NGAR er aika el mereko el betok el dart el rak el mei er a chelechang, e a Biblia a mla rulleterir a rebetok el kakerous el bliongel er a rechad el mo melodech a rolel a klengar er tir el mo ungil. A Biblia a oureor el ngar tiaikid el rolel e le llomes el ngar er ngii a mla er a Dios el mei. Me alta e te chad a melluches er ngii, engdi Biblia a ouchais er kid a uldesuel a Dios. A Biblia a mesaod el kmo: “[A re]chad a lulengedereder er tir a Chedaol Reng, me tuleak a Dios el mengedecheduch.”​—2 Petrus 1:21.

Me a Biblia a meskid a kmal loureor el ulekrael el kesengil e ngngar er a teblo el rolel. A kot, e ngmeskid a melemalt el osenged er a kmo ngerang a mo uchul a ungil el rolel a klengar. Ongerung, ngar er ngii a klisichel el rulleterir a rechad el mo meruul a omelodech el ousbech er a klengar er tir me bo el uchul e bo lungil a klengar er tir. Me ka me bo dosaod aika el eru el tekoi.

Klemedengei el kirel a Turrekong el Sebechel el Meketmokl

Ngar er a Biblia, e a Dios a iaksok er kid er tia el tekoi el kmo: “Ak mo osisecheklau er a rael el kirem el merael er ngii; ak mo osisecheklau e meskau a ngesou er a ungil uldasu.” (Psalm 32:8) Ka mesa el kmo a Dios a diak el di el beskid a ulekrael e ngdirrek el mo meskid a klemedengei, el ngii a duch el mo omes a chelsel a tekoi el mo medengelii a mera el blekerdelel. A doba klemedengei el mo omes el kmo ngera el turrekong a mera el meklou a ultutelel e ngsebechel el omekerreu er kid el mo diak dongoit a temed el oltoir a diak a ultutelel el tekoi er a klengar.

El di ua tiang, te betok el chad a remuul a ngar er a bab el klengar me a kerruul me ngturrekong er a klengar er tir. Ngbetok a babier el kirel a le di el kid el olengeseu er kid el kuk mo ungil er a rebebil er a rolel a ngeiul a chetengakl me a lechub e kede mo merau. Engdi a Biblia a ouchais er kid el kmo: “[A] chelechingil er a chad el ngar bita er ngii . . . [a] diak a ultutelel e ua doltoir er a eolt.” “Ngikel soal a udoud a diak bo lungil a rengul er a udoud.” (Olisechakl 4:4; 5:10) A choua aika el ulekrael ngoureor el kired er a chelecha el sils?

A bo dolecholt el kmo ngua ngerang a klungiolel a ulekrael el mla er a Biblia, e ka me bo domes er a blekerdelel a klengar er a Akinori er a Siabal. A Akinori a mlo mesisiich er a meringel el klaiuechit el kirel a klengarbab me ngtilobed er a ta er a ngar er a bab el daingak e miltik er a urerel er a merael a chisel el kombalii. A rokui el tekoi a kora kmal mle ungil el merael el kirel. Engdi aikang a dimlak el bo el uchul a deurreng el lullatk er ngii er a klengar. Ngbai mlo uchul a sulel a bedengel me a secherel. A resechelil er a ureor a dimlak el sebechir el mengelaod er ngii. Berredel a uldesuel a uchul e ngmlo chad er a omelim e dirrek el mellasem el melai er a klengar er ngii. A uriul e ngmlo omuchel el mesuub a Biblia el obengterir a Resioning er a Jehovah. A tekoi el lulsuub a ngildechii a osengel er a kmo ngerang a klou a ultutelel er a klengar. Ngdi mle mereched, e a secherel a bedengel, el stress a uchul a mlo diak. Me ngdikea el lorrurt er ngii a kldidairreng me a skel a klengarbab el tekoi, e le Akinori a mlo melechesuar er a tekoi el lolekoi er ngii a Biblia el kmo: “A chelellakl el uldasu a diak losecherii a bedenged.”​—Osisechakl 14:30.

