“A BIBLIA a kmo: “A RUBAK a melemalt er a ikel rokui el loruul.” (Psalm 145:17; Chocholt 15:3) A profet el Moses a millekoi el kirel el kmo: “A RUBAK a mesisiich el osebechekliu, ng cherrungel e melemalt el ngar a rokui el rolel. A Dios er kemiu a blak a rengul e merang, ng meruul a llemalt ma ungil.” (Duteronomi 32:4) A Jakobus 5:11 a kmo: “Nguangera iltetel a Rubak ra delechel a klechubechub er ngii.” Me a Dios a diak el sebechel el meruul me a diak el ngii a uchul a chelebirukel.

A disaiplo el Jakobus a milluches el kmo: “Me ngikel osiueklii chongetikaik lak el du el kmo, ‘Tial ongetikaik a mlara Dios el mei’; ele Dios a diak el sebechel mechetikaik ra mekngit, e dirrek el diak longetikaik ra chad el mora mekngit.” (Jakobus 1:13) Me a Jehovah a diak el lolsemai er a rechad el olab a chelebirukel me a ka longetikaik er tir el mo meruul a mekngit. Me a leuaisei, e ngtecha ngike el uchul a chelebirukel me a chelebuul el ngar er ngii?

Ngtecha Uchul a Chelebirukel?

A Jakobus a omekngerachel er a rechad el kirel a bebil er a chelebirukel el ngar er ngii sel ledu el kmo: “Ele chad el mechitikaik a mekurs ra ikel di ngelbesel a rengul e mekesuseu. Ma ngibes a mo dioll e mechellii a klengit; ma klengit a le mecherrungel e ngmechellii a kodall.” (Jakobus 1:14, 15) Me a rechad a sebechir el meruul a tekoi el oltirakl er a ngelbesel a rengrir. Ka dirrek el bo molebedebek er a klengit el mludiukes er ngii a rechad. A klisichel a klengit a sebechel el smisichii a ngibes el mo uchul a mekngit el omeruul el mo duubech. (Rom 7:21-23) Me tia el demludiukes er ngii el klengit a mla ‘choderderii’ a klechad, el uchul me a rechad a meruul a mekngit el mo uchul a chelebuul. (Rom 5:21) Ngdirrek el ngar er a chelebirukel el chad a sebechir el mengesuseu er a rebebil el mo mekngit.​—Osisechakl 1:10-16.

Engdi ngike el kot el ngar er a bab el uchul a chelebirukel a Satan el Diabelong. Ngngii a uchul me a chelebirukel a siliseb er tia el beluulechad. A Jesus Kristus a omekedong er a Satan el ngike el “mekngit” e “merreder er tial belulechad,” me a lechub e ngtia el diak el melemalt el blekeradel er a klechad. Tia el klechad a oumesingd el olengesenges er a Satan el loeak sel loltirakl a tekoi el loldubech e longoit a melemalt el rolel a Jehovah el Dios. (Matteus 6:13; Johanes 14:30; 1 Johanes 2:15-17) A 1 Johanes 5:19 a kmo:  “A belulechad el rokir a chederdall er ngikel mekngit.” E a mera er ngii, a Satan me a rechanghel er ngii a “mengeuid ra belulechad el rokir,” e omuchel a “chelebuul.” (Chocholt 12:9, 12) Me seikid, e a klou el ultelechakl el kirel a uchelel a chelebirukel a mo er a Satan el Diabelong.

A Olisechakl 9:11 (NW) a ochotii a lmuut el ta er a uchul a chelebuul sel ledu el kmo: “E le taem me a bkaischemrungel a duubech el mo er a bek el chad.” A Jesus a millekoi el kirir a reteruich me a teai el chad el mlad er a lemuukel a turm el otelecheterir. (Lukas 13:4) Te mlo chuarm e le tir el mla er a mekngit el basio er a mekngit el taem. A osisiu el tekoi a duubech er a chelecha el sils. El di ua tiang, a lrebet a metau el subechii a chad me lemetemall me a lechub e ngmad, e ng Dios a mle uchul? Ngdiak. Ngdimlak a melib er ngii me a dimlak a mesa el kmo ngmo duubech el tellemall. A osisiu el tekoi a sebeched el melekoi sel lebo er ngii a secher me a lechub e ngkiul kodall el mengoit er a rechad me ngdiak a redemerir me a rederrir me a lechub a rebecherir.

