‘Misei e bo moltirakl ra Dios.’​—EFESUS 5:1.

1, 2. (a) Ngera uchul me a ungil el omeruul a klou a ultutelel? (b) Ngera kede mo mesaod er ngii er tia el suobel?

 A SUE Fox el meluches a babier a kmo: “Ngkired el blechoel el olecholt a ungil el omeruul. A ungil el omerelled a sebechel el mo uchul a ungil el tekoi.” Sel leblechoel a rechad el meruul a ungil e ngsebechel kosadel a mondai. Engdi a lsekum a chad a mekngit a omerellel e ngsebechel el mo uchul a chetituokel el tekoi me a ngasechereng me a dirrek el klengiterreng.

² A ungil el omeruul a sebeched el metik er a chelsel a ongdibel er a remera el Kristiano. Me nguaisei, engdi kid a kired el mo kerekikl me a blekerdeled lak bo el ua blekerdelir a rechad er tia el beluulechad. Me bo dosaod el kmo ngmekerang a otutel a omellach er a Biblia el kirel a ungil el omeruul, a sebechel el omekerreu er kid, e dirrek el olechau a rengrir a rechad el mei er a mera el omengull. A kerebai er a Jehovah el Dios me a Ngelekel a sebechel el ngosukid el mo olecholt a ungil el omeruul.

A Jehovah me a Ngelekel​—A Kerebai er a Ungil el Omeruul

3. Ngera el kerebai er a ungil el omeruul a lolecholt er ngii a Jehovah el Dios?

³ A Jehovah el Dios a ochotii a cherrungel el kerebai el kirel a ungil el omeruul. Ngii a merreder er a eanged me a chutem engdi ngolecholt er a blekokuii me a omengull el mo er a redi chad. Sera longedecheduch er a rechad er a Israel, e a Jehovah a uluusbech er a tekoi er a Hebru el belkul a kmo ngolengit er tir me lobult er a mekngit el omerellir e bo loruul a melemalt. (Esekiel 18:25 a) A lsekum a rechedal a mo ruebet er a klengit e a Jehovah a ‘chubechubchad e ungil el Dios, ng meoud el ngmasech a rengul e a bltkil a rengul ma blakerreng er ngii a diak a ulebengelel.’ (Psalm 86:15) Ngii a kmal ngodech a blekerdelel er a rechad el tir a di mereched el ngmasech a rengrir a lsekum e ngdiak el motaut a uldesuir.

4. Ngmekerang a doukerebai er a Jehovah sel longedecheduch er kid a rechad?

 ⁴ A ungil el blekerdelel a Dios a bleketakl el mocholt er sel rolel a lorrenges a ongterir a rechad. A Jehovah a uleba kllourreng el ulerrenges, e ulenger a keril a Abraham el kirir a rechad er a Sodom. (Genesis 18:23-32) Ngdimlak di lomes a tekingel a Abraham el ua lak a belkul. A Jehovah a orrenges a nglunguchir a remesiungel me a lengelir tirke el ouuchel a rengrir er a kngterir. (Monguiu er a Psalm 51:11, 17.) Ngkmal kired el oukerebai er a Jehovah el oba kllourreng el orrenges er a rechad sel longedecheduch er kid.

5. Ngmekerang a doukerebai er a ungil el blekerdelel a Jesus e ngsebechel el meleketek er a deleuill er kid me a rebebil?

⁵ A Jesus a siluub a betok el tekoi er a Demal, el uldimukl er a ungil el omerellel. Nguluusbech er a klou el temel me a klisichel el meruul er a omesiungel. Ngdirrek el mle blechoel el klou a rengul e bekokuii el bedul a rechad. E tiang a mlo uchul me ngmlo sebechel el ngosuterir a rechebedes me a remeiko me a remechebuul. Ngdirrek el mle blechoel el olengeseu er tirke el mlo duum er ngii er a metacherbesul el taem. A Jesus a mle ileakl el kerekikl er tirke el uluumerang er ngii. (Markus 5:30-34; Lukas 18:35-41) Me kid el Kristiano a kired el oukerebai er a blekerdelel a Jesus, el mle bekokuii e soal el olengeseu er a rechad. A choua ika el ungil el omeruul a olechau a osengir me a rengrir a rechedad me a retonari er kid me a rebebil, e sebechel el mo uchul a odanges el mo er a Jehovah, e dirrek el mo uchul a deuil a rengud.

