Exodus 3:1-10

A JEHOVAH a “chedaol, chedaol, chedaol.” (Isaia 6:3) Aika el mlukreng el tekoi a olecholt el kmo a Jehovah el Dios a kot el klikiid e kmal bliochel. Ke locha mo oker el kmo, ‘Tia el blekerdelel a Dios el chedaol ngrullii el mo meringel er kid a mo kmeed er ngii? Ngsebechel a choua ngike el chedaol el Dios el mera el omekerreu er ngak​—el diak kcherrungel el chad?’ Ka me bo dorriter aike el melisiich er kid el tekoi el lullekoi a Dios el mo er a Moses, el debetik er a Exodus 3:1-10.

A ta er a klebesei er a longkar a sib a Moses, e ngmilsa a ngodech el ues​—el ngii a kerrekar “el mla tmaut, e ngdi dimlak le meseseb.” (2 el bades) Ngmle soal el mo medengelii a uchul me tia el tekoi a dilubech, me ngmlo kmeed el mo omes er ngii. Ngoeak a anghel e a Jehovah a dilu er a Moses el kmo: “Lak be mkeed. Mngubet oecherem, ele kau a dechor er a chedaol chutem.” (5 el bades) Ka di molatk er tiang​—a chutem a mlo chedaol e le sel kerrekar el tilaut a ulemekesiu er a chedaol el Dios!

Ngika el chedaol el Dios a mla er ngii a uchul me ngmilengedecheduch er a Moses. A Dios a dilu el kmo: “Ak kmal mla mo ungil meseterir a re chedak el le sal omekcharm er tir el ngar a Ekipten; ak mla remenges a lengelir el olengit a ngesou me te mo mengubet er tirkel ousibai er tir. Choi, ak kmal mla mo ungil medengei a rengelir.” (7 el bades) A Dios a mle medengelii a ringel el lechilebangel er ngii a rechedal e dirrek el rirenges a lengelir. A rengelir a dirrek el mlo rengelel a rengul. Ka momtab a tekingel a Dios el kmo: “Ak kmal mla mo ungil medengei a rengelir.” A ta el babier a mesaod el kirel tiang el kmo: “Aika el tekoi a olecholt a blekeradel el ngii a semeriar er a ta er a chad, e medemedemek, e chubechub.” A tekingel a Jehovah el mo er a Moses a ochotii a delechel a ulekerreuil.

A Dios ngmo mekerang? Ngdimlak el di bo el chubteterir e lemerekong. Ngbai ngar er ngii a lekiltmeklii. Ngmlo soal el olsobel er a rechedal e otobedeterir er a Ekipten el mo er a “kmal ungil chutem el ungil a dellomel er ngii.” (8 el bades) Me seikid e a Jehovah a ulemekngerachel er a Moses el kmo: “[Ke] mo melai er a re chedak . . . el oltobed er tir er a Ekipten.” (10 el bades) Me a Moses a ultutii sel ngerachel e ultebedeterir a rechad er a Israel er a Ekipten er sera 1513 B.C.E.

A Jehovah a dimlak lemengedoch. A remengull er ngii er a chelechang a sebechir el mo ulterekokl a rengrir el kmo ngomes a rengelir e orrenges a lengelir el kirel a ngeso. Ngkmal ungil el medengelii a ringel el lechelebangel er ngii. Engdi a Jehovah a diak di lolechesuar a klechubechub el kirir a reblak a rengrir el mesiungel e lemerekong. Ngii el medemedemek el Dios a soal el ngosuterir e le ng ‘chomekerreu er tir.’​—1 Petrus 5:7.

A klechubechub er a Dios a meskid a kmal ungil el omelatk. Alta e kid a diak demecherrungel, engdi ngoeak a ngelsuil a Dios e ngsebeched el oltirakl a melemalt e klikiid el llechul e mo nguu a kengei er ngii. (1 Petrus 1:​15, 16) A ta el redil el Kristiano el mlo mechitechut a rengul a miltik a ongelaod er tia el cheldechedechal a Moses. Ngmelekoi el kmo: “A lsekum a Jehovah a sebechel el rullii a chutem el mo chedaol, e nglocha ngar er ngii a omelatk el kirek. Tia el tekoi a kmal ngilsukak.”

Kau ngsoam el mesuub a lmuut el betok el kirel a chedaol el Dios, el Jehovah? Ngsebechel el mo er ngii a kmes el deluill er kau el obengkel e le a Jehovah a “medengei el kmo kede rruul er a ngerang; ng melatk el kmo kid a di chebechab.”​—Psalm 103:14.