“Ele konger a nglunguuch. A rokui el chad a mer kau el kirel a kngterir.”​—PSALM 65:2.

1, 2. Ngera uchul me a remesiungel a Jehovah a meluluuch el mo er ngii el oba ulterekokl el reng?

 A JEHOVAH a di blechoel el lorrenges a nglunguchir a reblak a rengrir el mesiungel. Kede oba ulterekokl el reng el kmo ngorrenges a nglunguched. Ngmo lmuut er a taem el rebetok el miliol el mesiungel a Jehovah a meluluuch er a osisiu el taem, me Ngii a di sebechel el orrenges er a dersta me a dersta er tir.

² A David el ta er a milluches er a Psalm a mle ulterekokl a rengul el kmo a Dios a orrenges a ongtil me ngdilu el kmo: “Ele konger a nglunguuch. A rokui el chad a mer kau el kirel a kngterir.” (Psalm 65:2) A nglunguchel a David a mlonger e le ngii el mle blak a rengul el mengull er a Jehovah. Ngsebeched el di kid el merriter er kid el kmo: ‘A ongtik ngolecholt el kmo a kuumerang er a Jehovah me a bliochel el omengull er ngak ngklou a ultutelel? A nglunguchek ngolecholt a ngerang el kirek?’

Moluluuch el Mo er a Jehovah el Oba Klengareourreng

3, 4. (a) Ngkirel el mo ua ngerang a blekerdeled sel doluluuch? (b) Ngkired el mekerang a lsekum e ngoberaod a ‘uldesued’ e le kid el mla ruebet er a klengit?

³ A lsekum e ngsoad a lemonger a nglunguched, e ngkired el meluluuch el mo er a Dios el oba klengareourreng. (Psalm 138:6) Ngkired el olengit er a Jehovah me ngmerriter er kid el ua ledilu a David el kmo: “Morriter er ngak kau el Dios, e bo modengelii a renguk; e mesemak me betik a uldesuek. Momes ma le ngar ngii a cheleblad er a chelsek, e morolak er a rael el di ngar ngii el mo cherechar.” (Psalm 139:23, 24) Me a doluluuch el mo er a Dios e ngkired el kongei er ngii me ngmerriter e mellach er kid el oeak a Tekingel. A Jehovah a sebechel el omekrael er kid el mo “cherechar,” el oeak sel lengesukid el mo merael er a rael el mo er a diak a ullebengelel el klengar.

⁴ E kuk mekerang a lsekum ngoberaod a ‘uldesued’ e le kid el mla ruebet er a klengit? (Monguiu er a Psalm 32:1-5.) Sel dolasem el omart er a mekngit el ukltked, e ngsebechel el mengitechut er kid, el ua kerrekar el sebechel el mo merat e mad er a temel a klou el kleald. A kngtil a David a uchul e ngurridii a deurreng er ngii e mlo smecher. Engdi ngkmal mlo ungil a rengul er a lolecholt a kngtil el mo er a Dios! Ka di molatk er a deurreng el blo lolechesuar er sera bo lodengei el kmo a ‘kngtil a mla musubes,’ e le Jehovah a uluusubes er ngii. Me a dolecholt a kngtid el mo er a Dios, e ngsebechel el mo uchul a ongelaod. Me a remechuodel el Kristiano a dirrek el sebechir el olengeseu er a chad el mlo er a klengit el lmuut el mo ungil a deleuill er ngii me a Jehovah.​—Osisechakl 28:13; Jakobus 5:13-16.

Molengit er a Dios e Moureng a Sulel

5. Ngera belkul a dolengit a ngeso er a Jehovah?

⁵ A lsekum e ngblechoel el di suebek a rengud er a ngii di el ngerang, e ngkired el melatk er a uleklatk el ledillii a Paulus el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” (Filipi 4:6) Me a dolengit e ngbelkul a kmo “kede olengit el oba klengareourreng.” El ileakl er sel taem el dechelebangel a kdekudel el blekeradel me a lechub e ngodechelakl e ngkmal kired el meluluuch el mo er a Jehovah el olengit a ngeso me a ulekrael.

