“Ngar er ngii a techelled el melilt: Mchitii a omelim e bo mungil, me a lechub e molemolem el melim e mad.”​—A chad el chilitii a omelim el rrom.

KA MOLATK er tiang, oleko ke mekar er a ta el kesus e a blim a mla tmaut a ngau er ngii. Telkib er a uriul e te merema rechad el mekodir a seseb. Omomdasu e ngsebechem el di merael el mo tmuu er a blim el di ua lak a ngerang? Ngkmal diak. Tia el blai a mla metemall me ngkirem el rullii er a uchei er a obo mkiei er ngii.

A osisiu el tekoi a lechelebangel er ngii a chad el smecher er a omelim el rrom sel lomuchel el omekungil er ngii. A klengar er ngii a mla metemall er a arukor el betok el rak, e chelechang e ngdikea lolim a rrom. A “ngau” a mla mad, engdi a klou el omelodech el kirel a blekerdelel a klengar me a omerellel a chad a klou a ultutelel a lsekum e ngika el smecher a diak lolim a rrom. Aika el tekoi a sebechel el ngosuir a smecher el melemolem el diak lolim a rrom.

1. Bo Modengelii a Cheraro

A Biblia a kmo a ngibes er a tech a “oumekemad ra reng er kemiu.” (1 Petrus 2:11) A tekoi er a Grik el “oumekemad” a belkul a kmo klou el tellemall el klaumekemad a uchul.​—Momekesiu er a Rom 7:23-25.

A ungil el soldau a mengoit er a klou el taem el mesuub a blekerdelel a cherroel, me nguaisei a chad el smecher er a omelim el rrom a kirel el mo medengelii sel rolel a arukor a lolemall er ngii me a telungalek er ngii.​—Hebru 5:14.

2. Mngedechii a Omelmim me a Uldesuem

A ta el toktang a kmo: “A dechitii a omelim el rrom e ngkired el choitii a butiliang me a tolechoi.” A belkul a tekingel a kmo ngdiak di dechitii a omelim e lemerekong, ngkired el ngodechii a uldesued me a blekerdeled.

A Biblia a omeklatk el kmo: “E bai mngedechemiu loeak a ukbechesul a reng er kemiu.” (Rom 12:2) El “medebedii el choitii ngikel mechut el chad ma chomerellel.” (Kolose 3:9) A lsekum a omerellel a mengodech engdi a uldesuel a diak lemengodech, e ngika el smecher a sebechel el lmuut el mo mekngit a blekerdelel e lmuut el mo imis el melim a rrom.

3. Mongedecheduch er a Chad el Moumerang er Ngii

A osisechakl er a Biblia a kmo: “Ngikel diak le ungil el obengterir a rechad a melatk er a di ngii; a ikel lodengei a re bek el chad el kmo ng ungil a di mekngit er ngii.” (Osisechakl 18:1) Me alta e ngdikea lolim a rrom, engdi ngdirk sebechel el lmuut el mechetakl el mo melim a rrom. Misei a uchul e ngkmal ousbech er a chad el sebechel el mengedecheduch er ngii e olengeseu er ngii. Ngkmal ungil a lsekum a chad el olengeseu a dirrek  el mla mo chobengelii tia el osisiu el omeruul e mla mo mesisiich. (Momekesiu er a Osisechakl 27:17.) Ngika el olengeseu a kirel lolecholt a omengull el kirel a klaumerang er ngika el smecher e kirel kongei el chemoit a temel me bo lsebechel el ngosuir.​—Osisechakl 17:17.

4. Moba Kllourreng

Ngika el smecher a ousbech er a klou el taem el mo ungil er a secherel e lmuut el meleketek er a klengar er ngii. Ngulterekokl el mo betok a mondai er a udoud me a ureor me a dirrek el chelsel a delengcheklel. Me a bo lungil er tia el secherel e ngdiak lebelkul a kmo ngmla mo diak a mondai er ngii. A lsekum a sebekreng a kmal mo klou e ngika el smecher a kmal kirel el melatk er sel ongelaod el ngar er a Psalm el kmo: “Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.”​—Psalm 55:22.

