“Misei e a Dios a ngila bek el klekedall ra chelechad el locha ra chelechad el ngar sel uldesuel.”​—1 KORINTH 12:18.

1, 2. (a) Ngerang a ochotii el kmo a rebek el chad a ngar er ngii a ngerechelir er a chelsel a ongdibel el kirir el mengreos er ngii? (b) Ngera el ker a bo dosaod el ngar tia el suobel?

 SEL taem er a Israel er a irechar el me lmuut er a chelechang, e a Jehovah a uluusbech er a ongdibel er ngii el ulemeka er a rechedal er a tekoi er a klereng e omesterir a ulekrael. El ua tiang, a uriul er a lodecheleklii a mats er a Ai, e a Joshua a “chiluiu a ikel rokui el tekoi er a llach el kirel a klengeltengat ma dellebeakl, el oltirakl a ikel rokui el llechukl er a babier er a llach . . . er mederir a rokui el chad er a Israel.”​—Josua 8:34, 35.

² Ngar er a kot el dart el rak, e a apostol el Paulus a dilu er a Timoteus el ta er a remechuodel el kmo, a ongdibel er a Rekristiano a “blil a Dios” e dirrek el “chelsakl e omekedecheraol ra klemerang.” (1 Timoteus 3:15) Me tia el klodam er a remera el Kristiano er a beluulechad el rokir a omtechei er a “blil a Dios” er a chelechang. Ngar er a 12 el bliongel er a kot el babilengel el mo er a Rekristiano er a Korinth, e a Paulus a ulemekesiu er a ongdibel el ua bedengel a chad. Ngdilu el kmo, ngkakerous a urerel a bek el klekedall, engdi ngii el rokui a ngar er ngii a ultutelel. A Paulus a milluches el kmo: “Misei e a Dios a ngila bek el klekedall ra chelechad el locha ra chelechad el ngar sel uldesuel. Ma ikel klekedall ra bedenged el domdasu el kmo ngulenganget ra ikel bebil a bai dongull.” (1 Korinth 12:18, 23) Me nguaisei, a ngerechelel a chad er a chelsel a blil a Dios a diak el belkul a kmo ngkuk ungil me a lechub e ngmekngit er a urerel a kuk tang, e le ngkakerous a ngerechelir a rebek el chad. Me a leuaisei, e kede mekerang e mo medengei a ngerecheled er a chelsel a ongdibel er a Dios, me ngmo sebeched el mengreos er ngii? Ngera el tekoi a ngar er ngii a lerellii er a ngerecheled er a chelsel a ongdibel? E kede mekerang e ngmo sebechel a ngelsechekled el mo “bleketakl ra rokuil chad?”​—1 Timoteus 4:15.

Kede Mekerang e Kiresii Tia el Techelled?

3. Ngerang a ta er a rolel e ngsebeched el kiresii a techelled er a chelsel a ongdibel?

³ A ta er a rolel e ngsebeched el kiresii tia el techelled er a chelsel a ongdibel a sel dolecholt er a blekongesenges el mo er a Chelechad er a Ruungerachel, el tir a omtechei er “ngikel blak a rengul e mellomes a rengul mesiou.” (Monguiu er a Matteus 24:45-47.) Ngkmal kired el di kid el merriter el kmo, kid kede kongei a ulekrael el dengai el mla er ngike el mesiou? El ua tiang, ngmla mo betok el rak el dolai a ulekrael el kirel a rolel a omengetmeklel a bedenged me a biled me a tekoi er a ongelaod me a mekngit el usbechel a Internet. Kid kede kerekikl el olengesenges aika el ulekrael me bo el sebechel el mukerreu a klereng er kid? E kuk ua ngerang a osenged er sel ulekrael el kirel a omengull el telungalek? Kid kede kongei er tia el ulekrael e mla oterekeklii a taem el kirel tia el omengull? A lsekum e ke mesobil, e ke mla oterekeklii a temem el mo mesuub er a Biblia el di kau el tang? A Jehovah a mo omekngeltengat er kid el rokui a lsekum e kede oltirakl a ulekrael er ngike el mesiou.