Me ngbleketakl el diak el Dios a uchul a chelebirukel me a chelebuul. Ngbai ngar er a moktek er ngii a mo olekngemed a chelebirukel me tirke el lomuchel er ngii. (Osisechakl 2:22) A Bades a olecholt el kmo a Dios a oeak a Kristus e mo meruul er a lmuut el klou er tiang sel lebo el ‘temall a urerel a Diabelong.’ (1 Johanes 3:8) Seikid e tia el blekeradel er a beluulechad el debetik er ngii a ngibes me a klauketui me a mekngit el omeruul a mo dibus. Seikid e a Dios a mo ‘smuld a bek el iuosech ra mederir,’ el mo ulebengelel a ringel. (Chocholt 21:4) Engdi ke locha mo oker el kmo: ‘Ngera me a Dios a dirkak el rellii tiang? Ngera uchul me ngulemechei a chelebirukel me a chelebuul me ngmelemolem el me lmuut er a chelecha el taem er kid?’ A nger el kirel tiang a debetik er ngii er a cheldecheduch er a Biblia el kirel a Adam me a Eba.

A Omelsemai a Mlukdubech

Sel uchul me a Dios a milechei a chelebirukel me ngmillemolem el mei er a chelecha el taem er kid a ngar er ngii a rellii er a tekoi el dilubech er a uchelel a reksi er a klechad. A tekoi el dilubech er seikid el taem a milkdebechii a klou a ultutelel el tekoi el kirel el soadel el kirel a Ulemeob, el ngii a ker el dimlak el beot me a lechub el sebechel el di mle mereched el monger. Ka me bo dekerekikl el omes er a tekoi el dilubech.

A Jehovah a milebii a kot el sechal me a redil el mle cherrungel e milsterir a Paradis el delengcheklir. Ngmle sebechir el mimokl el melilt a tekoi el ngii a mle sengk el lebilsterir a Dios el milleakl er tir er a charm. (Genesis 1:28; 2:15, 19) Me a lemimokl el melilt, e a Adam me a Eba a mle sebechir el lousbech er a llemesir el mo melilt el mo betik a rengrir e mesiou e olengesenges er a Ulemeob er tir. Me a lechub e te ngiltii el mo cheroid er a Dios e diak lolengesenges er ngii.

Me a lomsa Adam me a Eba a techall el mo olecholt er a bltikerreng el mo er ngii, e a mera el Dios a rirellii a chimo el mekkellel a tekoi el kirir. Ngdilu er a Adam el kmo: “Ng di subed cho mongang a redechel a rokui el kerrekar el ngar a chelsel a sers, e ngdi sel kerrekar er a mo medengei a ungil ma mekngit a diak monga er a redechel. Ele sel sils el mkelii e kom mad.” (Genesis 2:16, 17) Me a lolemolem el oba kengei er a Dios el kirel a klungiolir me a klengelakel er tir er a ngar er a mederir, e a Adam me a Eba a mle kirir el diak el bo longang a redechel sel chimo el kerrekar. Me te meruul el uaisei?

A Biblia a ouchais er kid a tekoi el dilubech. A Satan el Diabelong a uluusbech er a bersoech el ngerel, e dilu er a Eba el kmo: “Ng meral dilu Dios el kmo ng diak kom mongang a redechel a ngii di le kerrekar el ngar a chelsel a sers?” Me a Eba er a lomelekl el louchais a ledilu Dios, e a Satan a dilu er ngii el kmo: “Ng kmal diak le merang, ng diak bo mad. A Dios a melekoi el ua isei ele ng medengei el kmo sel bo mkelii e ng mo mellomes a rengmiu, e mo ua ingii el mo medengei a ungil ma mekngit.” A uriul er a lerenges aikang, e a Eba a mlo oureng er tia el kerrekar me ng “ngiluu a redechel el menga er ngii.” Tia el cheldecheduch a melemolem el kmo: “E sola e msa bechil me ng dirrek el milenga er ngii.” (Genesis 3:1-6) Me a Adam me a Eba a diul mle mekngit el lousbech er a ilmokl er tir, me te mlo er a klengit er a bo lak lolengesenges er a Dios.

