‘Mosuub ra Kristus Jesus, me mdul mo oba tal uldasu.’​—ROM 15:5.

1. Ngera uchul me ngkired el mo obang a uldesuel a Kristus?

 A JESUS a dilu el kmo: “Mer ngak . . . e mosuub er ngak, e cho bo muaisei e a ulengull a mora reng er kemiu.” (Matteus 11:28, 29) Tia el okedong a ochotii a bltkil a rengul a Jesus, el ngii a mera el ungil el kerebai el kired el oltirakl er ngii. Me alta e ngmle Ngelekel a Dios e klou a klisichel, engdi a Jesus a ullecholt er a delemedemek e mle medengei a ringelir tirke el chormang.

2. Kede mo mesaod a ngera el blekerdelel a Jesus?

² Ngar er tia el suobel me aike el ongingil el eru el suobel, e kede mo mesaod el kmo kede mekerang e mo sebeched el mekurulii e lomelemii e dirrek el otireklii a “chomelebedebekel a Kristus” er a klengar er kid. (1 Korinth 2:16) Kede mo merriter aike el eim el blekerdelel a Jesus el delemedemek me a klengareourreng, me a blekokuii, me a blekongesenges er ngii el mo er a Dios, me a blekeu, me a diak lemekimd el bltikerreng.

Mosuub er a Kristus el Ullecholt er a Delemedemek

3. (a) Ngera el blekerdelel a klengareourreng a lullisechakl er ngii a Jesus el mo er a rulebengkel? (b) Ngmilekerang a Jesus er a lomes a chelitecheterir a rulebengkel?

³ A Jesus, el cherrungel el Ngelekel a Dios, a kilengei el mei er a beluulechad el me mesiou er a delongelir a rediak lemecherrungel el chad, el bebil er tir a milekodir er a uriul. Me nguaisei, engdi ngmillemolem el dmeu a rengul e uleba ulserechakl el reng. (1 Petrus 2:21-23) Me sel doltirakl a blekerdelel e ngsebechel el ngosukid el mo oba uldesuel, el ileakl sel sekum a rebebil a tomellii a rengud. (Hebru 12:2) Ngdirrek el milengemedaol er a rulebengkel el mo mesuub er ngii e ‘mo cholengii chongelungel er ngii.’ (Matteus 11:29) Ngmle sebechir el suubii el kmo a Jesus a mle medemedemek a rengul e klou a rengul el outekangel a chelitecheterir. Sel kesus er a uchei er a lemad, e ngmirriso a ocherir el ullisechakl er tir me lolemolem el olecholt er a ‘ngariou el reng.’ (Monguiu er a Johanes 13:14-17.) A Jesus a millatk a chelitecheterir er sera lak lolemolem el “mekar” a Petrus me a Jakobus me a Johanes. Me nguleker el kmo, “Simon, ngimiit a medam? . . . [Di] mekar e moluluuch, me lak mekesuseu; adang, a reng a soal, e a klechad a mechitechut.”​—Markus 14:32-38.

4, 5. Ngmekerang e sebechel a kerebil a Jesus el ngosukid el mo outekangel a chelitecheterir a rebebil?

⁴ Kede mo mekerang a lsekum a kldemed er a klaumerang a soal el mengaidesachel, e mereched el ngmasech a rengul, e meoud el oltirakl a omellach er a remechuodel me “ngikel blak a rengul e mellomes a rengul mesiou”? (Matteus 24:45-47) Ngkired el di kid el merriter er kid el kmo kede mekerang e mo oba “chomelebedebekel a Kristus” sel di lemereched el ngmasech a rengud er a omerellir a rebebil. E lak dobes el kmo a Jesus a dimlak bo el kesib a rengul er a rulebengkel el mo lmuut er sel taem er a lolecholt a chelitechetul a klereng er tir. Me alta e ngsebeched el ousubes a chelitecheterir a rechad er tia el beluulechad er a Satan, engdi ngblechoel el meringel er kid el ousubes a kngterir a rudam er kid.

