Ngera uchul me a ta el redil el mlo diak el oumerang a klechelid a mengoit a klou el temel er a chelechang el olengeseu er a rechad el mo medengelii a Dios? Ngera rirellii a chad el soal a kengaol el klekool el mo soal a budech? Ngmilekerang a chad el mesisiich el ousbech a mekngit el kar e chad er a omelim e sekokoad, e mlo melodech er a blekerdelel a klengar er ngii? Ka monguiu aike el lolekoi.

NGKLEL: PENELOPE TOPLICESCU

REKIL: 40

BELUAL: AUSTRALIA

TEKOI EL MLA ER NGII: NGMLO DIAK EL OUMERANG A KLECHELID

KLENGAR ER NGAK ER A UCHEI: Ak milechell er a Sydney, Australia engdi sera el eru rekik, e a telungalek er ngak a millukl el mo er a New Guinea. Aki kiliei el eru el rak er a Rabaul e a uriul e ngeai el rak el ngar er a Bougainville. Seikid el taem, e ngdirkak a tv er a New Guinea me ngak me a ochedak a mlukeroul el milil el rikl, el mengedub e ousnorkel e mo camp.

Nglocha mle teruich a rekik er a bo kumuchel el mo semeriar a tekoi er a klechelid. A delak a mle Katolik, me ngdilu er ngak me ak mlo teloi er aike el mla er ngii el omesubel a Biblia el obengkel a ta er a sister. Ak mlo oba klaumerang er a Rekatolik e mlo metecholb er seikid el rak.

Uriul er a ki molukl el me remei er a Australia e bocha kngeasek, e ak mlo omuchel el mo oumededenger er a klaumerang er ngak. Me a sel taem el kngar a high skuul, e ak mlo mesuub a reksi, e ngak me a demak a mle blechoel el kemanget el chadecheduch el mesaod a uchelel a klechelid me aike el ki mulemdasu el kmo ngdelbochel el cheldecheduch el ngar er a Biblia. Tiang a mlo uchul e ak chilitii a klaumerang er ngak er a Katolik.

A delak me a demak a mlo kebii er a leteruich me a elolem a rekik. Tia el blekeradel a mle meringel el kirel a delak, me a uriul e ak millukl el mo kiei el obengkel a demak me a mechas er ngii. A ochedak a di kiliei el obengkel a delak, e a uriul e te millukl el mo er a ta er a beluu. Ak kmal mle sabisi er tiakid el taem. Ngmlo chuib a eru el rak er a uchei er a lluut el mocha ungil a deluill er ngak me a delak. Engdi ak mocha omuchel el melim e ousbech a mekngit el kar e mocha chad er a omilil. Ngmlo diak kngar er a skuul, e silikii a urerek, e ngar er a 20 a rekik, e ak mlo omuchel el kiei el ngar er a deleboes.

A bocha el 25 a rekik, e ak liluut el mocha omdasu el kirel a Biblia. Ak miltik er a beches el ureor  e mlo medengelii a Liene, el ungil a blekerdelel el ekebil el kmal blechoel el olecholt a omelengmes me a omengull el mo er a merredelel el kmal mle mekngit a tekingel er ngii. Ak uleker er ngii el kmo ngera me ngdiak louteketok er a merredelel, e ngmilsaod el kmo ngmilsuub a Biblia el obengterir a Resioning er a Jehovah me ngmillasem el oltaut a omellach er a Biblia er a klengar er ngii. A Liene a millekoi el kmo ngsebecham el mo dmak el mesuub a Biblia. Ak kilengei e le kulemdasu el kmo ngsebechek el suub a rokui el tekoi el lodengei er a chelsel a ta el sikang el omesuub. Sel kesus, e a Liene a chiloit a edei el sikang el onger a kerik el kirel a Biblia. Ngkmal mle mechas a renguk e le rokui el nger er ngii a mlengai er a Biblia.

Ak mo lotkak er sel kesus er a uriul er a omesuub el obengkel a Liene, me kumekall el mo remei e ngmera el mle kesib a renguk er a Dios el dimlak el mereched el mechikak me bo kusuub er a klemerang el kirel. Ak mle medengei el kmo a Resioning a kiliei el klikiid a klengar er tir me ak ulemdasu el kmo ngkmal meudang el kirek, el dikea el sebechek el melodech a blekerdelek. Ak dirrek el ulemdasu el kmo ngkmal diak el sebechek el oldingel a obliil el omerk er a klumech el ua Resioning. Ak mellemolem el mesuub el obengterir a Resioning e le ak millatk el osiik a telemellel a osisecheklir me bo el sebechel el mo ungil a ukltkek ak chititerir. Engdi a ta er a klebesei engdi ngak el mlo melechesuar el kmo tia kmal diak el bo el tekoi.

