A MERINGEL EL ULDASU EL UCHUL A KLENGITERRENG, a doltirakl er a report er a World Health Organization, e ngmelekoi el kmo ngsecher el bek el rak e te bekord ngar er a 120 el milliol el chad er a beluulechad el rokir a mo smecher er ngii. Bek el rak, e a ta el milliol el chad a di tir el ngmai a klengar er tir, e a delongelel a 10 el mo er a 20 el milliol a melasem el melai a klengar er tir. Me ngngera el ngeso a ngar er ngii el kirir a rechad el chuarm er a meringel el uldasu el uchul a klengiterreng? A ukeruul a locha sebechel el oridii a ringel me a ngeso er a uldasu a klou a ultutelel. Ngdirrek, a rebebil el melechesuar a choua aika el uldasu a mla metik el kmo ngsebechir el mongeseu el oeak aike el babier el loltobed a Resioning er a Jehovah el olengeseu el mesaod a Biblia, el di ua lolekoi tia el ongingil el babier el mla er a France el mei.

“Ngdiak el sal meketeket, e ngmlo diak kisa ungil el uchul e ak melemolem el ngar. Me ak milluluuch el mo er a Dios me lebechikak me ak mad. Ak melechesuar er ngak el ua ble kulekoad er a chelsek. Me ak mle meringel el meluluuch el olengit a ulekrael er a Jehovah.

“Ak dirrek el mlerriter a suobel el mla er a Watchtower me a Awake!, e kmal mlo mechas a renguk er a tekoi el kbiltik! Ngmla mo betok er a 15 el rak el kblechoel el menguiu aika el babier, engdi ngdimlak kulechesuar el kmo ngua ngera el omelisiich a mle sebechek el ngmai er ngii. Ngmui er a omesodel a bltikerreng, el ngii a blekeradel el kmal kesiokel er a chelecha el sils. Ak miltik aike el rokui el kuluusbech er ngii.”

A Biblia a melekoi el kmo: “A RUBAK a kmeed er tirkel chelam a rengrir; ng olsobel er tirkel di dikea omeltkir.” (Psalm 34:18) Me ngulterekokl, tirke el rokui el “chelam a rengrir” e “dikea omeltkir” a sebechir el mo metik a omelisiich me a omelatk el kirel a ngar er a medad er a chelsel a Biblia. A Resioning er a Jehovah a merous aika el babier el mesaod a suobel er a Biblia el mo olengeseu er tirke el ousbech me bo el sebechir el ngmai a klungiolir er a ongelaod el mla er a Dios el mei.