“Ak mellach er kemiu ra ikal tekoi, el kirel me bo mkaubltikerreng.”​—JOHANES 15:17.

1. Ngera uchul me a Rekristiano er a kot el dart el rak a mle kirir el olekes er a klausechelei er tir?

 A JESUS a millisiich er a redisaiplo er ngii el mo melemolem er a klausechelei er tir, er sel ulebongel el kesus er ngii er tia el chutem. Ngar er tiaikid el osisiu el kesus, e ngdilu el kmo a bltikerreng el mocholt er a delongelir a mo dongcheterir el kmo te obengkel. (Johanes 13:35) Tirke el apostol a mle kirir el melemolem el melisiich er a klausechelei er tir me bo el sebechir el outekangel a odechelakl, e lecherrengelii a ureor el Jesus a ulterekeklii er tir. Me nguaisei, a Rekristiano er a kot el dart el rak a merrael a chisir el kirel a mesisiich el blakerreng er tir el mo er a Dios me a kmes el deluill er a delongelir.

2. (a) Ngerang a kired el meruul, e ngera uchul? (b) Ngera el ker a bo dosaod?

² Chelecha el taem, e ngkmal uchul a klou el deurreng sel deteloi er tia el cheldebechel el meliuekl er a beluulechad, el rechedal a oukerebai er a omerellir tirke el Kristiano er a kot el dart el rak. Kede kltmokl el mo olengesenges a llechul a Jesus el olecholt er a bliochel el bltikerreng er a delongeled. Me nguaisei, engdi a ruumesingd el chad er a chelecha el uriul el sils a blechoel el mengeblad e diak el chubechub. (2 Timoteus 3:1-3)  A klausechelei el loruul a blechoel el di meruul a ues e di mo uchul a klungiolir. Me a lsekum e ngsoad el melemolem el medangch el ua remera el Kristiano, e ngkired el meruul a tekoi el diak di dolatk a klungioled e lemerekong. Me bo dosaod aika el ker el kmo: Ngerang a uchetemel a ungil el klausechelei? Kede mekerang e mo ungil el sechelei? E oingerang e ngkired el dortii a klausechelei er kid? E mekerang a doleketek a ungil el klausechelei?

Ngerang a Uchetemel a Ungil el Klausechelei?

3, 4. Ngerang a uchetemel a mesisiich el klausechelei, e ngera uchul?

³ A kot el mesisiich el klausechelei a mengai a uchetemel er a bltkil a rengud el mo er a Jehovah. A King el Salomon a milluches el kmo: “Ma re terul chad a sebechir el mtekengii a odechelakl er a le di le tal chad. A le edei a kerrelel a ekil e ng meringel el meloched.” (Olisechakl 4:12) Me a lsekum a Jehovah a mo ongedei el ochulel a klausechelei, e ngulterekokl sel klausechelei el mo sebechel el outekangel a betok el tekoi.

⁴ Me nguaisei, tirke el diak el betik a rengrir er a Jehovah a dirrek el sebechir el remuul a ungil el klausechelei er tir. Engdi, a rechad el kaubltikerreng e le ngbltkil a rengrir el mo er a Dios a uchul, a mo mesisiich a deluill er tir. Me a lsekum e ngduubech a chetituokel el tekoi er a delongelir, e te mesmechokl er a deluill er tir el oltirakl a soal a Jehovah. Me a lsekum a rumtok a melasem el melemall er a kltarreng er a delongelir, e te mo medengei el kmo ngdiak el sebechir el tomellii a klausechelei er a delongelir a remera el Kristiano. Ngar er a reksi, e a remesiungel a Jehovah a mla ochotii el kmo te kongei el mo mad el kirir a resechelirir er a bai lolterekokl er tir.​—Monguiu er a 1 Johanes 3:16.

