“Bo mekereker, e ak mla mo kats er a belulechad.”​—JOHANES 16:33.

1. Ngmle ua ngerang a blekongesenges er a Jesus el mo er a Dios?

 A JESUS KRISTUS a mle blechoel el olengesenges e meruul a soal a Demal el ngar er a eanged. (Johanes 4:34; Hebru 7:26) Ngdi a tekoi el dilubech el mo er ngii a rirellii el mo meringel er ngii el olengesenges. Ngar er a uchelel a omesiungel, e a recherroel a Jesus el uldimukl er a Satan, a millasem el mengeuid e orrimel e mengeblad er ngii el mo uchul e letemellii sel blakerreng er ngii. (Matteus 4:1-11; Lukas 20:20-25) Tirka el cherroel a Jesus a mlo uchul a ringelel a uldesuel me a bedengel me a rengul. E sola e te milekodir el dilelii er a teluo el kerrekar. (Matteus 26:37, 38; Lukas 22:44; Johanes 19:1, 17, 18) A Jesus a millemolem el “mle bekongesenges el mo lmuut ra kodall” er a chelsel aika el betok el ringel.​—Monguiu er a Filipi 2:8.

2, 3. Ngera a sebeched el suubii er a Jesus el mle bekongesenges er a chelsel a meringel el blekeradel?

² A tekoi el dilubech el mo er a Jesus er a lengar er tia el chutem a ulsisecheklii el kmo, ngmekerang e sebechel el olengesenges er a chelsel a meringel el blekeradel el ngii el tekoi a dirkak a ta el bo lechermii. (Hebru 5:8) Ngsebeched el kora mo melatk el kmo a Jesus a siluub a bek el tekoi el kirel a omesiungel el mo er a Jehovah. E le ngii a uleba kmes el deluill er ngii me a  Demal el kemanget el taem e mle ua “chad er omelib el blai” er sel taem er a omebelel a rokui el tekoi. (Osisechakl 8:30) Me nguaisei, engdi a klaumerang er ngii el uluutekangel a rokui el ringel a mileketeklii a cherrungel el blakerreng er ngii. Me tiang a mlo uchul e ngliluut el okesengii a deluill er ngii me a Demal. Ngera sebeched el suubii er a tekoi el dilubech el mo er a Jesus?

³ A Jesus alta e ngmle cherrungel el chad engdi ngdimlak di lultuil er a klisichel, e ngbai milluluuch el mo er a Dios el kirel a ngeso me bo lsebechel el melemolem el olengesenges. (Monguiu er a Hebru 5:7.) Me kid a dirrek el sebeched el melemolem el olengesenges a lsekum e kede oba klengareourreng e meluluuch el olengit a ngeso er a Dios. Tiaikid a uchul me a apostol el Paulus a milengelechel er a Rekristiano el kmo: “Mnguu a Reng ra Kristus Jesus el mo rengmiu,” e le “ngdi mle ngii loltubokl er ngii, me ngmle bekongesenges el mo lmuut ra kodall.” (Filipi 2:5-8) A blekerdelel a Jesus a ulechotii el kmo a rechad a sebechir el mo bekongesenges alta e te kiei er tia el mekngit el beluulechad. Engdi a Jesus a mle cherrungel el chad, e kuk ua ngerang el kired kid el diak demecherrungel el chad?

Mo Bekongesenges Alta e Ngdiak Demecherrungel

4. Ngera belkul tia el kmo ngar er ngii a llemelted el melilt a tekoi?

⁴ A Dios a milebii a Adam me a Eba el ngar er ngii a llemeltir el melilt a tekoi, me kid el ngelekir a dirrek el oba tia el osisiu el techall. Me tiang ngera belkul? Ngbelkul a kmo ngsebeched el melilt el mo meruul a ungil me a lechub e ngmekngit. El ua tiang, a Dios a meskid a llemelted el melilt el kmo kede mo olengesenges er ngii me a lechub e ngdiak. Me nguaisei engdi ngobengkel tia el ilmokl el melilt a tekoi, e ngkired el di kid el mesaod er kid el kirel a blekerdeled. E aike el tekoi el dolilt el mo meruul a sebechel el mo uchul a klengar me a kodall el kired, e dirrek el ngar er ngii a lerellii el kirir tirke el kmeed er kid.