⁵ Ka molatk er a tekoi el dilubech el mo er a apostol el Petrus. A Jesus er sera ledu er a Petrus me lemetengel er a bilas e lorael er bebul a daob el bedul ngii, e ngmera el mirrael el telkib el taem. Ngdi sera bo lemedakt er a rengelel a daob e ngulemuchel el orresors. A Jesus a mle sebechel el dmu el kmo, “Ka mesekau, bo  mcheremii!” Engdi ngdimlak, ngbai “dimlemereched lodersii a chimal lorekedii, e dmu el kmo, ‘Kau el kekere kloumera er kau, ngera me ngouesarech a rengum?’” (Matteus 14:28-31) Ngsebeched el mo oltirakl a blekerdelel a Jesus el mereched el ngosuir a odam el mo smisichii a klaumerang er ngii. Me tiang a mera el klou a ultutelel el suobel el sebeched el suubii er sel blekerdelel a Jesus, el ullecholt a delemedemek el mo er a Petrus.

6. Ngera el tekoi a lullisechakl a Jesus el mo er a rechapostol el kirel a skel a ngar er a bab el deruchall?

⁶ A Petrus a dirrek el mle teloi er a rechapostol el tir a mle kaititekangel el kmo ngtecha er tir a kot el ngar er a bab. A Jakobus me a Johanes a dul mle sorir el mo dengchokl er a kadikm me a katur er a kingellel a Jesus er a omengedereder. Sera lerenges aika el tekoi a Petrus me a rebebil, e ngmiltirm a rengrir. A Jesus a mle medengei el kmo ngoeak a rolel a ulekurulir e ngmilekdebechii tia el reng er a klaiuechit. Misei e ngdilu er tir el kmo: “Ko medengei el kmo, tirikel merreder rar ngodech el renged ra belulechad a mengedereder er tir, me tirikel ngarbab a meringel a tikingir er tir. E diak bo le uaisei ra delongeliu; ngikel soal ngarbab ra delongeliu a kirel mo mesiungiu, me ngikel soal mo kot ra delongeliu a kirel mo mesiungiu.” Me a Jesus a dilu el kmo: “El ua Ngelekel a chad el mlei el diak el kirel siungel, e ngbai kirel mesiou, e mengkengkii a klengar er ngii el ngbetir ar betok.”​—Matteus 20:20-28.

7. Ngmekerang e sebechel a derta er kid el melisiich er a kltarreng er a chelsel a ongdibel?

⁷ A doukerebai er a klengareourreng er a Jesus e ngsebechel el rullid el mo “kot el ngariou” er a delongelir a rudam. (Lukas 9:46-48) Tia el omeruul a sebechel el mo uchul a kltarreng. A Jehovah, el uai a chedam er a klou el telungalek, a soal a rengelekel a bo “le dak el kiei” el ta rengrir. (Psalm 133:1) A Jesus a milluluuch el mo er a Demal el kirir a rokui el mera el Kristiano el kmo: “Ak ngara chelsir me kau a ngara chelsek, me bo le cherrungel el tang, me bo lodenge belulchad el kmo kulderchak e betik a rengum er tir el ua ngak el betik ra rengum.” (Johanes 17:23) Tia el kltarreng a ochotii el kmo kede oltirakl er a Kristus. Ngsebeched el mo melechesuar tia el kltarreng sel bo doba uldesuel a Kristus el kirel a chelitecheterir a rebebil. A Jesus a mle mereched el ousubes me ngullisechakl el kmo a lsekum ngsoad el nguu a klausubes e ngkired el mereched el ousubes.​—Monguiu er a Matteus 6:14, 15.

