“A ngklel [a Jehovah] le modanges!”​—JOB 1:21.

1. Ngtechang a milluches er a babier er a Job, e lilechesii er oingerang?

 A MOSES er a bo le 40 a rekil e ngchiliis er a Ekipten me a Farao lak lokodir e mellukl el mlo er a beluu er a Midia. (Rellir 7:23) Me a lengar er isei, e nglocha rirenges el kirel aike el ringel el mlo er a Job el kiliei er a beluu er a Uz el kmeed er a Midia. A betok el rak er a uriul, er a mochu ulebengelel a omerollir a rechad er a Israel er a ked el ngar er a bita er a Uz, e a Moses a locha rirenges a chisel a klengar er a Job. A rechad er a Judea a oumerang el kmo a Moses a milluches er a babier er a Job er a uriul er a kodellel a Job.

2. Ngoeak a ngera el rolel e a babier er a Job a melisiich er a remesiungel a Jehovah er a chelechang?

² A babier er a Job a melisiich er a klaumerang er a remesiungel a Dios er a chelechang. Ngoeak a ngera el rolel? Sel cheldecheduch a ngosukid el mo medengei aike el tekoi el dilubech el ngar er a eanged, e mekltkid er sel omelsemai el kirel a llemeltel a Dios el mengedereder er a eanged me a chutem. Ngdirrek el ngosukid el mo medengei aike el kired el meruul el lomelemii a blakerreng er kid, e ngosukid el mo medengelii a uchul e a Jehovah a mechititerir a remesiungel me bo el chelebangel a ongarm. A babier er a Job a meketeklii el kmo a Satan el Diabelong a ngike el ngar er a uchei el cherroel a Jehovah me a rechad. Ngii el babier a dirrek el olecholt el kmo a rediak el mecherrungel el chad el ua Job a sebechir el lomelemii a blakerreng er tir el mo er a Jehovah er a chelsel a ringel. Ka me bo dorriter a bebil er a tekoi el losaod a babier er a Job.

A Satan a Mlengarm er a Job

3. Ngera kede medengei el kirel a Job, e ngera uchul me a Satan a ulemekbat er ngii?

³ A Job a mle merau e merael a chisel el chad, el ungil a blekerdelel. Ngmle ungil a tekingel e ullengeseu er a remechebuul. E a klou a ultutelel a kmo a Job a milluu er a Dios. Ngmeldung el kirel el kmo: “Ng milengull el meluluuch er a Dios e kmal mle blak a rengul er ngii. Ng kmal mle ungil chad e mle kerekikl me lak a ngeral mekngit el le rellii.” Ngdiak el sel iltetel me a chisel a uchul me a Satan el Diabelong a ulemekbat er ngii, e ngbai sel omeluu er ngii el mo er a Dios.​—Job 1:1; 29:7-16; 31:1.

4. Ngerang a blakerreng?

⁴ A uchelel a babier er a Job a mesaod er a kldibel er a rechanghel el mlo er a medal a Jehovah el ngar er a eanged. A Satan a mle teloi er tir e dilu a tekoi el oltelechakl er a Job. (Monguiu er a Job 1:6-11.) Me alta e a Satan a millekoi el kirel a kerruul er a Job, engdi ngbai mle soal el melasem er a blakerreng er ngii. Sel tekoi el “blakerreng” a mesaod er a chad el melemalt e diak a telemellel. A Biblia sel lousbech er ngii e ngmesaod er a chad el cherrungel a blakerreng er ngii el mo er a Jehovah.

