“Ar anghel el rokui ngdiak el tirikel mesiou el reng el mlodurch el mo mesiou el kirir tirikel chad el kirir el mo mediukes er cholsobel?”​—HEBRU 1:14.

1. Ngera el omelisiich a dengai er a Matteus 18:10 me a Hebru 1:14?

 A JESUS KRISTUS a ulemeklatk er a ngii di el chad el melibas er a rultirakl er ngii el kmo: “Bo le blak a rengmiu me lak le ings a medemiu era ta er tirikal mekekerei; ak dmu er kemiu el kmo, ar anghel er tir a ngara eanged el diblechoel lomes ra medal a Demak el ngara eanged.” (Matteus 18:10) Me a losaod el kirir a reblak a rengrir el anghel, e a apostol el Paulus a milluches el kmo: “Ar anghel el rokui ngdiak el tirikel mesiou el reng el mlodurch el mo mesiou el kirir tirikel chad el kirir el mo mediukes er cholsobel?” (Hebru 1:14) Aika el tekoi a oterekeklii el kmo a Dios a ousbech er a rechanghel el olengeseu er a rechad. Ngerang kmung a Biblia el kirir a rechanghel? Ngmekerang a lolengeseu er kid? Ngsebeched el mesuub a ngerang er tir?

2, 3. Ngerang a bebil el urerir a rechanghel?

² Ngar er ngii a betok el milliol el blak a rengrir el anghel el ngar er a eanged. Ng ‘klou a klisichir el anghel, el olengesenges a tekingel’ a Dios. (Psalm 103:20; monguiu er a Chocholt 5:11.) Tirka el reng el ngelekel a Dios a kakerous a blekerdelir e oltirakl a blekerdelel a Dios e mimokl el melilt a tekoi el bo loruul. Ngar er ngii a blechebechel a ngar er a bab el deruchellir er a medal a Dios, el omuchel er a Mihael (el ngklel a Jesus er a eanged) el ngike el bderir a rechanghel. (Daniel 10:13; Judas 9) Ngika el “ulemuchel el mechell loeak uchei ra rokuil bleob” a “Tekoi” me a lechub e Ngmelekingel a Dios, el luluusbech er ngii a Jehovah el meruul a rokui el tekoi.​—Kolose 1:15-17; Johanes 1:1-3.

³ A reserafim el ngar er a eungel ngike el bderir a rechanghel, a omerk er a cheledolel a Jehovah e olengeseu er a rechad el mo kiei el oltirakl er a llechul a Dios. Ngdirrek el ngar er ngii a rekerubim, el tir a mesiou el melisiich er a omengederederel a Dios. (Genesis 3:24; Isaia 6:1-3, 6, 7) A rekuk bebil el anghel, me a lechub a ruderuchel, a ngar er ngii a betok el urerir el oltaut a soal a rengul a Dios.​—Hebru 12:22, 23.

4. Ngera mle uldesuir a rechanghel er a lobeob tia el chutem, e ngera mlo rsel omko Adam me a Eba a uluusbech er a ilmeklir el melilt a tekoi el ngar er a melemalt el rolel?

⁴ A rokui el anghel a uleldeu a rengrir er sera lobeob a beluulechad e mirruul a urerir er a  lobeob tia el chutem el mo delengcheklir a rechad. (Job 38:4, 7) A Jehovah a milebii a chad el ‘ngar er a eou er a rechanghel’ el ‘ua teletelel,’ el olecholt a blekerdelel. (Hebru 2:7; Genesis 1:26) Omko a Adam me a Eba a uluusbech er a ilmeklir er a melemalt el rolel, e tir me a ruldidellel a rsechir a mle sebechir el oldeu a rengrir er a klengar el ngar er a paradis el chutem el chedal a telungalek er a Jehovah.

5, 6. Ngera el ultok a dilubech er a eanged, e ngerang merruul a Dios?

⁵ Ngulterekokl a rechanghel el mlo mechas a rengrir er a lesa uchelel a ultok el dubechang er a telungalek er a Dios el ngar er a eanged. A ta er tir a dimlekea el soal el oldanges er a Jehovah e bai mlo soal a omengull a lebo er ngii. Ngmlo Satan (el belkul a kmo “Ngike el Omtok”) er sera lolasem er a llemeltel a Jehovah el mengedereder e mlo omuchel er a kuk ta er a omengedereder. A Satan er a lomulak, e ngmle sebechel el mengetikaik er tirke el teru el obekel el mo obengkel el omtok er a Omebelir.​—Genesis 3:4, 5; Johanes 8:44.