6. A Jesus ngmilecherei a ngera el kerebai el kirel a omengull el mo er a rechad?

⁶ A Jesus a dirrek el ullecholt er a omengull el mo er a rechad er a lomekedong a ngklir. A remengeteklel a klechelid er a Rechijudea a dimlak loruul el uaisei. Te ulemes er tirke el dimlak lodengelii a Llach el ua el “delebeakl” el chad. (Johanes 7:49) Engdi a Ngelekel a Dios a dimlak loruul el uaisei, ngbai ulemekedong er a rechad el uluusbech a ngklir, el ua Martha me a Maria me a Zaheus me a lmuut el bebil. (Lukas 10:41, 42; 19:5) Me alta e a rolel a cheldecheduch er a delongelir a rechad a oltirakl a kakerous el siukang me a blekeradel, engdi a remesiungel a Jehovah a kirir el kerekikl me lungil a blekerdelir el mo er a rokui el chad. b Ngdiak el bechei a kakerous el deruchellir a rechad me bo el terebengii  sel omengull er tir el mo er a rekldemir er a klaumerang me a rebebil.​—Monguiu er a Jakobus 2:1-4.

7. Ngmekerang a omellach er a Biblia a sebechel el ngosukid el mo olecholt a ungil el omeruul el mo rebek el chad?

⁷ A ungil el omerellel a Dios me a Ngelekel el mo er a rokui el chad, a ochotii el kmo te oba omengull el mo er tirke el chad, el tir a semeriar er a klemerang. Me nguaisei, engdi ngkakerous a blekeradel er a siukang er a bek el beluu. Me a omellach er a Biblia a meskid a tabesul el ulekrael el ngosukid el mo ungil a omerelled el mo er a rebek el chad. Me a leuaisei e me bo desa el kmo, ngmekerang a ungil el omerelled e sebechel el mo uchul a ungil tekoi el kirel a omesiunged.

Douetkeu e Dongedecheduch er a Rechad

8, 9. (a) Ngera el omerellel a chad el dimlak el durengul a sebechel el mo mekngit? (b) Ngera uchul me ngkired el oltirakl er a tekingel a Jesus el ngar er a Matteus 5:47?

⁸ Ngar er tia el merechereched a blekerdelel el klengar er a chelecha el taem, e ngdiak a temir a rechad el mengedecheduch e kautkeu er a delongelir. Ngmera el tekoi, ngdiak el sebeched el mengedecheduch er a rokui el chad el dosiueklterir. Me nguaisei, engdi ngngar er ngii a taem el mo kired el ouetkeu e mengedecheduch er a rechad. Kau, ngngar er ngii a blekerdelem el blechoel el ouetkeu er a rechad me a lechub e ngdiak? A chad a lsekum e ngdiak el kerekikl e ngsebechel el mekurulii a mekngit el omerellel el dimlak el durengul.

⁹ A Jesus a ulemeklatk er kid el kmo: “Cho di mouetkeu rar udam er kemiu, e ngeral kuk ngarbab el tekoi cho mrellii? Ar Chisentail ngdiak dilerrek el uaisei?” (Matteus 5:47) A Donald Weiss el mesuub a uldesuir a rechad a milluches el kmo: “A rechad a kmal chetirir sel sekum kede olechib a osenged er tir el ua lak desterir, me nguaisei engdi ngdiak a ungil el uchul e dolechib a osenged er a rechad. Me ngkmal ungil el tekoi sel douetkeu e dongedecheduch er a rechad.” Me a leuaisei, e lak debechei a mekngit el omeruul me bo el uchul el temellii a deleuill er kid me a rechad.

10. Ngmekerang a ungil el omerelled a ngosukid el meleketek er a omesiunged? (Momes er a box el “Momuchel el Outkeu el Oba Ungil el Klikm.”)