5. A Satan ngerang dilung el kirel a Job?

⁵ A Satan a uleltelechakl el kmo a Job a mengull er a Dios e le ngii a bechelechelingaol a rengul er a bai leblak a rengul. A Satan a millekoi el kmo a Job a mo melemolem er a blakerreng er ngii el mo er a Jehovah a lsekum a Jehovah a omekngeltengat e omekerreu er ngii. A Jehovah a milecherei a Satan me longarm er a Job me bo el sebechel el onger er a ultelecheklel ngii el Satan. Sei a uchul me a chelsel a ta el sils, e a remerechorech a mlei el ngmai a chermel e mekodeterir a remesiungel, me a reteruich el ngelekel a mlad er a ses el eolt. (Job 1:13-19) Aika el omengarm er a Satan ngchiltechetur a blakerreng er a Job? A mlukreng el cheldecheduch a mesaod er a uldesuel a Job el kirel a chelebulel el kmo: “A [Jehovah] a milskak a ikel ngar ngii er ngak, e chelechang e ng mla ngmai. A ngklel [a Jehovah] le modanges!”​—Job 1:21.

6. (a) Ngera dilubech er a kuk ta er a kldibel el ngar er a eanged? (b) A Satan ngdi millasem er a blakerreng er a Job el mo er a Jehovah e merekong?

 ⁶ Ngmla er ngii a kuk ta er a kldibel er a eanged er a uriul. A Satan a liluut el oltelechakl er a Job el kmo: “A chad a mo meiubet a rengul er a bek el tekoi el kirel a klengar er ngii me lak le mad. E Chomko ke mekrengelii a bedengel e ng di mo ngar medam e siuesau.” Momtab el kmo a ultelecheklel a Satan a dimlak di lolasem er a blakerreng er a Job e lemerekong, e ngbai millekoi el kirel a blakerreng er a ngii di el “chad” el mengull er a Jehovah er a lolekoi el kmo “a chad a mo meiubet a rengul er a bek el tekoi el kirel a klengar er ngii me lak le mad.” E a uriul er isei, a Dios a milecherei a Satan me longebuul er a Job me ngdi mlo btuu a bedengel el rokir. (Job 2:1-8) Engdi tiang a dimlak el ulebongel el ongarm el mo er a Job.

Klubeled el Dengai er a Blekerdelel a Job

7. Ngoeak a ngera el rolel e a bechil a Job me tirke el sechelil a ulemekcharm er ngii?

⁷ A bechil a Job a dirrek el mlo chuarm er aike el tekoi el lechilarm er ngii a Job. A kodellir a rengelekir me a rokui el kloklir el dikeang a ulterekokl el mlo uchul a kngtil a rengul. Ngdirrek el kmal chilarm er a lesa bechil el smecher er a meringel el rakt. Me nglilangel el mo er a Job el kmo: “Kau ke dirk blak a rengum er a Dios el ua ngar a mong? Ngera me ng diak msiuesii a Dios e mad?” A retedei el chad​—el Elifas me a Bildad me a Sofar—​a mlei el leko te me mengelaod er a Job. E a lechub e te bai millekoi a cheleblad el tekoi me a ‘ongelaod el luleltobed a di ulemekcharm’ er a Job. El ua tiang, a Bildad a millekoi el kmo a rengelekel a Job a mirruul a mekngit a uchul e te mlad. A Elifas a millekoi el kmo a Job a mlo chuarm el kirel a kngtil er a ngar er a mong. Ngdirrek el uleltelechakl el kmo a blakerreng er a rechad a diak a ultutelel er a Dios! (Job 2:9, 11; 4:8; 8:4; 16:2; 22:2, 3) Me a lengar er a eungel aika el meringel el ongarm, e a Job a lilemelemii a blakerreng er ngii. Engdi ngmle cheleuid el “mlengikiid er ngii e oltelechakl er a Dios.” (Job 32:2) Me nguaisei, engdi ngmillemolem el blak a rengul er a chelsel aika el rokui el ongarm.