Ngsebechem el mesang a berredel a tekoi el dilubech? A Diabelong a millekoi el lomtok a tekingel a Dios el mo er a Adam. A tekingel a  Satan a ua el dilu el kmo a Adam me a Eba a diak el lousbech er a Jehovah el mo melilt a ungil me a mekngit el kirir. Tia el omelsemai er a Satan a milekdebechii a ker el kirel a llemeltel a omengederederel a Jehovah er a bebrir a rechad. Me ngmilekerang a mera el Dios er a longer er tia el omelsemai?

Ngmle Usbechall a Taem

A Jehovah a mla er ngii a klisichel el sebechel el okngemedeterir tirka el tedei el omtok el Satan me a Adam me a Eba e le ngmle mesisiich er tir. Engdi a Satan a dimlak lolsemai er a klisichel a Jehovah e ngbai milsemai er a llemeltel a omengederederel. Tia el omelsemai a ngar er ngii a rellii er a rokui el bleob el sebechir el mimokl el melilt a tekoi. Ngmle kirir el mesa el kmo tia el sengk er a mimokl el omelilt a kirel el lousbech er ngii er a melemalt el rolel el remurt er a chelsel a telkael el lebesterir a Dios el kirel a tekoi er a klechad er tir, tekoi er a kldung, me a tekoi er a klereng. E le lak e ngmo uchul a ulterekokl el tellemall el kirir el di ua chad el lak el lomekerreu er a llechul a gravity e lengasech er a kedidai el blai el mo er a chado el sechesokl el mei er a iou e ngulterekokl el metemall. (Galatia 6:7, 8) A rokui el mellomes a rengrir el bleob a sebechir el mo ngmetik a klungiolir a lekerekikl el di tir el lomtab aike el mekngit el tekoi el mo duubech sel lolilt el mo cheroid er a Dios. Engdi tiang a uluusbech a taem.

Tia el usbechellel a taem el mo onger er tia el omelsemai a sebeched el omekesiu er ngii el ua tiang: Ka me dedu el kmo ngngar er ngii a chedam er a ta er a blai el melsemai er a chedam er a kuk ta er a telungalek el kmo ngtechang a mesisiich er tir el terung. Ngsebechir el di mengider a bad e ngmedebodeb el kmo ngtecha mesisiich. Ngike el chedam el kilderii sel kot el oberaod el bad a kltukl el mesisiich. Engdi omko a omelsemai a mle kirel a kmo ngtecha el chedam a mera el betik a rengul er a rengelekel me tir a betik a rengrir er ngii, me a lechub e ngkuk omelsemai el kirel a kmo ngtecha el chedam a ungil el lomtebechel er a telungalek er ngii, e te mlo mekerang? Ngka el klisiich me a ka el tekoi a sebechel el meketeklii tiang. Ngmo kirel el usbechall a taem el domes er tir el terung me a tekoi el loruul e mochu sebeched el medengelii a melemalt el nger er aika el omelsemai.

A Klemengetel a Taem Ngngerang Mla Meketeklii

Ngmla mo chuib a bekord el 6,000 el rak er a Satan er a lekot el melsemai er a llemeltel a omengederederel a Dios. Me ngngerang mla meketeklii a reksi er a klechad? Ka bo molebedebek a eru el tekoi el lullekoi a Satan el lomtok er a Dios. Ngdilu er a Eba el kmo: “Ng kmal diak le merang, ng diak bo mad.” (Genesis 3:4) Sera lolekoi el kmo a Adam me a Eba a diak bo el mad a bo longa er sel blul el rodech, e a Diabelong a ua el lullekoi el kmo a Jehovah a omulak. Tia kmal diak lebeot el tekoi! E le a lsekum a Dios a dimlak leklemerang a tekoi el lullekoi er tiaikid el taem, e ngmekerang e sebeched el loumerang er ngii el kirel a kuk bebil er a tekoi? Engdi aika el betok el rak el mla mo chuib ngngerang mla ochotii?