4. Ngera kired el kerekikl el meruul sel dolilt a tekoi?

⁴ A rebebil a mo melekoi el kmo a derta el Kristiano a ngar er ngii a llemeltir el di tir el melilt a bilir me a rolel a longedmokl a bedengir me a dirrek el tekoi er a ongelaod. A mla metecholb el Kristiano el soal el mengreos er a techellel er a chelsel a ongdibel, a medengei el kmo a omelilt er ngii a diak el kirel el di ultuil er aike el soal el tekoi e lemerekong. Ngbai kirel el oba osengel a Jehovah el mocholt el oeak a Tekingel el Biblia. A klumech er a chelsel a ‘olbidel el omekrael er kid,  e llemesel a roled.’ (Psalm 119:105) Me ngkired el mo kerekikl sel dolilt a tekoi, e le tekoi el doruul a sebechel el ngar er ngii a lerellii er a omesiunged me a delongeled kid me a rebebil, el diak di el chelsel a ongdibel e ngdirrek el ikrel a ongdibel.​—Monguiu er a 2 Korinth 6:3, 4.

5. Ngera uchul me ngkired el kerekikl me lak doruul a tekoi el di oltirakl a soad?

⁵ A “reng el oureor er chelechang ra chelsir ar ngalek er chorrengesmengoit” a mla oberk er a beluulechad, me ngdi ua eolt el douteliil er ngii. (Efesus 2:2) Tia el reng a sebechel el rullid me kede mo omdasu el kmo ngdiak dousbech a ulekrael er a cheldebechelel a Jehovah. Ngkmal diak el soad el mo ua Diotrefes el dimlak el soal el oltirakl a ulekrael er a apostol el Johanes me ‘ngdimlak le ngiikemam.’ (3 Johanes 9, 10) Ngkired el kerekikl me lak doruul a tekoi el di oltirakl a soad. A omerelled me a tekinged lak bo el uchul e bo domtok er tia el mla meketmokl el rolel er a Jehovah e ngomeskid a ulekrael er a chelecha el taem. (Ulecherangel 16:1-3) Ngbai soad el kiresii tia el techelled el melemolem el oureor el oltirakl a ulekrael er ngika el mesiou. E dirrek el kired el mo olengesenges e kongei el mo chederedall er tirke el olab a ngerachel er a chelsel a ongdibel er kid.​—Monguiu er a Hebru 13:7, 17.

6. Ngera uchul me ngkired el di kid el merriter er a blekerdelel a klengar er kid?

⁶ A ta er a rolel e kede ochotii el kmo kede mengreos er tia el techelled er a chelsel a ongdibel, a oeak sel dekerekikl el di kid el merriter er kid, e doruul aike el sebeched el mo ‘mengebkall er chomesiunged’ el mo uchul a odanges el mo er a Jehovah. (Rom 11:13) A rebebil a sebechir el mo soiseb er a mui el taem el omesiou. E a rekuk bebil a mo teloi er a ureor er a klemissionari me a rudam el oldingel a ongdibel, me a dirrek el rebebil a kuk mo chedal a telungalek er a Bethel el meliuekl er a beluulechad el rokir. A rebetok er a rudam me a rudos a teloi er a ureor er a okedecherul a Kingdom Hall. A klou el ildois er a rechedal a Jehovah a blak a rengrir el melisiich a telungalek er tir er a tekoi er a klereng, e dirrek el mo teloi er a ureor er a berkel a klumech er a bek el sandei. (Monguiu er a Kolose 3:23.) Ngulterekokl a rengud el kmo sel dekengei el tongetengii a klengar er kid el mo er a tkul er a bab el sebeched el mesiou er a Dios, e ngmo er ngii a techelled el teloi er tia el mekreos el ureor.

A Tekoi el Ngar er Ngii a Lerellii er a Ngerecheled er a Chelsel a Ongdibel

7. Ka msodii a uchul me a blekerdelel a klengar er kid a ngar er ngii a lerellii er a ngerecheled er a chelsel a ongdibel.