NGMILEKERANG A BIBLIA A LENGEDECHII A KLENGAR ER NGAK: Ak kulemolem el mesuub a melemalt el rolel a klengar el ngar er a Biblia, e a ukltkek a merrael el mo mengesang er ngak. Ak chilitii a usbechel a mekngit el kar me bo el ungil a ukltkek. Engdi ak millukl el mo er a ta er a beluu el telkib el taem e kmal mlo chad er a omilil me a omelim. Me ngua el bek el taem el kulengeriakl el melasem el mo kiei el oltirakl a omellach er a Biblia, e ak mo metermokl e oubeteteluut. Me ak kmal merur e meluluuch el mo er a Jehovah engdi ak kmal ouuchel a renguk.

Sera ksuubii a blekerdelel a King el David el mo er a Bathseba me a klechubechub el lulechotii a Jehovah el mo er tir, e tia kmal ngilsukak. A David a mle bekeu el kongei a telemellel er a lollach er ngii el dimlak lolasem el mesosaod er ngii. Ngmle ngar er a eou a rengul e kilengei a omellach el lengilai. (2 Samuel 12:1-13) Me ngbek el taem el bo kmetermokl, e ak melatk er sel cheldechederir el mlo uchul e ngmlo beot er ngak el olengit a klausubes er a Jehovah. Seikid e ak tilbir er a renguk el diak kungiil el mo uriul e ak bai meluluuch er a uchei er a krebet er a ongetikaik. E tia mlo uchul a klou el omelodech er a klengar er ngak.

NGERA EL KLUNGIAOL AK NGILAI: Ngmle bekongesengasech a renguk. Engdi sel bades el ngar er a Efesus 4:29-31 a ngilsukak el mo medengelii a klungel a ultutelel a kungeroid er ngak er a “cheluached, ma ngasechereng, ma klsiberreng.” Me a kusuub el mocha sebechek el mtebechel a ngesechel a renguk, e ak dirrek el mlo meduch el omtebechel er a churak. A omellach er a Jesus el kmo a omelekingem a lechoi e di lechoi a ngilsukak el mo ulterekokl a uldesuek el chad.​—Matteus 5:⁠37.

A delak, el kot e ngulemtok er ngak a kubengterir a Resioning, a uriul e ngdilu el kmo ngchemat er ngak. Ngdirrek el dilu el kmo, “Ak medengei el kmo tia el teletelem er a chelechang a diak el ior er a ulekurulem e ngbai tekoi el bla msuub el kirel a Jehovah a uchul.” Ngkmal mlo dmeu a renguk er a krengesii el melekoi el uaisei.

Ak melatk er a chelechang el kmo a klengar er ngak a ngar er ngii a belkul me a moktek er ngii. Aika el mereko el etiu el rak, e ngak me a bechik a dmak el oureor el mui el taem el olisechakl er a rechad er a Biblia. Ngmera el tekoi, ak umerk a klumech el mo er a bek el obliil e melechesuar er a chelecha el taem el kmo ngdiak a ngodech el lmuut el ungil el ureor el bla kuruul er ngii el uai tiang.

NGKLEL: DENIS BUSIGIN

REKIL: 30

BELUAL: RUSSIA

TEKOI EL MLA ER NGII: CHAD ER A KARATE

 KLENGAR ER NGAK ER A UCHEI: Ak milechell er a Perm e mlukeroul er a Furmanov, el beluu er a Ivanovo er a Rosia el bekord el 40,000 el chad a kiei er ngii. A Furmanov a kmal mle klebokel el beluu el betok a kerrekar er ngii, el uchei er a blsechel a kelekolt e a llel a mo merir e bekerekard. Ngar er a delongelel a rak er a 1980 el mo er aike el rak el ulemuchel er a 1990, e a delengerenger a kmal mlo klou er tia el mats. Ngdimlak el betok a ududam engdi mle ungil besul a delengcheklam. Aki mle keseked el kiei ngak me a delak me a demak me a ochelek er a chimong a delemerab er ngii el blai.

Sera el euid a rekik, e ak mlo omuchel el mesuub a karate. Ngkmal mle soak el klekool me ngkmal mlo klou a ultutelel el tekoi er a klengar er ngak. A bek el taem el kmededaes e ak ngar er a gym me a rokui el sechelik a di mle chad er a klekool. Sera bo el 15 a rekik, e ak ngiluu a bekerekard el bando er a karate e a ta el rak er a uriul e ak ngiluu a bedengel a chutem a iro er ngii. Ak mle teloi er a cheldebechel er a ruusekool a karate el mlo er a klaiuengader er a Rosia me a bebil er a beluu er a Europe me a Asia. Ngkora kmal mle ulterekokl a klengar er ngak er a ngar er a medak, engdi sera bo el 17 a rekik, e a klengar er ngak el rokir a mlengodech.