 Me ngera omomes er ngii el kot el oureor el turrekong er a klengar? Ngera el tekoi a omrellii e ngmera el mo dmeu a rengum? Ngsebechem el kmo ngsel lungil a chebechiielem? Me a lechub e ngsel momuchel a ungil el klengar er a rengelekem? Adang sel lebetok a resechelim? Me a lechub e ngsel lengar er ngii a deurreng er a klengar er kau? Aika el rokui el kmal di ungil el turrekong. Me alta e ngdiak el aike el ngar er a bab el moktek er a klengar, engdi a Biblia a dirrek el melisiich er kid el mo meruul ngii el tekoi. Me ngoeak a klemedengei, e a Biblia a mekrolid el mo omes a rolel a klengar el mera el ngar er ngii a deurreng er ngii sel ledu el kmo: “Moluu er a Dios e moltaut a llechul; tiaikid ia ngerechelel a chad.” (Olisechakl 12:13) Sel bo lak doltirakl er tia el ngerachel, e a tekoi el doruul a mo diak a moktek er ngii e mo omekseselkreng e melemall a rengud. Engdi a Biblia a olterekokl a rengud el kmo: “Moumerang el ulsirs er a Rubak me bo le ungil a rengum.”​—Osisechakl 16:20.

Ngmekerang a Biblia a Lerelleterir a Rechad el Mo Melodech er a Klengar er Tir

A apostol el Paulus a milluches el kmo: “Ele tikingel a Dios a dingar e ngarngii a klisichel.” Me ngdi uai a kedorm el erebita medal el saider, e ngsebechel el merus el ngmoech el mo er aike el dmolech el uldesuel a chad me a omelebedebekel. (Hebru 4:12) A Biblia a ngar er ngii a klisichel el ngmodech a klengar er a rechad me ngsebechel el ngosuterir el mera el di tir el mesterir el kmo te ua ngera el chad. Me tirke el mera el melemalt a rengrir a sebechir el mo melechesuar el kmo te mera el ousbech a omelodech. El di ua tiang, a Paulus a melluches el kirir a remla er a ongdibel er a Rekristiano er a beluu er a Korinth er a irechar el mle merechorech me a recheltelaol er a rrom me a remla er a laokreng el kmo: “Ngarngii ra chelsiu ar uleuaisei. Ngdi kemiu a mla mengatech . . . luleak . . . a [r]eng ra Dios er kid.” (1 Korinth 6:9-11) A chedaol el reng er a Jehovah a dirk uaisei el mesisiich el oureor er a chelecha el sils, e sebechel el rullii a chad el mo meruul a omelodech el ousbech er a klengar er ngii.

A Mario, el kiliei er a Europe, a mle sekokoad el chad el meloko e olterau a marijuana. Ngmla er ngii a ta el taem e a rebulis er a bo lengai aika el mekngit el kar el lullab, e ngkmal ngilasech a rengul me nguldelecheklii a bulis e tomellii a mlil. A Mario a dirrek el dimlak a urerel e kmal mle betok a blsel. Ngmle medengei el kmo ngdimlak el sebechel el di ngii el sumechokl a mondai er ngii a uchul e ngkilengei el mo mesuub a Biblia. Me a lolengeriakl er a omesubel, e a Mario a ngilodech a blekerdelel e mlo diak lousbech me a ka lolterau a mekngit el kar e dirrek el mlo diak loldechelakl. A rechad el mle medengelii er a uchei a kmal mlo mechas a rengrir er ngii. Me sel lesang e te stob er ngii e oker er ngii el kmo: “Mario, ngmera el dimlak dengchau!”

Me ngngera rulleterir a rechad el ua Akinori me a Mario el mo melodech a blekerdelir e metik a mera el deurreng er a klengar? Ngbleketakl el kmo, ngsel beches el klemedengei er a Dios el lebiltik er ngii el oeak a omesubir er a Biblia. Ngdi ta el Dios a sebechel el meskid a ulekrael el dousbech el mo ungil a klengar er kid er a chelechang e mo oba omelatk er a diak a ulebengelel el klengar er a ngar er a medad el klebesei. Me ngdi uai a Chedam, e a Jehovah el Dios a mengedecheduch er kid el okiu a Biblia el kmo: “Mrengesak e rungalek, mngai a ikal tekingek me bo le kemanget a klengar er kau. . . . Ng diak a ngerang el mo melenget er a rolem a cho morael er a llomeserreng, ma cho mrurt e ng diak bo mesibas. Di blechoel el melatk a cho bla msuub. A ikel bla msuub a klengar er kau me bo mkerekikl er ngii.” (Osisechakl 4:10-13) Me ngngera el ulekrael a kuk lmuut el ungil e oureor el kired el uai aika el ulekrael el mla er a Ulemeob er kid el mei?