6, 7. Ngera uchul me ngkired el odekiar a omereng el saul er a nglunguched?

⁶ Ngera ngochotii a blekerdeled a lsekum kede di  meluluuch el mo er a Jehovah er sel taem el dousbech a ngeso er ngii? A Paulus a dilu el kmo a ongtid el mo er a Dios a kirel el medung el obengkel a “chomereng el saul.” Ngkmal ngar er ngii a ungil el uchul e ngkired el oba omereng el saul el ua David er a ledu el kmo: “Kau e RUBAK a ngarbab, e mesisiich, e kebkall, e chetengakl, e meang, ele ikel ngar ngii er a eanged ma chutem a di kloklem, ma renged me ng kloklem e RUBAK, ele kau a merreder a rokui el tekoi. . . . Me chelechang e Dios er kemam, e aki mereng a sulem, e oldanges er a kebkall el ngklem.”​—1 Kronika 29:11-13.

⁷ A Jesus a uluureng a sulel a Dios el kirel a blauang me a bilong el luluusbech er sel ulebongel el belsilel ngii me a rulebengkel. (Matteus 15:36; Markus 14:22, 23) Me a dolecholt er a osisiu el ungil el tekoi, e ngkired el “mereng a sulel a Jehovah” el kirel a ‘mengasireng el tekoi el le riruul el kired,’ me a ‘melemalt el llechul’ e dirrek el mereng a sulel el kirel a tekingel me a klemechel el ngii a sebeched el metik er a Biblia.​—Psalm 107:15; 119:62, 105.

Moluluuch el Kirir a Rebebil

8, 9. Ngera uchul me ngkired el meluluuch el kirir a rudam me a rudos er kid?

⁸ Kid a ulterekokl el blechoel el meluluuch el di kired engdi a nglunguched a dirrek el kirel el medung el kirir a rebebil, el uldimukl er a Rekristiano el diak dodengei a ngklir. Me alta e a apostol el Paulus a dimlak lodengelterir a rokui el Kristiano er a Kolose, engdi ngmilluches el kmo: “Sel ki moluluuch el kiriu, e a ki diblechoel mereng a sulel a Dios, el Demal a Rubak er kid el Jesus Kristus, ele ki rirenges a kloumera er kemiu el kirel a Kristus Jesus, ma bltikerreng el ngarngii er kemiu el kirir a rokuil mechedaol.” (Kolose 1:3, 4) Ngdirrek el milluluuch el kirir a Rekristiano el ngar er a Thesalonika. (2 Thesalonika 1:11, 12) Me nguaisei, sel doluluuch el kirir a rudam me a rudos er kid el Kristiano e kede olecholt el kmo kede melatk er tir.

⁹ A nglunguched el kirir a rengellitel el Kristiano me tirke el ‘ngodech el sib’ a olecholt el kmo kede kerekikl el melatk er a cheldebechelel a Dios. (Johanes 10:16) A Paulus a millekoi er a rekldemel er a omengull me loluluuch el kirel, ‘me lsebechel loba blekeu el meketeklii a bertelel a evangkelio.’ (Efesus 6:17-20) Me kid kede dirrek el meruul er a osisiu el tekoi el meluluuch el kirir a rudam me a rudos er kid?

10. Ngerang rullii er kid sel doluluuch el kirir a rebebil?

¹⁰ A doluluuch el kirir a rebebil, el ileakl a chad el blechoel el diak el soad a blekerdelel, e ngsebechel el ngodechii a uldesued el kirel. (1 Johanes 4:20, 21) A choua ikaikid el nglunguuch a kmal melisiich e dirrek el meleketek a kltarreng er a delongeled kid me a rudam er kid. Me a lmuut el tang, aikaikid el nglunguuch a dirrek el ochotii el kmo kede oubltikerreng el ua Kristus. (Johanes 13:34, 35) Tia el bltikerreng a rodech er a chedaol el reng er a Dios. Kid kede blechoel el meluluuch el olengit er a chedaol el reng er a Jehovah me lengesukid el mo olecholt a rodech er a reng el bltikerreng, ma deurreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma omengerem? (Lukas 11:13; Galatia 5:22, 23) A doruul el uaisei, e a tekinged me a omerelled a ochotii el kmo kede kiei el oltirakl er a chedaol el reng er a Jehovah.​—Monguiu er a Galatia 5:16, 25.

