uldesuel a bechim el kirel a tekoi el mosaod er ngii, e lak mobes el kmo a bechim a dirrek el ngar er ngii a deluill er ngii me a rengelekiu.

Bo Mungil el Kaodengei

Kede ungil el medengei el kmo a osisecheklir a rengalek a meringel el ureor, el sebechel el nguu a klou el temed me a klisiched. Me nguaisei, engdi ngmo er ngii a taem el rengelekiu a mo tuobed er a delengchekliu, me seikid e kau me a bechim a di mocha kemiu el terung. A leuaisei, e a chebechiieliu ngmo mesisiich me a lechub e ngmo mechitechut el tia el okurulir a rengalek a uchul? A nger a di mo ultuil er sel rolel a omoltaut er a omellach er a Olisechakl 4:9, 10 el kmo: “A re terung a kuk ungil er a di tang, ele le dak el oureor e ng meruul a ungil ureor. A bo lubuu a tang, e ngkel tang a ngosuir.”

Sel lsekum a chedam me a chedil a dmak el oureor e ngulterekokl el mo ungilbesul a rokui el tekoi. A Carol el dulsaod er ngii er a uchei a kmo: “Ak medengei a betok el ungil el blekerdelel a bechik, engdi sel rolel a lomekeroul er a rengelekam e ngullecholt a lmuut el bebil er a ungil el blekerdelel. A omengull me a bltkil a renguk el mo er ngii a mukeroul sel kumes er ngii el kmal oba bltikerreng el omekerreu er a rengelekam.” A John a melekoi el kirel a bechil el Alison el kmo: “Sel kumes a blekerdelel a bechik el ungil e kerekikl el chedil el ngelmuut el mekurulii a bltikerreng me a omengull er ngak el mo er ngii.”

Mrellii a temem kau me a bechim el dmak el omekeroul er rengelekiu, e a chebechiieliu a mo mesisiich, me kemiu a mo ungil el kaodengei sel lemekurula el mo meklou a rengelekiu. E tiang a kot el ungil el kerebai el sebechir a rengelekiu el mo oltirakl.

[Footnote]

DI LEKAU EL OKER ER KAU . . .

▪ Ngua ngera el klemengetel a taem a kungoit er ngii el obengkel a bechik er a bek el sandei el di kemam el terung?

▪ Ngoeak a ngera el rolel e a kulengeseu er a bechik sel lollach er a rengelekam?