“E morael el ngara bltikerreng, el ua Kristus el mle betik a rengul er kid.”​—EFESUS 5:2.

1. Ngerang dilu Jesus el kirel a olengchelir a remera el disaiplo er ngii?

 A BERKEL a ungil el chais er a Rengedel a Dios, el oldingel a obliil, a olengchelir a Resioning er a Jehovah. Me nguaisei, engdi a Jesus Kristus a ngileltii a ta er a blekeradel el loruul er ngii a Rekristiano e ngmo uchul e te medangch el kmo te mera el disaiplo er ngii. Ngdilu el kmo: “A beches el llach a kbeskemiu el kmo, bo mkaubltikerreng; el kaubltikerreng el ua ngak el betik a renguk er kemiu. Cho bo mkaubltikerreng, e te mo medengelkemiu a rokuil chad el kmo kom Obengkek.”​—Johanes 13:34, 35.

2, 3. A bltikerreng er a klodam el dolecholt er ngii, ngerang ngrullii el mo er tirke el omais el mei er a miting er a Rekristiano?

² Ngdiak a bltikerreng el sebechel el mekesiur a bltikerreng er a delongelir a remera el Kristiano. A bltikerreng er a delongelir a remesiungel a Jehovah a mengurs er tir el mo dmak el ngar er a mera el omengull, el di ua sisiak el sebechel el kmurs a deel el odak. El ua tiang, a Marcelino el chad er a Cameroon, a uluureor e miltemall a medal me ngmlo meiko. Uriul er a lemetemall a medal, e a rechad a mlo melekoi el kmo ngmlo meiko e le ngii el mle chad er a olai. A mengeteklel  a klechelid me a rechad er a ikelesia er ngii a dimlak lolengeseu er ngii, e bai ultebedii er a ongdibel er tir. A ta er a Sioning er a Jehovah a milengemedaol er ngii el mo er a miting er tir engdi ngii a ulemai er a rengul, e le ngdimlak el soal a rechad a lluut el mo oltngakl er ngii.

³ Ngkmal mlo mechas a rengul a Marcelino er a omeruul el blo lolechesuar er a chelsel a Kingdom Hall. A rechad er a ongdibel a kmal uluuetkeu er ngii, me ngii a dirrek el ngilai a ongelaod er a osisechakl el ngar er a Biblia el lerirenges. Ngulemuchel el mo er a bek el miting, e ulengeriakl er a omesubel er a Biblia, e mlo metecholb er a rak er a 2006. Chelechang e ngomerk er a klemerang el mo er a telungalek er ngii me a retonari er ngii e mesuub a Biblia el obengterir a rebebil. Ngkmal soal el ngosuterir tirke el losuub a Biblia el obengterir el mo melechesuar tia el osisiu el bltikerreng el blo lodengelii er a delongelir a rechedal a Dios.

4. Ngera uchul me ngkired el olengesenges er a tekingel a Paulus el kmo “morael el ngara bltikerreng”?

⁴ Tia el bltikerreng er a klodam a kmal ungil, engdi kid el rokui a ngar er ngii a ngerecheled el omekeroul er ngii. Ka di molatk er a cheluml el ngau. A lsekum e ngsoam a lolemolem el mesisiich a nguil, e ngkirem el melecha idungel er ngii, e le lak molsiu a idungel er ngii, e ngmad. Me nguaisei, a ochulel a bltikerreng er a chelsel a ongdibel a sebechel el mo mechitechut a lsekum a derta el Kristiano a diak loureor el melisiich er ngii. Me tiang ngmekerang a doruul er ngii? A apostol el Paulus a ulenger el kmo: “E morael el ngara bltikerreng, el ua Kristus el mle betik a rengul er kid, me ngdi mle ngii el mengkengkii el bochochod a bul el tenget el tongetengii ra Dios el kired.” (Efesus 5:2) Ngkired el melatk er a ker el kmo, Ngoeak a ngera el rolel e ngsebeched el melisiich er a bltikerreng?

“Meruul a Rengmiu el Mo Meteu el Koirak”

5, 6. Ngera uchul me a Paulus a milengelechel er a Rekristiano er a Korinth el mo olekes er a bltikerreng er a klodam?