⁷ Ngklou a ultutelel el di kid el merriter er kid e le ngerecheled er a chelsel a ongdibel a ultuil er aike el sebeched el remuul. El ua tiang, a ngerechelel a odam er a chelsel a ongdibel a kuk ngodech er a ngerachel el mloterekokl er a odos. A omesiunged el mo er a Jehovah a ultuil er aike el sebeched el remuul, el oltirakl er a rekil a chad me a klisichel a bedengel me a lmuut el bebil. A Osisechakl 20:29 a kmo: “A klebkellir a re mekekerel chad a klisichir, e a klebekelir a re mechuodel a cheball el bderrir.” A remekekerei el chad a ngar er ngii a klisichir el remuul a betok el tekoi, e a remechuodel a mo uchul a klungiolel a ongdibel el llemesel a rengrir me a klou el klaodengei er tir er a tekoi el bla bo lechelebangel er a klengar er tir a uchul. Me lak dobes el kmo ngoeak a grazia er a Jehovah, e ngsebeched el remuul a betok el kirel a omesiunged er a chelsel a cheldebechelel er a beluulechad el rokir.​—Rom 12:6-8.

8. Ngera sebechel el rullii er a ngerecheled er a chelsel a ongdibel aike el urunguled er a tekoi el soad el meruul?

 ⁸ A okesiu er a reteru el odos a meketeklii a ta er a tekoi el sebechel el ngar er ngii a lerellii er a ngerecheled er a chelsel a ongdibel. Te mlukeroul er a chelsel a ta el delengchokl e di dul mla tuobed er a ongeteruich me a ongeru el skuul. A rechad er a blirir a millisiich er tir el mo teloi er a mui el taem el omesiou er a uriul er a letobed er a skuul. Me a le tebedang er a skuul e a tang a mlo soiseb er a mui taem el omesiou, e ngike el tang a mlo oureor el mui el taem el mengereker. Ngera me ngmle kakerous a omelilt er tir? A urungulir a mle kakerous, me te di dul millilt a tekoi el sorir el mo meruul. Tiang a klemera el tekoi el kirir a rebetok el chad. Me ngungil a bo lulterekokl a uldesued el kirel a tekoi el bo doruul er a omesiunged el mo er a Dios. Kid ngsebeched el telkib el ngodechii a blekerdelel a klengar er kid me bo el sebeched el kilungii a omesiunged el mo er a Dios?​—2 Korinth 9:7.

9, 10. Kede mekerang a lsekum e ngdiak a klemeriarreng er kid el meruul a lmuut el betok er a omesiunged el mo er a Jehovah?

⁹ E kuk mekerang a lsekum e ngdiak a klemeriarreng er kid el meruul a lmuut el betok el kirel a omesiunged el mo er a Jehovah me a lechub e kede kuk di meruul aike el mla moterekokl el ngerecheled e merekong? Ngar er babilengel a Paulus el mo er a Rekristiano el ngar er a Filipi e ngdilu el kmo: “Le Dios choureor ra chelsiu lolekiis a urrunguliu e oltaut, le tiakid a ungilbesul ra Dios.” Me nguaisei, a Jehovah a sebechel el omekrael a uldesued, e meklemalt a rengud me a urunguled.​—Filipi 2:13; 4:13.

¹⁰ Me a leuaisei, e ngkmal kired el olengit er Ngii me lengesukid el mo meruul a soal. A King el David er a Israel er a irechar a mirruul el uaisei er a loluluuch el kmo: “Mocholt a rolem er ngak e RUBAK; mosisecheklak el merael er ngii. Morolak er a chelsel a klemerang er kau e mosisecheklak, ele kau ia Dios el osebelek; ak di ultuil er kau.” (Psalm 25:4, 5) Kid me ngdirrek el sebeched el meluluuch el mo er a Jehovah me lengesukid el mo meruul aike el soal. Sel dodengei el kmo ngua ngerang a uldesuel a Jehovah me a Ngelekel el kirel aike el tekoi el sorir a doruul er a omesiunged, e ngulterekokl el mo uchul a klou el omereng el saul er kid el mo er tir. (Matteus 26:6-10; Lukas 21:1-4) Me a urunguled el soad el lmuut el meruul a betok a mo uchul e kede olengit er a Jehovah me lengesukid el lmuut el mo blak a rengud el mesiou er Ngii. A profet el Isaia a milecherei a kerebai el kired el oltirakl er ngii. E le sera lerengesii a Jehovah el oker el kmo: “Ng techa bo kuderchii? Ng techa mo oderchelam?” Mak ulenger el kmo, “Ng ngak a mong! Moderchak!”​—Isaia 6:8.