8. Ngera el ungil el kerebai a lebilecherei a Elihu el kirir tirke el olengeseu el omekrael er a rechad er a chelechang?

⁸ Chelechang e kede menguiu el kirel a Elihu, el dirrek el mle omes er a Job. A Elihu a ulerrenges a tekingel a Job me tirke el tedei el sechelil. Alta e a Elihu a mle kekerei er tirka el teua el chad, engdi ngmle klou a llemesel a rengul er tir. Ngulechotii a omengull er ngii el mo er a Job er a longedecheduch er ngii. E chilat er a melemalt el blekerdelel a Job. Engdi ngdirrek el dilu el kmo a Job a di millatk er a melemalt el omerellel. E sola e ngii el Elihu a millisiich er a Job er a ledu el kmo a blakerreng el mo er a Dios a kmal klou a ultutelel. (Monguiu er a Job 36:1, 11.) Tiang a kmal ungil el kerebai el kirir tirke el olengeseu el omekrael er a rechad er a chelechang! A Elihu a ullecholt a kllourreng e mle kerekikl el orrenges e chilat e ulemeklatk el melisiich er a rebebil.​—Job 32:6; 33:32.

9. Ngmilekerang a Jehovah er a lolengeseu er a Job?

 ⁹ A uriul, e a mengasireng el tekoi a dilubech el mo er a Job! A cheldecheduch a kmo: “A [Jehovah] a milengedecheduch er a Job el ngar a eolt.” A Jehovah a uluusbech a bebil el ker el olengeseu er a Job el mo omeklemalt er a uldesuel. A Job a kilengei er tia el omellach, e dilu el kmo: “Ak milengedecheduch el di klebelung a tekingek . . . mak ulat er a chebechab e mengab er ngak er a chab.” Me a uriul er a longedecheduch er a Job, e a Jehovah a ulechotii a ngesechel a rengul el mo er tirke el tedei el sechelil, el tir a millekoi a cheleblad el tekoi. A Job a mle kirel el meluluuch el kirir. E sola, “e a [Jehovah] a liluut el rullii el kmal mlo ungilbesul e milsa erul chachisois el ildisel a ikel mlar ngii er ngii er a ngar a mong.”​—Job 38:1; 40:4; 42:6-10.

Ngua Ngerang a Klisichel a Bltkil a Rengud el Mo er a Jehovah?

10. Ngera uchul me a Jehovah a dimlak di lebecherei a Satan me a lechub e di lemereched el mekodir?

¹⁰ A Jehovah a Ulemeob a rokui el tekoi, e Merreder er a eanged me a chutem. Ngera uchul me a Jehovah a mle kirel el onger er a ultelecheklel a Diabelong? A Dios a mle medengei el kmo a di lebecherei a Satan me a lechub e di lemereched el mekodir a diak bo longer er sel ultelecheklel a Satan. A Diabelong a millekoi el kmo a Job, el ngii a blak a rengul el mesiungel a Jehovah, a diak bo el lemelemii a blakerreng er ngii a lsekum ngoriid a rokui el kerruul er ngii. Engdi a Job a millemolem er a blakerreng er ngii er a chelsel tia el ongarm. A Satan a dirrek el millekoi el kmo a chad a mo cheroid er a Dios a lsekum e ngmo chuarm a bedengel. A Job a mlo chuarm engdi ngdimlak loridii a blakerreng er ngii. Me a Satan a mlocholt el kmo ngbulak el oeak a blakerreng er ngika el diak el cherrungel el chad. E kuk mekerang el kirir a rebebil el mengull er a Dios?

11. Ngmilekerang a Jesus er a longer er a omelsemai er a Satan?

¹¹ Nguaisei, a derta el mesiungel a Jehovah a lsekum e te lomelemii a blakerreng er tir er a chelsel a omengarm er a Satan, e te ochotii el kmo a otelecheklel ngika el cheraro el Satan a rokui el di klsuul. A Jesus a mlei er tia el chutem e mileketeklii el kmo a Satan a cheblad. A Jesus a mle cherrungel el chad, el di ua Adam, el ngike el kot el demad. A blakerreng er a Jesus el mo lmuut er a kodellel a ulechotii el kmo a Satan a bulak e a ultelecheklel a rokui el di klsuul.​—Chocholt 12:10.

