NGAR er sel ulebongel el kesus er a klengar er ngii, e a Jesus a dilu er a reblak a rengrir el apostol er ngii el kmo: “A beches el llach a kbeskemiu el kmo, bo mkaubltikerreng; el kaubltikerreng el ua ngak el betik a renguk er kemiu. Cho bo mkaubltikerreng, e te mo medengelkemiu a rokuil chad el kmo kom Obengkek.” (Johanes 13:34, 35) Me nguaisei, a remera el Kristiano a kirir el mo kaubltikerreng.

Me a Paulus a milluches el ileakl el mo er a rebechiil el sechal el tir a oukerebai er a Kristus el kmo: “Kemiul sechal, bo le betik a rengmiu rar bechemiu, el ua Kristus el mlo betik a rengul ra eklesia, me ngdi mle ngii lodersii el kirel.” (Efesus 5:25) Ngmekerang a bechiil el sechal el Kristiano a loltaut er tia el uleklatk er a chelsel a chebechiielel, el ileakl a lsekum a bechil a dirrek el mesiungel a Jehovah?

A Kristus a Omecheliu er a Ongdibel

A Biblia a kmo: “Me dilerrek ar sechal el mo betik a rengrir rar becherir el ua le betik a rengrir ra bedengir. E ngikel betik a rengul ra bechil a betik a rengul ra di ngii. Le ngdiak a chad louketui ra di bedengel, te bai omekeroul e omecheliu, el uaia Kristus el uaisei ra eklesia.” (Efesus 5:28, 29) A Jesus a kmal mle betik a rengul er a redisaiplo er ngii e ulemecheliu er tir. Alta e te dimlak el mecherrungel, engdi ngii a kmal mle betik a rengul er tir. Ngmle urungulel el soal a redisaiplo er ngii a bo “ldechor el ngar medal el klebokel,” e mle blechoel el omes aike el ungil el blekerdelir.​—Efesus 5:27.

A bechiil el sechal a kmal kirel el olecholt er a bltkil a rengul el mo er a bechil el oeak a tekingel me a omerellel el ua Kristus el ullecholt er a bltkil a rengul el mo er a ongdibel er ngii. A bechiil el redil el melechesuar a bltkil a rengul a bechil a blechoel el dmeu a rengul. Ngar er a kuk bitang, e a bechiil el redil el ngar er ngii a rokui er ngii a sebechel el mo diak el deu a rengul a lsekum a bechil a blechoel el mengemikr er ngii.

Ngmekerang a bechiil el sechal a lochotii a bltkil a rengul el mo er a bechil? Ngar er a delongelir a rechad, e ngblechoel el chemat er ngii e melisiich er ngii er aike el loruul. A lsekum a bechil el redil a rirellii a klou el tekoi el kirel a telungalek er tir, e ngsebechel el ouchais er a rebebil el kirel. E sel di el tir el terung, e ngsebechel a bechil el redil el melechesuar a bltkil a rengul. Sel lorekedii a chimal e lochulii e lechat er ngii e alta e aikang a kmal mekekerei el tekoi, engdi ngkmal odeuir a rengul a bechil el redil.

Ng “Diak Le Merur Lomekedong er Tir el Kmo Chodam”

A Kristus Jesus a dimlak “le merur lomekedong er [a rengellitel el uleltirakl er ngii] el kmo chodam.” (Hebru 2:11, 12, 17) A lsekum e kau a bechiil el Kristiano, e lak mobes el kmo a bechim a dirrek el odos er kau el Kristiano. A telbilel el mo er a Jehovah a kuk ngar er a uchei er a telbilel er a chebechiil, el diak el ultuil er a kmo ngmiltecholb er a uchei me a lechub e nguriul er a bo el bechim. Sel momekedong er ngii el mo onger er a miting, e ngkirem el oleker er ngii el “Sister.” Ngii a odos er kau el diak di el sel omngar er a Kingdom Hall e lemerekong, e ngdirrek el sel omngar er a blimiu. Ngkmal klou a ultutelel el molecholt a ungil el omeruul me a omelengmes el mo er ngii sel omngar er a blai el di ua sel omngar er a Kingdom Hall.