Kede Mekerang a Dolengeriakl el Beduluchei?

11. (a) Ngera el omesiou er a chelsel a cheldebechelel a Jehovah a ngar er ngii el sebechir a rudam el mo teloi er ngii? (b) Ngmekerang a odam e sebechel el mo ngmai aika el techall er a omesiou er a chelsel a ongdibel?

¹¹ Sel domes a ildisir a rechad el miltecholb er tia el mlo merek el rak er a 2008 el mle 289,678, e ngmeketeklii el kmo ngkmal klou a ureor el dirk  ousbech er a rebetok el odam. Me te mekerang a rudam el kirel tia el tekoi? Ngkmal ungil a lolasem el oltirakl a Bades el kirel a chad el soal el mo mesiou el ta er a remechuodel me a lechub e ngmesiou el olengeseu er a remechuodel. (1 Timoteus 3:1-10, 12, 13; Titus 1:5-9) Ngera ngochotii a lsekum a odam a melasem el oltirakl a Bades me ngblechoel el oldingel a obliil, e blak a rengul el meruul a ngerechelel er a ongdibel, e blechoel el ungil el onger er a bek el temel a miting er a Rekristiano, e dirrek el olecholt er a klemeriarreng er ngii el mo er a rudam me a rudos er ngii? A loruul el uaisei e ngolecholt el kmo ngmera el mengreos er tia el techellel el mesiou er a chelsel a ongdibel.

12. Te mekerang a rengeasek el odam e ochotii a blakerreng er tir el kirel a klemerang?

¹² A rengeasek el odam ngera sebechir el remuul me bo lolengeriakl el beduluchei er a omesiungir? A bo leblak a rengrir el mesuub er a Biblia e ngmo sebechir el omekeroul er a “llomeserreng ma utebengel a tekoi er a klereng.” (Kolose 1:9) Ngdirrek el sel lolemolem el mesuub er a Tekingel a Dios, e lengar er a bek el miting er a ongdibel e ngsebechir el olengeriakl. Ngar er ngii a ‘kloul blkais el siseball ra ngarngii a klisichel lurreor’ el kirir choua itirka el ngeasek el odam el sorir el mo teloi er a mui el taem el omesiou. (1 Korinth 16:9) A domekeroul er a klemeriarreng el kirel a omesiunged el mo er a Jehovah, e ngmo uchul a kot el ungil el rolel a klengar, e dirrek el mo uchul a betok el klengeltengat.​—Monguiu er a Olisechakl 12:1.

13, 14. Ngoeak a ngera el rolel e a rudos a sebechir el ochotii el kmo, te mengreos er a techellir er a chelsel a ongdibel?

¹³ A rudos a dirrek el sebechir el ochotii el kmo te mengreos er a techellir el oltaut er a tekoi el ngar er a Psalm 68:11 el kmo: “A re betok el redil a mlo omerk er a chais.” A ta er a kot el ungil el rolel el sebechir a rudos el ochotii a omereng el saul er tir el kirel a omesiungir, a sel leteloi er a ureor el meruul er a remo disaiplo. (Matteus 28:19, 20) Me sel loruul er tia el omesiungir, e lekengei el melenget aike el ngar er ngii er tir el kirel tia el ureor, e te ochotii el kmo te mengreos er tia el techellir er a chelsel a ongdibel.

¹⁴ A Paulus a milluches el mo er a Titus el kmo: “Ar mechas me dilerrek el uaisei el mongelechel er tir me le ua teletelir ar mechedaol, . . . e bai bo lsensei ra ungil tekoi, e lolisechakl rar mekekerel redil el mo betik a rengrir rar becherir mar ngelekir, e lulserechakl a rengrir, e lulekidakl, e loureor a tekoi ra blirir, e lungil, e loltirakl rar becherir, me lak le motuub a tikingel a Dios.” (Titus 2:3-5) A rudos a kmal sebechir el mo uchul a omelisiich er a chelsel a ongdibel! El oeak sel lolecholt er a omengull el mo er a rudam el olab a ngerachel, e lungil a omerellir el oeak a omengetmeklel a bedengir me a bilir me a omelilt er tir el kirel a ongelaod. Me a loruul el uaisei, e te olecholt el kmo te mengreos er tia el techellir er a chelsel a ongdibel e mo uchul e ngsebeched el oukerebai er a ungil el blekerdelir.

