“Sel diak le meues el blekerdelel a Dios . . . a domtab el bleketakl meues ra ikel ulebeob.”​—ROM 1:20.

1. Ngerang mla rullii a llomeserreng er a beluulechad el mo er a rebetok el chad er a chelechang?

 A TEKOI el “llomeserreng” a betok a belkul. A rebebil a melekoi el kmo a chad a mellomes a rengul e le ngii el klou a klemedengei er ngii el kirel a betok el tekoi. Engdi tirke el leko te mellomes a rengrir e le te oba llomeserreng er a beluulechad a diak el sebechir el omekrael er a rechad el mo metik er a mera el belkul a klengar. Me tirke el oltirakl er a choua itirkaikid el chad a “oberius el mechetakl ra bek el eltel chosisechakl.”​—Efesus 4:14.

2, 3. (a) Ngera uchul me a Jehovah a “dital mellomes a rengul el Dios”? (b) Ngerang a klekakerous er a llomeserreng el mla er a Dios me a llomeserreng er a beluulechad?

² E ngar er ngii tirke el kuk oba mera el llomeserreng el mla er a Jehovah el Dios el mei. A Biblia a ouchais er kid el kmo a Jehovah a “dital mellomes a rengul el Dios!” (Rom 16:27) Ngmedengei a rokui el tekoi el kirel a eanged me a chutem, el kmo ngerruul er a ngerang me a dirrek el reksi er ngii. Aike el llach el omekerreu a klengar​—el rechad a ousbech el ngar er a omesubir—​a rokui el di lurruul a Jehovah. Sei a uchul me ngdiak el mechas a rengul er aike el klekedall el bla lruul a rechad me a sel leko ngngar er a bab el llomeserreng er tir. “Ele llomeserreng er tial belulechad a klebelung er medal a Dios.”​—1 Korinth 3:19.

³ A Biblia a ouchais el kmo a Jehovah a ‘mesterir [a remesiungel] a llomeserreng.’ (Osisechakl 2:6) A llomeserreng el mla er a Dios a kmal bleketakl el diak el ua llomeserreng er a rechad. Ngosukid el mo ngmai a melemalt el klemedengei me a sekutaberreng me bo el sebeched el ungil el melilt a tekoi. (Monguiu er a Jakobus 3:17.) A apostol el Paulus a kmal mle mechas a rengul er a llomeserreng er a Jehovah. Ngmelluches el kmo: “O, ngmeral dmolech a ilteet ra llomeserreng ma klemedengei ra Dios! A kerrekerilel a diak le mutab ma rolel a diak le motirakl!” (Rom 11:33) A Jehovah a kot el mellomes a rengul a uchul me kede oumerang el kmo a llechul a sebechel el omekrael er kid el mo er a kot el ungil el rolel a klengar. Ngdirrek el medengei aike el dousbech el mo oldeu er a rengud el kuk ngar er a uchei er a ngii di el chad.​—Osisechakl 3:5, 6.

Jesus​—el “Chad er Omelib el Blai”

4. Ngerang a ta er a rolel e ngsebeched el mo medengelii a llomeserreng er a Jehovah?

⁴ A llomeserreng er a Jehovah, el obengkel aike el bebil el ngar er a bab el blekerdelel a mocholt er a blebelel. (Monguiu er a Rom 1:20.) Aike el meklou el blebelel el mo lmuut er aike el mekekerei el blebelel a olecholt er a kakerous el blekerdelel. Kede metik a betok el ocholt el kirel ngike el kot el mellomes a rengul e betik a rengul el Ulemeob sel domes el mo er a bab er a eanged me a lechub e kede omes er a chutem er a eou. Ngsebeched el mesuub a betok el kirel el oeak sel dolebedebek el kirel a blebelel.​—Psalm 19:1; Isaia 40:26.

5, 6. (a) Ngtechang a ulebengkel a Jehovah el omeob a rokui el tekoi? (b) Ngera el tekoi a bo dosaod, e ngera uchul?

⁵ A Jehovah a dimlak el di el ngii el tang er sera lomuchel “el omeob er a beluulchad ma bek el tekoi el ngar a melidiul.” (Genesis 1:1) A Biblia a ouchais er kid el kmo ngmilebii a chad el reng er a uchei er a lomeob er a eanged me a chutem, e uluusbech er ngii el omeob “a rokuil tekoi.”  Ngike el mle chad el reng a ngike el di ta el Ngelekel a Dios​—“e ulemuchel el mechell loeak uchei ra rokuil bleob”—​e a uriul e ngmlei er a chutem el ua chad el Jesus. (Kolose 1:15-17) A Jesus a mellomes a rengul el di ua Jehovah. A Osisechakl er a 8 el bliongel a omekesiu er ngii el ua llomeserreng, e dirrek el omekedong er ngii el “chad er omelib el blai” er a Dios.​—Osisechakl 8:12, 22-31.