Ngak me a resechelik a tilemelii a telemall e mludechem me ak mlekelebus el eru el rak. Ngkmal mle meringel a klengar er a blil a kelebus. Engdi tiakid el taem el kngar er a kelebus, e ngak a mle ketengek el mesa Biblia. Ak chiliuii a Genesis me a Psalm me a Beches el Testament el rokir. Ak mlo auspendik er sel nglunguuch el mo er a Demad el ngar er a eanged el lullisechakl er ngii a Jesus, e mellekoi er ngii er a bek el kebesengei er a uchei er a  bo kbad, el melatk el kmo ak uaisei e alta ak mongeseu.

Sera rak er a 2000, e ak tilobed er a kelebus, engdi klengar er ngak a dimlak lultebechel el kmo ngbedul ker me a dimlak a moktek er ngii. Me ak mlo omuchel el ousbech a mekngit el kar. Ngar tiakid el taem, e a delak a mlad. Ngkmal mle betik a renguk er ngii me ngkmal mle meringel er ngak a kodellel. Engdi ngmlo sebechek el chemoit a mekngit el kar e liluut el mo omuchel el omais el mo er a gym. Ak dirrek el millukl el mo er a Ivanovo e miltik er a urerek er a kekerei el stoang el olterau a kall. A mle merredelam er ngii el stoang a mle ta er a Sioning er a Jehovah. Ngmilsaod el me er ngak a bebil er a uchetemel a klemerang el mla er a Biblia e dilu er a ta er a Sioning me ngmlo omais el me mesuub a Biblia el obengkek.

NGMILEKERANG A BIBLIA A LENGEDECHII A KLENGAR ER NGAK: Sel taem er a kusuub a Biblia, e ngkmal mlo dmeu a renguk er a ksuubii a moktek er a Dios el mo meruul er tia el beluulechad el mo paradis, me ngkmal mlo soak el mo rredemelel a mo kiei er a chelsel ngii el klengar er a ngar er a medad. Ak dirrek el mlo medengei el kmo a Jehovah el Dios a ngar er ngii a ngar er a bab el rolel a klengar el lolterekokl, e soal a rechad a lekiei el oltirakl er ngii. Ngak a mle smau el kiei el di ulemdasu er a di ngak. Engdi ak silubii el kmo a Jehovah a mle soal a kulatk er a rebebil e bo kumekeroul a bebil er a ungil el blekeradel el dimlak er a klengar er ngak el mo bekokuii e melisiich a tekoi er a budech.

Me sera bo kumuchel el mo dmolech el melebedebek aike el rokui el bla lruul a Jehovah el mei er ngak el ua ngelekel el luldureklii el mo tenget el kirel a kngtik, e a omereng el saul el mo er a bltkil a rengul a Dios a rirellak el mo melodech er a klengar er ngak. El di ua tiang, ak silubii el ngar er a Psalm 11:5 el kmo a Jehovah a ouketui er a resorir el meruul a delengerenger. Me seikid, e ak mle stob el omes a program er  a tv el milengebkall a tekoi er a uldikel me a kltui. Ngkmal mle meringel er ngak engdi mlo sebechek el choitii a kengaol el klekool el ble kteloi er ngii. A omellach el ngar er a 1 Korinth 15:33 a ngilsukak el mesa el kmo tirke el chad el kulilt el ousechelei er tir a ngar er ngii a klou el chitikikii er a klengar er ngak. Me a taem el kchiloit er a kelebus a mle ungil el olechotel tiang. Me ak tilbir a renguk el mo stob a klausechelei er ngak el obengterir a rechad el kengaol el klekool a mle meklou el tekoi er a klengar er tir.

NGERA EL KLUNGIAOL AK NGILAI: Sera ak teloi er tir e kusuub a Biblia el obengterir a Resioning er a Jehovah e tia ngilsukak el mo melemalt el chad. El di ua tiang, ak silubii er a Hebru 13:5 a klungel a ultutelel a lungilbesul er a rengud aike el ngar er ngii er kid e bo domtok er a ngibes er a udoud. A kultirakl er tia el omellach e ngngilsukak el mo olechib er ngak er a blulak me a rrechorech.

Ak mle blechoel el omes a klausechelei el kmo ngklou a ultutelel. A ngar er a mong, e ak ulemes a klausechelei er a rebebil el meltemall, el rrechorecherreng me a dakt a uchul. A Resioning er a Jehovah a diak el mecherrungel engdi ak silubii el kmo te mengull a blekeradel el lolisiich a Dios e melasem el mo oltaut ngii el omellach er a chelsel a omerellir el mo er a rebebil. Ak mla metik er a remera el sechelik er a delongelir.