15. A mesobil el odos, ngmekerang e sebechel el outekangel er a blekeradel el blechoel el sabisi?

¹⁵ A lebebil er a taem e ngmo meringel er a remesobil el odos el melechesuar tia el techellir er a chelsel a ongdibel. A ta el odos el mla obengelii tia el blekeradel a kmo: “A lebebil er a taem e ak kmal sabisi.” Sera loker er ngii el kmo ngmilekerang e mlo sebechel el outekangel, e ngdilu el kmo: “A nglunguuch me a omesuub a ngilsukak el mo melechesuar tia el techellek er a chelsel a ongdibel. Ak mesuub er sel rolel a Jehovah a lorriter er ngak. E dirrek el melasem el olengeseu er a rebebil er a chelsel a ongdibel. Me ngoeak tiang e ngngilsukak el mo melatk er a rebebil e diak di kumdasu el kirek.” Ngar er a Psalm 32:8 e a Jehovah a dilu er a David el kmo: “Ak mo osisecheklau e meskau a  ngesou er a ungil uldasu.” Me nguaisei e a Jehovah a semeriar er a derta el mesiungel el mo lmuut er a remesobil el rudos, e dirrek el ngosuterir a rokui el mesiungel el mo metik er a techellir er a chelsel a ongdibel.

Molemolem el Mengreos er Tia el Techellem!

16, 17. (a) Ngera uchul me kede rirellii a kot el ungil el telbiil er a lekengei a Jehovah el ngoikid el osisebid er a chelsel a ongdibel er ngii? (b) Kede mekerang e melemolem el mengreos er tia el techelled er a chelsel a cheldebechelel?

¹⁶ Ngoeak a bltkil a rengul a Jehovah e ngmla rullii a ungil el deleuill er ngii me a derta el mesiungel. A Jesus a dilu el kmo: “Ngdiak a chad el sebechel mer ngak a lak le ngikel ulderchak el Chedam a kursii.” (Johanes 6:44) Ngar er a delongelir a rebetok el biliol el chad el ngar tia el chutem er a chelechang, e a Jehovah a mla ngoikid el osisebid er a chelsel a ongdibel er ngii. Kede mla rullii a kot el ungil el telbiil el obengkel er sera lekengei el ngoikid el mo chedal. Me chelechang e ngmla mo er ngii a moktek er a klengar er kid. Me ngmera el uchul a deurreng sel dodengei el kmo ngar er ngii a mekreos el techelled er a chelsel a cheldebechelel a Jehovah!

¹⁷ A ta er a milluches er a Psalm a dilu el kmo: “RUBAK, ng soak a blil a delengcheklem, . . . [A] ochik a dechor er a melemalt el chutem; ak mo oldanges er a RUBAK er a chelsel sel klou el ongdibel.” (Psalm 26:8, 12) Ngika el mera el Dios a meskid a techelled er a chelsel a cheldebechelel. Me a dolemolem el oltirakl a ulekrael er a Jehovah, e doba blakerreng el mesiou er ngii e ngsebeched el melemolem el urrekodel er tia el mekreos el techelled er a chelsel a cheldebechelel.

Ke Dirk Melatk?

• Ngera uchul me ngsebeched el melekoi el kmo a rokui el Kristiano a ngar er ngii a techellir er a chelsel a ongdibel?

• Kede mekerang e ochotii el kmo kede mengreos er a techelled er a chelsel a cheldebechelel a Dios?

• Ngera el tekoi a sebechel el ngar er ngii a lerellii er a techelled er a chelsel a ongdibel?

• Te mekerang a rengeasek me a remeklou el chad el Kristiano e ochotii el kmo te mengreos er a techellir er a chelsel a cheldebechelel a Dios?

[Aike el Ker er a Suobel]

[Siasing er a 19 el llel]

Te mekerang a rudam e mo sebechir el ngmai a techellir er a chelsel a ongdibel?

[Siasing er a 20 el llel]

Te mekerang a rudos e ochotii el kmo te mengreos a ngerechelir er a chelsel a ongdibel?