⁶ A blebelel a Jehovah a olecholt er a llomeserreng er Ngii me a Jesus, el Ngike el Chad er a Omelib el Blai. Aika el blebelel a meskid a meklou a ultutelel el suobel. Ka me bo dosaod a eua er aika el blebelel el ngar er a Osisechakl 30:24-28 el “kmal imis el mellomes a rengul.” a

Aike el Desuub er a Blekerdelel a Chedib el Meses el Oureor

7, 8. Ngera el tekoi el kirel a chedib a mechas a rengum er ngii?

⁷ Sel dorritel er a teletelel me a urerel a blebelel a Dios el mo lmuut er aike el kmal mekekerei el charm er a beluulchad, e ngsebeched el ngmai a klubeled er ngii. El di ua tiang, ka molatk er a llemesel a rengul a chedib.​—Monguiu er a Osisechakl 30:24, 25.

⁸ Ngar er ngii a diak lemochur a ildisel el chedib el oureor er a bebul me a chelsel a chutem. A rebebil el chad er a omesuub a oumerang el kmo ngar er ngii a bekord el 200,000 a ildisel el chedib el kirel a derta el chad. A delebechel el chedib a ngar er ngii a edei el bedengel: tirke el redil el omechell me a resechal me a tirke el oureor. Aika el chedib a oureor el omekerreu aike el ousbech a delebechel. Ngar er ngii a ta er a bedengel a chedib el ngar er a South America el ngar er ngii a sersel. Ngmelalem e mengoias e olsobel a dellemelel. A remesuub a mla metik er ngii el kmo ngkaikid el chedib a di meruu aike el kall el sebechel a delebechel el mengang e merekong. b

9, 10. Kede mekera doukerebai er a blekerdelel a chedib el meses el oureor?

⁹ Ngsebeched el mesuub a betok el tekoi er a chedib. Me a dosuub a blekerdelel, e kede mo medengei el kmo ngkired el meringel el oureor a lsekum e ngsoad a lebo er ngii a redechel a urered. A Biblia a ouchais er kid el kmo: “A re mesaik el chad a kirir el melai a klubelir er a klengar er a chedib. Ng diak omtebechel er tir, ma ka merreder er tir, ma lechub e le mengeteklir, ngdi te mengudel a kelir er a belsechel a kleald, el mengedmokl el kirel a belsechel a kelekolt.” (Osisechakl 6:6-8) A Jehovah me a Jesus, el Chad er a Omelib el Blai er ngii, a blak a rengrir el oureor. A Jesus a dilu el kmo: “A Demak a uluureor el me lmuut er chelechang, me ngak ma kdirrek loureor.”​—Johanes 5:17.

¹⁰ Kid me ngdirrek el kired el mo blak a rengud el oureor el oltirakl er a Dios me a Kristus. Me a ngii di el ureor me a ngerachel el dobang el ngar er a omesiunged el mo er a Dios, e ngkired el ‘mo blak a rengud ra urerel a Rubak.’ (1 Korinth 15:58) Sei a uchul, me ngkired el oltirakl er  a uleklatk er a Paulus el mo er a Rekristiano el ngar er a Rom el kmo: “Bo le blak a rengmiu el diak bo mesaik, e bo mkard ra klereng, e mosiou ra Rubak.” (Rom 12:11) A urered el meruul a soal a Jehovah a diak lebo lak a belkul, e le Biblia a kmo: “Ele Dios a diak le ngara chelebirukel, me ngdiak lobes a ureriu . . . [me] sel bltikerreng el kirel a ngklel.”​—Hebru 6:10.

Omekerreu er a Deluill er Kid me a Dios

11. Mosaod a bebil er a teletelel a badger.

¹¹ A badger a ta er a kekerei el charm el sebeched el suub a betok el tekoi er ngii. (Monguiu er a Osisechakl 30:26.) Ngkora ua teletelel a klou el usangi engdi ngmekekerei a dingal e mekedeb a ochil. E meruul er a blil er a delongelel a bad. E kmal ungil a osengel me ngsebechel el chemiis el mo er a delul a bad me a chiiechab el omart er ngii er a meklou el charm. Aika el badger a rruul el kirir el dmak el kiei el delebechel el kaukerreu e kakeald er a temel a kelekolt. c

12, 13. Ngera el klubeled a dengai er a badger?