12. Ngera el techall me a ngerachel a lobang a derta el mesiungel a Jehovah?

¹² Nguaisei, engdi a Satan a melemolem el mengarm er a remesiungel a Jehovah. A derta er kid a ngar er ngii a techelled me a ngerecheled el olecholt el oeak a blakerreng er kid el kmo kede mesiou er a Jehovah e le ngbetik a rengud er ngii​​—el diak dosiou er ngii e le ngmo uchul a klungioled. Kede omes er a omesiunged el ngii a klou el techelled el olecholt er a blakerreng er kid el mo er a Jehovah. Ngdirrek el mengelaod er a rengud sel dodengei el kmo a Jehovah a meskid a klisiched el mo outekangel a ngii di el ongarm el lebechei el kired, el di ua Job.​—1 Korinth 10:13.

Satan​—A Cheraro el Omtok er a Mera el Osisechakl

13. A babier er a Job ngouchais a ngerang el kirel a Satan?

¹³ A Chuodel el Renged a mesaod er a blekerdelel a Satan el omtok er a Jehovah e mengetikaik er a klechad el mo cheroid er Ngii. Ngar er a Beches el Renged, e kede metik a betok el suobel el mesaod er a ultekengel a Satan el mo er a Jehovah, e a ngar er a babier er a Chocholt, e kede mesuub el kmo ngdi kmedung e a Jehovah a mo mesebechakl er a omengederederel e mo okngemedii a Satan. A babier er a Job a menglou er a klemedengei er kid el kirel a ultok er a Satan. A Satan er a bo el teloi er sel kldibel el ngar er a eanged, e  ngdimlak el bong el mo oldanges er a Jehovah. Ngbai mla er ngii a mekngit el moktek er ngii. Me a uriul er a lolekoi a mekngit el kirel a Job e lenguu a kengei el mo mengarm er ngii, “e a Satan a tilobed er medal a [Jehovah].”​—Job 1:12; 2:7.

14. Ngera mle osengel a Satan el bedul a Job?

¹⁴ A babier er a Job a ochotii a Satan el kmo ngii a cherroel a klechad. Sel taem er a delongelel sel kldibel el medung er a Job 1:6 me sel kuk tang el ngar er a Job 2:1, e a Job a mlo chuarm. E a blakerreng er ngii a uchul me a Jehovah a dilu er a Satan el kmo: “E kau a kmal milengeluch er ngak me kkengei er kau me bo moldechelakl er ngii el di diak a uchul, e ngdi Job a dirk blak a rengul el ua ingii er a ngar a mong.” A Satan a dimlak el meterob er a klsuul el ultelecheklel el bedul a Job, e bai mle soal el melemolem el mengarm er ngii. Ngmlengarm er a Job er sera lungilbesul me sera el sal chebulang el dirrek. Tiang a ochotii el kmo a Satan a diak el chebteterir a remechebuul me a remetacherbesrir. Ngkmal ouketui er tirke el blak a rengrir el chad. (Job 2:3-5) Nguaisei, a blakerreng er a Job a ulechotii el kmo a Satan a bulak.

15. Tirke el omtok er a mera el omengull er a chelecha el taem, te olecholt a ngera el blekerdelel a Satan?

¹⁵ A Satan a ngike el kot el blebelel a Dios el mlo omtok er ngii. A rumtok a mera el osisechakl er a chelecha el taem a olecholt er a blekerdelel a Diabelong. Te di omdasu a mekngit el bedul a rebebil el ngar er a ongdibel me a remechuodel el odam el Kristiano me a Chelechad er a Ruungerachel. A rebebil a chetirir el ousbech er a ngklel a Dios el Jehovah. E dirrek el diak el sorir el mesuub el kirel a Jehovah e bo losiou er ngii. Tirkang a di ua demerir el Satan, el sorir el melemall a klaumerang er a reblak a rengrir el chad. (Johanes 8:44) Sei a uchul me a remesiungel a Jehovah a kirir el mo cheroid er tir.​—2 Johanes 10, 11.