A lsekum e ngar er ngii a lmuut el bebil er a ngerechelem er a ongdibel, e ngsebechel el mo uchul e ngmo diak el tabesul a ngerechelem er a ongdibel me a chelsel a telungalek. Me a ungil el klaingeseu er a delongelir a remechuodel me a reministerial servant a sebechel el meskau a techellem  el mo ngosuir ngike el odos el ousbech a ngeso er kau​—el ngii a bechim. Lak mobes, a rebetok el odam a sebechir el kutmokl a ngerachel el kau a miltutk el mo meruul, engdi sel ngerechelem el mo er a bechim a di kau a kutmeklii.

Me nguaisei, e kau a bdelul a bechim. A Biblia a kmo: “A bderrir ar bek el sechal a Kristus, ma bdelul a redil a sechal.” (1 Korinth 11:3) Ke mekerang a omoltaut er tia el ngerechelem el bdelul a delengchokl? Ngkirel el okiu a bltikerreng, el diak el oeak sel di momelekl er a bades el dirk meldung, e di mongerechir er a omengull er a bechim. Sel kot el rolel e ke mo ungil el oltaut er a deruchellem el mo er a bechim a mo oukerebai er a omerellel a Jesus Kristus.​—1 Petrus 2:21.

“Kom Sechelik”

A Jesus a ulemekedong er a redisaiplo er ngii el sechelil. Ngdilu er tir el kmo: “Chelechal mor medad e ngdikea kuleker er kemiu el kmo mesiou, ele mesiou a diak lodenge loruul a rubak er ngii; kemiu a kuleker er kemiu el kmo sechelik, ele kmla ocholt er kemiu a ikel rokui el bla krenges ra Demak.” (Johanes 15:14, 15) A Jesus me a redisaiplo er ngii a mla er ngii a ungil el rolel a cheldecheduch er a delongelir, e dirrek el dilak el meruul a tekoi. “Ma Jesus mar Ubengkel” a mlokedong el mo er a merengel a chebechiil er a Kana. (Johanes 2:2) Ngmla er ngii a ileakl el basio er tir, el ua sers er a Gethsemane. A Biblia a melekoi el kmo a “Jesus mar Ubengkel a mle mekudem el mo kldibel er ngii.”​—Johanes 18:2.

A bechiil el redil a ousbech el mo melechesuar el kmo ngike el kot el kmeed el sechelil a bechil. Ngkmal klou a ultutelel el kemiu el bechiil el sechal me a rebechemiu a dmak el kiei el dmeu a rengmiu, e dmak el mesiou er a Dios! Moldeu a rengmiu el dmak el mesuub er a Biblia, e mdak el terung el merael e mchachedecheduch e momengur. Mrellii a chebechiieliu el lmuut el mo mekreos el ua reteru el chad el kmal ungil el sechelei.

“Ngmle Betik a Rengul er Tir el Mora Ullebongel”

A Jesus a ‘mle betik a rengul er a redisaiplo er ngii el mora ullebongel.’ (Johanes 13:1) A rebebil el bechiil el sechal a mo diak el oltirakl er a Kristus el kirel tia el tekoi. Te mo mengoit er a ‘rebecherir er a le ngeasek,’ e mo becherir a remekekerei el redil.​—Malakai 2:14, 15.

A rekuk bebil el ua Willi a oukerebai er a Kristus. A bechil a Willi a mle smecher a uchul me ngmle kirel el ousbech a ileakl el ulekerreu el betok el rak. Ngmle ua ngerang a uldesuel a Willi el kirel tia el tekoi? Ngdilu el kmo: “Ak blechoel el omes er a bechik el sengk el mla er a Dios el me er ngak. E dirrek el 60 el rak er a  uchei, e ak tilbir el mo omekerreu er ngii er a ungil el taem me a mekngit el taem me ngkmal diak el sebechek el obes er tia el telbilek.”

Kemiu el bechiil el sechal el Kristiano, moukerebai er a bltkil a rengul a Kristus. Momecheliu er a remeluu er a Dios el bechemiu​—el tir a odos er kemiu e sechelimiu.

[Siasing er a 19 el llel]

A bechim ngkot el kmeed el sechelim?

[Siasing er a 19 el llel]

Molemolem el oubltikerreng el mo er a bechim