A chad el omekall er a klou el torak el melai a komi a kmal mle meringel a bekellel me ngriretengii a chad me a bechil me a 23 a rekil el chad el merael er a tkul a rael. A ta el simbung er a beluu er a New York a uluuchais el kmo tirke el obekel a di mlad er isei, e ngike el ngeasek el chad a dimlak lemad engdi ngmlo diak lodengelii a rengul. Sera bo lodengelii a rengul e a kot el uldesuel a kmo: ”Ngdiak el sebechek el oumerang el kmo tia el tekoi a mera el dilubech. Dios, mngesukak el mo outekangel er tia el tekoi.” E dilu el kmo, “Ngdirkak bo el temek el mad.”

KAU a ulterekokl el mla remenges a choua isei el chais. Sel sekum a chad a chelebangel a tekoi el mle sebechel el mo uchul a kodellel engdi ngdimlak lemad, e a rechad a mo melekoi el kirel el kmo, ‘Ngdirkak bo el temel el mad.’ Engdi sel sekum a chad a mad er a bkaischemrungel el rolel, e te mo omdasu el kmo, ‘Ngmla mo temel’ me a lechub e te kmo, ‘Ngmle soal a Dios.’ Me alta e a chad a omdasu el kmo a tekoi a dilubech e le ngmlo kirel me a lechub e ngkuk mle temel me a lechub e ngmle soal a Dios, engdi a uldesuir a di osisiu. E le a rebetok el chad a oumerang el kmo a tekoi el mo duubech er a klengar a di mla moterekokl er a uchei me ngdiak a ngera el sebechir el remuul el mo ngodechii. Engdi a rechad a diak di lomdasu el uaisei el kirel a bkaischemrungel el tekoi me a kodall e lemerekong. Tia el uldasu a di mla er ngii er a irechar el mei.

El di ua tiang, a rechad er a Babilon er a irechar a uluumerang el kmo a omerolel a btuch el ngar er a eanged a ngar er ngii a lerellii el kirel a tekoi el duubech er a klengar er a rechad. Me seikid e te ulemes er a eanged el kirel a olangch me a kmu ngerang el mo omekrael er a ngar er a mederir el klebesei. A Rechigrik me a rechad er a Rom a milengull a betok el chelid el dil el mla er ngii a klisichir el olterekokl el kmo a rechad a mo ungil me a lechub e ngmo mekngit a ngar er a mederir el klebesei. E a lebebil er a taem, e tia el klisichir tirke el chelid el dil a sebechel el lmuut el mo mesisiich er a ngar er a bab el chelid er a belurir, el Zeus me a Jupiter.

Ngar er aike el beluu er a Ongos, e a rechad er a klechelid er a Hindu me a Buddha a oumerang el kmo aike el lechelebangel a chad er a chelechang a mo er ngii e le ngomerellel er a kuk ta er a klengar er ngii a uchul. Te dirrek el oumerang el kmo aike el omerellel er a chelecha el klengar a mo olterekokl er aike el bo lechelebangel er sel ongingil el klengar er ngii. A kuk bebil er a klechelid​—el uldimukl er ngii  a betok el eklesia er a Klekristiano—​a dirrek el kongei er aike el klaumerang el kmo a tekoi el duubech er a klengar er a chad a di mla moterekokl er a uchei.

Me alta e kede kiei er a taem el rechad a leko te oumerang er a tekoi e le ngii el ngar er ngii a meues el olechotel, engdi a rebetok el chad a dirk oumerang el kmo a blekerdelel a klengar er tir er a bek el sils, me a tekoi el mo duubech el mo er tir, a di mla moterekokl er a uchei e diak a ngera el sebechir el meruul el mo ngodechii. Kau nguaisei a uldesuem el kirel a klengar? A tekoi el mo duubech er a klengar, a lungil me a lechub e lemekngit​—el mo lmuut er a cheroll me a kodall—​ngmera el mloterekokl er a uchei? Me a klengar er kau ngdirrek el uaisei? Ka me bo domes el kmo ngmekerang a Biblia e sebechel el ngosukid el onger aika el ker.

[Credit Line]

Ken Murray/​New York Daily News