Kau ngmla ta el bo molechesuar el kmo ngdiak a chad el medengelii a ringel el mchelebangel er ngii? El mo lmuut me a lsekum e te medengei engdi ngkora diak lomekerreu.

SEL leduubech a betok el mondai er a klengar er kid e ngsebechel el mo uai a ses el eolt a blekerdelel a klengar er kid el diak lemeterob. E a lebebil er a taem, e aike el mondai a kmal mo oberaod me ngdiak el sebeched el outekangel. Ngsebechel el mo uaisei a uldesued sel dechelebangel a secherel a reng me a uldasu me a telemall el mo uchul a chelitechetul a bedenged me a kemanget el secher me a lmuut el bebil. Kede kmal mo chuarm me ngkora mo diak dodengei el kmo kede mo mekerang. Ngar er ngii a chad el omekerreu?

“[A] Dios er a Bek Longelaod” a Omekerreu

A Biblia a mesaod er a Dios el kmo ng “Chedam ra klechubechub, el Dios er a bek longelaod.” (2 Korinth 1:3) A Dios, el ngklel a Jehovah, a medengei el kmo kede ousbech a  ongelaod. A Biblia a ousbech er a tekoi el ‘ongelaod’ er a kakerous el rolel el betok el taem, el oterekeklii el kmo a Dios a medengei a ringeled e kmal soal el mengelaod er kid. Tia el tekoi a ochotii el kmo alta e a rechad a diak lodengei me a lechub e lomekerreu a ringeled, engdi a Jehovah a kmal medengei e omekerreu er kid.

Sel tekoi el kmo a Jehovah a omekerreu er a derta me a derta el chad a bleketakl el mocholt er a Bades. A Biblia a kmo: “A RUBAK omes a ikel duubech er ker me ker; ng omes er kid a le ungil a doruul ma lechub e ng mekngit.” (Osisechakl 15:3) Ngdirrek el ngar er a Job 34:21 e kede menguiu el kmo: “Ng mengkar a bek el blekeklel a chad.” A Jehovah a omes a omerelled​—a lungil me a lemekngit​—e dirrek el medengei a blekerdelel a klengar er kid, me ngsebechel el olengeseu er kid er sel rolel el ungil er ngii. Tiang a lullisiich er ngii a profet el Hanani er a lolekoi er a King el Asa er a Juda el kmo: “A osengel a RUBAK a mekelekelii a beluulchad el rokir, me ng omesterir a klisichir tirkel blak a rengrir er ngii.”​—2 Kronika 16:7, 9.

Ngdirrek el ngar er ngii a ta er a uchul e a Jehovah a mengkar er kid. A Jesus a milsaod el kmo: “Ngdiak a chad el sebechel mer ngak a lak le ngikel ulderchak el Chedam a kursii.” (Johanes 6:44) A Jehovah a kmal omekerreu er kid me ngmerritel er a rengul a chad e mo medengei el kmo ngika el chad ngmera el soal el mo medengelii me a lechub e ngdiak. A leuaisei, e a Jehovah a sebechel el ngosuir. El di ua tiang, a ta el redil er a beluu er a Dominican Republic a mlo er a osbitar el mo er a botk er a kasinoma. Ngmilluluuch el mo er a Dios me lengesuir el mo medengelii a mera el klechelid. E seikid, e a bechil a mlei e mesang a babier el dai er ngii a kmo Ngerang a Soal a Dios a Doruul? a el lengiluu er a ta er a Sioning er a Jehovah el mlo er a blirir er sel tutau. Ngika el redil a milenguiu er tia el babier e mlo melechesuar el kmo a Dios a mla onger er a nglunguchel. Ngkilengei el mo mesuub a Biblia el obengkel a ta er a Sioning e tilbir a klengar er ngii el mo er a Dios e mlo metecholb er a chelsel a elolem el buil.

