“Kristus . . . a milechere kerebai el momakes loltirakl a ultil chochil.”​—1 PETRUS 2:21.

1. (a) Ngera mle ngerechelel a ngelekel a Dios er a ureor er a omebelel a bek el tekoi? (b) Ngua ngerang a uldesuel a Jesus el kirir a rechad?

 A DIOS er a lomeob er a eanged me a chutem, e a kot el ngelekel el sechal a mla er a bita er ngii el “ua chad er omelib el blai.” Ngii el ngelekel a Dios a uluureor el obengkel a Demal er sel taem er a Jehovah er a lolib a teletelel e lomeob aika el betok el kakerous el bedengel a charm me a dellomel el ngar tia el beluulechad me a dirrek el sera longetmokl er a Paradis el ngii a mlo delengcheklir a rechad el tir a ulebeob el okesiul a Jehovah. Ngii el ngelekel a Dios, el uriul e ngmlo okedongall el Jesus, a kmal mle betik a rengul er a rechad me ngmle ‘ungil a rengul er a beluulchad e obotech a rengul er a re chad el ngar ngii.’​—Osisechakl 8:27-31; Genesis 1:26, 27.

2. (a) Ngmekerang a Jehovah e milsterir a rediak el mecherrungel el chad aike el ousbech? (b) Ngerang a ta er a telengtengil a klengar el Biblia a meskid a ulekrael el kirel?

² Uriul er a lrebet er a klengit tirke el kot el obekel, e a ngbetel a kngtil a klechad a mlo klou el tedebechel a moktek er a Jehovah. A Jehovah a kiltmeklii a rolel a olubet el oeak a tengetengel a Kristus. (Rom 5:8) A Jehovah a dirrek el meskid a Tekingel el Biblia, el mo omekrael er a rechad er a ungil el rolel e te outekangel e mesmechokl a tekoi el duubech el diak el cherrungel el klechad er tir a uchul. (Psalm 119:105) Ngar er a Tekingel, e a Jehovah a mesterir a rechad a ulekrael el mo sebechir el lomolem a mesisiich e ngar er ngii a deurreng er ngii el telungalek. Me ngngar er a babier er a Genesis e ngmelekoi el kirel a chebechiil el kmo a sechal a kirel “mecherei a demal ma delal e mo obengkel a bechil, me bo letal chelechad.”​—Genesis 2:24.

3. (a) Ngera ngullisechakl a Jesus el kirel a chebechiil? (b) Ngera kede mo mesaod el ngar er a chelsel tia el suobel?

³ Me ngar er a omesiungel er tia el beluulechad, e a Jesus a millisiich el kmo a chebechiil a kirel el ngar er ngii el kemanget el taem, me ngullisechakl a omellach e lemotirakl e ngsebechel el ngosuterir a rechedal a telungalek el mo olechib er tir er a uldasu me a blekeradel el ngii a sebechel el tomellii a deurreng er a telungalek er tir. (Matteus 5:27-37; 7:12) Tia el suobel a mo mesaod a bebil el osisecheklel a Jesus el kirel a klengar er a telungalek. Ka me bo domes el kmo ngmekerang a kerebil a Jesus a lengesuir a bechiil el sechal me a bechiil el redil me a rechedam me a rechedil me a rengalek el mo kiei el dmeu a rengrir.

Ngmekerang a Bechiil el Sechal el Kristiano a Lekebkellii a Bechil el Redil

4. Ngerang a osisiu el tekoi el meues er a delongelel a ngerechelel a Jesus me a ngerechelir a Rekristiano el bechiil el sechal?

⁴ A Dios a tiltkii a bechiil el sechal el mo bdelul a telungalek el di ua Jesus el Bdelul a ongdibel. A apostol el Paulus a dilu el kmo: “Ma sechal a bdelul a  bechil, el ua Kristus el bdelul a eklesia, el di ngii el Osobelel a bedengel, el eklesia. Kemiul sechal, bo le betik a rengmiu rar bechemiu, el ua Kristus el mlo betik a rengul ra eklesia, me ngdi mle ngii lodersii el kirel.” (Efesus 5:23, 25) Me ngmera el tekoi el omerellel a Jesus el mo er a rulebengkel a kiltmeklii a kerebai el kirir a Rekristiano el sechal el mo oltirakl er ngii er a omerellir el mo er a rebecherir. Me bo domes a bebil er a rolel e a Jesus a ullecholt er a klisichel a dereder el lebilsang a Dios.