5. Ngera uchul me a klausechelei er a Ruth me a Naomi a mle mesisiich?

⁵ Ngkmal bleketakl el kmo, a kot el ungil el klausechelei a sebeched el metik er ngii er a delongelir tirke el betik a rengrir er a Jehovah. Ka molatk er a kerebai er a Ruth me a Naomi. Tirka el terung a tileketekii a kot el ungil el klausechelei el llechukl er a Biblia. Ngera uchul me a klausechelei er tir a mle mesisiich? A Ruth a ulechotii a uchul er a ledu er a Naomi el kmo: “A re chad er a beluam a mo chedak; ma Dios er kau a mo Dios er ngak. . . . A meringel belsel a RUBAK le mer ngak a lsekum ng ngodech el tekoi a choridak er kau el diak le kodall.” (Ruth 1:16, 17) Me nguaisei, a Ruth me a Naomi a dul mle dmolech a bltkil a rengrir el mo er a Dios, me te milecherei a bltikerreng me ngmelisiich er a delongelir. Me tiang a mlo uchul e te mlukngeltengat er a Jehovah el terung.

A Rolel e Kede Mo Ungil el Sechelei

6-8. (a) Ngsebechel a mesisiich el klausechelei el meteketek el okiu a ngerang? (b) Ngoeak a ngera el rolel e ngsebeched el omuchel a ungil el klausechelei?

⁶ A kerebai er a Ruth me a Naomi a ochotii el kmo a ungil el klausechelei a diak el sebechel el di ngii el meteketek. A uchetemel a klausechelei a sel bltkil a rengrir a rechad el mo er a Jehovah. Me nguaisei, a mesisiich el klausechelei a sebechel el meteketek el okiu a ducherreng me a reng er a omelenget. Ngmo lmuut er a ruchad me a rudam el tir a mengull er a Jehovah, me ngdirrek el kirir el oureor el toketekii a ungil el klausechelei er tir. Me a leuaisei, e kau ke mekerang e sebechem el mo ungil el sechelei?

 ⁷ Momuchel el meruul er tiang. A apostol el Paulus a millisiich er a resechelil el ngar er a ongdibel er a Rom el mo ‘blak a rengrir lometechakl rar merael.’ (Rom 12:13) Me a lsekum e ngsoad el mo ungil el sechelei, e ngkired el ousbech a bek el techall el omtechakl er a remerael. Ngdiak a chad el sebechel el meruul er tia el tekoi el kirem. (Monguiu er a Osisechakl 3:27.) A ta er a rolel e ngsebechem el mo ungil el sechelei a oeak sel mongemedaol er a rekakerous el chad er a ongdibel el mo omengur el obengkem. Kau ngsebechem el mo oltaut er tia el omeruul el omtechakl er a rechad?

⁸ A ta er a rolel e ngsebeched el omuchel el omak a klausechelei er kid a sel dolengit er a rebebil el mo obengked el oldingel a obliil. Sel mdechor er a medal a tuangel er a obliil, e morrenges er ngike el omdak el oldingel el mengedecheduch er a chad er a blai el ouchais er a bltkil a rengul el mo er a Jehovah, e ngulterekokl el rullau el kmal mo kmeed er ngii.

9, 10. Ngera el kerebai a lebilecherei a Paulus, e mekerang a doukerebai er ngii?

⁹ Molasem el mo medengelterir a rebetok. (Monguiu er a 2 Korinth 6:12, 13.) Ke mla ta el molatk el kmo ngkmal meringel er kau el mo er ngii a sechelim er a chelsel a ongdibel? Tiang uaisei e le ngdi kau el rullii el mo meringel er kau el melilt er a resechelim? A apostol el Paulus a meskid a ungil el kerebai el kirel a dolasem el mo medengelterir a rebetok el chad. Ngmle ta el taem el lulemdasu el kmo ngkmal diak el sebechel el mo sechelirir tirke el diak el chad er a Judea. Me nguaisei, engdi ngii a mlo “apostel rar Chisentail.”​—Rom 11:13.