⁵ A apostol el Paulus a milluches el mo er a Rekristiano er a Korinth el kmo: “Kemiul chad ra Korinth, a ngeram a teleu el bedul kemiu; ma reng er kemam a mla mesasech. Kemiu a diak mkosekodel ra chelsam, ko bai kosekodel a chelsel a rengmiu. Ak melekoi er kemiu el ua kulekoi rar ngalek, e ngdi soak a dilerrek el meruul a rengmiu el mo meteu el koirak.” (2 Korinth 6:11-13) Ngera uchul me a Paulus a milengelechel er a Rekristiano er a Korinth el mo menglou er a bltikerreng er tir?

⁶ Ka molatk er a ongdibel er a Korinth er a lekot el omuchel. A Paulus a mlo er a Korinth er a ulebengelel a 50 el rak er a taem er kid. Me sera lomuchel er a urerel er a berkel a klumech, e a rebebil a mlo omtok er ngii, engdi ngii a dimlak lemeterob el omerk er a klumech. Ngdi mle chelsel a kesai el taem e a rebetok a mlo oumerang er a ungil el chais. Ngar er a chelsel a “tal rak ma chelolem el buil” e a Paulus a ullisechakl e millisiich er a beches el ongdibel. Ngbleketakl el kmo, a Paulus a ulebang a dmolech el bltikerreng el mo er a Rekristiano er a Korinth. (Rellir 18:5, 6, 9-11) Ngmle betok a ungil el uchul e a Rekristiano a mle kirir el oubltikerreng e dirrek el mengull er ngii. Me nguaisei, engdi a rebebil er a  chelsel a ongdibel a ultngeklii, e le ngmle chetirir a lomeklemalt er tir. (1 Korinth 5:1-5; 6:1-10) A rebebil a locha ulerrenges a omelaes er “tirkel ngarbab el apostel.” (2 Korinth 11:5, 6) A Paulus a mle soal a rudam me a rudos a bo loubltikerreng el mo er ngii. Sei a uchul me ngullengit er tir el mo “meteu el koirak,” el belkul a kmo ngkirir el olekes er a bltikerreng er a klodam.

7. Kede mekerang e mo sebeched el melisiich er a bltikerreng er a klodam?

⁷ E kid a mekerang? Kede mekerang a dolekes er a bltikerreng er a klodam? Ngblechoel el beot er a rechad el mo kaubltikerreng sel sekum ngosisiu a rekrir me a blekerdelel a klengar er tir. E tirke el sorir a osisiu el tekoi er a omilil a dirrek el blechoel el sorir el dmak. Engdi a lsekum a klemeriarreng er kid a rullid el di soad el obengterir a rebebil el Kristiano, e ngbelkul a kmo ngkired el mo “meteu el koirak.” Me ngungil a di lekid el oker el kmo: ‘Ngak ak meruul a tekoi el kirel a odingel me a omilil el obengterir a redi osisiu el chad? Ngar er a chelsel a ongdibel, e ak mengeroid er ngak er a rebeches el chad e le ak melatk el kmo ngkirir el omuchel el me mengedecheduch er ngak? Ngak ak uuetkeu er a rengeasek me a remeklou el ngar er a chelsel a ongdibel?’

8, 9. Ngmekerang a tekingel a Paulus el ngar er a Rom 15:7 a ngosukid el mo melemolem el omdois er a bltikerreng er a klodam?

⁸ A tekingel a Paulus el mo er a Rekristiano er a Rom, a sebechel el ngosukid el mo oba tabesul el osenged el bedul a rekldemed er a omengull, el kirel a dekautkeu er a delongeled. (Monguiu er a Rom 15:7.) A tekoi er a Grik el mloiuid el kmo “mkangingai” a belkul a kmo “moutkeu e moltuchakl er a rengar omerael el mo uchul e momak a ungil el klausechelei.” Ngar er a taem er a Biblia, e a chad el oltuchakl er a resechelil a kirel el ochotii er tir el kmo ngdmeu a rengul el mesterir. A Kristus a mla kongei el ngoikid el osisebid er a ongdibel er a Rekristiano, me ngkmal kired el mo oukerebai er ngii sel doutkeu er a rekldemed er a omengull.

⁹ Me sel doutkeu er a rudam er kid er a chelsel a Kingdom Hall me a bebil er a basio, e ngsebeched el mengoit a taem el mengedecheduch er tirke el dersta el dongedecheduch er tir, me a lechub e ngdiak deblechoel el obengterir. Me sel ongingil el miting er kid e ngkuk sebeched el mengedecheduch er a rebebil. A doruul el uaisei, e ngmo er ngii a techelled el mengedecheduch er a rebetok el odam me a rudos er kid. Ngdiak el kired el bekikl el kmo ngdimlak dongedecheduch er a rokui el chad. Me a diak a chad el kirel el mo chetil e le kid el dimlak a techelled el outkeu er ngii.