5. Bo Mosiik er a Rungil el Sechelei

Ngika el smecher a kirel el di ngii el oker el kmo: ‘A resechelik te melisiich er ngak me ngdiak kulim a rrom me a lechub e te blechoel el mesaod a “temel a deurreng er a mla me mong” el meruul er ngak el mo omdasu el kmo ngngar er ngii a olengesonges er ngak?’ A Osisechakl 18:24 a kmo: “Ngar ngii a re sechelid el diak le meral sechelid, e ngdi mor ngii a sechelid el kuk mo kmeed er kid er a ta er kid.” Ngkirel el mo ungil el medengelterir a rungil el sechelil me tirke el kuk sebechir el melemall er ngii.

6. Lak Momdasu el Kmo Ke Mla Mo Ungil

A chad el smecher sel ledu el kmo, “Ak mla mo ungil me ngdikea el soak el melim a rrom!” e ngua di lengii el chemat er ngii me ngomes er tia el secherel el ua lekekerei el tekoi. Tia el deuil a rengul a di tedeb. A babier el Willpower’s Not Enough (Ngdiak el Sebechel el Di Klisiich e Lungiang) a kmo: “A lsekum e ngdiak bo letabesul a rokui el tekoi, e ngsebechem el ruebet el mo meringel el metemall.”​—Momekesiu er a Osisechakl 16:18.

7. Bo Mkerekikl Aike el Tekoi el Mo Uchul a Secher

Te betok el chad a choitii a omelim el rrom, engdi te kuk mo imis el omengur me a lechub e te kmal mo mechesang el di oureor me a lechub e te mo oubakutsi, me a lmuut el bebil. Ngera kngtil tiang? A ta el smecher er a omelim el rrom a sebechel el melekoi el kmo: ‘Engdi ngak tiang el dikea kulim a rrom.’ Nguaisei, el ungil a lsekum a chad a mo mechesang er a bebil el tekoi, engdi a ngii di el kar me a lechub a ureor el mengesang er a uldesuel a sebechel el msang a di tedeb el ongelaod e merekong.

8. Bo Moltirakl er a Beches el Teletelel a Delengchokl

Sel lorael el mo ungil a rokui el tekoi, e a rebetok el smecher er a omelim el rrom a sebechir el lmuut el mo melim a rrom! E ngera uchul? E le tia el omeruul a ua lebeches el tekoi el lolasem er ngii me nguchul e ngblechoel el melechesuar el soal el lmuut el mo melim a rrom. Ma lmuut el tang, ngika el smecher sel bo lak lolim e ngsebechel el ngodechii a blekerdelel a delengcheklel. Me a leuaisei, e a derta el chad er a telungalek a kirir el melodech a blekerdelir. A babier el Recovery for the Whole Family (A Ngeldechel a Telungalek el Rokir) a mesaod el kmo: “A rokui el blekeradel er a delengchokl a kirel el mengodech e toketekii a beches el blekeradel er a delengchokl.” Tia uchul me a rechedal a telungalek a kirir el mo kaingeseu me bo lemesisiich ngika el smecher.​−Momekesiu er a 1 Korinth 12:26.

9. Bo Mkerekikl Me Lak Mluut el Mo Melim a Rrom

A uldasu el kmo kede ungiang me a mekngit el klausechelei me a usbechel a klalo el sebechel el mo uchul a secher me a doleakl er kid er a rechad, a sebechel el mo uchul e kede lmuut el mo melim a rrom. Me ngungil sel bo deblechoel el ouchais aike el ngar er a rengud el mo er a sechelid el doumerang er ngii.

A ta el chad el dikea lolim a rrom a kmo: “A rokui el smecher er a omelim el rrom a choitii a omelim el rrom. A rebebil a ngeltengat el mla choitii a omelim el rrom e dirk kiei.”

[Baks er a 30 el llel]

A lsekum e Ngmo Kirem el Ousbech a Kar

A ngii di el kar el ngar er ngii a arukor er ngii a sebechel el mo uchul e a chad el smecher er a omelim a lmuut el mo melim a rrom. A chad el smecher er a omelim el rrom a mechitechut er a ngii di el omechiuaiu el kar. Me a lsekum e ngkmal kirel el ousbech a kar e ngungil a . . .

1. bo longedecheduch er a toktang el kirel a telemellel a kar.

2. bo louchais er a sechelil er a uchei er a lolai er a kar.

3. bo loluches a ildisel a kar el lolai.

4. bo lak lolai a kar er sel kot el rechedel el mo ungil.

5. bo lechoit aike el mlo medechel el derengel a kar.