¹⁰ Me a lmuut el tang, a Paulus a dimlak di lesechelirir tirke el ble letelbesebasech. El ua tiang, ngii me a Timoteus a kmal mle kausechelei, alta e ngmle kakerous a meklungir me a blekerdelel a klengar er tir. Chelecha el taem, e a rebetok el ngeasek a ngar er ngii a ungil el klausechelei er tir el obengterir a remechuodel el chad er a ongdibel. A Vanessa el 20 me a derengel a rekil a melekoi el kmo: “Ngngar er ngii a sechelik el 50 me a derengel a rekil, el sebechek el ouchais er ngii a rokui el tekoi, el ua kuuchais el mo er a sechelik el di ua klungek. Ngkmal imis el betik a rengul er ngak.” A choua aika el klausechelei ngmekerang e meteketek? A Vanessa a melekoi el kmo: “Ngdimlak el sebechek el di dengchokl e kbetik er tia el klausechelei, ngmle kirek el osiik er ngii.” Kau ke kongei el meleketek a klausechelei er kau el obengterir a rechad el kakerous a rekmiu? Sel moruul el uaisei, e a Jehovah a ulterekokl el mo omekngeltengat er kau.

11. Ngera kede suubii er a kerebil a Jonathan me a David?

¹¹ Moba blakerreng el bedul a sechelim. A Salomon a milluches el kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.” (Osisechakl 17:17) Sera loluches aika el tekoi, e nglocha millatk er sel klausechelei er a demal el David, me a Jonathan. (1 Samuel 18:1) A King el Saul a mle soal a  ngelekel el Jonathan a bo leking er a beluu er a Israel. Engdi a Jonathan a kilengei er sel tekoi el kmo a Jehovah a mla ngiltii a David el mo king. Me a Jonathan a dimlak el ua demal er a Saul el mlo mechechei er a David, er a lengai a chetengakl me a lechub e ble lemereched el mlo oumerang a klsuul el tekingel a demal. (1 Samuel 20:24-34) Me kid kede ua Jonathan, el dmeu a rengud a lsekum a resechelid a mo er ngii a ngerechelir er a chelsel a ongdibel? Kid kede mo mengelaod e olengeseu er a resechelid sel bo lechelebangel a ringel? Kid kede mereched el mo oumerang a mekngit el tekoi el medung el kirir a resechelid? Me a lechub e kede mo ua Jonathan el oba blakerreng el mesebechakl er a resechelid?

Sel Bocha el Kirel el Medort a Klausechelei

12-14. Ngera el omelsemai a lechelebangel a rechad el mesuub a Biblia, e kede mekerang e ngosuterir?

¹² A lsekum a chad el mesuub a Biblia a omuchel el melodech a blekerdelel a klengar er ngii, e ngulterekokl el mo chelebangel a omelsemai er a resechelil. Nglocha ngar er ngii a resechelil el kmal soal lobengterir engdi tir a diak loltirakl a llechul a Biblia. Ngdirrek el milengoit a klou el taem el obengterir er a uchei, engdi chelechang e ngsebechel el mesang el kmo a mekngit el omerellir a sebechel el mengesuseu er ngii, me ngmelechesuar el kmo ngklou a ultutelel el kirel el mengesadel a temel el obengterir. (1 Korinth 15:33) Me nguaisei, nglocha mo melechesuar el kmo a lsekum e ngdiak lobengterir e ngua lak lomekerreu er tir.

¹³ Me a lsekum kau a mesuub a Biblia e chelebangel er tia el tekoi, e lak mobes el kmo a mera el sechelim a mo dmeu a rengul el omes er kau el ngodechii a blekerdelel a klengar er kau el mo ungil. Nglocha mo soal el obengkem el mesuub el kirel a Jehovah. Engdi tirke el leko te sechelim a mo ‘oltuub er kau ele chelechang e ngdikea mobenterir el ngar chouaisel mengelengalek lomeruul.’ (1 Petrus 4:3, 4) Nguaisei, kau a diak lak momekerreu er a resechelim, e ngbai tir a mekngit a omerellir.

¹⁴ Sel lomuchel a chad el mesuub a Biblia el mengeroid er ngii er a resechelil, el tir a diak el betik a rengrir er a Dios, e a rechad er a ongdibel a sebechir el mo sechelil. (Galatia 6:10) Kau ke medengelterir tirke el omais el mei er a miting, el tir a mesuub a Biblia? Ke blechoel el mo mengedecheduch er tir, e dirrek el melisiich er tir?