¹² Me ngngera sebeched el suub er a badger? A kot, e momtab el kmo ngika el charm a kerekikl el di mekar me ngdiak lemodechelakl, e ousbech er a ungil el osengel el chemiis er a meklou el charm, e diak lebo el cheroid er a blil. Kid me kede uaisei el kired el kerekikl el di mekar el kirel aike el kdekudel el tekoi el ngar er tia el beluulechad er a Satan. A apostol el Petrus a milengelechel er a Rekristiano el kmo: “Bo mulserechakl e di mekar. E ngikel cherrouiu el diabelong choua choteb el laion el merael el meliuekl losiik ra bo le dekeueklii.” (1 Petrus 5:8) Sera lengar er tia el chutem a Jesus, e ngdi millemolem el mekar el kirel aike el ongarm er a Satan el mo melemall er a blakerreng er Ngii. (Matteus 4:1-11) A Jesus a milecherei a kmal ungil el kerebai el kired el oltirakl er ngii!

¹³ A ta er a rolel e ngsebeched el di mekar a oeak sel dousbech aika el ulekerreu er a klereng el lomeskid a Jehovah. Ngkired el blechoel el menguiu er a Biblia e mo er a bek el miting er a Rekristiano. (Lukas 4:4; Hebru 10:24, 25) Me a lmuut el tang, ngdi ua badger el dmak el kiei el delebechel, me kid a kired el mo olekeed er kid er a rekldemed el Kristiano me ngmo sebeched el “dul kasisiich loeak sel dul kloumera” er kid me tir. (Rom 1:12) Me sel doruul aike el kired el meruul me denguu a ulekerreu er a Jehovah, e kede olecholt el kmo kede kongei er a tekingel a David el ngar er a Psalm el kmo: “A [Jehovah] a risois er ngak, e cheuotelek, e osebelek; ng Dios er ngak, e risois er ngak, el ngii a omertelek.”​—Psalm 18:2.

 Outekangel er a Chelsel a Ultok

14. Me alta e a chimo el chebud a kora ua lak a ultutelel, engdi ngera kede dmung el kirel a klou el delebechel?

¹⁴ Ngsebeched el suub a betok el tekoi er a chebud. A chimo el chebud el eru el iings a klungel, a kora ua lak a ultutelel, engdi a klou el delebechel er a chebud a kdekudel. (Monguiu er a Osisechakl 30:27.) A klou el delebechel er a chebud a sebechel el mereched el kmang a llel me a redechel a dellomel er a temel a omeridm el di mo diak a medechel. A Biblia a omekesiu er a ngerel a klou el delebechel er a chebud el mo er a ngerel a kuruma me a lechub e ngngerel a merat el chudel a le meseseb. (Joel 2:3, 5) A rechad a mlenguml a ngau el omekoad a klou el delebechel er a chebud engdi ngdiak el sebechir el mekoad el rokui. E ngera uchul? E le ngar er a uchei el delebechel er a chebud a chuchebii a ngau el mekodir, e sel delebechel el oeakullir a di melemolem er a omerollel. Me alta ngdiak a king er tir me a lechub a mengeteklir, engdi a klou el delebechel el chebud a di ua blechobech el cheldebechel er a resoldau el kldmokl el mo er a mekemad, el diak a sebechel el torebengii. d​—Joel 2:25.

15, 16. Te mekerang a ruumerk er a klumech er a Renged er a chelechang e mo ua klou el delebechel er a chebud?

¹⁵ A profet el Joel a omekesiu er a urerir a Resioning er a Jehovah el mo er a urerel a chebud. Ngmelluches el kmo: “Ng oldechelakl el ua re chad er a mekemad; ng melemiakl cheuatel el ua re soldau. Ng rokui el di merael el di melemalt el bedul uchei e diak bo le ngodech a lorael el bedul ngii, ma lechub e lolebechakl el mor a rolel a kuk tang. Ng di toruud a cheuatel el diak bo le meterob.”​—Joel 2:7, 8.

¹⁶ Tia el ulaoch a mera el ungil el mesaod er a blekerdelir tirke el omerk er a ungil el chais er a Rengedel a Dios er a chelechang! Ngdiak a “cheuatel” er a ultok el mle sebechel el torbengii a urerir. Te bai oukerebai er a Jesus, el ngii a uluutekangel el meruul a soal a Dios alta rebetok el chad a uleltuub er ngii. (Isaia 53:3) Ngmera el tekoi, a rebebil el Kristiano a mlokoad el kirel a  klaumerang er tir. Nguaisei, engdi a ureor er a berkel a klumech a dirk melemolem, e a ildisir a ruumerk er a klumech er a Renged a di merael el mo betok. Chochoi, a odechelakl a bai mla merkii tia el klumech er a Renged el mo er a rechad el tir a dimlak el sebechir el rongesii. (Rellir 8:1, 4) Ngar er a omesiungem, e kau ke mla ochotii a choua isei el blekerdelel a chebud el outekangel er a chelsel a bleot el reng me a odechelakl?​—Hebru 10:39.