 Ngar er a babier er a Psalm, e kede metik a betok el tekingir a rechad er a Hebru er a irechar el mengelaod er a rengud, el uai a tekingel a King el David er a losaod er a ulekerreuil a Jehovah el mo er a remesiungel. Ngar er a Psalm 56:8, e kede menguiu a tekingel a King el David el milluluuch el mo er a Jehovah el kmo: “Ma iuechel a medak a ngar a record er kau. Ng diak le ngar a babier er kau?” Ngoeak tia el tekingel, e a David a mle medengei el kmo a Jehovah a medengelii a ringel el lecharm er ngii. A Jehovah a mle ungil el medengelii a uchul a ringelel a David me aike el tekoi el lechilebangel el mlo uchul e nglilangel. Nguaisei, a Omebeled a mengkar er tirke el melasem el meruul a soal, el “tirkel blak a rengrir er ngii.”

A lmuut el ta er a Bades el mesaod er a ulekerreuil a Dios a sel merael a chisel el 23 el Psalm. Ngomuchel el mesaod er a Dios el uai a ungil el klekar er a sib el kmo: “A RUBAK a mengkerengek, me ng diak a kngesonges er ngii.” A chad er a Middle East el mengkar a chermel el sib a kmal omekerreu aika el sib, e  dirrek el omngakl a derta er ngii. Bek el sils e ngomekedong aika el chermel el mei e melitaiu a bedengel e a lengar er ngii a telemall e ngomkar me bo lsebechel el mereched el mo mechubs. A lsekum a sib a smecher, e ngulterekokl el osiik a rolel e muri el oltuu er a kar er a omerkolel e olengeseu er ngii me di ledechor me lak bo el mechiuaiu e lemad. Tiang a kmal ungil el tekoi el domekesiu er ngii er sel rolel a Jehovah a lomekerreu er tirke el chad el olengit a ngeso er ngii.

Nglunguuch me a Okiis​—Olechotel a Ulekerreuil a Dios

Aika el uldasu me a lmuut el bebil el klebokel el psalm a diak el di llechukl er a Biblia el di kired el menguiu e oldeu a rengud er ngii e lemerekong. Aikang a olecholt el kmo te milekerang a reblak a rengrir el mesiungel a Dios er a irechar er a louchais el mo er a Jehovah aike el ngar er a rengrir e lolengit a ngeso er ngii e loureng a sulel el kirel a ulekrael me a klengeltengat el mla er ngii el mei. A choua aika el tekoi a meketeklii el kmo a remesiungel a Dios er a irechar a kmal uluumerang el kmo a Dios a omekerreu er tir. Me a donguiu e dolebedebek aika el ungil el tekoi e ngsebechel el ngosukid el mo oba choua isei el uldasu el kirel a Dios. A sengk er a nglunguuch a klou el olechotel a kmo a Dios a omekerreu er kid.

A lebebil er a taem, e ngkmal mo oberaod a mondai er kid me ngmo diak dodengei el kmo ngmekerang a doluluuch el kirel. Tiang mo merrob er a Jehovah me ngmo diak el sebechel el medengei a chelebuled? A Rom 8:26 a onger el kmo: “Me ngdirrek el uaisei a Reng a ngosukid ra chelitechetud; le ngdiak dodengei el kmo kede mlekera doluluuch el ngar sel kirel, ngdi Reng a smodid loba diak le medu el ngingd.” Tia el bades a meketeklii el kmo aike el mlukreng el nglunguchir a remesiungel a Jehovah er a irechar a dirrek el sebechel el olecholt aike el ngar er a rengud el mo er Ngika el ‘onger a nglunguuch.’​—Psalm 65:2.

A omelatk er a okiis a dirrek el ta er a olechotel a ulekerreuil a Dios el mo er a derta el chad. A Jesus Kristus a dilu el kmo: “A sikang a mei el bo lorrenges ra ngerel [a Jesus] tirikel rokui el ngara debull, me te tuobed.” (Johanes 5:28, 29) A belkul sel tekoi er a Grik el lousbech er ngii er tiang a diak el di lolekoi el kirel a “debull” e lemerekong. Tiang a olecholt er a uldasu el kmo a Dios a melatk aike el rokui el omerellel ngika el mla mad el chad.