15, 16. (a) Kede mekerang a lsekum a sechelid a mo diak losiou er a Jehovah? (b) Kede mekerang e ochotii a bltkil a rengud el mo er a Dios?

¹⁵ E kuk mekerang a lsekum a sechelid er a ongdibel a mo diak losiou er a Jehovah me ngmocha kirel el mesuld a ngklel? Ngmekngit a rengud sel leduubech a choua itia el blekeradel. A ta el odos a ouchais er a blekerdelel er a bo lak losiou er a Jehovah a ta el sechelil el kmo: “Ngkmal mlo mekngit a renguk e le ak kulemdasu el kmo a sechelik a mle mesisiich er a klemerang. Ak melatk el kmo nglocha di milsiou er a Jehovah e le ngmle soal loldeu a rengrir a rechad er a blil. Misei e ak kulemuchel el di ngak el merriter el kmo: Ngak ak mesiou er a Jehovah e le ngmera el soak?” Me ngmilekerang? Ngdilu el kmo: “Ak kuluuchais aike el ngar er a renguk el mo er a Jehovah, e tilbir el kmo ak mo mesiou er ngii, el diak el belkul a kmo ngii el omeskak a resechelik er a chelsel a ongdibel, e ngbai sel bltkil a renguk el mo er ngii a uchul.”

¹⁶ Ngdiak el sebeched el melemolem el sechelil a Jehovah a lsekum kede ousechelei er tirke el chad el sorir el sechelil tia el beluulechad. A Jakobus a milluches el kmo: “Ngdiak modengei el kmo a dousechelei ra belulechad e kede cherarou ra Dios? Tirikel sorir lousechelei ra belulechad a di tir el rulleterir el mo cherarou ra Dios.” (Jakobus 4:4) Ngsebeched el ochotii el kmo ngbetik a rengud er a Dios el oeak sel doumerang el kmo a lsekum a sechelid a choitid, e a Dios a mo ngosukid el outekangel a dolemolem el oba blakerreng  el mesiou er ngii. (Monguiu er a Psalm 18:25.) Ngike el odos el dulsaod er ngii er a uchei a melekoi el kmo: “Ak silubii el kmo ngdiak el sebeched el meruul er a chad el mo betik a rengul er a Jehovah me a lechub e ngkid. Tiang a di mo ultuil er ngike el chad.” Me ngera kired el meruul me bo el sebeched el meleketek er a klausechelei er kid el obengterir tirke el ngar er a chelsel a ongdibel?

Mlemelemii a Ungil el Klausechelei

17. Te mekerang a rungil el sechelei a lechadecheduch er a delongelir?

¹⁷ A ungil el cheldecheduch er a delongeled a okesengii a klausechelei er kid. Sel donguiu el kirel a klausechelei er a Ruth me a Naomi, me a David me a Jonathan, me a Paulus me a Timoteus, e ngsebeched el mesang el kmo a ungil el klausechelei er tir a mlo er ngii, e le ngungil el cheldecheduch me a omengull er a delongelir a uchul. A Paulus a milluches el kirel a rolel a ungil el cheldecheduch el kmo: “Mdiblechoel lousbech a medemedemek el cheldecheduch, el ulsar.” Tia el tekingel a millutk el kirel sel rolel a dongedecheduch er tirke el “ngara ikrel” a ongdibel, el tir a diak el rudam er kid el Kristiano. (Kolose 4:5, 6) Me a lsekum me ngkired el olecholt a omengull sel dongedecheduch er tirke el diak el ngar er a klemerang, e ngkmal klou a ultutelel el doruul el uaisei el mo er a rechad el ngar er a ongdibel.

18, 19. Ngmo ua ngera uldesued a lsekum a ta er kid el Kristiano a mellach er kid, e ngera el kerebai a lebilecherei a remechuodel er a Efesus el kired?