⁶ A Jehovah a di mle mereched el oukerrekeriil er a Satan er a ledelii tia el kot el ulaoch er a Biblia el kmo: “E kau ma redil a mo kauketui, ma ruldidellel a rsechem ma ruldidellel a rsechel a redil a di mo blechoel el kaucherarou. E a uldidellel a rsechel a mo rukemii a bdelum e kau a mo mengchii a kotel ochil.” (Genesis 3:15) Tia el klauketui er a delongelel a Satan me a “redil” er a Dios a mo melemolem el kemanget el taem. Nguaisei, a Jehovah a ulemes er a reblak a rengrir el anghel el cheldebechelel el ngar er a eanged el ua betik a rengul el bechil. Tia el ulaoch a mle uchul a ungil el omelatk, alta e a komakai el omesodel a mle ‘berrotel’ e mo bleketakl er a cherengel a taem. Ngmle moktek er a Dios el ta er tirke el ngar er a cheldebechelel el ngar er a eanged a mo okngemedeterir a rokui el omtok e a “bek el tekoi ra eanged ma chutem [a] mo tang el ngara Kristus.”​—Efesus 1:8-10.

7. Ngera te mirruul a rebebil el anghel er a taem er a Noah, e ngera dilubech el mo er tir?

⁷ Ngar er a taem er a Noah, e a rebebil el anghel a “chiloit a delengcheklir” e rirelleterir el mo ua rechad me bo el sebechir el oltaut a ngelbesel a rengrir el ngar er tia el chutem. (Judas 6; Genesis 6:1-4) A Jehovah a mildeklterir er a chelsel a ilkolk, me te mlo obengkel a Satan el “mekngit el reng” el oucheraro er a rechedal a Dios.​—Efesus 6:11-13; 2 Petrus 2:4.

Ngmekerang a Rechanghel a Lolengeseu er Kid?

8, 9. Ngmekerang a Jehovah a lousbech er a rechanghel el olengeseu er a rechad?

⁸ A Abraham me a Jakob me a Moses me a Josua me a Isaia me a Daniel me a Jesus me a Petrus me a Johanes me a Paulus a bebil er tirke el chad el ngilai a ngeso er a rechanghel. A remelemalt el anghel a uleltaut er a kerrekerilel a Dios e uluuchais a ulochel me a ulekrael er ngii, el uldimukl er a Llach er a Moses. (2 King 19:35; Daniel 10:5, 11, 14; Rellir 7:53; Chocholt 1:1) Chelechang e kede oba cherrungel el Tekingel a Dios, me a Dios a dikea loldurech er a rechanghel el ouchais er kid a tekingel. (2 Timoteus 3:16, 17) Me alta e ngdiak el sebeched el mesterir a rechanghel, engdi te blak a rengrir el oltaut er a soal a rengul a Dios e olengeseu er a remesiungel.

⁹ A Biblia a kmo: “A anghel er ngii a mengkar er tirkel meluu er a RUBAK e sobecheklterir er a kdekudel.” (Psalm 34:7; 91:11) A Satan a melasem er a blakerreng er a rechad sel lengar er a chelsel a ringel a uchul me a Jehovah a milecherei me ngomekcharm er kid. (Lukas 21:16-19) Nguaisei, engdi a Dios a medengelii sel telkael el olechotel a blakerreng er kid el mo er ngii. (Monguiu er a 1 Korinth 10:13.) A rechanghel a kltmokl el mo olengeseu el oltirakl er a soal a rengul a Dios. Te ulsebelii a Sadrak me a Mesak me a Abednego me a Daniel me a Petrus, engdi te milecherei a Stefanus me a Jakobus me te mlad er a chimorir a recheraro. (Daniel 3:17, 18, 28; 6:22; Rellir 7:59, 60; 12:1-3, 7, 11) Ngmle kakerous a blekeradel me a omelsemai er aike el tekoi el dilubech. Me nguaisei, a rebebil er a rudam er kid el ngar er aike el blil a kelebus er a Renazi a mlokoad, engdi a Jehovah a ngilsuterir a rebetok me te silobel.

