‘A Dios a soal a obo merau, el betok a mlim me a ungil el siobai er kau. Di bo moumerang er ngii, e bsang aike el rokui el ngar er a chidbengem.’

A CHOUA itia el tekoi a lolisiich er ngii a bebil er a klechelid er a beluu er a Brazil, el ua losaod a simbung er sel beluu. E betok a rechad el oumerang er tia el tekoi. A Time magazine a mesaod a tekingir a rechad el kiei er a beluu er Merikel el leko te Kristiano el kmo: “A bekord el 61% er tir a oumerang el kmo a Dios a soal a rechad a bo lemerau, e a 31% er tir a kongei el kmo a lsekum ke msa Dios a rokui el ududem, e ngmo omekngeltengat er kau er a betok el udoud.”

A choua aika el klaumerang el melisiich er a uldasu el kmo a kerruul a mla er a Dios el mei a kmal mla mo klou er aike el beluu er a Latin-America, el ua beluu er a Brazil, me sei a uchul me a rechad a mo er aike el ikelesia el ngii a melisiich er tia el klaumerang. Engdi a Dios ngmera el omesterir a kerruul tirke el mesiou er ngii? Tirke el rokui el mesiungel a Dios er a irechar, te mle merau?

Ngar er a Chuodel el Renged, e kede menguiu el kirir tirke el ulemekngeltengat er tir a Dios el kmo te mle merau. El ua tiang, ngar er a Duteronomi 8:18 e ngkmo: “Molatk el kmo ng RUBAK el Dios er kemiu a ngii omeskemiu a klisiich el mo merau.” Tiang a ulemeklatk er a rechad er a Israel el kmo a lsekum te mo olengesenges er a Dios, e ngmo omekngeltengat er a rengedir.

E kuk ua ngerang el kirir a derta el mesiungel a Dios? A blak a rengul el chad el Job a kmal mle merau, e a uriul er a lechebulii a Satan, e a Jehovah a liluut el omekngeltengat er ngii el “erul chachisois.” (Job 1:3; 42:10) A Abraham a dirrek el mle merau me kede menguiu el ngar er a Genesis 13:2 el kmo: “Ng uluusib e oukaming e oukerbou e dirrek a silber ma kolt me ngmlar ngii er ngii.” Sera bo ldak a reteua el king er a ongos e ludechemii a chedal el Lot, e ngmilengideb “er a re blak a rengrir el chedal er a ikel tento er ngii, el mle 318 el rokui,” el tir a rengelekir a remesiungel. (Genesis 14:14) Me a Abraham a ulterekokl el mle betok a rechedal a telulngalek er ngii, el uldimukl er tirka el 318 el “blak a rengrir el chedal,” el tir a mle meduch el ousbech a klekedall er a mekekmad. Ngii el mle sebechel el omekerreu er tia el klou el telungalek er ngii, a ochotii el kmo ngkmal mle merau el chad el betok a chermel.

Nguaisei, a rebetok el blak a rengrir el mesiungel a Dios er a irechar, el ua Abraham me a Isak me a Jakob me a David me a Salomon, a mle merau. Me tiang ngbelkul a kmo a Dios a omesterir a kerruul tirke el rokui el mesiou er ngii? Me a lechub, e ngbelkul a kmo a chad el chebuul a diak el sebechel el nguu a kengei er a Dios? A ongingil el suobel a mo onger aika el ker.