A Steven er a Britain a kmo: “Ngbek el sandei el ki monguiu er a Biblia el telungalek. Ak uluumerang el kmo a Biblia a Tekingel a Dios engdi ngdimlak semeriar er ngii e le ngmle meringel er ngak el mo medengelii.”

A Valvanera er a Spain a kmo: “Sera le 17 a rekik, e ak millasem el menguiu er a Biblia engdi ngmlo diak kunguiu er ngii e le ngkmal mle meringel er ngak el mo medengelii.”

A Jo-Anne er a Australia a kmo: “Ngak el mle chad er a Katolik a uchul me ak ulemdasu el kmo ngkirek el menguiu er a Biblia. Ak rirekir a omengiuek er a chelsel a edei el rak e dimlak a ta el bo kudengelii.”

A BIBLIA a kot el merael a chisel el babier er a beluulechad. Ngta er a kot el moteterau el babier el sebechir a rechad el nguu el ngar er a betok el kakerous el omelekoi me a klekedall el ua cassette me a video me a lmuut el bebil. Me nguaisei, engdi a rebetok el ngar er ngii a Biblia er tir a meringel er tir el mo medengelii. Kau ke oba osisiu el uldasu?

A Dios Ngsoal a Bo Dodengelii a Tekingel?

A Biblia a kmo: “Ele chedaol Llechukl el rokui a melluches luleak a Reng ra Dios.” (2 Timoteus 3:16) Chochoi, a Jehovah el Dios a milskid a Biblia. Omomdasu e ngsoal a bo dodengelii a Tekingel me a lechub e ngrirellii el mo meringel er a rechad el mo medengelii me te di mekesai el chad, el ua remengeteklel a klechelid me a rechellimosk a sebechir el mo medengelii?

Ka momtab aika el bades er a Biblia:

“A llach el kumeskemiu er chelechal sils a diak le sal meringel ma lechub e le cheroid er kemiu.”​—Duteronomi 30:11.

“A omesodel osisecheklem omekllomes, ng mesterir a re metitur a llomeserreng.”​—Psalm 119:130.

A Jesus a dileu a rengul el oeak a chedaol el reng e dilu el kmo: “Chedam, el Rubak ra eanged ma chutem, ak uldanges er kau, le ke milart a ikal tekoi rar mellomes a rengrir mar bekudasu, e ulecholt rar tolechoi; Chedam nguaisei, le tia chodeuir a rengum el tekoi.”​—Lukas 10:21.

A Dios a kmal soal a bo dodengelii a Tekingel el Biblia, engdi te betok el chad a meringel er tir el mo medengelii. Ngera mo ngosukid el mo medengelii? A ongingil el suobel a mesaod a edei el tekoi el sebechel el ngosukid el mo medengelii a Biblia.