5. Ngmilekerang a Jesus e olecholt er a klisichel a dereder el lulebang er bebrir a redisaiplo er ngii?

⁵ A Jesus a mle ‘medemedemek e ngariou a rengul.’ (Matteus 11:29) Ngdirrek el mle chad er a omeruul. Ngdimlak el ta el lechoit a ngerechelel. (Markus 6:34; Johanes 2:14-17) Nguleak a blekokuii e ulemesterir a omellach a redisaiplo er ngii el mo lmuut er aike el taem el mle kirel el betok el lomelekl a tekingel. (Matteus 20:21-28; Markus 9:33-37; Lukas 22:24-27) Me nguaisei, engdi a Jesus a dimlak el lorrirem a rengrir me a lechub e lomekrur er tir, ngdirrek el dimlak el relleterir el mo melatk el kmo ngdiak el betik a rengul er tir me a lechub e ngkmal diak a rolel el sebechir el suub aike el tekoi el lolisechakl er tir. Ngbai uleldanges e millisiich er a redisaiplo er ngii. (Lukas 10:17-21) Me sei a uchul e a redisaiplo er ngii a milengull er ngii el bltikerreng er ngii me a omerellel el mo er tir a uchul!

6. (a) Ngera sebechel el suubii a bechiil el sechal er a blekerdelel a omerellel a Jesus el mo er a redisaiplo er ngii? (b) A Petrus ngomesterir a rebechiil el sechal a ngera el omelisiich?

⁶ A kerebil a Jesus a olisechakl er a rebechiil el sechal el Kristiano el kmo ngdiak el kirel el meringel a omengederederir. E le deruchellir a bai kirel el mocholt el oeak a omengull me a omelenget el ngar er a bltikerreng. A apostol el Petrus a melisiich er a rebechiil el sechal el mo oukerebai er sel bltkil a rengul a Jesus el oeak sel lekiei el obengterir a rebecherir e ‘mengull er tir.’ (Monguiu er a 1 Petrus 3:7.) Me a leuaisei, e ngmekerang e sebechel a bechiil el sechal el mengedereder e a osisiu el taem e ngmengebkall er a bechil?

7. Ngoeak a ngera el rolel e a bechiil el sechal a mengebkall er a bechil? Momekesiu.

⁷ A ta er a rolel e a bechiil el sechal a sebechel el mengebkall er a bechil a oeak sel lekerekikl el oker a uldesuel er a uchei er a lolib a tekoi el kirel a telungalek er tir. Alta e ngkirel el melib el mo melukl me a lechub e ngmo melodech er a urerel me a lechub e ngkuk di tekoi er a bek el sils er a klengar er tir el ua omilil er tir el mo mesarech er a ta er a beluu me a lechub e ngtekoi er a omengereomel el udoud me bo el sebechel a telungalek el mech a bek el ousbech er a delengcheklir. Ngii el tekoi a mo kirel a telungalek er tir a uchul e ngklou a ultutelel e dirrek el rolel a blekokuii a lsekum a bechiil el sechal a oker a uldesuel a bechil, le lta e ngsebechel el ngosuir el mo rullii a tabesul el omelilt el mo uchul e ngmo beot er a bechil el olengeseu er ngii. (Osisechakl 15:22) A rebechiil el sechal el Kristiano el mengebkall er a rebecherir a ngmai a bltikerreng me a omengull er a rebecherir el redil e a ngar er a uchei er ngii e te nguu a kengei er a Jehovah.​—Efesus 5:28, 29.

Ngmekerang a Bechiil el Redil a Lolecholt a Dmolech el Omengull el Mo er a Bechil el Sechal

8. Ngera uchul me a kerebil a Eba a dolechib er kid er ngii?

⁸ A Rekristiano el bechiil el redil a kmal ungil el oukerebai er a Jesus el kirel a omengull er ngii el  mo er a rulab a klisichel a dereder. Ngmla er ngii a klou el klekakerous er a osengel el kirel a dereder me sel osengel a Eba el lulechotii el kirel a dereder! A Eba a dimlak el sebechel el kutmeklii a ungil el kerebai el kirir a rebechiil el redil el oltirakl er ngii. Ngmla er ngii a telutk el merredelel el lulengedecheduch er ngii a Jehovah e ulemsa llechul. Engdi a Eba a dimlak el longull er tia el tekoi. Ngdimlak el lotireklii a llach el lulechotii a Adam el mo er ngii. (Genesis 2:16, 17; 3:3; 1 Korinth 11:3) Me alta e a Eba a mlecheblad, engdi ngmle kirel el oker er a bechil el kirel tia el ngor el melekoi er ngii a tekoi el ‘lodengei’ a Dios. Engdi ngdimlak el loruul el uaisei e bai mellasem el mo omekrael er a bechil.​—Genesis 3:5, 6; 1 Timoteus 2:14.