5. Kede chelebangel a ngera el ongetikaik, e mekerang e sebeched el mo mesisiich er ngii?

⁵ Ngmeringel el doba blekongesenges el kirel a llechul a Dios e le kid el diak demecherrungel. A Paulus a dirrek el mle kirel el outekangel, me ngmilluches el kmo: “Ngarngii a kuk ngodech el llach era chelsel a klekedall ra bedengek, el oumekemad ra blekeradel er chomelebedebekek, e mengelebus er ngak ra chelsel a blekeradel ra klengit el ngara klekedall ra bedengek.” (Rom 7:23) Ngmo beot el dolengesenges sel lak a ringel me a techerelbesud. Ngdi kede mo mekerang a lsekum ngsoad el olengesenges engdi a “ngibes ra tech, ma ngibes ra mad” a mengesang a uldesued? Ngkired el tuib a rengud el mo olengesenges er a Jehovah er a uchei er a leduubech a ngii di el chetituokel el tekoi me a lechub e ngngongetikaik. (Psalm 78:8) Me aika el ngibes a mo er ngii e le kid el diak demecherrungel e dirrek el chederedall er tia el mekngit el beluulechad el kmal mesisiich el sebechel choitikikid el mo er a klengit. (1 Johanes 2:16; 1 Korinth 2:12) Ngar er ngii a betok el okesiu er a Biblia el kirir tirke el chad el mlo mesisiich e le tir el tilib a rengrir er a uchei er a leduubech a ongetikaik.​—Esra 7:10; Daniel 1:8.

6, 7. Ka mosaod el kmo ngmekerang e a omesubed el di kid el tang a sebechel el ngosukid el mo ungil el melilt a tekoi.

 ⁶ A ta er a rolel e kede tuib a rengud a sel bo el blak a rengud el mesuub a Bades me aike el babier el mesaod el kirel a Biblia. Ka di molatk er tiang, oleko ngmocha temem el mesuub el di kau el tang, me ke mla meluluuch el olengit er a Jehovah me lengesukau el mo oltaut a tekoi el mosuub er a Tekingel. Ke melatk el mo omes er a mubi er sel ongingil el kesus. Alta e ke mla remenges a chisel ngii el mubi el kmo ngkmal ungil, engdi ngdirrek el olecholt a tekoi er a deleboes me a uldikel.

⁷ Me ke melebedebek a ulekrael er a Paulus el ngar er a Efesus 5:3 el kmo: “Ngkiriu el diak le borngii ra ngeriu ra delongeliu a tekoi ra deleboes, ma bek el mengelengalek ma ngibes, e bai mo redemelir ar mechedaol.” Ke dirrek el melatk a tekingel el ngar er a Filipi 4:8. (Monguiu.) Me sel molebedebek er tia el ulekrael, e di el kau el oker er kau el kmo, ‘Ngak ak kultirakl a kerebil a Jesus el kirel a blekongesenges el mo er a Dios a lsekum ak kongei el mo omes er tia el mubi?’ Me ke mo mekerang? Ke di kongei el mo omes er ngii?

8. Ngera uchul me ngkired el mo blak a rengud el oltirakl a llechul a Dios?

⁸ Ngkmal cheleuid el tekoi a lsekum e kede choitechetur a blakerreng er kid el mo oltirakl a llechul a Jehovah, e le kede omdasu el kmo kede mesisiich me ngdiak demekesuseu er a mekngit el klausechelei, el uldimukl er aike el ongelaod el melisiich a tekoi er a deleboes me a uldikel. Ngbai kired el omekerreu er kid me a rengeleked er aike el tekoi el lolisiich a Satan. A rechad el ousbech a computer a meringel el oureor el mengetmokl a mesil er tir me lak el siseb a baiking el tomall aike el urerir el ngar er a chelsel. Te dirrek el mengetmokl a computer er tir e le a baiking a sebechel el mo soiseb er ngii e ousbech er tia el computer el melemall a bebil er a computer. Me nguaisei, kid me ngkmal kired el mo kerekikl el omekerreu er kid er a “ulekbat ra diabelong,” el ngii a sebechel el melemall er kid.​—Efesus 6:11.