Ngsebechek el di omcheritem er a kmo nglocha mlo ua ngerang a klengar er ngak a lsekum e ngdimlak suub e bo kultirakl a ulekrael er a Biblia. Ak locha liluut el mekelebus me a lechub e ak mlo uchul a chelebulir me a rengelel a klengar er a rebebil er a rechad. Engdi chelechang, e ngngar er ngii a kmal klebokel el bechik me a reteru el ngelekek el sechal, me aki dmak el telungalek el dmeu a rengmam el olisechakl er a rebebil a klemerang el kirel a Dios.

NGKLEL: JOSÉ CARLOS PEREIRA DA SILVA

REKIL: 31

BELUAL: BRAZIL

TEKOI EL MLA ER NGII: SEKOKOAD

KLENGAR ER NGAK ER A UCHEI: Ak mlukeroul er a kmal chebuul el delengchokl er a Americana, São Paulo. Ngdimlak a ungil el ralm el ki molim me ngii el beluu a mle mekngit er a eisei. Ngmle merael a chisel el basio el kirel a uldikel me a delengerenger el mla er ngii.

Ak mlukeroul el mekngit a blekerdelek e sekokoad. Ak mle blechoel el teloi er aike el meringel el klakoad er a rael, me a rechad er a hang a mle medakt er ngak. Me a bilek me a omengetmeklel a bedengek me a blekerdelek a rirelleterir a rebebil el mo omdasu el kmo ak bekeu. Ak mle mesisiich el melim a rrom e blechoel el di melim el mad. Ak dirrek el uluusbech a mekngit el kar el di ua rubekuk. A mera er ngii, a ta er a rubekuk a mlad er a imis el usbechel a mekngit el kar a mle uchul.

NGMILEKERANG A BIBLIA A LENGEDECHII A KLENGAR ER NGAK: Sera bo kudengelterir a Resioning er a Jehovah, e te ulechotii el kmo a Dios a mo rullii tia el beluulechad el mo paradis. (Lukas 23:42, 43; Chocholt 21:3, 4) Ak dirrek el silubii el kmo a rulekoad a diak a ngera el lolechesuar, me a Dios a diak bo lomekcharm er a remekngit el chad er a beluu er a ngau. (Olisechakl 9:5, 6) Ngkmal mlo kiei a renguk er a bo kudengelii tiang. A tekoi el ksiluub el kirel a Dios a silisichii a urungulek el mo melodech er a blekerdelel a klengar er ngak.  Engdi ngdimlak el beot el kuruul er tia el omelodech, el mo mengoit a usbechel a mekngit el kar me a omelim me a klakoad me a sius el mle kse er ngak el ousbech.

Engdi a tekingel a Paulus el ngar er a 1 Korinth 6:9-11 a kmal millisiich er ngak. Ngii el bades a olecholt el kirir a rebebil er a Rekristiano er a kot el dart el rak el mle ta el taem el lurruul a bebil er a mekngit el omeruul el kmla er ngii. Engdi ngii el bades a melemolem el melekoi el kmo: ‘Ngarngii ra chelsiu ar uleuaisei. Ngdi kemiu a mla mengatech, e mlechedaol, e muklemalt luleak a ngklel a Rubak el Jesus Kristus ma reng ra Dios er kid.’ Ngii el tekoi a milskak a omelatk el kmo ngak me ngdirrek el sebechek el ngodechii a klengar er ngak el mo oldeu er a rengul a Dios.

Sera kkot el mo teloi er a Resioning er a Jehovah, e ngmlo ulterekokl a renguk el kmo te ngar er a mera el klechelid. E le te mle medengelii a blekerdelek el bekongesengasech a renguk e sekokoad, engdi te kmal uleba bltikerreng e uluutkeu er ngak el mo teloi er tir.

NGERA EL KLUNGIAOL AK NGILAI: A lemlak kusuub a Biblia e kngedechii a blekerdelel a klengar er ngak, e ak locha mla mad. Engdi ngbai dmeu a renguk el mla mo er ngii a techellek el ngosuir a ta er a rubekuk el mo mesuub er a Biblia e mo cheroid er a usbechel a mekngit el kar. Ak dirrek el mla melisiich er a rebebil er a rechedak el mo omuchel el mesuub er a Biblia. Ak kmal oba omereng el saul el mlo sebechek el tibir a renguk el mo mesiou er a Dios, el ngii a kmal omekerreu er kid!

[Siasing er a 24 el llel]

“Ak tilbir er a renguk el diak kungiil el mo uriul e ak bai meluluuch er a uchei er a krebet er a ongetikaik, me ngmlo uchul a klou el omelodech er a klengar er ngak”