“Bo Bereked er a Ungil”

17. Ngera uchul me a ochil a sechesech a sebechel el bereked er a meiau el klalo?

¹⁷ A kekerei el sechesech a sebechel el omtok er a klisichel a gravity. (Monguiu er a Osisechakl 30:28.) A rehakase a mechas a rengrir er ngika el kekerei el charm el sebechel el melemiakl a kboub e merael er a meaiu el tenzio e diak el rebet el me er iou. Ngmekerang e sebechel el uaisei? Ngdiak el ousbech a uid, e ngbai ngar er ngii a kora kmal mekekerei el chui er a cheldngelel a ochil. E a derta er aika el kora chui a ngar er ngii a betok el telael el klekedall el kora rekodoll el ngar er ngii a kora teletelel a kmal mekekerei el belatong el ngar er a rsel. Ngar er ngii a klisichel aika el klekedall el kora rekodoll el sebechel el oltekau er a berredel ngika el sechesech​—el mo lmuut er sel taem el lemediderurt er a eungel a karas! A remesuub a semeriar er aika el klekedall el ngar er a ochil a sechesech me te melekoi el kmo a lsekum a rechad a sebechir el remuul a klekedall el oltirakl er a teletelel a ochil a sechesech, e ngsebechir el ousbech er ngii el ua mesisiich el uid. e

18. Ngmekerang e mo sebeched el blechoel el “bereked ra ungil”?

¹⁸ Ngera sebeched el suub er a sechesech? A Biblia a melekoi el kmo: “Mouketui a mekngit, e bo bereked ra ungil.” (Rom 12:9) Aike el mekngit el ongetikaik el ngar er ngii er a beluulechad er a Satan a sebechel el rullid el mo cheroid er a omellach er a Dios. El ua tiang, a deblechoel el obengterir tirke el diak loltirakl a llechul a Dios—sel dengar er a skuul me a dengar er a ureor me a lechub e ngoeak a ngii di el tekoi er a ongelaod—​e ngsebechel el tomellii a telbilel a rengud el meruul a llemalt. Me lak becherei tia el tekoi me lduubech el leko er kau! A Tekingel a Dios a omeklatk el kmo: “Lak di le kau el omdasu el kmo ng mellomes a rengum.” (Osisechakl 3:7) Ngbai kirem el oltirakl er sel mellomes el uleklatk el Moses a milsterir a rechad er a Israel er a ngar er a mong el kmo: “Moluu er a [Jehovah] el Dios er kemiu e di le ngii el tang cho mongull el meluluuch er ngii.” (Duteronomi 10:20) Me a bo debereked er a Jehovah, e kede mo oukerebai er a Jesus, el meldung el kirel el kmo: “Kau a mle betik a rengum ra llemalt e ouketui a chelebirukel.”​—Hebru 1:9.

Klubeled el Dengai er a Blebelel a Dios

19. (a) Ngera el blekerdelel a Jehovah a obla mues er aike el blebelel? (b) Ngmekerang e sebeched el ngmai a klungioled er a llomeserreng er a Dios?

¹⁹ Kede mla mesaod el kmo aike el blekerdelel a Jehovah a bleketakl el mocholt er a blebelel, e dirrek el sebeched el ngmai a klubeled er ngii. A bo leblak a rengud el mesuub a urerel a Jehovah, e ngmengal mo mechas a rengud er a llemesel a rengul. A dolemolem el mesuub el kirel a llomeserreng er a Dios, e ngmengal mo dmolech a deurreng er kid er a chelechang e dirrek el omekerreu er kid el kirel a ngar er a medad el klebesei. (Olisechakl 7:12) Chochoi, ngsebechel a derta me a derta er kid el mo melechesuar sel klemerang el tekoi el ngar er a Osisechakl 3:13, 18 el kmo: “Ngeltengat ngikel chad el mo mellomes a rengul, el ngikel nguu a sekutaberreng. Tirkel mo mellomes a rengrir a ngeltengat; a llomeserreng a mesterir a klengar.”

[Aike el footnote]

Ke Dirk Melatk?

Ngera el ungil el suobel a sebeched el suub er a . . .

• chedib?

• badger?

• chebud?

• sechesech?

[Aike el Ker er a Suobel]

[Siasing er a 20 el llel]

Kau ke meses el oureor el ua chedib?

[Siasing er a 21 el llel]

A badger a metik a ulekerreu sel ledak el kiei el delebechel. Kau ke dirrek el uaisei?

[Siasing er a 22 el llel]

A Rekristiano el omerk er a klumech a kirir el outekangel el di ua chebud

[Siasing er a 22 el llel]

A Rekrisitano a kirir el mo bereked er a ungil el tekoi, el di ua sechesech el bereked er a bebul a klalo e diak el rebet

[Credit Line]

Stockbyte/​Getty Images