9. Ngera uchul me ngkired el olengesenges er a Jehovah er a bek el sils?

⁹ Ngbek el sils el kired el melilt el kmo a tekoi el doruul ngoltirakl a soal a Jehovah me a lechub e ngdiak. Ngkired el olengesenges er a Dios e kiei el oltirakl a llechul me bo el sebeched el mo suobel. Ngsebeched el ochotii a klaumerang er kid sel doltirakl er a kerebil a Kristus el kirel a blekongesenges el mo lmuut “ra kodall.” A Jehovah a mo omekngeltengat er a blakerreng er kid. A Jesus a tilbir el kmo: “Ngdi ngikel outekangel el mo lmuut ra ullebongel a mosobel.” (Matteus 24:13) Tia belkul a kmo kede ousbech er a blekeu el ua blekeradel el lulechotii a Jesus.​—Psalm 31:24.

A Jesus a Kot el Ngar er a Bab el Kerebai el Kirel a Blekeu

10. Ngkired el oltngakl a ngera el blekeradel er tia el beluulechad?

¹⁰ Ngkired el oltngakl aika el blekeradel er a beluulechad el iliuekl er kid. A Rekristiano a chelebangel a tekoi er a klechad me a tekoi er a beluu me a kerruul me a klechelid el ngii a sebechel el choridid er a melemalt el rolel a Jehovah. A rebetok a chelebangel a ultok er a telungalek. Ngar er a bebil el beluu, e a skuul a melisiich er sel uldasu el kmo kede mla er a mongkii el mei, me a rebebil a omdasu el kmo ngdiak a Dios. Ngar er a chelsel aika el blekeradel, e ngkired el mo mesisiich el omtok aika el tekoi me bo lsebeched el omekerreu er kid. A kerebil a Jesus a olecholt er a rolel e ngsebeched el mo mesisiich er aika el tekoi.

11. Ngmekerang a dosuub el kirel a kerebil a Jesus a ngosukid el mo bekeu?

¹¹ A Kristus a dilu er a rulebengkel el kmo: “Cho mngara belulechad e kom chuarm; ngdi, bo mekereker, e ak mla mo kats er a belulechad.” (Johanes 16:33) Ngmle blechoel el oltngakl er a blekeradel er tia el beluulechad, e dimlak el becherei me el terebengii me lak el cherrengelii a omesiungel, me a lechub el temellii sel uldesuel el kirel a mera el omengull me a melemalt el omeruul. Me kid me ngkired el mo uai ngii. A Jesus a millekoi el kirir a rulebengkel el ngar er a nglunguchel el kmo: “Te diak le klalo ra belulechad, el ua ngak el diak kklalo ra belulechad.” (Johanes 17:16) Me sel dosuub e doltirakl er a kerebil a Jesus el kirel a blekeu, e ngsmisichid el mo bekeu el oltngakl a blekeradel er tia el beluulechad.

 Mosuub er a Blekengel a Jesus

12-14. Mosaod a bebil el kerebai er a Jesus el olecholt er a blekeu.

¹² A Jesus a ullecholt er a klou el blekeu er a chelsel a omesiungel. Ngdimlak lemedakt el ousbech er a deruchellel el Ngelekel a Dios el “mlo soiseb ra templo ra Dios el oldik ra rokui el olterau mar umchar el ngara mekesokes ra templo, e milukl a tebelir ar kerukem a udoud ma kingellir ar ulterau a belochel.” (Matteus 21:12) A resoldau er a be lomdechem er ngii er sel ulebongel el kesus er ngii er tia el chutem, e ngmle bekeu el omekerreu er a rulebengkel e dilu el kmo: “A lsekum ko mosiik er ngak e bechiiteterir tirikal chad me lorael.” (Johanes 18:8) A uriul e ngdilu er a Petrus me losisebii a saider er ngii er a blil, el ulechotii el kmo a Jesus a ultuil a uldesuel er a Jehovah, el diak el ultuil er a klekedall er tia el beluulechad.​—Johanes 18:11.