8. Ngera sebeched el suub er a kerebai er tirke el meketeketang el mesiungel a Dios?

⁸ Ngsebeched el suub a betok sel doltirakl a klaumerang er tirke el mla mo betok el rak el loukerebai er a Kristus. Tirkang a ua Jesus el blechoel el klou a rengrir el kirel a chelitecheterir a rebebil. Te mla suubii el kmo a lolecholt a klechubechub el ua Kristus e ngdiak di lengesuterir el “loltour a chelitechut rar diak le misisiich,” e ngdirrek el meleketek er a kltarreng. Me a lmuut el tang, ngmelisiich er a ongdibel el rokir el mo oltirakl er a uldesuel a Kristus. Te dirrek el sorir a osisiu el tekoi el mo er a rudam er tir el ua sel uldesuel a Paulus el kirir a Rekristiano er a Rom el kmo: “A Dios ra ducherreng ma chongelaod le rellemiu el mo mesuub ra Kristus Jesus, me mdul mo oba tal uldasu, me bo lta rengmiu loba tal ngor el kobkellii a Dios el Demal a Rubak er kid el Jesus Kristus.” (Rom 15:1, 5, 6) Nguaisei, a doba kltarreng el mengull e ngmo uchul a odanges el mo er a Jehovah.

9. Ngera uchul me kede ousbech er a chedaol el reng el mo oltirakl er a kerebil a Jesus?

 ⁹ A Jesus a milsaod er a ‘ngariou el reng’ me a delemedemek, el ngii a rodech er a reng el kmo ngdmak el tekoi. Me a leuaisei, e kede ousbech er a chedaol el reng er a Jehovah me a omesubed er a kerebil a Jesus, me bo el sebeched el oukerebai er ngii. Ngkired el meluluuch el olengit er a chedaol el reng er a Dios e melasem el omekeroul a rodech er a reng el “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.” (Galatia 5:22, 23) Me a doltirakl er tia el blekeradel er a delemedemek me a klengareourreng el lulechotii a Jesus, e kede mo odeuir a rengul a Demad, el Jehovah.

A Jesus a Ullecholt er a Blekokuii el Mo er a Rebebil

10. Ngmilekerang a Jesus er a lolecholt er a blekokuii?

¹⁰ A blekokuii a rodech er a reng e a Jesus a mle blechoel el olecholt er ngii el mo er a rebebil. Tirke el rokui el ulsiik er a Jesus a mlo melechesuar el kmo “ngkmal uluuetkeu er tir.” (Lukas 9:11, NW) Ngera sebeched el suubii er a blekerdelel el mle bekokuii? A bekokuii el chad a ungil el sechelei, e medemedemek a rengul, e chubechub e bekururau. A Jesus a mle uaisei a blekerdelel. Ngmle chubteterir a rechad e le te “ua ikel diak chomekang el sib, me ngmechitechetong me ngblengkangk.”​—Matteus 9:35, 36.

11, 12. (a) Ka msodii a ta er a tekoi el lerirellii a Jesus el ngosuir a chad? (b) Ngera sebechem el suubii er a kerebil a Jesus?

¹¹ A Jesus a dimlak di el chebteterir a rechad e ngdirrek el ngilsuterir. Ka molatk er a redil el mla mo 12 el rak el lorael a rasech er ngii. Ngmle medengei el kmo ngoeak a Llach er a Moses e ngdiak el klikiid me a ngii di el chad el rutechii a dirrek el mo diak el klikiid. (Levitikus 15:25-27) A chisel me a omerellel a Jesus a ulterekokl el rirellii el mo oumerang el kmo ngmle sebechel e dirrek el soal el omekungil er ngii. Ngii el dil a milengedecheduch er a rengul el kmo: “A di kretechii ku bilel, e ak mo ungil.” Me ngmera el uleba blekeu e rirtechii a bilel me ngdi mle mereched el mo ungil.

¹² A Jesus a mlo medengei el kmo ngngar er ngii a rirtechii me ngulsiik el kmo ngtechang a rirtechii. Ngika el dil a kmal medektang e le ngtilemellii a llach me ngmlo obiou er a medal e uluuchais er ngii a rokui el tekoi. A Jesus nguluungeroel er ngika el chebuul el dil? Ngkmal dimlak. Ngbai dilu el kmo: “Rungalek, a kloumera er kau a ulemekungil er kau; morael el ngara budech, me bo mungil era rekdem.” (Markus 5:25-34) Ngkmal mlo ungil a rengul er a lerenges aika el ungil el tekoi!

13. (a) Ngera klekakerous er a blekerdelel a Jesus me a Refarisee? (b) Ngmle ua ngera omerellel a Jesus el mo er a rengalek?