¹⁰ Ka di molatk er a kerebai er a teru el obekel el Tom me a Carol, el kiei er a klou el mats er a beluu er a Merikel. Te melasem el mo ungil mengedecheduch er a retonari er tir el ua le  tedebechel a omesiungir. Me te milekerang? A Tom a millekoi el kmo “Aki melasem el oltirakl er a bades er a Jakobus 3:18, el mengedecheduch e meruul a budech el obengterir a rechad. Aki outkeu e mengedecheduch er a rechad er a rekeblirir me a tirke el chad el oureor er tia el basio er kemam, el mesaod aike el tekoi el lesemeriar er ngii, el ua rengelekir me a cheremir el bilis me a blirir me a dirrek el urerir. Me a cherengel a taem e te mo omes er kemam el ua kim sechelirir.” A Carol a dilechelii el kmo: “Sel ki mluut el mong e aki ouchais a ngklam er tir me a ureor el ki moruul er ngii engdi aki melasem el di kedeb a cheldechedechemam, e dirrek el oker a ngklir. Me tiang a mlo uchul e ngmlo sebecham el sioning el mo er tir.” Tirka el obekel a mla mo medengelterir a rebetok el chad er a tonari er tir. A rebebil er tir a kongei el melai aika el babilenged el mesaod er a Biblia, e a rebebil a mla mo semeriar el mesuub el kirel a klemerang.

Moruul a Ungil er a Chelsel a Meringel el Blekeradel

11, 12. Ngera uchul me kede medengei el kmo kede mo chelebangel a mekngit el omelekoi sel domerk er a ungil el chais, e kede mekerang e kutmeklid el mo chelebangel aika el tekoi?

¹¹ Sel domerk er a ungil el chais e a lebebil er a taem e kede mo metik er a rechad el mekngit a omerellir el mei er kid. Kede medengei el kmo kede mo chelebangel aikang, e le a Jesus a dilu er a redisaiplo er ngii el kmo: “A lsekum toldechelakl er ngak, e toldechelakl er kemiu.” (Johanes 15:20) Engdi ngdiak bo luchul a ungil el tekoi a lsekum kede melekoi a mekngit. Me ngkirel el mo uangerang a blekerdeled? A apostol el Petrus a milluches el kmo: “E di mongedaol ra Kristus el Rubak ra chelsel a rengmiu. E mkedmeklemiu el di sebechiu loba delemedemek ma chomeluu el smodii a blkul sel omelatk el ngara chelsiu er tirikel mengeriil chomesaod.” (1 Petrus 3:15) A doruul a ungil e ngsebechel el ngmodech a uldesuir tirke el ulemtok el mo sorir tia el klumech el domerk er ngii.​—Titus 2:7, 8.

¹² Kid kede kltmokl el oltirakl a ulekrael er a Dios, sel bo dechelebangel a mekngit el tekingir a rechad? Nguaisei, a Paulus a mengelechel el kmo: “Mdiblechoel lousbech a medemedemek el cheldecheduch, el ulsar, me bo modengei a ikel kiriu longer ra dertal chad.” (Kolose 4:6) Sel de blechoel el meruul a ungil el bedul a rechad er a blid me a tirke el dedak el ngar er a skuul me a rechad er a urered me a rechad er a ongdibel me a retonari er kid, e ngbelkul a kmo kede mla kutmeklid el mo chelebangel a ngii di el mekngit el omelekoi el ua teletelir a remera el Kristiano.​—Monguiu er a Rom 12:17-21.

13. Ka mosaod el kmo ngmekerang a ungil el omeruul e sebechel ngmodech a uldesuir a rumtok.

¹³ Ngsebechel el mo uchul a ungil el tekoi sel doruul a ungil er a chelsel a meringel el blekeradel. El ua tiang, a ta el Sioning er a beluu er a Siabal a mlo metik er a chad el ngar er a blil me a okiak er ngii el mle mekngit a tekingir el mo er ngii. Engdi ngika el Sioning a mle ungil el melmesumech er tir e mirrael. Ngmillemolem el oldingel a obliil e mlo melechesuar el kmo ngike el okiak a ulemdidm er ngii. Me a bocha losiueklii er a rael e ngika el okiak a dilu el kmo: “Ak kmal mlo mekngit alta e ngkmal mle meringel a tekingam el bedul kau, engdi ngdimlak bo el kesib a rengum. Ak mekerang e mo sebechek el mo ua ikau?” Ngika el okiak a dirk urridii a urerel e dirk mlad a delal a uchul me ngdikea ungil el omeltkel el kirel a klengar. Ngika el Sioning  a milsaod er a omesubel a Biblia el mo er ngii, me ngkilengei el mo mesuub. Me chelechang e ng mesuub el eru el taem er a ta el sandei.

