AOMOMES el meliuekl er kau e ngsebechem el mesang el kmo a chelebirukel me a chelebuul a kmal obdois. A mekemad a dul lomekoad er a resoldau me a redi chad er a beluu. A delengerenger me a uldikel a di blechoel el domes. Nglocha dirrek el mla duubech a mekngit el eko er kau el omelekiakl me a diak el melemalt el omeruul a uchul. Me alta aika el tekoi el momes me a obla mcharm a rirellau el mo oker el kmo, ‘Ngera uchul me a Dios a omechei a chelebirukel?’

Tiang a diak el beches el ker. A bekord el 3,600 el rak er a mla me mong, e a blak a rengul el mesiungel a Dios el chad el ngklel a Job a uleker el kmo: “Ngera ma Dios a mechititerir a re mekngit el chad me te chad, e mechititerir me te mo mechuodel e ungilbesrir?” (Job 21:7) A profet el Jeremia er a ongeuid el dart el rak er a uchei er a taem er kid a kmal mle meringel a uldesuel er a mekngit el omerellir a rechad er a belual me nguleker el kmo: “Ng ngera uchul ma re mekngit el chad a mo meteet? E ngera uchul ma re cheblad a mo ungilbesrir?” (Jeremia 12:⁠1) A Job me a Jeremia a dul mle medengei el kmo a Dios a melemalt. Engdi te mle rrau a rengrir el melebedebek el kmo ngera me ngkmal mle klou a chelebirukel. Kau a locha dirrek el rrau a rengum er tia el tekoi.

A rebebil er a rechad a oltelechakl er a Dios el kirel a chelebirukel me a chelebuul el ngar er ngii. A rebebil a melebedebek el kmo: ‘A lsekum a Dios a olab a rokui el klisiich, e melemalt, e betik a rengul, e ngerang me ngdiak el terrob aika el mekngit me a chelebuul? Ngera uchul me ngomechei a chelebirukel me ngmelemolem el mei er a chelechang?’ A ongingil el suobel a mo onger aikang me a lmuut el bebil er a meklou a ultutelel el ker.

[Credit Line]

AP Photo/​Adam Butler