A Job a Uleldanges er a Ngklel a Jehovah

16. Ngmle ua ngerang a osengel a Job el bedul a Jehovah?

¹⁶ A Job a uluusbech e dirrek el uleldanges er a ngklel a Jehovah. Sera lrenges a chais el kirel a kodellir a rengelekel e ngdimlak lolekoi a mekngit el kirel a Dios. Ngmle cheleuid el omdasu el kmo a Dios a uchul a kodellir, engdi ngii a di millemolem el oldanges er a ngklel a Jehovah. E a uriul, e ngdilu el kmo: “Omeluu er a [Jehovah] a llomeserreng, ma omekiai a klengit a klemedengei.”​—Job 28:28.

17. Ngerang a ngilsuir a Job el lomelemii a blakerreng er ngii?

¹⁷ Ngera ngilsuir a Job el lomelemii a blakerreng er ngii? A uchei er a bo el charm, e ngmilekurulii a kmes el deluill er ngii el obengkel a Jehovah. Ngdiak a olechotel a kmo ngmle medengelii sel omelsemai er a Satan el omtok er a Jehovah, engdi ngii a millemolem er a blakerreng er ngii. Ngdilu el kmo: “Ng mo lmuut er a kodellek el di kdu el kmo ng diak a telemellek.” (Job 27:5) Ngmilekerang a Job e mekurulii a kmes el deluill el obengkel a Dios? Ngulterekokl el rirenges a omerellel a Dios el mo er a Abraham  me a Isak me a Jakob, el tir a mle chedal er a irechar. E dirrek el sel lomes aike el bleob el meliuekl er ngii, e ngmle sebechel el omtab a betok el blekerdelel a Jehovah.​—Monguiu er a Job 12:7-9, 13, 16.

18. (a) Ngmilekerang a Job er a lochotii a blakerreng er ngii el mo er a Jehovah? (b) Ngoeak a ngera el rolel e kede oltirakl er a kerebil a Job?

¹⁸ Aike el tekoi el lesiluub a Job a rirellii el mo soal el odeuir a rengul a Jehovah. Ngmle mekudem el oldars a tenget, e le ngmle bekikl el kmo a rengelekel alta te remuul a tekoi el dimlak lodeuir a rengul a Dios me a lechub e te “mla mor a klengit el otubii a Dios.” (Job 1:5) Me alta e ngkmal mlo chuarm engdi ngii a di millemolem el melekoi a ungil el tekoi el kirel a Jehovah. (Job 10:12) Ngmera el ungil el kerebai el kired! Kid me ngdirrek el kired el blechoel el melai a melemalt el klemedengei el kirel a Jehovah me a moktek er ngii. Me ngoeak a omesuub me a dengar er a miting me a nglunguuch me a ureor el omerk er a ungil el chais, e ngsebeched el melisiich er a deluill er kid el obengkel a Jehovah. Kede dirrek el oturk a klisiched el ouchais el omeketakl er a ngklel a Jehovah. A blakerreng er a remesiungel a Jehovah er a chelechang a oldeu er a rengul el di ua sel blakerreng er a Job. Tia el tekoi a mo soadel er a ongingil el suobel.

Ke Dirk Melatk?

• Ngera uchul me a Satan el Diabelong a ulemekcharm er a Job?

• Ngera el ongarm a blo lechelebangel er ngii a Job, e ngerang mirruul?

• Ngerang a ngosukid el mo lomelemii a blakerreng er kid, el di ua Job?

• Ngera el tekoi a desuub el kirel a Satan el ngar er a babier er a Job?

[Aike el Ker er a Suobel]

[Siasing er a 10 el llel]

A cheldechedechal a Job a omeklatk er kid er sel klou el omelsemai el kirel a omengederederel a Jehovah er a eanged me a chutem

[Siasing er a 12 el llel]

Ngera el blekeradel a sebechel el melasem er a blakerreng er kau?