A Kot el Ungil el Rolel a Domekeroul a Ungil el Omeruul

14, 15. Te milekerang a remesiungel a Jehovah er a irechar a lolisechakl er a rengelekir el kirel a ungil el omeruul?

¹⁴ A rechedam me a rechedil el milluu er a Dios er a taem er a omelechesel a Biblia, a ulsisechakl er a rengelekir el kirel a ungil el omeruul sel lengar er a blirir. Ka momtab er sel rolel a le chadecheduch a Abraham me a ngelekel er a Isak, el llechukl er a Genesis 22:7. A omerellel a Josef a olechotel a ungil el osisechakl el le ngiluu er a rechad er a blil. Sel taem er a lengar er a kelebus e ngmillemolem el meruul a ungil el mo er a rechad el le dilak el kelebus. (Genesis 40:8, 14) A cheldechedechal el mo er a Farao a ulechotii el kmo ngmilsuub el mo meduch el mengedecheduch er a rengar er a bab el chad.​—Genesis 41:16, 33, 34.

¹⁵ Ngar er aike el Teruich el Llach el mlo er a rengalek er a Israel e ngmla er ngii a llach el kmo: “Ke mo mengull er a demam ma delam, me ke mo meketeket el kiei er a beluu el lomeskau a Rubak el Dios er kau.” (Exodus 20:12) A ta er a rolel e ngmo sebechir a rengalek el olecholt a omengull el mo er a redemerir me a rederrir, a oeak a ungil el omerellir. A ngelekel a Jeftha el redil a ullecholt er a ileakl el omengull, er a lekengei el otireklii a telbiil el bla le rellii a demal el kirel.​—Mengeteklel 11:35-40.

16-18. (a) Ngmekerang a dolisechakl er a rengalek el mo ungil a omerellir? (b) Ngera el klungiaol a sebechel el mo er ngii sel le mosisechakl a rengalek el mo ungil a omerellir?

¹⁶ Ngkmal klou a ultutelel a dolisechakl er a rengeleked el mo ungil a omerellir er a bek el taem. A bo lsebechir el ungil el teloi er a rechad, e ngkirir el mesuub el mo meduch el outkeu er a rechad, e ungil el mengedecheduch er a dengua me a dirrek el sel lomengur el obengterir a rechad. Ngkired el ngosuterir el mo medengei el kmo ngkired el outkeu er a rechad, e meruul a ungil el mo er a remechuodel me tirke el  smecher, e ngosuterir el mengider a oberaod el telechellir. Ngkirir el mo meduch el ousbech a tekoi el “a kulengit” me a “ke mesulang” me a “chochoi” me a “ngsebechek el ngosukau?” me a “ak kmal mlo mekngit.”

¹⁷ Ngdiak el meringel a dolisechakl er a rengalek el mo ungil a omerellir. Sel kot el ungil el rolel a osisechakl a oeak a ungil el kerebai el kid. A lluich ma eim a rekil el Kurt a ouchais el kmo: “Sel ki momes a omerellel a delemam me a demmam el ungil el chadecheduch er a delongelir, me sel kllourreng er tir me a ungil el omerellir el mo er a rebebil, e ngak me a rudam er ngak a mlo sebecham el oukerebai er tir. Ak dirrek el ulebengkel a demak sel longedecheduch er a remechuodel el odam me a rudos er a uchei me a uriul er a miting. Ak silubii a ungil el omerellel a demak sel louetkeu e lolecholt a omengull el mo er rechad, me ngmlo sebechek el oukerebai er ngii. Tia el blekeradel el meruul a ungil a diak el sel rolel a omoruul er ngii, e ngbai sel rolel el soam el mo meruul er ngii.”

¹⁸ Ngsebechel el mo uchul a ngerang, a lsekum a rechedam me a rechedil a olisechakl er a rengelekir a ungil el omeruul? Ngmo beot er a rengalek el mo ungil el sechelei, e dirrek el mo sebechir el melemolem a ungil el deleuill er tir me a rebebil. Ngdirrek el mo beot er tir el chederedall er a remerreder er a ureor, e meduch el obengterir a rechad er a oureor. Me nguaisei, a rengalek el ungil e melemalt a omerellir a mo uchul a deurreng er a redemerir me a rederrir.​—Monguiu er a Osisechakl 23:24, 25.

Mo Ileakl el Oeak a Ungil el Omeruul

19, 20. Ngera uchul me ngkired el oterekokl a rengud el mo oukerebai er a chubechub el Dios er kid me a Ngelekel?