¹³ A Jesus a kmal dimlak el ua tirke el diak el chubechub el Farisee el uluusbech er a deruchellir el omekberaod er a rechad. (Matteus 23:4) Ngbai mle chubechub e uleba kllourreng el olisechakl aike el rolel a Jehovah. Ngmle ungil el sechelirir a rulebengkel e mle blechoel el oubltikerreng  e chubechub el ua mera el sechelei. (Osisechakl 17:17; Johanes 15:11-15) A rengalek a mle beot er tir el mo er a Jesus, me ngii me ngdirrek el mle beot er ngii el obengterir. A tekoi el lurruul a dimlak el chesengur me bo lak a temel el obengterir a rengalek. A rulebengkel a mlerrob er a rengalek me lak lebo er a Jesus e le te dirk uleba sel uldesuir a remengeteklel a klechelid el kirel a ngar er a bab el deruchall. A Jesus a mlo chetil a blekerdelir me ngdilu el kmo: “Bechiiteterir ar mekekerel ngalek me le mer ngak, e lako molekebai er tir; ele ngkirir a rengedel a Dios.” Nguluusbech er a rengalek el olisechakl er a rulebengkel er a klou a ultutelel el tekoi el kmo: “Ak meral dmu er kemiu el kmo, ngikel melai ra rengedel a Dios, el diak le ua kekerel ngalek, a kmal diak bo lsiseb er ngii.”​—Markus 10:13-15.

14. A klemeriarreng el mo er a rengalek, ngerang mo rullii er a uldesuir?

¹⁴ Ka di molebedebek er a uldesuir tirke el ngalek sel bocha lemeklou el chad e lolatk er a Jesus el “milechulleterir e ulemor a chimal er bebrir, el ulemekngeltengat er tir.” (Markus 10:16) Me a chelechang, e a rengalek el tir a mo melechesuar a klemeriarreng er a remechuodel me a rebebil, a diak lobes aika el ungil el blekeradel el mlo er tir sel bo lemeklou el chad. Te dirrek el suubii a lmuut el klou a ultutelel el tekoi el kmo, a klisichel a Jehovah a obengterir a rechedal.

Molecholt a Blekokuii er a Chelsel Tia el Mekngit el Beluulechad

15. Ngera me ngdiak el mechas a rengud er a blekerdelir a rechad el meringel er tir el olecholt a blekokuii?

¹⁵ A rebetok el chad a melechesuar el kmo ngmeringel er tir el olecholt a blekokuii el mo er a rebebil. A rechedal a Jehovah a mo chelebangel a mekngit el omeruul er a bek el sils sel lengar er a skuul me a ureor me sel lomais a beluu me a dirrek el sel loldingel a obliil. A mekngit el omeruul a sebechel el tomall a rengud engdi tiang a diak el beches el tekoi. A Jehovah a ulemekrael er a Paulus el mo omeklatk er kid el kmo a remera el Kristiano er aika el “uriul sils” a mo iliuekl er a rechad el tir a “betik a rengrir ra di tir, . . . e diak le chubechub.”​—2 Timoteus 3:1-3.

16. Kede mekerang e olecholt a blekokuii er a chelsel a ongdibel el ua Kristus?

¹⁶ Ngar er a chelsel a ongdibel er a remera el Kristiano e ngsebeched el melechesuar a ungil el blekeradel, el ngii a kmal ngodech er a blekeradel er tia el mekngit el beluulechad. Me a derta er kid a sebeched el meruul a tekoi el mo uchul tia el ungil el blekeradel sel doltirakl er a blekerdelel a Jesus. Kede mekerang e meruul er tiang? Ngsebeched el ngosuterir a rebetok er a chelsel ongdibel el ousbech a ngeso me a omelisiich e le tir el chelebangel a betok el secherel a bedengir me a lmuut el bebil er a meringel el tekoi. Me alta e aika el mondai er a “uriul sils” a kmal betekngang, engdi ngdiak el beches el tekoi. A Rekristiano er a irechar a dirrek el chilebangel a osisiu el mondai. Me a leuaisei, e a ngeso a klou a ultutelel er a chelechang el kirir a Rekristiano el di ua ngar er a mong. El di ua tiang, a Paulus a milengelechel er a Rekristiano el mo mellach “rar kesibor, e molisiich rar mechitechut a rengrir, e mngesuterir ar mechitechut, e moba kllourreng el bedul tir rokui.” (1 Thesalonika 5:14) Tiang a belkul a kmo ngkired el lolecholt er a blekerdelel a Kristus el mle bekokuii.