11. Ngera uchul me ngsebeched el olengit er a rebebil me loluluuch el kired?

 ¹¹ A lsekum kede mo medengei el kmo a ngeleked a ngar er ngii a techellel el mo mechitikaik el mo mengeblad a subelel er a skuul, e ngkired el meluluuch el kirel, e dirrek el ousbech a bades el ngosuir el mo mesang el kmo ngkirel el meruul a tekoi el ngar er a melemalt el rolel. A Paulus a dilu er a Rekristiano er a Korinth el kmo: “A ki meluluuch el mora Dios me bo lak moruul a mekngit.” (2 Korinth 13:7) A choua aika el nglunguuch a odeuir a rengul a Jehovah e olechotel a ungil el blekerdeled. (Monguiu er a Osisechakl 15:8.) Ngsebeched el olengit er a rebebil me loluluuch el kired, el di ua apostol el Paulus el dilu el kmo: “Moluluuch el kiram, a ki oumera el kmo a ki oba klikiid lukltkam, me ngsomam el melemalt loureor el kirel a ngiidil tekoi.”​—Hebru 13:18.

A Nglunguched a Olecholt a Betok el Kired

12. Ngera aike el meklou a ultutelel el tekoi el kirel medung er a nglunguched?

¹² A nglunguched ngolecholt el kmo ngdmeu a rengud e blak a rengud el mesiungel a Jehovah? A ongtid ngoltirakl aike el soal a Dios, me a tekoi er a berkel a klumech er a Renged, me a omengebkall el kirel a omengederederel, me a omengedolel a ngklel? Aika el tekoi a kirel el mo kot el meklou a ultutelel er a chelsel a nglunguched, el ua lulechotii a Jesus el ngar er a nglunguchel, el kmo: “A Demmam el ngara eanged, le mechedaol a ngklem. A rengedem le mei, ma uldesuel a rengum le meruul ra belulechad el ua chomerellel ra eanged.”​—Matteus 6:9, 10.

13, 14. A nglunguched ngolecholt a ngerang el kired?

¹³ A nglunguched el mo er a Dios a olecholt a moktek er kid, me a tekoi el desemeriar er ngii me a urunguled. A Jehovah a medengei el kmo kede ua ngera el chad. A Osisechakl 17:3 a kmo: “A kolt ma silber a measem er a ngau, e a rengul a chad a measem er a RUBAK.” A Dios a sebechel el mes aike el ngar er a rengud. (1 Samuel 16:7) Ngii a medengei el kmo ngua ngerang a uldesued el kirel aike el miting er kid me a omesiunged me a dirrek el rudam me a rudos er kid er a klereng. Ngdirrek el medengei a uldesued el kirir a ‘rudam’ er a Kristus. (Matteus 25:40) Ngmedengei el kmo a nglunguched a mera el oltirakl a urunguled, el diak di domelekl a tekoi. A Jesus er a loluluuch e ngdilu el kmo: “Me sel moluluuch e lak muar Chisentail el omelekl a diak a blkul tekoi; e tomdasu el kmo a le betok a ildisel chomelekoi e ngmorenges.”​—Matteus 6:7.

¹⁴ A nglunguched a dirrek el ochotii el kmo kede mera el ultuil er a Dios. A David a dilu el kmo: “Ele kau a omertelek, ke mesisiich el cheuatel el sobecheklak er a cherarou. Di bo kblechoel el kiei er a tento er kau, me bo kselebechakl er eungel osebekem.” (Psalm 61:3, 4) Sel okesiu er a Dios el kirel a ‘tento’ el mo dokedekid a belkul a kmo kede mo kiei e dmeu rengud el ngar er a eungel a ulekerreuil. (Chocholt 7:15) Ngkmal mengelaod a reng sel bo dekeed er a Jehovah el oeak a nglunguuch, e doba ulterekokl el reng el kmo Ngii a ngar er a bita er kid er a taem er a ngii di el omelsemai er a klaumerang er kid!​—Monguiu er a Psalm 118:5-9.

