KAU ke mekerang a omosaod er a tekoi el klaumerang? A rebebil a omekesiu er ngii el ua meiko el klaumerang. A chad er a omeluches el chad er a Merikel el H. L. Mencken a ngklel, a millekoi el kirel a klaumerang el kmo “ngtekoi el diak el sebechel el meketmokl me a lechub e ngmo duubech.”

Engdi a Biblia a mesaod el kmo a klaumerang a diak lemeiko me a ka leberrous el tekoi. A Tekingel a Dios a kmo: “A kloumerang a sel bo dulterekokl oumera ikel tekoi el dolatk, e mo ulterekokl medenge ikel tekoi el diak le meues.”​—Hebru 11:1.

Ngkakerous el uldesuir a rechad el kirel a klaumerang a uchul me ngungil a bo dosaod a nger er aika el ker:

• Ngerang a klekakerous er a belkul a klaumerang el ngar er a Biblia me a omesodir a rechad?

• Ngera uchul me ngklou a ultutelel el dokurulii sel klaumerang el losaod er ngii a Biblia?

• Ke mekerang e smisichii a klaumerang er kau?

A Babilengel Ngike el Ouklalo me a Olechotel

Sel taem er a omelechesel a babier er a Hebru er a Biblia, e a tekoi er a Grik el mloiuid el “ulterekokl oumera” a ble leblechoel el ousbech er ngii. Ngmle usbechall el kirel aike el babier el olterekokl a kloklir a rederta el chad. Sei a uchul me a ta el babier a melekoi el kmo a Hebru 11:1 a sebechel el moiuid el kmo: “A klaumerang a babilengel ngike el ouklalo el oterekeklii a uldesuel el kmo ngmo nguu a kloklel.”

Ngsebechem el lochotii tiaikid el klaumerang sel mocherar a kloklem er a ungil a chisel el kombalii e mongiil er tir el nguu el mei. Sel receipt el mobang a meskau a ungil el uchul e ke oumerang er sel kombalii el mulecherar a kloklem er ngii. Me ngulterekokl a rengum el kmo ke mo nguu a kloklem. A lsekum e ke oridii a receipt er kau, e ke mla oridii a babier el olechotel a kmo ke ouklalo er a klalo. Me ngdi osisiu, tirke el oumerang el kmo a Dios a ulterekokl el mo oltaut a telbilel a mo ngmai a omeksullir. Engdi tirke el diak a klaumerang er tir, me a lechub e te mla oridii, a diak el rredemelel a mo ngmai a klengeltengat er aike el telbilel a Dios.​—Jakobus 1:5-8.

A Bades er a Hebru 11:1 el mloiuid el “ulterekokl medenge” a meskid a olechotel el kuk ngodech er sel uldesued el kmo ngmera el tekoi. El ua tiang, sel domes er a sils e ngua lolidiich el meliuekl er a beluulechad​—el ngmasech er a ongos e mo ngmelt er a ngebard. Engdi a bleketakl el olechotel el oeak a ochur me a omesubel a btuch a meketeklii el kmo a beluulechad a diak di lechimo el klekedall el ngar er a chelsel tia el solar system. Sel bo modengelii tia el tekoi e mkengei el kmo ngmera el tekoi, e a klaumerang er kau a dikea el meiko, e ngbai meskau a techellem el mo medengei e oumerang a tekoi el ngii a klemerang, el diak di loeak a osenged er a tekoi.

Ngua Ngerang a Ultutelel a Mesisiich el Klaumerang?

Tiaikid a klaumerang el lolisiich er ngii a Biblia​—ngmesisiich el klaumerang el bleketakl a olechotel, el sebechel el ngodechii a klaumerang er kid. Choua itia el klaumerang a kmal klou a ultutelel. A apostol el Paulus a milluches el kmo: “Ma lak a kloumerang e ngdiak el sebechel mo dmeu a rengul a Dios, ele tirikel sorir lolekeed er tir er ngii a diak le iit loumera el kmo ngngarngii a Dios, e dirrek loumera el kmo tirikel osiik er ngii a le besterir chomeksulir.”​—Hebru 11:6.

Ngkmal betok a tekoi el sebechel el tomellii a klaumerang er kau sel molasem el omekeroul er ngii, engdi a lsekum e ke mo oltaut aike el eua el tekoi el ngar er a ongingil el llel tia el babier, e ke ulterekokl el mo sebechem el mekurulii a klaumerang er kau.