Ngar er ngii a sechelim el mla ta el lolekoi er kau a mekngit el kirel a chad el dirkak a ta el mesang? E sel bocha mkasoues kau me ngii el chad e aike el tekingel a sechelim ngmlo uchul me ngdiak el sebechem el mes a dechal me a ungil el blekerdelel ngii el chad? Ngsebechel el duubech a osisiu el tekoi el kirel a Biblia.

A APOSTOL el Paulus a ulemeklatk er a tekoi el sebechel el duubech a bo lak donguiu er a Biblia el diak a mengesang er a uldesued. A Paulus a milluches el kirir a rebebil er a rechad er a Judea er sel taem er ngii el kmo: “Ak ulecholt el kirir el kmo, te blak a rengrir el bedul a Dios, e ngdi ngiil blakerreng a diak le ngara meral klemedengei.”​—Rom 10:2.

A rebebil er a rechad er a Judea er a kot el dart el rak a dimlak el kengei er a klemerang el  mle bleketakl el lolecholt er ngii a Chuodel el Renged el kirel a Messias. A Jesus er a Nazareth a uleltaut aike el lolekoi a Bades el mle kirel el meruul, e chilerrungel a bek el ulaoch el kirel a Messias. Me nguaisei, engdi a dimlak lemesim el uldesuir el di bla lruul er a uchei a milerrob er a rebetok el chad er a belual me ngmlo diak el bleketakl er a rengrir a Tekingel a Dios.

Ngera sebeched el suubii er tia el tekoi? Ngklou a ultutelel el donguiu er a Biblia el diak a mengesang er a uldesued. A berrotel el osengel a chad el mengetukel me a lechub a uldesuel a chad el di bla el rellii er a uchei er a bo lodengelii a tekoi a sebechel el merrob er ngii me ngmo diak el bleketakl er a rengul a klemerang el ngar er a Biblia.

El di ua tia el okesiu, a sensei er a osisecheklel a klechelid er a North Carolina er a Merikel a mesaod er a Biblia el kmo “ngkmal babilengir a rechad, el olecholt a di uldesuir a rechad el betok er ngii a ketouch, e diak a ta er ngii el meskid a ulekrael el kirel a kmo ngera ungil el  rolel a klengar el doltirakl er ngii.” A lsekum a chad a menguiu er a Biblia e omdasu el kmo “ngkmal babilengir a rechad,” e ngulterekokl el locha diak bo loltirakl aike el ulekrael me a omellach el ngar er a chelsel el diak el osisiu ngii me a uldesuel.

Engdi a Biblia a melisiich er kid el mo blak a rengud el mesuub er ngii. A Paulus a milluches el kirir a rechad er a Beroea er sel sils er ngii el kmo: “Te mle blak a rengrir el melai a Tekoi, me te mlerriter a chedaol Llechukl ra bek el sils, el sorir el mo medengei el kmo ngiil tekoi nguaisei ngdiak.” (Rellir 17:11) Me ngdi uai tir, e kau a dirrek el locha kirem el chemoit aike el tekoi el sebechel el mengesang er a uldesuem me ngmo diak el bo el bleketakl er a rengum a tekoi el mosuub. Monguiu er a Tekingel a Dios el diak a mengesang er a uldesuem, el blak a rengum el merritel el mo medengei a klemechel a Dios.