15, 16. A nglunguched ngngosukid el mo ungil el tichiir a ngera el tekoi el kirel a ileakl el techall er a omesiou?

¹⁵ A melemalt el nglunguched el mo er a Jehovah el kirel a moktek er kid a ngosukid el mo tichiir a klemerang er a nglunguched. El ua tiang, a klemeriarreng er kid el mo mesiou er a Dios el teloi er a rechedal, ngolechotel a urunguled el soad el olengeseu, e remuul aike el sebeched er a ureor er a berkel a klumech er a Renged me a dirrek el chelsel a ongdibel? Me a lechub e ngsoad el meruul aika el tekoi e le ngsoad el mo “bderrir ar bek el chad” me a lechub e kede mo “mengedereder rar chad”? Aikang a diak el kirel el blekerdelir a rechedal a Jehovah. (Monguiu er a 3 Johanes 9, 10; Lukas 22:24-27.) A lsekum e ngcheleuid a urunguled, e a  melemalt el nglunguched el mo er a Jehovah el Dios a sebechel el ngosukid el mo tichiir a klemerang er a cheleuid el urunguled, e ngosukid el mo ngmodech er a uchei er a bo lemesisiich er a chelsel a rengud.

¹⁶ A Rekristiano el bechiil el redil a locha dirrek el mo er ngii a urungulir el sorir a rebecherir a bo losiou el ua rudam el olengeseu er a remechuodel, me a lechub e te mo mechuodel. Tirka el odos a ouchais a urungulir sel loluluuch el mo er a Dios, e dirrek el kerekikl me ngungil a omerellir. Tiang a kmal klou a ultutelel e le a cheldechedecherir me a omerellir a rechedal a telungalek er a chad a kmal klou a lerellii er a osengir a rechad er a ongdibel el bedul ngii.

Meluluuch er a Buai el Omtechei er a Rebebil

17. Ngera uchul me ngungil a bo decheroid er a rechad e doluluuch?

¹⁷ A Jesus a mle blechoel el cheroid er a seked me bo el sebechel el ileakl el meluluuch el mo er a Demal. (Matteus 14:13; Lukas 5:16; 6:12) Kid me kede dirrek el ousbech er tia el omeruul. Sel dengar er a ileakl el basio el cheroid er a rechad e doluluuch, e ngsebeched el mo ungil el melilt a tekoi, el ngii a odeuir a rengul a Jehovah, e ngosukid el melemolem el melisiich er a omengull er kid el mo er ngii. Me nguaisei, a Jesus a dirrek el milluluuch er a buai, e tia el omerellel a kired el oukerebai er ngii me bo el sebeched el meluluuch el ngar er a melemalt el rolel.

18. Ngera el tekoi a kired el melatk sel doluluuch el omtechei er a ongdibel?

¹⁸ Ngar er aike el miting er kid, e a reblak a rengrir el sechal er a ongdibel a meluluuch el omtechei er kid. (1 Timoteus 2:8) A rekldemed er a klaumerang a sebechir el melekoi el kmo “amen,” el belkul a kmo “bo leuaisei,” er a uriul er a bo lemerek a nglunguuch. A omeruul el uaisei a olechotel a kmo kede kongei er a tekoi el mildung. A nglunguchel a Jesus a mle bleketakl el dimlak el kora olekibetiekl er a rechad. (Lukas 11:2-4) Me a lmuut el tang, ngdimlak losaod a rokui el ngeso me a lechub a mondai er a derta el chad el ulerrenges er ngii. A ongit el kirir a rederta el chad a kirel el ileakl, el diak el uldimukl er a nglunguuch er a buai. Me ngike el meluluuch el omtechei er a rechad a kirel el kerekikl me ngdiak lomasech a berrotel el tekoi.