9. Ngera el kerebai el kirel a otireklel a tekoi a lekiltmeklii a Jesus?

⁹ Engdi a Jesus a meskid a kmal el ungil el kerebai el kirel a otireklel a Bdelul. A uldesuel me a blekerdelel a klengar er ngii a olecholt el kmo ng “dimlak lomdasu el kmo, ‘Kungreos er ngak me di kua Dios,’ e bai di mle ngii el mechachongii e nguu a teletelel a mesiou.” (Filipi 2:5-7) Chelecha el sils, e a Jesus a mengedereder el ua King e dirk oba osisiu el uldasu. Ngoba klengareourreng e oltirakl er a Demal er a rokui el tekoi e olengeseu er a omengederederel.​—Matteus 20:23; Johanes 5:30; 1 Korinth 15:28.

10. Ngmekerang e sebechel a bechiil el redil el melisiich er a omengederederel a bechil?

¹⁰ A redil el Kristiano a ungil a bo loltirakl er a Jesus sel lolisiich a omengederederel a bechil. (Monguiu er a 1 Petrus 2:21; 3:1, 2.) Ka me domes er a blekeradel el msa techall el mo sebechel el meruul el uaisei. A ngelekel el sechal a melai er a kengei el mo meruul er a tekoi el usbechall a kengei er a rechedam me a rechedil er ngii. Tia el tekoi a dirkak lemesaod er a delongelel ngii me a bechil a uchul e ngmelemalt a bo loker ngika el chedil el kmo, “Ke mla olturk er a demam?” E a lsekum e ngdirkak, e ngkirel el mo mesaod er ngii el obengkel a bechil er a uchei er a bo lolib a ngii di el ngerang. Me a lmuut el tang, a bechiil el redil el Kristiano a diak el soal el mo omtok er a bechil me a lechub e bo el lolsemai a uldesuel er a mederir a rengelekir. A lsekum e ngdiak el kengei er a uldesuel a bechil el kirel a kmung ngerang, e ngungil a bo longedecheduch er a bechil el kirel sel di el tir el tang.​—Efesus 6:4.

A Kerebil a Jesus el kirir a Rechedam me a Rechedil

11. Ngera el kerebai a lekiltmeklii a Jesus el kirir a rechedam me a rechedil?

¹¹ Me alta e a Jesus a dimlak el bo el bechiil me a dimlak bo loungalek, engdi ngmilecherei a kmal ungil el kerebai el kirir a Rekristiano el chedam me a rechedil. Ngoeak a ngera el rolel? Nguleba bltikerreng e mle klou a rengul el olisechakl er a redisaiplo er ngii el oeak a tekoi el lullekoi me a omerellel. Ngulechotii er tir el kmo ngmlekerang a  bo longetmokl er tia el ureor el lulterekeklii er tir. (Lukas 8:1) A uldesuel a Jesus me a omerellel el mo er a redisaiplo er ngii a ulisechakl er tir el kmo ngkirel el mo ua ngerang a omerellir el mo er a rebebil er a rechad.​—Monguiu er a Johanes 13:14-17.

12, 13. Ngera kirir a rechedam me a rechedil el meruul er ngii a lsorir el omekeroul er a rengalek el meluu er a Dios?

¹² A rengalek a blechoel el oltirakl er a redemerir me a rederrir a lungil me a lemekngit a omerellir.  Me seikid e kemiu el chedam me a rechedil, di el kemiu el oker er kemiu el kmo: ‘Ngera el tekoi a kulisechakl er ngii er a rengelekek el kirel a klungel a taem el mechoit el kirel a osengel a TV me a tekoi er a ongelaod me a lechub a omesubel a Biblia me a ureor er a berkel a klumech? Ngera sel mera el klou a ultutelel el tekoi er a chelsel a telungalek er kemam? Kemam aki omechei a ungil el kerebai el oeak sel ki mrellii a mera el omengull el mo klou a ultutelel el tekoi er a klengar er kemam me aike el omelilt el ki moruul?’ A llechul a Dios a kirel el mo kot el tekoi el ngar er a rengrir a rechedam me a rechedil a lsekum e ngsorir el omekeroul er a rengalek el meluu er a Dios.​—Duteronomi 6:6.