10. Ngera el ngeso a sebeched el ngmai, el obengkel a ngeso er a rechanghel?

¹⁰ A Bades a diak lolisechakl el kmo a derta el  chad el ngar er tia el chutem a ngar er ngii a anghel el mengkar er ngii. Sel doluluuch e kede oumerang el kmo “a dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid.” (1 Johanes 5:14) Nguaisei, a Jehovah a sebechel el oderechii a anghel el me ngosukid, engdi ngdirrek el sebechel a ngeso el mei el ngar er a kuk ta er a rolel. A rekldemed el Kristiano a sebechir el ngosukid e mengelaod er kid. A Dios a sebechel el meskid a llomeserreng me a klisiich el mo outekangel a “toched” el ringel el omekcharm er kid el ua longelebed er kid a “chodruchel ra Satan.”​—2 Korinth 12:7-10; 1 Thesalonika 5:14.

Moltirakl er a Jesus

11. Te milekerang a rechanghel er a lengesuir a Jesus, e a blakerreng er ngii el mo er a Dios ngulechotii a ngerang?

¹¹ Molatk er sel rolel a Jehovah a lousbech er a rechanghel el olengeseu er a Jesus. Te milsubed el kirel a cherellel me a okisel e ngilsuir er sera lengar er a chutem. Ngmle sebechir el ngodechii a blekeradel me lak lemudechem e lemad. Engdi a anghel a bai mlodurech el mo melisiich er ngii. (Matteus 28:5, 6; Lukas 2:8-11; 22:43) Ngoltirakl er a moktek er a Jehovah, e a Jesus a tilengetengii a klengar er ngii el ochotii el kmo a cherrungel el chad a sebechel el melemolem er a blakerreng er ngii el mo er a Dios er a chelsel a meringel el odechelakl. A Jehovah a ulekisii a Jesus er a kodall e milsa diak el ngemed el klengar el ngar er a eanged, me a “rokuil klisichel chomerreder” me a rechanghel a mlo chederdall er ngii. (Matteus 28:18; Rellir 2:32; 1 Petrus 3:22) A Jesus a ulechotii el kmo ngii a ngike el ngar er a uchei el “uldidellel a rsechel a redil” er a Dios.​—Genesis 3:15; Galatia 3:16.

12. Ngoeak a ngera el rolel e kede oltirakl er a kerebil a Jesus?

¹² A Jesus a mle medengei el kmo ngdiak el kirel el melasem er a Jehovah e lomdasu el kmo a lsekum e ngmeruul a kdekudel el tekoi e a rechanghel a mo osebelii. (Monguiu er a Matteus 4:​5-7.) Misei e me bo doltirakl er a kerebil a Jesus el mo “ulserechakl a rengud,” e lak doruul a tekoi el mo uchul a telemelled, e bai doutekangel a ngii di el odechelakl el me er kid.​—Titus 2:12.

Aike el Sebeched el Suub er a Reblak a Rengrir el Anghel

13. Ngera sebeched el suub er a kerebai er a remelemalt el anghel el ngar er a 2 Petrus 2:9-11?

¹³ Me sera lollach er tirke el “di olab a rengrir loltuub” er a rengellitel er a Jehovah, e a apostol el Petrus a melutk el mo er a ungil el kerebai er a remelemalt el anghel. A rechanghel alta e ngngar er ngii a klou el klisichir, engdi te olecholt a klengareourreng el diak el oukerrekeriil “er tir er medal a Rubak.” (Monguiu er a 2 Petrus 2:9-11.) Me ngdiak el kired el oukerrekeriil er a rebebil, e le kede mengull er tirke el olab a ngerachel er a ongdibel, e mechei a rokui el tekoi me ngngar er a chimal a Jehovah, el Ngar er a Bab el Chad er a Kerrekeriil.​—Rom 12:18, 19; Hebru 13:17.