 [Baks er a 6 el llel]

Meklou a Ultutelel el Ulekrael el kirel Chelecha el Sils

A Biblia a meskid a meklou a ultutelel el omellach el sebechel el omekrael a klengar er kid er a chelecha el taem. Aikaikid a bebil er a olechotel:

• Doldeu a rengud er a ungil el deluill er kid me a rebebil

“Misei e a ikel ngiidi le ngerang el somiu a lruul ar chad lekor kemiu, dilerrek el moruul el uaisei el morar chad.”​—Matteus 7:12.

“E ngikel kot el ngariou ra delongeliu el rokui, ingii a klou.”​—Lukas 9:48.

“E bo le blak a rengmiu lometechakl rar merael.”​—Rom 12:13.

• Mo mesisiich er aike el mekngit el blekerdeled

“Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.”​—Osisechakl 13:20.

“Lak mobengterir a re chad el sekengim er a mesisiich el ilumel.”​—Osisechakl 23:20.

“Lak mousechelei er a chad el bekongesengasech a rengul.”​—Osisechakl 22:24.

• Mteketekii a mesisiich el chebechiil

“Kemiul sechal, bo le betik a rengmiu rar bechemiu el ua le betik a rengmiu ra di kemiu, me kemiul redil, bo mongull rar bechemiu.”​—Efesus 5:33.

“Moubail ra reng ra klechubechub, ma blekokuii, ma klengariou, ma delemedemek, ma kllourreng, bo mkaberekakl a chetimiu rar chad, ma le ngarngii a klaotutakl ra delongeliu e mkausubes.”​—Kolose 3:12, 13.

• Mngesuterir a rengalek

“Molisechakl er a ngalek er sel meral rolel a klengar e ng mo melatk er ngii er a klteketel a klengar er ngii.”​—Osisechakl 22:6.

“Me kemiul chedam, lak molengasech a rengrir ar ngelekiu, e momekeroul er tir er chomengedung ma chomellach ra Rubak.”​—Efesus 6:4.

• Mongeroid er kau er a klautoketok

“A medemedemek el nger a cholleklii a ngasechereng, e ngdi medecherecher el nger a olengasechereng.”​—Osisechakl 15:1.

“Bo mkaidesachel el kakull.”​—Rom 12:10.

A rekausechelei el chad el dmak el meruul a siobai a sebechir el okebai a mondai a lsekum e te meluches a contract er a delongelir. Sei a uchul me a mesiungel a Dios el Jeremia a milluches el kmo: “Ak mle saing e loiang a olengchelek er a telbiil, e ngilititerir a re mo sioning, e mlo dobodeb a udoud er olebedabel.” ​—Jeremia 32:10.

• Domekeroul er a ungil el osenged er a tekoi

“Bo msichedekl a ikal tekoi ra rengmiu, el rokui el klemerang, . . . ma rokui el kirel morngii a bltikerreng, ma rokui el ngarngii a chetengel, ma ngiidi le ngeral klungiaol, ma rokui el odengesall.”​—Filipi 4:8.

A Biblia a diak lolisiich er kid el mo omdasu a mekngit e dirrek el omtok er tirke el “mengeremrum” el kirel a klengar er tir. Ngbai melekoi el kmo: “Bo moba chomelatk e ldeu a rengmiu.”​—Judas 4, 16; Rom 12:12.

A doltirakl aika el ungil el omellach e ngngosukid el mo oldeu a rengud er a budech me a deurreng er a chelechang e dirrek el ngosukid el mo oltaut aike el soal a Dios a doruul e mo ngmai a klengeltengat er ngii. A Biblia a kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29.

[Siasing er a 5 el llel]

A Akinori er a longereker (katur) me ngii me a bechil el dmeu a rengrir el olisechakl er a rechad a klemerang er a Biblia er a chelecha el sils