10. Ngera el ileakl el techall a mo er a rokui el chad er a chelsel a ongdibel? E kede mekerang e sebeched el mo ungil el ousbech er ngii?

¹⁰ A doutkeu er a rebebil e tiang a uchelel a ungil el cheldecheduch el sebechel el mo uchul a melemolem el klausechelei. El ua tiang, tirke el mo er aike el meklou el ongdibel e mengedecheduch er a rebebil, a sebechir el muuchel a ungil el klausechelei er tir el mo uchul e te semeriar el lmuut el mo kasoues er a ta er a taem. Tirke el oureor er a okedecherul a Kingdom Hall me a tirke el ngar er ngii a techellir el olengeseu, a mo sebechir el omak a ungil el klausechelei er tir el oeak a ungil el blekerdelir me a sel lekauchais a ungil tekoi er a delongelir. Me a choua aika el techall a sebechel el omak a ungil el klausechelei er a chelsel a cheldebechelel a Jehovah. Me a lsekum kede melemolem el omdois er a bltikerreng er kid el mo er a rudam, e tiang a smisichii a bltikerreng me a kltarreng er a chelsel a mera el omengull.

Mrellau el Mo Beot er a Rechad el Eko er Kau

11. Ngera el kerebai a lulechotii a Jesus el ngar er a Markus 10:13-16?

¹¹ A rokui el Kristiano a sebechir el rulleterir el mo beot er a rechad el mo er tir el di ua Jesus. Ka molatk er a blekerdelel a Jesus er sel taem el redisaiplo er ngii a millasem el merrob er a rechad me lak lobetiterir a rengelekir el mo er ngii. Ngdilu el kmo: “Bechiiteterir ar mekekerel ngalek me le mer ngak, e lako molekebai er tir; ele ngkirir a rengedel a Dios.” E sola e “ngmilechulleterir e ulemor a chimal er bebrir, el ulemekngeltengat er tir.” (Markus 10:13-16) Ka di molatk, tirka el ngalek a ulterekokl el kmal mlo ungil a rengrir er sera bo lolechesuar a bltkil a rengul ngika el Klou el Sensei!

12. Ngera sebechel el mo uchul e ngmo meringel er a rechad el mengedecheduch er kid?

 ¹² A derta kid el Kristiano a ungil a di lekid el oker el kmo. ‘Ngak, ngbeot er a rechad el me kmeed er ngak, me a lechub ak blechoel el mechesang?’ E le a lebebil er a taem e a omerelled a sebechel el mo uchul e ngmo meringel er a rechad el mengedecheduch er kid. A lsekum kede blechoel el ousbech a cell phone me a lechub e kede orrenges a chelitakl el ousbech a earphone er a delongelir a rechad, e ngsebechel el rulleterir el mo omdasu el kmo ngchetid el mengedecheduch er tir. Me a lsekum a rebebil a omes er kid el di blechoel el mechesang el menguiu, e te mo omdasu el kmo ngdiak el soad el mengedecheduch er tir. Me nguaisei, el ngar er ngii a “belsechel el di deluk,” engdi sel sekum kede iliuekl er a rechad e ngblechoel el “belsechel el dongedecheduch.” (Olisechakl 3:7) A rebebil a locha mo melekoi el kmo, “Ngak a soak el kuk di ngak” me a lechub e te melekoi el kmo “Ngdiak el soak el mengedecheduch er a chelechang.” Me nguaisei, sel domuchel a ungil el cheldecheduch el mo lmuut er a taem el lechetid el mengedecheduch, e ngolechotel a bltikerreng el ngii a diak “losiik a di klungiolel.”​—1 Korinth 13:5.

13. A Paulus ngmillisiich er a Timoteus el mo mekerang el bedul a rudam me a rudos er ngii el Kristiano?

¹³ A Paulus a millisiich er a ngeasek el Timoteus el mo mengull er a rebek el chad er a ongdibel. (Monguiu er a 1 Timoteus 5:1, 2.) Ngdirrek el kired el mengull er a remechuodel el Kristiano el ua ledelad me a redemad, me a rengeasek el ua lemera el bebil er kid. Me a omengull er kid a rulleterir a rudam me a rudos el mo beot er tir el me kmeed er kid.