¹³ A Jesus a mle bekeu el olecholt a blulekngir me a chelbelderir a reklsuul el sensei er a taem er ngii e dilu el kmo: “Ngdi kom chebuul kemiu el cheblad el Farisee mar chellimosk ra llach! Ko mengesimer ra rengedel a eanged, me ngdiak bo lsiseb ar chad; . . . e olechib a medemiu e imikr a lmuut el meklou a blkul ra chelsel a llach, el ta klngesngelel, ma klechubechub, ma kloumerang; . . . ko mellib a ikrel a kob ma blatong, e a chelsel a mui ra nglemokel ma tameterreng el omellechemakl.” (Matteus 23:13, 23, 25) A rulebengkel a Jesus a kirir el mo obang a osisiu el blekeu, e le a remengeteklel a klechelid a mo oldechelakl e mekodeterir a rebebil er tir.​—Matteus 23:34; 24:9.

¹⁴ A Jesus a dirrek el mle bekeu el dechor el omtok er a remekngit el reng. A ta el taem e ngmlo duum er ngii a ta el chad el blekall er a mekngit el reng. Ngikang a kmal mle mesisiich me ngdi smongd a bombatel. A Jesus a mle bekeu el uleldik er aike el mekngit el reng el milengedereder er ngika el chad. (Markus 5:1-13) Chelecha el taem, e a Dios a diak el omesterir a remesiungel a klisichir el mo meruul a mengasireng el tekoi. Ngdi ngar er a urered el omerk a klumech el olisechakl er a rechad, e kede dirrek el mo oumekemad er a Satan, el ngii a mla “chouid a rengrir tirikel diak loumerang.” (2 Korinth 4:4) Me kid a ua Jesus, el klekedelled er a mekemad a “diak le klalo ra klechad, e ngbai ngarngii a klisichel er medal a Dios el toruud cheuatel,” el ngii aike el cheleuid el uldesuir a rechad el kirel a klechelid. (2 Korinth 10:4) Me a dousbech aika el klekedall er a mekemad el bilskid a Dios, e ngsebechel el mo uchul e kede suub a betok er a kerebil a Jesus.

15. A blekengel a Jesus ngmengai a uchetemel er a ngerang?

¹⁵ A blekengel a Jesus a mle ultuil er a klaumerang er ngii, me kid me ngdirrek el kired el mo bekeu el uai ngii. (Markus 4:40) Kede mekerang e mekurulii a mera el klaumerang? A kerebil a Jesus el kirel tiang a sebechel el omekrael er kid. Ngulechotii a cherrungel el klemedengei me a klaumerang er ngii el kirel a Biblia. A Jesus a uluusbech er tia el saider, el diak el mera el saider, e ngbai Tekingel a Dios, el Biblia. Ngmle blechoel el omelekl a osisecheklel el ousbech a Bades. Ngbetok el taem el ngar er a uchelel a  cheldechedechal e ngomuchel el melekoi el kmo “Ngellechukl el kmo,” e tiang a melutk el kirel a Tekingel a Dios. a

16. Kede mekerang e smisichii a klaumerang er kid?

¹⁶ Ngkired el menguiu e mesuub er a Biblia er a bek el sils e mo er a miting er a Rekristiano, e sichedekl er a rengud a klemerang el ngii a uchetemel a klaumerang, me bo el sebeched el dechor el mtekangel a ngii di el ringel el bo dechelebangel, e le kid el oltirakl er a Kristus. (Rom 10:17) Ngkired el melebedebek e omtab aike el dosuub me bo el sebechel el medalem er a rengud. Kede ousbech er a mesisiich el klaumerang el ngosukid el mo bekeu. (Jakobus 2:17) Ngkmal kired el meluluuch el kirel a klaumerang e le a klaumerang a rodech er a reng.​—Galatia 5:22.

17, 18. Ngmilekerang a ngeasek el odos e olecholt er a blekeu el ngar er a skuul?