¹³ A lsekum a rechedam me a rechedil a oltaut a omellach er a Biblia er a tekingir er a bek el sils, e tia el blekeradel a ulterekokl el lutebengii a rengelekir. A leuaisei, e a tekingir a rechedam me a rechedil me a osisecheklir a mo er ngii a klisichel. Engdi a lsekum a rengalek a omes a eru el bedengel a klengar, e nglocha sebechir el di tir el mo omdasu el kmo a omellach er a Biblia a diak el sal meklou a ultutelel me a diak a ngera el rellii er kid. Me tiang a mo uchul e a rengalek a mo beot er tir el mo mechitechut sel lebo el chebangel a orrimel el mla er tia el beluulechad el mei.

14, 15. Kerresel a ngera el tekoi a kirir a rechedam me a rechedil el omekeroul er a rengelekir, e ngera ta er a rolel e ngsebechir el meruul el uaisei?

¹⁴ A rechedam me a rechedil el Kristiano a medengei el kmo a okurulel a ngalek a ousbech a lmuut el betok er a di lomsang a siungel a bedengel. Me seikid a uchul, me ngkmal klebelung el tekoi a dolisechakl er a ngalek el mo oltoir er a turrekong el di mo kirel a kerruul. (Olisechakl 7:12) A Jesus a ullisechakl er a redisaiplo er ngii el mo meruul a kerresel me a skel a tekoi er a klereng el mo kot er a klengar er tir. (Matteus 6:33) Me a loukerebai er a Jesus, e a Rekristiano el chedam me a rechedil a kirir el melasem el mo er sel tkurrebab el sebechir el omekeroul er a rengelekir el mo oltoir a turrekong er a klereng.

¹⁵ A ta er a rolel e a rechedam me a rechedil a sebechir el meruul er tiang a sel bo loruul a techall el mo sebechir a rengelekir el mo blechoel el obengterir a rengar er a mui el taem el omesiou. Ka molatk el kmo ngkol ua ngera el omelisiich a bo lenguu a rengeasek sel bo lungil el medengelterir a repioneer me a recircuit overseer me a rebecherir. A remo oldingel el missionary me a rengar er a Bethel me a reteloi er a ureor er a okedecherul a blil a ongdibel er a beluulechad el rokir a blechoel el mengedecheduch el oba klou el klemeriarreng el kirel a deuil a rengrir er a omesiungir el mo er a Jehovah. Ngulterekokl el tirkaikid el okiak a ngar er ngii a kmal ungil el tekoi el bla lruul el kirel a omesiungir el sebechir el ouchais. A kerebai er tir er a reng er a omelenget el lolecholt er ngii er a omesiungir a sebechel el ngosuterir a rengelekem el mo meruul a mellomes el omelilt, e oterekokl a turrekong er tir el kirel a omengull, e mo melai a ungilbesul el rolel a omesuub er a skuul me lsebechel el ngosuterir el mo soiseb er a mui el taem el omesiou.

Kemiu el Ngalek​—Ngera Mo Ngosukemiu el Mo Oltirakl er a Kerebil a Jesus?

16. Ngmilekerang a Jesus er a longebkall er a demal me a delal er tia el chutem me a Demal el ngar er a eanged?

¹⁶ Kemiu el ngalek, a Jesus a dirrek el milechei  a kmal ungil el kerebai el kiriu. A Jesus a mloterekokl er a ulekerreuil a Josef me a Maria, engdi ngkmal ullengesenges er tir. (Monguiu er a Lukas 2:51.) Ngmle medengei el kmo alta e ngdimlak el mecherrungel engdi a Dios a ulterekeklii er tir a ngerachel el mo omekerreu er ngii. Seikid a uchul me ngmle kirir el mukebkall. (Duteronomi 5:16; Matteus 15:4) Sera bo leklou el chad, e a Jesus a mle blechoel el meruul a tekoi el ulemotech er a rengul a Demal el ngar er a eanged. Tiang a belkul a kmo ngmle kirel el oltngakl a ongetikaik. (Matteus 4:1-10) Kemiu a rengeasek me ngdirrek el lebebil er a taem e kom locha mekesuseu el mo diak molengesenges er a redemmiu me a redelemiu. Me a leuaisei, e ngera sebechel el ngosukemiu el mo oltirakl er a kerebai er a Jesus?

17, 18. (a) Ngua ngera el orimel a bo lechelebangel a rengeasek sel lengar er a skuul? (b) Ngera sebechel el olengeseu er a rengeasek sel bo lechelebangel a omelsemai?