14. Ngera el klungiaol a sebechem el ngmai el oeak a ungil el cheldechedecham el mo er a rebebil?

¹⁴ Me sel deblechoel el mengedecheduch er a rechad, e ngsebechel el mo uchul a deurreng e dirrek el uchul a omelisiich er a tekoi er a klereng. A ta el odam el oureor er a obis er a branch a dirk melatk er a rebebil el mechuodel el mla er a telungalek er a Bethel, el mle blechoel el mengoit a taem el mengedecheduch er ngii. Te millisiich er ngii e dirrek el rirellii el mo melechesuar a bltkil a rengrir el bedul ngii. Me a chelecha el taem, e ngoukerebai a ungil el omerellir sel longedecheduch er a rechad er a telungalek er a Bethel.

A Klengareourreng a Ngosukid el Meruul a Budech

15. Ngera olecholt el kmo ngsebechel el mo duubech a chetituokel el tekoi er a delongeled?

¹⁵ A reteru el Kristiano el odos er a Filipi el Juodia me a Sintike, a mlo er ngii a telkib el chetituokel el tekoi er a delongelir. (Filipi 4:2, 3) A klautoketok er a delongelel a Paulus me a Barnabas a kmal mlo klou el tekoi el mlo uchul me te mlo kebii. (Rellir 15:37-39) A choua ika el cheldecheduch a olecholt el kmo a lebebil er a taem e ngduubech a chetituokel el tekoi er a delongelir a remengull er a Dios. Me nguaisei, a Jehovah a ngosukid el mo sumechokl a chetituokel el tekoi e lmuut el mak a ungil el klausechelei er kid, engdi ngngar er ngii a tekoi el soal a bo doruul er ngii.

16, 17. (a) Ngua ngera klungel a ultutelel a klengareourreng er sel taem el dolasem el mesmechokl a chetituokel el tekoi? (b) Sel cheldecheduch el kirel a blekerdelel a Jakob er a bo lekebetech ngii me a Esau, ngolecholt a ngerang el kirel a klengareourreng?

¹⁶ Ka molatk, oleko kau me a sechelim a tibir a  mo er a omerael el ngar er a mlai. Me a uchei er a omomuchel er a omerolliu, e ngkiriu el ousbech er a kiis el mengiis er a mlai. Me tia el omerael a sebechel el omuchel sel omnguu a kiis el orelii a mlai. Me nguaisei, a semecheklel a kakerous el uldasu a dirrek el ngar er ngii a tekoi el dousbech er ngii el mo kutmeklii el di ua kiis, e tia el kiis a klengareourreng. (Monguiu er a Jakobus 4:10.) El ua lolecholt a Bades el bo dosaod er ngii, tia el kiis a mesterir a techellir tirke el ngar er ngii a mekngit er a delongelir el mo oltaut a omellach er a Biblia.

¹⁷ Ngbekord el lluich el rak er a uchei, e a Esau a ulterur a llemeltel a kot el ngalek er a ta er ngii er a Jakob, el uchul me ngmle soal el omekoad er ngii. A “Jakob a kmal mlo medakt me ng mlo ouedikel a rengul” er a bocha letemel ngii me a Esau el mo kebetech. Ngulemdasu el kmo a Esau a ulterekokl el mo mekodir. Engdi sera bo lekebetech, e a Jakob a rirellii a tekoi el Esau a dimlak lolatk el kmo ngsebechel el mo rullii. Ng “mlo euid el losus el mor a chutem e mocha er bitar obekul.” Me ngngera dilubech? A “Esau a rirurt el mo osiueklii, e milechulii e turengur a medal e te dul lilangel.” Me a kdekudel el tekoi el mle sebechel el duubech a mlo diak, e le Jakob el ullecholt er a klengareourreng el uchul me a Esau a mlo ungil a rengul.​—Genesis 27:41; 32:3-8; 33:3, 4.

18, 19. (a) Ngera uchul me ngklou a ultutelel el doltaut a omellach er a Bades sel leduubech a chetituokel el tekoi er a delongeled kid me a rebebil? (b) Ngera uchul me ngdiak el kirel el mo mechitechut a rengud a lsekum ngike el tang a dirk ousbech a taem el mesmechokl er a uldesuel?

