“Kau el kekere kloumera er kau, ngera me ngouesarech a rengum?”​—Matteus 14:31.

NGERANG A CHETITUOKL EL TEKOI? A redisaiplo er a Jesus a dirrek el uluumededenger a lebebil er a taem. (Matteus 14:30; Lukas 24:36-39; Johanes 20:24, 25) E a Biblia a mesaod er a diak lultebechel el klaumerang el ua “klengit el omereked er ngii er kid.” (Hebru 12:1) A apostol el Paulus a milluches el kmo: “Ngdiak le rokuil chad a ngar ngii a kloumera er tir.” (2 Thesalonika 3:2) Me alta e a rebetok a sebechir el olecholt er tia el ungil el blekeradel, engdi ngdiak lolasem el meruul er ngii. E a Dios a mo omekngeltengat er tirke el melasem el olecholt er a klaumerang er tir.

KE MEKERANG E SMODII SEL CHETITUOKL EL TEKOI? Bo modengei aike el tekoi el sebechel el mekedbechii a rraurreng er kau. El ua tiang, a disaiplo el Thomas a uluumededenger el kmo a Jesus a mla mekiis er a kodall, el mo lmuut er sel taem er a lolekoi  a redisaiplo el kmo te mla mesang. A Thomas a mle soal a bleketakl el olechotel. Me ngera mlo rsel? A Jesus a ulechotii a bleketakl el olechotel me bo lsebechel a Thomas el mo mesisiich a klaumerang er ngii.​—Johanes 20:24-29.

Ngoeak a Biblia, e a Jehovah el Dios a meskid a nger el dousbech el melisiich er a klaumerang er kid. El ua tiang, a rebetok el chad a oriid a klaumerang er tir er a Dios e le te oltelechakl el kmo Ngii a uchul a mekemad me a uldikel me a chelebuul er a klechad. Ngerang dmung a Biblia el kirel tia el tekoi?

A Dios a diak longedereder el okiu a kabelment er a klechad. A Jesus a millekoi el kirel ngike el diak lemeues el Satan el kmo ng “merreder er tial belulechad.” (Johanes 14:30) A Satan a ullecholt er a Jesus a rokui el dereder er tia el beluulechad e le ngmle soal a bo lterrob e longull er ngii me ngdilu el kmo: “Ak mo meskau a klisichel chomerreder era ika el rokui ma klebkellel; le ngmla moterekokl er ngak, ma kmsa ngikel soak.” A Jesus a dimlak lomtok er sel klisichel a omerrederel a Satan, ngbai dilu el kmo: “Ngellechukl el kmo, ‘Bo mongull el meluluuch ra Rubak el Dios er kau, e di le ngii cho mosiou er ngii.’” (Lukas 4:5-8) Me ngbleketakl el Satan me a rokui el kabelment er a klechad a uchul a chelebuul er tia el beluulechad, el diak el Dios.​—Chocholt 12:9, 12.

Ngdi kmedung e a Jehovah el Dios a mo choroid a rokui el tekoi el uchul a ringel. Ngmla oterekeklii a Rengedel me a lechub e ngkabelment er Ngii er a Ngelekel el Jesus Kristus, me Jesus a mo mengedereder er a beluulechad. (Matteus 6:9, 10; 1 Korinth 15:20-28) A bo lemutaut a ulaoch er a Biblia, e a ungil el chais er a Renged a oberkang er a beluulechad el rokir. (Matteus 24:14) Ngdi telkib kung, e tia el Renged a mo okngemedeterir tirke el omtok er ngii e mo choroid a rokui el ringel er a klechad.​—Daniel 2:44; Matteus 25:31-33, 46; Chocholt 21:3, 4.

NGERA KEDE NGUU ER NGII? Tirke el oumededenger a tekoi a ua chedesaoch “el oberius el mechetakl ra bek el eltel chosisechakl el duubech ra cheleblad rar chad.” (Efesus 4:14; 2 Petrus 2:1) Engdi tirke el mla mo oumerang a sebechir el “misisiich el dechor ra kloumerang.”​—1 Korinth 16:13.

A Resioning er a Jehovah, el tir a milluches er tia el babier, a kmal sorir el ngosukau el mo metik a nger er aike el ker el ngii a melasem er a klaumerang er kau. Te outkeu er kau el me teloi er tir e di kau el merriter aike el tekoi el lolisechakl. A omkengei el meruul er tiang e ngulterekokl el mo smisichii a klaumerang er kau er a Dios.

A lsoam a lmuut el omesodel, e momes er a 8 el bliongel el dai er ngii a kmo “Ngerang a Rengedel a Dios?” me a dirrek el 11 el bliongel el “Ngera Uchul me a Dios a Omechei a Ringel?” el ngar er a babier el What Does the Bible Really Teach? a (Ngerang a Mera el Osisecheklel a Biblia?)

[Footnote]

[Siasing er a 9 el llel]

Tirke el mla mo oumerang a sebechir el mesisiich el dechor er a klaumerang