Ka molatk er tiang, a Dios a kirel el mo medengei a rokui el tekoi el kirel a chad er a uchei er a bo lolekiis er ngii, el uldimukl er a teletelel me a omerellel me a blekerdelel me a  cherrengelel a uldesuel! (Markus 10:27) Malta e ngmla chuib a betok el telael el rak engdi a Dios a diak lobes er a chad el mla mad. (Job 14:13-15; Lukas 20:38) Me a rebetok el billiol el chad el mla mad a diak lobes er tir a Jehovah el Dios​—el meketeklii el kmo a Dios a omekerreu er a derta me a derta el chad.

 A Jehovah a Mesterir a Rechad a Omeksullir

Ngera kired el meruul me bo lsebeched el nguu a ulekerreuil a Dios? A kot, e ngkmal kired el ochotii el kmo kede oumerang er ngii, e olengesenges er ngii, e dirrek el otuil a klaumerang er kid er ngii. A apostol el Paulus a olecholt er a deluill er a doba klaumerang me a doldeu a rengud er a ulekerreuil a Dios. Ngmilluches el kmo: “Ma lak a kloumerang e ngdiak el sebechel mo dmeu a rengul a Dios, ele tirikel sorir lolekeed er tir er ngii a diak le iit loumera el kmo ngngarngii a Dios, e dirrek loumera el kmo tirikel osiik er ngii a le besterir chomeksulir.”​—Hebru 11:6.

Momtab el kmo a klaumerang el lodeuir a rengul a Dios a ngar er ngii a eru el telengtengil. A kot, e ngkired el ‘diak de iit loumera el kmo ngngarngii a Dios,’ el belkul a kmo a Dios a Merredeled me ngrredemelel a blekongesenges me a omengull er kid. Ongerung, e ngkired el oumerang el kmo “tirikel osiik er  ngii a le besterir chomeksullir.” A mera el klaumerang a uldimukl er a doumerang el kmo a Dios a semeriar er tirke el rokui el sorir el meruul er a soal e ngii a mo omesterir a  omeksullir. Me a dosuub a Tekingel a Dios e dobengterir tirke el chad el olengesenges er ngii, e ngsebeched el mo oba choua isei el klaumerang e nguu a omeksullel me a ulekerreuil a Dios.

Betok el chad er a chelecha el sils a oumerang el kmo a Dios a diak el semeriar er a tekoi el duubech el mo er a klechad. Engdi kid a mla mesang el oeak a Biblia el kmo a Dios a kmal omekerreu er tirke el olecholt er a mera el klaumerang el bedulngii. Me alta e a klengar er a chelechang a mui er a ringel me a sebekreng me a klengiterreng engdi ngdiak el kirel el mo mechitechut a rengud. A Jehovah el Dios a mera el omekerreu er kid me ngmengemedaol er kid el mo er ngii el kirel a ngeso. A milluches er a psalm a kmo: “Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.”​—Psalm 55:22.

[Footnote]

[Baks/​Siasing er a 9 el llel]

Aike el Bades el Melisiich er a Klaumerang er Kau er a Bltkil a Rengul me a Ulekerreuil a Dios el Bedulkau

“A osengel a RUBAK a mekelekelii a beluulchad el rokir, me ng omesterir a klisichir tirkel blak a rengrir er ngii.”​—2 KRONIKA 16:9.

“Me mlecha iuechel a medak er a ollemelem el rruul er a budel a charm. A iuechel a medak ngdiak el ngar er a babilengem?”​—PSALM 56:8.

“A RUBAK a mengkerengek, me ng diak a kngesonges er ngii.”​—PSALM 23:1.

“Ele konger a nglunguuch. A rokui el chad a mer kau el kirel a kngterir.”​—PSALM 65:2.

“Cho bo momekedong, e ak mo onger er kau, ng mo ungil a rengum er ngak, el blebelem.”​—JOB 14:15.

“Ele ngii di le chad el mor a Dios a kirel el oumerang el kmo ng ngar ngii a Dios, e ngii a omesterir omeksullir tirkel osiik er ngii.”​—HEBRU 11:6.

“Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.”​—PSALM 55:22.