¹⁹ A Paulus a milluches el kmo: “Misei e bo mteletelir ar ngalek el le betik a rengul er tir a Dios, el oltirakl ra Dios.” (Efesus 5:1) A doukerebai er a Jehovah el Dios me a Ngelekel e ngkired el mo oltaut a omellach er a Biblia er a klengar er kid, el ua ika el omellach el bla desuub er tia el suobel. A doruul el uaisei e ngmo uchul e kede olechib er kid me ngdiak de mekesuseu el mo meruul a tekoi el di osiik a klungioled.​—Judas 16.

²⁰ Ngar er aika el ulebongel el sils er a omengederederel a Satan, e ngmelasem el melemall er sel ungil el omeruul el Jehovah a mla osisecheklii el mo er a rechedal. Me nguaisei, engdi ngii el Diabelong a kmal diak el sebechel el okngemedii a ungil el omerellir a remera el Kristiano. Me kid el rokui a kired el oterekokl a rengud, el melemolem el oltirakl er a kerebai er ngika el chubechub el Dios er kid me a Ngelekel. A omerelled me a omelekinged a rullid el mo ileakl er tirke el meruul a mekngit. E tiang a mo uchul a odanges el mo er a Jehovah el Dios, el Ngii a meskid a cherrungel el kerebai el kired el oltirakl er ngii. E dirrek el sebechel el mo uchul e ngolechau er tirke el melemalt a rengrir el chad el mo mengull er Ngii.

[Aike el footnote]

Ke Dirk Melatk?

• Ngera kede mla suub er a Jehovah me a Ngelekel el kirel a dolecholt a ungil el omeruul?

• Ngera uchul me ngungil el ocholt a lsekum kid el Kristiano a oba ungil el klikm el outkeu er a rechad?

• Ngmekerang a ungil el omerelled e sebechel el mo uchul a ungil el omesiunged?

• Te mekerang a rechedam me a rechedil a lolisechakl er a rengelekir er a ungil el omeruul?

[Aike el Ker er a Suobel]

[Baks er a 29 el llel]

Momuchel el Outkeu el Oba Ungil el Klikm

A rebetok el chad a blechoel el omai er a rengrir el omuchel el mengedecheduch er a rechad el diak lodengelterir. Engdi ng bltkil a rengrir el mo er a Dios me a rechad a uchul, e a Resioning er a Jehovah a mesuub el mo meduch el omuchel a cheldecheduch, me bo lsebechir el ouchais er a klemerang er a Biblia el mo er a rechad. Ngera sebechel el ngosukau el mo meduch el omuchel a cheldecheduch?

A klou a ultutelel el omellach a medung er a Filipi 2:4 el kmo: “Ma dertang lak lomdasu a di kirir, e bai dirrek el lomdasu a kirir ar ngodech el chad.” Kele mobes el kmo: A chad el dirkak a ta el lesekau, a omes er kau el ua ngodech el chad. Ke mekerang e rullii el mo kongei el mengedecheduch er kau? Ngsebechem el omuchel el outkeu el oba ungil el klikm er kau. Me nguaisei, engdi ngngar er ngii a lmuut el bebil er a tekoi el dirk kirem el meruul.

Sel dolasem el omuchel el mengedecheduch er a chad, e kede ulterekokl el mla dobengii a tekoi el lullatk er ngii. A lsekum e kede di mesaod a tekoi el soad el mesaod, e ngsebechel el mo diak el semeriar el lorrenges er kid. Engdi a lsekum e kede oba sekutaberreng el melatk er ngii, e ngsebechel el mo uchul e ngkongei el mengedecheduch er kid. Tia el omeruul a lurruul er ngii a Jesus er sera longedecheduch er redil er a Samaria er a bita er a chido. (Johanes 4:7-26) Ngika el redil a mle melai a ralm. Me a Jesus a ulemuchel er a cheldechedechal el olengit a imelel el ralm er ngii, el mlo uchul a ungil el omesodel a tekoi er a klereng er a delongelir.

[Siasing er a 28 el llel]

A ungil el omerelled el mo er a rechad a sebechel el mo uchul a ungil el ocholt el mo er tir

[Siasing er a 30 el llel]

Ngklou a ultutelel a ungil el omeruul er a bek el taem