¹⁷ Ngulterekokl el locha betok er a rengalek el omdak el ngar er a skuul a di mekesai me a lechub e ngdiak a omellach er a Biblia el loltirakl. Te locha melasem el mengetakl er kau el mo meruul a tekoi el diak el ungil e ocherchur er kau a omkotoar er tir. A rengalek el omdak el ngar er a skuul, te melenguul el omekedong er kau a ngodech el ngakl sel lak omkengei el mo obengterir? A leuaisei, e ke mekerang? Ke medengei el kmo a obo medakt me morimel el mo oltirakl er tir, e ke kngtir a rengul a delam me a demam me a Jehovah. A omoltirakl er tir e ngmekrolau el mo er ker? Alta e ke mla meruul a turrekong el kirem, el ua ureor er a klepioneer me a lechub e ng ministerial servant, me a lechub e ke mo mesiou er aike el basio el ousbech a ngeso er a berkel a klumech, me a lechub e ke melatk el mo er a Bethel. A omomdasu e a omteloi er a rengalek el omdak el ngar er a skuul e ngsebechem el mongeseu el mo ngmai a turrekong er kau?

¹⁸ Kemiu a rengeasek er a chelsel a ongdibel er a Rekristiano, kom metik er kemiu a lebebil er a taem el chelebangel a blekeradel el melsemai a klaumerang er kemiu? A leuaisei, e kom mekerang? Molatk er a kerebai, el Jesus. Ngdimlak el kengei el mechetakl e bai dilechor el mesisiich el kirel aike el ble lodengei el kmo ngmelemalt. Omolatk aika el tekoi e ngsebechel el meskemiu a klisiich el mo bleketakl el ouchais er a rengalek el omdak el ngar er a skuul el kmo ngdiak el somiu el mo teloi er tir el meruul a tekoi el modengei el kmo ngmekngit. Me ngdi ua Jesus, e moturk a osengiu er a omelatk er a klengar el diak a ulebengelel el ngar er a deurreng el mesiou e olengesenges er a Jehovah.​—Hebru 12:2.

Sel Uchul a Deurreng er a Klengar er a Telungalek

19. Ngera el blekerdelel a klengar a sebechel el mo uchul a mera el deurreng?

¹⁹ A Jehovah el Dios me a Jesus a sorir aike el kot el ungil el kirir a rechad. Me alta ngdiak demecherrungel engdi ngdirk sebeched el oldeu a rengud er a klengar er kid. (Isaia 48:17, 18; Matteus 5:3) A Jesus a ullisechakl a klemerang el ngii a mle uchul a uchetemel a deurreng er a klechad engdi ngdiak el di ble le ikaikid a lullecholt er a redisaiplo er ngii e lemerekong. A Jesus a ullisechakl er tir er sel kot el ungil el rolel a klengar. E a ngar er a bab er isei, e ngmilecherei a ungil el kerebai el kirel a tabesul el klengar me a tabesul el uldasu el kirel a tekoi. Me a ngii di el chad el ngar er a ngii di el deruchall er a chelsel a telungalek a kmal sebechir el ngmai a klungiolir er a kerebai el lekiltmeklii. Me a leuaisei, e kemiu el bechiil el sechal me a rebechiil el redil me a rechedam me a rechedil me a rengalek, bo moltirakl er a kerebil a Jesus! A longeluolu a osisecheklel a Jesus e loltirakl er a kerebil, e tiaikid a mera el rolel e a chad a mo metik er a deurreng er a klengar er a telungalek er tir.

Ngmekerang a Omonger?

• Ngmekerang a rebechiil el sechal a lolecholt er a klisichel a dereder el lebilsterir a Dios?

• Ngmekerang a bechiil el redil a loltirakl er a kerebil a Jesus?

• Ngera sebechir a rechedam me a rechedil el suub er a blekerdelel a Jesus el mo er a redisaiplo er ngii?

• Ngera sebechir a remekekerei el chad el suub er a kerebil a Jesus?

[Aike el Ker er a Suobel]

[Siasing er a 15 el llel]

A uchei er a bo lolib a tekoi el kirel a telungalek, e ngmo mekerang a betik a rengul el bechiil el sechal?

[Siasing er a 16 el llel]

Ngera el blekeradel a msa bechiil el redil a techall el mo melisiich er a omengederederel a bechil?

[Siasing er a 17 el llel]

A rengalek a mesuub a ungil el blekerdelir a rederrir me a redemerir