A Adam me a Eba a mlo chuarm er a secher me a ringel me a cheluodel e mlad. A Biblia a kmo: “A Adam a mlo 930 a rekil e mad.” (Genesis 3:19; 5:5) Me ngmla er a Adam e tia el diukes el luchul a klengiterreng a uleberk el mo er a rebek el chad. (Rom 5:12) Aika el mla mocheuekl el taem a mla meketeklii el kmo a Satan a “bulak e demal a blulak” e a Jehovah a “diak lomulak.”​—Johanes 8:44; Hebru 6:18.

A Satan a dirrek el dilu er a Eba el kmo: “A Dios a melekoi el ua isei ele ng medengei el kmo sel bo mkelii [a blul el rodech] e ng mo mellomes a rengmiu [Adam me a Eba], e mo ua ingii el mo medengei a ungil ma mekngit.” (Genesis 3:5) Aika el blulekngel a Diabelong a milsterir a rechad a klsuul el techall el di tir el mo mengedereder er tir me ngmilengeblad er tir el mo oumerang el kmo ngmo ungil er tir a bo lecheroid er a omengederederel a Dios. Ngmera el mlo uaisei?

A klemengetel a reksi er a klechad, e a rechad a mla melasem a bek el bedengel a omengedereder. Engdi ngbetok el taem, e ngii el omengedereder a di mo uchul a tellemellel a telungalek er a klechad. A mellomes a rengul el milluches a Biblia er a bekord el 3,000 el rak er a mla me mong a millekoi el kmo: “A re bebil er a re chad er tial beluulchad a ngar ngii a klisichir, e  a re bebil a mo chuarm er tir.” (Olisechakl 8:9) A profet el Jeremia a milluches el kmo: “E diak a chad el sebechel el chodereder a blekeklel.” (Jeremia 10:23) Ngmo lmuut er a llomeserreng el mocholt el oeak a omesubel a beluulechad me a omebelel a beches el klekedall er aika el mereko el rak a dimlak el sebechel el ngodechii a lolekoi er ngii tia el bades e le klemengetel a taem a di omeketakl er a klemerang el lolekoi er ngii.

Me Kau Ke Mo Mekerang?

A taem el lebilecherei a Jehovah a mla meketeklii a Satan el kmo ngcheleuid er sel omelsemai er ngii el kirel a llemeltel a omengederederel. A Jehovah a kot el ngar er a bab el Mengedereder er a uldekial a eanged me a chutem. Ngngar er ngii a llemeltel el mengedereder er a rokui el blebelel me a rolel a omengederederel a kot el ungil. A rechanghel er ngii el ngar er a eanged el meketeketang el ngar e kiei el ngar er a eungel a omengederederel a melekoi el kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.”​—Chocholt 4:11.

Ngera uldesuem el kirel tia el omelsemai el kirel a omengederederel a Dios? Ke kongei el kmo a Dios ngredemelel a mengedereder er kau? A lsekum ke kongei el uaisei, e ngbelkul a kmo ngkirem el mo medengelii e kongei er a klisichel a omengederederel a Jehovah. Tiang a sebechem el meruul er ngii el loeak sel moltaut er a bek el tekoi el moruul er a klengar er kau aika el mengasireng el klemerang me a omellach el debetik er a Tekingel, el Biblia. A “Dios a bltikerreng” me a llechul me a omellach el mla er ngii a oeak a bltkil a rengul el mo er a reblebelel. (1 Johanes 4:8) A Jehovah a diak lorreked a klungiaol el mei er a ngii di el ta er kid. Me ngsebechem el sichedekl er a rengum aika el ulekrael el mla er a Biblia el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum. Mletkii a RUBAK er a ikel bek el moruul, e ngii a mo ochotii er kau a melemalt el rael.”​—Osisechakl 3:5, 6.

[Siasing er a 7 el llel]

Ngsebechem el ngiltii a omengederederel a Dios el oeak a omosuub er a Biblia e moltaut a lolekoi er a klengar er kau

[Credit Line]

© Jeroen Oerlemans/​Panos Pictures