14. Ngera sebeched el suub er a rechanghel el kirel a klengareourreng?

¹⁴ A rechanghel er a Jehovah a meskid a ungil el kerebai el kirel a klengareourreng. A rebebil er tir a dimlak el sorir el ouchais a ngklir el mo er a rechad. (Genesis 32:29; Mengeteklel 13:17, 18)  Ngar er ngii a rebetok el milliol el anghel el ngar er a eanged, e a Biblia a di olecholt er a ngklel a Mihael me a Gabriel. Tiang a omekerreu er kid me ngdiak bo dongull er a rechanghel. (Lukas 1:26; Chocholt 12:7) A apostol el Johanes er a bo lterrob el mengull er a anghel, e ngdilu er ngii el kmo: “Lak moruul chouaisel tekoi! Ngak a di ua ikau mar udam er kau.” (Chocholt 22:8, 9) A omengull er kid me a nglunguched a kirel el di mo er a Dios e merekong.​—Monguiu er a Matteus 4:8-10.

15. Ngera sebeched el suub er a rechanghel el kirel a kllouerreng?

¹⁵ A rechanghel a dirrek el mecherei a ungil el kerebai el kirel a kllouerreng. Te uaisei el kmal sorir el mo medengei aike el chedaol el bertelel a Dios, engdi ngdiak a klemedengei er tir er ngii el rokui. A Biblia a kmo: “Mar anghel me te blak a rengrir el sorir el mesang.” (1 Petrus 1:12) Me te mekerang? Te oba kllouerreng el mengiil el mo er sel blsechel a Dios el “bo lodenge bek el blekeradel el llomeserreng ra Dios loeak a eklesia.”​—Efesus 3:10, 11.

16. A omerelled ngerang rullii el kirir a rechanghel?

¹⁶ A Rekristiano el chormang er a ringel a ‘mla mo osongel er a rechanghel.’ (1 Korinth 4:9) A rechanghel a kmal dmeu a rengrir sel lesekid el olecholt a blakerreng er a omerelled, e dirrek el oldeu a rengrir a lobult a ta el mekngit el chad. (Lukas 15:10) A rechanghel a omes er a ungil el omerellir a redil el Kristiano. A Biblia a olecholt el kmo “a redil a kirel melekedek ra bdelul [el] cholengchelel a klisiich, el kirir ar anghel.” (1 Korinth 11:3, 10) Nguaisei, a rechanghel a dmeu a rengrir el mesterir a redil el Kristiano me a rokui el mesiungel a Dios el ngar er tia el chutem el oltirakl a omengederederel a Dios me a rolel a dereder. A choua isel blekongesenges a ungil el uleklatk el mo er tirka el ngelekel a Dios el ngar er a eanged.

A Rechanghel a Olengeseu er a Ureor er a Berkel a Klumech

17, 18. Ngera uchul me ngsebeched el melekoi el kmo a rechanghel a olengeseu er a urered er a berkel a klumech?

¹⁷ A rechanghel a teloi er a bebil el meklou el tekoi el dilubech er a “klsel a Rubak.” E aikang a uldimukl er a uchelel a omengederederel a Renged er a 1914 me a sel taem el “Mihael mar anghel er ngii” er a lodikii a Satan me a remengelengalek el reng er a eanged. (Chocholt 1:10; 11:15; 12:5-9) A apostol el Johanes a milsa “kuk  tara anghel el suebek ra milidiul, el oba diak a ullebengelel evangkelio el kirel omerk er ngii el mor tirikel kiei ra belulechad.” Me ngike el anghel a dilu el kmo: “Bo medakd ra Dios e bsa klebkall, e ngmocha blsechel a loukerrekeriil; e mongull el meluluuch er ngikel rirellii a eanged ma chutem, ma daob ma uchul a ralm.” (Chocholt 14:6, 7) Me nguaisei a rechanghel a olengeseu er a remesiungel a Jehovah sel lomerk er a ungil el chais er a mla medalem el Renged me a dirrek el sel taem el ngar er ngii a ultok er a Diabelong.​—Chocholt 12:13, 17.

¹⁸ Chelecha el sils, e a rechanghel a omekrael er kid el mo er a remelemalt a rengrir el chad, engdi diak el ua isel lurruul er ngii el mo er a Filipus el dilu er ngii me lebo lesa chad er a Ethiopia. (Rellir 8:26-29) Me alta e ngdiak desterir a rechanghel, engdi a betok el ocholt a omeketakl el kmo te olengeseu er a ureor er a berkel a klumech, e omekrael er kid el mo er “tirikel rokui el mlo kirir el mo nguu a diak a ullebengelel klengar.” a (Rellir 13:48) Ngkmal klou a ultutelel a deblechoel el teloi er a ureor er a berkel a klumech me bo el sebeched el osiik er tirke el sorir el “meluluuch ra Chedam el meluluuch loba reng ma klemerang.”​—Johanes 4:23, 24.