19. Ngkirel el mo ua ngerang a blekerdeled sel dorrenges a nglunguuch er a ongdibel?

¹⁹ Ngkired el olecholt er a ‘dakt ra Dios’ sel dorrenges a nglunguuch er a ongdibel. (1 Petrus 2:17) Ngngar er ngii a taem me a basio el kirel a bebil er a omeruul, el ngii a diak el kirel el meketmokl er a chelsel a ongdibel er a Rekristiano. (Olisechakl 3:1) El ua tiang, a rebebil a sorir a rokui el chad a bo ledak el kaiuerekedechim er a temel a nglunguuch. Tiang a sebechel el mo melibas me a lechub e ngmo mengesang er a rebebil, el uldimukl er tirke el ketengir el mei er a ongdibel. A rebebil el bechiil el chad a kaiuerekedechim engdi a lsekum te kaiuechull er a temel a nglunguuch, e te ulterekokl el mo melibas er a rebebil. Te locha mo omdasu el kmo  tirka el obekel a meruul a tekoi el diak el lolecholt a omengull el mo er a Jehovah e ngbai di kirel aike el sorir. Ngoeak a dmolech el omengull er kid el mo er a Dios, e bo ‘doruul a ngii di lengerang el kirel a klebekellel a Dios’ e bo dekerekikl me a omerelled lak longesang me a lechub e lolibas er a rebebil.​—1 Korinth 10:31, 32; 2 Korinth 6:3.

Kede Meluluuch el Kirel a Ngerang?

20. Ke mekerang a omosaod er a Rom 8:26, 27?

²⁰ A lebebil er a taem e ngdiak dodengei a tekoi el soad el melekoi er a nglunguched. A Paulus a milluches el kmo: “Ngdiak dodengei el kmo kede mlekera doluluuch el ngar sel kirel, ngdi Reng a smodid loba diak le medu el ngingd. Me ngikel merriter a reng rar chad a medengei a ikel lolebedebek a Reng, le Reng choltirakl a uldesuel a Dios el meluluuch el mesaod el kirir ar mechedaol.” (Rom 8:26, 27) A Jehovah a Ngike el uchul e ngmlo sebechel el meluches a betok el nglunguuch er a chelsel a Biblia. Me ngkongei aika el betok el ongit el ua el ongtid, e dirrek el semeriar el mo otaut. A Dios a medengelkid, e dirrek el medengei a belkul a tekoi el ngii a kutmokl el medung el okiu a chedaol el reng er ngii e ngmlo sebechir a remilluches er a Biblia el lemuches. A Jehovah a onger a ongtid el okiu a reng el “smodid.” Me a dolemolem el omekeroul er a klemedengei er kid er a Tekingel a Dios, e ngmo sebeched el beot el ouchais a uldesued sel doluluuch el mo er ngii.

21. Ngera kede mo merriter er a ongingil el suobel?

²¹ El ua aike el bla desuub, a nglunguched a ouchais a betok el kired. El ua tiang, a nglunguched a ulterekokl el ochotii el kmo ngua ngerang a deleuill er kid me a Jehovah, e ua ngerang a klemedengei er kid el kirel a Tekingel. (Jakobus 4:8) A ongingil el suobel e kede mo merriter a bebil el nglunguuch me aike el belkul el llechukl er a Biblia. Me a omerriter er kid er a Bades ngerang mo rullii er a nglunguched el mo er a Dios?

Ngmekerang a Omonger?

• Ngkirel mo ua ngerang a blekerdeled sel doluluuch el mo er a Jehovah?

• E ngera uchul me kede meluluuch el kirir a rekldemed er a klaumerang?

• A nglunguched ngolecholt a ngerang el kirel a uldesued me a blekerdeled?

• Ngkirel el mo ua ngerang a blekerdeled sel dorrenges a nglunguuch er a ongdibel?

[Aike el Ker er a Suobel]

[Siasing er a 10 el llel]

Kau ke blechoel el oldanges e mereng a sulel a Jehovah?

[Siasing er a 12 el llel]

A blekerdeled er a temel a nglunguuch er a ongdibel a kirel el blechoel el mengebkall er a Jehovah