TIA el mlo merek el rak e ngmla er ngii a subed el mla er a Chelechad er a Ruungerachel el mo melodech er a temel a miting er a ongdibel, me bo el sebechel a bek el telungalek el dmak el mesuub er a Biblia. Me a lsekum e kau a bdelul a telungalek, e ngkirem el mo ungil el medengei aike el lousbech a bechim me a rengelekem me bo el sebechem el ngosuterir el ngmai a klungiolir er tia el omesuub. A rubekel el diak a rengelekir a sebechir el lousbech er tia el taem el dmak el terung el mesuub er a Biblia. A remesobil el rudam me a rudos a dirrek el sebechir el lousbech er tia el taem el di tir el mesuub er a Biblia.

Te betok a mla olecholt a omereng el saul er tir el kirel tia el mla meketmokl el taem el kirel a Omengull er a Telungalek. El ua tiang, a Kevin el ta er a remechuodel a milluches el kmo: “A tekoi el ‘sulang,’ a diak el sebechel el smodii a deurreng el lolechesuar er ngii a rechad er a ongdibel el kirel tia el ileakl el klebesei. Kemam el mechuodel a mla chadecheduch er a delongelam er a rolel aki mousbech er tia el techall el mo oltirakl a ulekrael er a Chelechad er a Ruungerachel el mesuub el obengkel a telungalek er kemam.”

A Jodi, el bechil a ta er a remechuodel a milluches el kmo: “Ngar er ngii a retedei el ngelekam el redil el rekrir a 15, 11 me a 2. Aki dirk millukl el mo er a ongdibel el rechad er ngii a ousbech a chimorir el mengedecheduch. Aki kmal el lousbech a klou el taem el mengetmokl er kemam el mo er a bek el miting. Chelechang e ngmla mo sebecham el lousbech er tia el ileakl el klebesei el dmak el mesuub el telungalek!”

A John me a JoAnn, el teru el obekel el mesiou el mui el taem, a milluches el kmo: “A omesubam el telungalek er a ngar er a mong a dimlak el sal ulterekokl e le ngmle betok a ureor er a ongdibel me ngmle kiram el losiik a techall el kirel a omesubam el terung. Tia el beches el tekoi a mera el sengk er a Jehovah el sebechel el melisiich er kemam er a tekoi er a klereng a lsekum aki ousbech er ngii er a melemalt el rolel.”

A Tony, el mesobil el odam el 20 me a derengel a rekil, a ousbech er a klebesei er a Ongeru el Ureor el kirel a omesubel el di ngii el tang. E aike el bebil er a taem, e ngmengetmokl er ngii el kirel aike el miting er a ongdibel, e ngdi ngmelekoi el kmo: “Ak kmal semeriar el kirel a Ongeru el Ureor.” E ngera uchul? “E le ak mla cheklii seikid el klebesei el di mo temek el obengkel a Jehovah.” E dochelii el kmo: “Ak mengoit a eru el sikang el mesuub a suobel el melisiich er a deleuill er ngak me a Jehovah. Sel kungoit a klou el taem el mesuub e ngsebechek el melebedebek el kirel aike el bades el kunguiu.” Me tiang mlo uchul a ngerang? “A omellach er a Jehovah a mera el mla mo tekoi er a renguk el kuk mesisiich er a ngar er a mong.” Ngar er ngii a okesiu el kirel tiang? “Ngar sel babier el Insight, e ak milenguiu el kirel a klausechelei er a David me a Jonathan. Ak siluub a betok el kirel a blekerdelel a Jonathan el blechoel el melatk er a rebebil. A kerebil a ngilsukak el mo medengelii a belkul a bo demera el sechelil a chad. Me ak kmal semeriar el mo medengei a lmuut el betok er aika el mekreos el tekoi el ngar er a omesubek sel Ongeru el Ureor!”

Kid el rokui el mesiungel a Jehovah a ulterekokl el mo ngmai a klungioled a bo dungil el ousbech er tia el ileakl el taem el mo dmak el telungalek el mesuub er a Biblia.