19, 20. Ngerang a urerir a rechanghel el omeketakl er a “ullebongel ra belulechad”?

¹⁹ A Jesus a melutk el kirel a taem er kid er a ledu el kmo: “A ullebongel ra belulechad me ngmo uaisei, el le mei ar anghel el mo meleakl rar mekngit erar melemalt.” (Matteus 13:37-43, 49) A rechanghel a teloi er a ulebongel el ureor el mengideb er a rengellitel e melecha olangch er tir. (Monguiu er a Matteus 24:31; Chocholt 7:1-3) Me a lmuut el tang, a rechanghel a mo obengkel a Jesus el “lomii a sib ma kaming.”​—Matteus 25:31-33, 46.

²⁰ “Sel le ngara eanged a Rubak el me duum el ngara kerdel a ngau, el cheltekill rar ngarngii a klisichir el anghel, isei e a Rubak a mo melaitechei er tirikel diak lomtab ra Dios, mar diak lolengesenges ra evangkelio ra Rubak er kid el Jesus.” (2 Thesalonika 1:6-10) A Johanes er a lesa seikid el osisiu el ues, e ngmilsaod el kirel a Jesus me a rechanghel er ngii el ngar er a becheleleu el uos el mo oumekemad el kirel a llemalt.​—Chocholt 19:11-14.

21. Ngerang a bo loruul er ngii ngike el anghel el “oba kiis era diak a btil deliobech, ma kloul mbombatel” el mo er Satan me a remengelengalek el reng?

²¹ A Johanes a dirrek el ‘ulemes ra tal anghel e ngmetengel ra eanged, el oba kiis era diak a btil deliobech, ma kloul mbombatel.’ E ngikang a Mihael, el bderir a rechanghel, el mo rongedii a Diabelong e mideklii​—ngii me a remengelengalek el reng—​el mo er a diak a btil el deliobech. Te mo mengubet el di tedeb el taem sel bo el merek aike el Ta el Telael el Rak er a Omengederederel a Kristus el kirel sel ulebongel el skeng el mo er a cherrungel el klechad. Uriul er isei, e a Satan me a tirke el rokui el obengkel el omtok a mo nguemed. (Chocholt 20:1-3, 7-10; 1 Johanes 3:8) E a rokui el ultok el mo er a Dios a mo diak.

22. Ngerang a bo loruul er ngii a rechanghel er a ngar er a medad el klebesei, e ngera osenged el kirir?

²² Ngdi kmedung e kede mo mengubet er tia el mekngit el blekeradel er a Satan. A rechanghel a mo er ngii a klou el urerir el mesebechakl er a  omengederederel a Jehovah e churrengelii a moktek er ngii el kirel tia el chutem me a klechad. A remelemalt el anghel a uaisei el mera el “reng el mlodurch el mo mesiou el kirir tirikel chad el kirir el mo mediukes er cholsobel.” Me a leuaisei, e me dolecholt a omereng el saul er kid el mo er a Jehovah el Dios el ngii a oldurech er a rechanghel er ngii el me ngosukid el oltaut er a soal a rengul e mo nguu a diak a ulebengelel el klengar.

[Aike el footnote]

Ngmekerang a Omonger?

• Ngmekerang a lomii a urerir a rechanghel?

• Ngera te mirruul er ngii a rebebil el anghel er a taem er a Noah?

• Ngmekerang a Dios a lousbech er a rechanghel el olengeseu er kid?

• Ngerang a urerir a remelemalt el anghel er a chelecha el taem er kid?

[Aike el Ker er a Suobel]

[Siasing er a 21 el llel]

A rechanghel a oldeu a rengrir el oltaut a soal a rengul a Dios

[Siasing er a 23 el llel]

A rechanghel a kltmokl el mo olengeseu el oltirakl er a soal a rengul a Dios, el di ua sel taem er a Daniel

[Siasing er a 24 el llel]

Bo bekeu, e le a rechanghel a olengeseu er a ureor er a berkel a klumech er a Renged!

[Credit Line]

Globe: NASA siasing