¹⁷ A ngeasek el odos el Kitty a mlo medengei el kmo ngmekerang a mera el klaumerang e meskid a blekeu. Sera lekekerei e ngmle medengei el kmo ngdiak el kired el “merur ra evangkelio” sel dengar er a skuul, me ngkmal mle soal el omerk er a klumech el mo er tirke el ledak el ngar er a skuul. (Rom 1:16) A bek el rak e ngmillasem el omerk er a klumech el mo er a rebebil, engdi ngmle meringel er ngii el meruul er tia el tekoi el dektel a uchul. Sesei el rak er a uriul e ngmlo er a ngodech el skuul e dilu el kmo, “Chelechang e ngmo blak a renguk el ousbech a bek el techall el omerk er a klumech el ngar er a skuul.” Me ngmilluluuch el olengit er a blekeu me a ungil el techall me bo el sebechel el omerk er a klumech el ua Jesus.

¹⁸ Sel kot el sils er a skuul, e a sensei a ullengit er a rengalek er a skuul el mo ouchais a ngklir me a chisir. A rebebil a mlo ouchais el kirel a klechelid er tir, engdi te millekoi el kmo ngdimlak el blechoel el mo er a ikelesia er tir. A Kitty a mlo melechesuar el kmo tiaikid a kot el ungil el techall el lulluluuch el kirel. Me sera bo el temel el mo mengedecheduch e ngmle bekeu el kmo, “Ngak a ta er a Sioning er a Jehovah, me a kuusbech er a Biblia el omekrael er ngak er a omengull er ngak el mo er a Dios me a blekerdelek er a bek el sils.” Sera longedecheduch, e a rebebil er a rengalek a olsebesebek a mederir el mededenguul er ngii. E a rebebil a mle kerekikl el orrenges, e a uriul e te uleker a ker. A sensei a chilat er a Kitty e le ngii el mle sebechel el dechor el mesebechakl er a klaumerang er ngii. Ngkmal dmeu a rengul a Kitty el mle sebechel el mesuub er sel blekengel a Jesus.

Molecholt er a Klaumerang me a Blekeu el Ua Kristus

19. (a) A mera el klaumerang nguldimukl er a ngerang? (b) Kede mekerang e odeuir a rengul a Jehovah?

¹⁹ A rechapostol a dirrek el milechesuar el kmo a blekengir a kirel el mengai a uchetemel er a klaumerang. Te ullengit er a Jesus el kmo: “Mluut el dochel a kloumera er kemam!” (Monguiu er a Lukas 17:5, 6.) A mera el klaumerang a lmuut el klou er a di doumerang el kmo ngar er ngii a Dios. Tiang a uldimukl er a kmes el deleongel el obengkel a Jehovah, el di ua sel delongelel a ngalek me a betik a rengul el chedam. A Salomon a mlukreng el meluches el kmo: “Rungalek, sel bo le mellomes a rengum, e ng kmal mo ungil a renguk. Ng mo dmeu a renguk sel kurrenges er kau el melekoi a meral tekoi.” (Osisechakl 23:15, 16) Me nguaisei, sel doba blekeu el kirel a melemalt el omellach e kede odeuir a rengul a Jehovah, me a klaodengei er kid el kirel tiang a toketekii a blekenged. Mada, me bo doltirakl er a kerebil a Jesus el mo bekeu el dechor el kirel a llemalt!

[Footnote]

Ngsebechem el Mesaod?

• Ngera sebechel el mo ngosukid el mo bekongesenges alta e ngdiak demecherrungel?

• A mera el klaumerang ngmengai a uchetemel er ker, e kede mekerang e mo nguu?

• A debekongesenges e dolecholt er a blekeu el ua Jesus e ngmo uchul a ngerang?

[Aike el Ker er a Suobel]

[Siasing er a 15 el llel]

Kau ke mla tibir a rengum el mo oltngakl a ongetikaik?

[Siasing er a 17 el llel]

Ngsebeched el olecholt er a blekeu el ngii a mengai a uchetemel er a klaumerang el ua Jesus