A NGALEK el redil el etiu a rekil er a beluu er a Brazil el mla chemudel a ududel a ulemii ngii el udoud el mo eru el bliongel, el tang a 18 el kluk me a sel tang a 25 el kluk. Ngngilai a 18 el kluk el mo locha er a blil a tenget er a Kingdom Hall er ngii el mo olengeseu el omechar aike el lousbech a ongdibel. E sola e uldurokl aike el 25 el kluk el mo er a obis er a branch er a Resioning er a Jehovah, el obengkel a kedeb el babilengel. Ngmelluches el ngar er a babilengel el kmo: “Ngsoak el melenget aika el udoud el mo olengeseu er a rudam me a rudos el meruul er a ureor er a berkel a klumech er a beluulechad el rokir. Ngkmal betik a renguk er a Jehovah a uchul me ak meruul er tia el tekoi.”

A demal me a delal ngika el ngalek a mla osisecheklii er a klungel a ultutelel a doruul aike el sebeched el olengeseu er tia el ureor er a berkel a klumech er a Renged. Te dirrek el ulsisecheklii el kmo ngkired el ‘mengull er a RUBAK el okiu omelenget el ikel kot el ungil’ er kid. (Osisechakl 3:9) Me kid el rokui a soad el mo uai ngika el ngalek el redil, el mo blak a rengud el melisiich a tekoi er a Renged, el ngar er a beluad me a dirrek el beluulechad el rokir!