¹⁸ Ngar er ngii a kmal betok el ungil el omellach el kirel a dosmechokl a tekoi el sebeched el metik er a Biblia. (Matteus 5:23, 24; 18:15-17; Efesus 4:26, 27) a Ngmo meringel el mesmechokl a tekoi a lsekum ngdiak doltaut aika el omellach. Ngungil a domuchel el olecholt er a klengareourreng el mesmechokl er a chetituokel el tekoi, er a bai dongiil er ngike el tang el mo omuchel.

¹⁹ A lsekum kede melasem el meruul a budech e diak el sebeched, e ngdiak el kired el mo mechitechut a rengud. Alta e ngike el ta er a chad a dirk ousbech a klou el taem el mesmechokl er a uldesuel. A rubekul a Josef a mle mekngit a omerellir el mo er ngii. E a uriul er a kemanget el taem, e a Josef a mlo ngar er a bab el chad er a beluu er a Ekipten, e mlo er ngii a techellel el lmuut el mo kasoues ngii me a rubekul. Te mla ouuchel a rengrir e dirrek el ullengit a klausubes. Me a Josef a uluusubes er tir, me tiang a mlo uchul e a rengelekel a Jakob a mlo er ngii a techellir el mo chedal a Jehovah. (Genesis 50:15-21) Ngsebeched el melisiich a kltarreng me a deurreng er a chelsel a ongdibel, sel dolemolem el omdois a bltikereng el obengterir a rudam me a rudos er kid.​—Monguiu er a Kolose 3:12-14.

Doubltikerreng el Oba “Chomeruul Ma Klemerang”

20, 21. Ngera sebeched el suubii er a omerellel a Jesus el mirriso a ocherir a rechapostol er ngii?

²⁰ Telkib el taem er a uchei er a kodellel a Jesus e ngdilu er a rechapostol el kmo: “Ma kmla ochotii er kemiu a kerebai, el dirrek el bo moruul er ngii el ua ikel kriruul er kemiu.” (Johanes 13:15) Ngdirk mlo merek el meriso ocherir tirke el 12 el apostol er ngii, e tia el omeruul a dimlak el siukang me a lechub e di lungil el omeruul. A uchei er a losaod er tia el cheldecheduch el kirel a omeriso el uach, e a Johanes a milluches el kmo: A Jesus a “mlo betik a rengul rar chedal er tial belulechad, me ngmle betik a rengul er tir el mora ullebongel.” (Johanes 13:1) Ngbltkil a rengul a Jesus el mo er a redisaiplo er ngii a uchul, me ngmiruul a tekoi el ua sibai. Me chelechang e ngkirir el oba klengareourreng el dul kesiou. Me nguaisei, a bliochel el bltikerreng er a klodam a  kirel el mo uchul e kede olecholt a bltikerreng el mo er a rudam me a rudos er kid.

²¹ A apostol el Petrus el ta er a lurriso a ochil a Ngelekel a Dios, a mlo medengelii a belkul a tekoi el lurruul er ngii. Ngmilluches el kmo: “Me bo ldul mekeald a rengmiu el kaubltikerreng, e ko mla mekikiid a reng er kemiu loeak a blekongesenges ra klemerang, me ko mocha oba diak a cheleblad er ngii el bltikerreng ra klaodam.” (1 Petrus 1:22) A apostol el Johanes el dirrek el lurriso a ochil a Jesus, a milluches el kmo: “Rengelekei, lak di doba chomelekoi ma berdel a ngor loubltikerreng, e bai doba chomeruul ma klemerang el kaubltikerreng.” (1 Johanes 3:18) Mada, me dolecholt er a bltikerreng el mo er a rudam me a rudos er kid el okiu a omerelled.

[Footnote]

Ke Dirk Melatk?

• Ngoeak a ngera el rolel e kede melemolem el omdois a bltikerreng el mo er a rebebil?

• Ngera el tekoi a ngosukid el mo mengoit a taem el mengedecheduch er a rebebil?

• Ngera uchul me ngkired el olecholt a klengareourreng sel doruul a budech?

• Ngera el tekoi a rullid el mo olengeseu er a rekldemed er a klaumerang?

[Aike el Ker er a Suobel]

[Siasing er a 23 el llel]

Douetkeu er a rekldemed er a klaumerang

[Siasing er a 25 el llel]

Mousbech a techellem el mengedecheduch er a rebebil