¹⁸ A rungil el sechelei a kerekikl el melatk a uldesuel a ta me a tang, me bo el sebechel el ungil e bleketakl a cheldecheduch er a delongelir. A mellomes a rengul el King el Salomon a milluches el kmo: “A ungil tekoi odesebii a rengul a chad, me ng ungil a le medung er sel kirel el belsechel.” (Osisechakl 15:23) Kau ke kongei er a uleklatk a lsekum a sechelim a omeklatk er kau? (Monguiu er a Psalm 141:5.) Ngmo ua ngerang a uldesuem a lsekum a sechelim a omeklatk er kau el kirel a omerellem? Ke omes aika el tekingel el ua lolechotel a bltkil a rengul me a lechub e ngmo kesib a rengum?

¹⁹ A apostol el Paulus a dileu a rengul er a kmes el deleongel er ngii me a remechuodel er a ongdibel er a Efesus. Ngmlo medengelterir a rebebil er tir er a bocha le Kristiano. Ngar er sel ulebongel el ongdibel er tir, e ngmle mesisiich el mellach er tir. Me te milekerang? Ngmle ungil a rengrir el ngmai a uleklatk, e le te mlo melechesuar a bltkil a rengul el mo er tir, me te kmal lilangel sel lolatk el kmo ngdikea lluut el mo mesang.​—Rellir 20:17, 29, 30, 36-38.

20. Ngerang mo meruul a ungil el sechelei?

²⁰ A rungil el sechelei a diak di lekengei a uleklatk, e te dirrek el omeklatk. Me nguaisei, engdi kid el rokui a diak el kired el ‘oltoech a ngered er a tekingir a re bebil.’ (1 Thesalonika 4:11) E diak dobes el kmo “ar derta er kid a kirir el mo mesaod er tir ra Dios.” (Rom 14:12) Ngdi a ungil el sechelei a omeklatk er a kldemel el kirel a llechul a Jehovah sel bo el kirel. (1 Korinth 7:39) El ua tiang, ke mo mekerang a lsekum e ke omes er a mesobil el sechelim el mocha meruul er a deluill er ngii el obengkel a chad el diak el ngar er a klemerang? Ngmo diak momeklatk er ngii e le ngchetim el tomellii a ungil el klausechelei er kemiu? Me a lechub, e ke mo mekerang a lsekum a sechelim a diak el kengei aika el uleklatk? A ungil el sechelei a mo osiik a ngeso er a rebetik a rengrir el mengkerengel a sib me bo lsebechir el ngosuir a kldemel, el ngii a mocha er a cheleuid el rael. Choua itia el omeruul a ousbech a blekeu. Me nguaisei, ngdiak a ngii di el tekoi el sebechel el mo tomellii a klausechelei el ngii a mengai a uchetemel er a bltikerreng el mo er a Jehovah.

21. Kid kede blechoel el mekerang, e ngera uchul me ngklou a ultutelel el delemelemii a mesisiich el klausechelei er kid er a chelsel a ongdibel?

²¹ Monguiiu er a Kolose 3:13, 14. A lebebil er a taem e a omerelled a melibas er a resechelid, me a lechub e ngmo chetid a omerellir. A Jakobus a milluches el kmo: “Kid el rokui a remuul a betok el tellemall.” (Jakobus 3:2) Me nguaisei, a mera el sechelid a diak lomechur a ildisel a klengit el deriruul, e ngbai ousubes a rokui el tekoi. Me ngkmal klou a ultutelel el doleketek a mesisiich el klausechelei el oeak a ungil el rolel a cheldecheduch me a klausubes er a delongeled! A dolecholt er a choua isel el bltikerreng e ng “chochull el mengerrungel.”

Ngmekerang a Omonger?

• Kede mekerang e toketekii a ungil el klausechelei?

• Ngoingerang e ngkirel el medort a klausechelei?

• Ngera kired el meruul me bo el sebeched el lomelemii a mesisiich el klausechelei?

[Aike el Ker er a Suobel]

[Siasing er a 24 el llel]

Ngerang a mle uchetemel a mesisich el klausechelei er a Ruth me a Naomi?

[Siasing er a 25 el llel]

Kau ke blechoel el oltuchakl er a rechad?