17, 18. Ngera bebil el rolel e ngsebeched el oukerebai er a blekerdelel a Jesus el mle bekokuii?

¹⁷ A Rekristiano a ngar er a ngii a ngerechelir el ouetkeu er a rudam er tir, e olecholt a blekokuii el di ua Jesus, e kerekikl er a rokui el odam, el tirke el meketeketang el ngar er a ongdibel me tirke el dirk mle soiseb. (3 Johanes 5-8) Ngkired  el mo ua Jesus el ullecholt a klechubechub el mo er a rebebil me bo el sebeched el mengelaod er tir.​—Isaia 32:2; Matteus 11:28-30.

¹⁸ A derta er kid a sebeched el olecholt a blekokuii el mo er a rebebil sel doruul a ungil el mo er tir el olecholt el kmo kede omekerreu er tir e medengei a ringelir. Mousbech a bek el techall el mo ngosuterir. A Paulus a dilu el kmo: “Bo mungil kaubltikerreng loba bltikerreng ra klodam; e bo mkaidesachel el kakull.” (Rom 12:10) Me ngkired el oltirakl a kerebil a Jesus el ullecholt a blekokuii el mo er a rebebil e melasem el olecholt er a “diak a cheleblad er ngii el bltikerreng.” (2 Korinth 6:6) A Paulus a milsaod er a bltikerreng er a Kristus el kmo: “A bltikerreng choba kllourreng ma blekokuii; a bltikerreng a diak le mechechei, a bltikerreng a diak lolengesechekl er ngii e diak lomkuuk.” (1 Korinth 13:4) Misei e lak dorreked a ngesechel a rengud el mo er a rudam me a rudos er kid, e bai bo doltirakl er a uleklatk el kmo: “Bo bekokuii e mchubechub ra delongeliu, e mdul kausubes el ua Dios el ngara Kristus el uluusubes a kngtmiu.”​—Efesus 4:32.

19. Ngera el klengeltengat a mo er ngii sel dolecholt a blekokuii el ua Kristus?

¹⁹ A blekerdeled el soad el omekeroul e olecholt a blekokuii el ua Kristus, er a bek el taem er a chelsel a bek el blekeradel, a sebechel el mo uchul a betok el klengeltengat. Seikid e a reng er a Jehovah a mo mimokl el oureor er a chelsel a ongdibel, el melisiich er a rebek el chad el mo olecholt a rodech er a reng. Me a lmuut el tang, sel doltirakl er a kerebil a Jesus e ngsebeched el ngosuterir a rebebil el mo meruul er a osisiu el tekoi. A deuil a rengud e le kid el dmak el mengull a mo odeuir a rengul a Jehovah. Me a leuaisei, e bo leblak a rengud el olecholt er a delemedemek me a blekokuii el ua Jesus el ngar er a omerelled el mo er a rebebil.

Ngsebechem el Mesaod?

• A Jesus ngmilekerang e ochotii el kmo ngii a ‘medemedemek e ngariou a rengul’?

• A Jesus ngmilekerang e olecholt a blekokuii?

• Ngera bebil el rolel e kede olecholt a delemedemek me a blekokuii el ua Kristus er a chelsel tia el mekngit el beluulechad?

[Aike el Ker er a Suobel]

[Siasing er a 11 el llel]

Kid ngsebeched el ngosuir a odam er kid el mlo mechitechut a klaumerang er ngii, el ua Petrus?

[Siasing er a 12 el llel]

Ke mekerang e mo sebechem el melisiich a blekokuii er a chelsel a ongdibel?