“Ma rokuil chad a mukngar el ngara Kristus, el ua rokuil chad el mad el ngara Adam.”​—1 KORINTH 15:22.

1, 2. (a) Ngmilekerang a Andreas me a Filipus er a losiueklii a Jesus? (b) Ngera uchul me ngsebeched el melekoi el kmo a tekoi el dolab el omeketakl er a Klemessias er a Jesus a kuk betok er aike el lullab a Rekristiano er a kot el dart el rak?

 A ANDREAS a mle ulterekokl a rengul el kmo a Jesus er a Nazareth a Ngike el Ngellitel er a Dios me ngdilu er a odam er ngii er a Petrus el kmo: “A ki miltik ra Messias.” A Filipus a mlo oumerang er tia el tekoi me ngmlo osiik er a sechelil er a Nathanael e ouchais er ngii el kmo: “A ki mla metik er ngikel llechukl ra llach ra Moses, e dirrek el llechukl rar profet, el Jesus ra Nazareth, el ngelekel a Josef.”​—Johanes 1:40, 41, 45.

² Kau ke mera el mui el oumerang el kmo a Jesus a ngike el mera el ngar er a telbiil el Messias, el ngii a “ngikel Uchelel cholsobel” er a Jehovah? (Hebru 2:10) Chelecha el sils, e a olechotel a Messias el dolab a kuk betok er a lullab a reblak a rengrir el mesiungel. Ngar er a cherellel a Jesus el mo lmuut er a okisel, e a Tekingel a Dios a meskid a cherrungel el olechotel a kmo ngii a mle Kristus. (Monguiu er a Johanes 20:30, 31.) A Biblia a dirrek el olecholt el kmo a Jesus a ngar er a eanged e melemolem el oltaut a ngerechelel el ua Messias. (Johanes 6:40; monguiu er a 1 Korinth 15:22.) Ngar er a omesoded er a tekoi er a klereng, e kau me ngdirrek el sebechem el melekoi el kmo ke mla ‘metik ra Messias’ er a chelecha el sils. Engdi kot e hall e bo domes el kmo tirke el mle kot el disaiplo te mlekerang e mo medengei el kmo te miltik er a Messias.

Chedaol el “Bertelel” a Messias a Mekekokil el Obeketakl

3, 4. (a) Te milekerang a redisaiplo er a kot el dart el rak e “miltik ra Messias?” (b) Ngera uchul me ngsebechem el melekoi el kmo ngdi ta el Jesus a uleltaut aike el rokui el ulaoch el kirel a Messias?

³ Ngmekerang e sebechir a rulebengkel a Jesus el mo ulterekokl a rengrir el kmo ngngii a mle Messias? Nguleak a reprofet, e a Jehovah a mlekekokil el lomeketakl aike el mo olengchelel a mei er a Messias. A ta er a mesuub er a Biblia a ulemekesiu er tia el blekeradel el mo er a teletelel a dongederoder a kakerous el klekedellel a chimo el bleob. Ka molebedebek er a betok el kakerous el chad el dirkak a ta me lechadecheduch er a delongelir a lemei el lolab a derta el kakerous el klekedellel ngika el bleob el me mengederoder. A lsekum seikid el taem, e ngii el kakerous el klekedall a mechederoder el rullii a chimo el cherrungel el bleob el diak a klekedellel el dibus, e ke ulterekokl el locha mo melatk el kmo ngmla er ngii a milluk aika el kakerous el klekedellel ngii el bleob e uleldurokl a derta me a derta er ngii el mo er tirka el chad el lullab el mei. Me ngdi uai aika el derta el teluk el klekedellel ngii el bleob, e a rokui el ulaoch el kirel a Messias a omeskid a dertelkib el meklou a ultutelel el tekoi el omeketakl er a Messias.

⁴ Me ngua ngerang a techellel aika el rokui el ulaoch el kirel a Messias a di lengabt e bo lemotaut er a ta el chad? A ta er a merriter a tekoi el chad a dilu el kmo a techall el sebechel el di ngabt e a rokui el ulaoch el kirel a Messias a motaut er a ta el chad a kmal “imis el ongasireng” me ngkirel el mechoit el uldasu. Me seikid, e ng “di ta el Jesus er a chelsel a reksi er a klechad a mle sebechel el rullii tia el tekoi.”

5, 6. (a) Ngmekerang a bo lemotaut a kerrekeriil el mo er a Satan? (b) Ngmilekerang a Dios er a lokekokil el lomeketakl er a uldidellel a rasech er ngike el tane me a lechub e ngngalek er a telbiil?

⁵ Sel lolisiich er ngii aika el ulaoch el kirel a Messias a mle chedaol el “bertelel” a Dios el betok a telengtengil el melutk el kirel a tekoi er a eanged me a chutem. (Kolose 1:26, 27; Genesis 3:15) A mle uldimukl er a chelsel ngii el bertelel a Dios a sel kerrekeriil el mo er a Satan el Diabelong, el “chuodel bersoech,” el mle uchul me a rechad a rirebet er a klengit me a kodall. (Chocholt 12:9) Tia el kerrekeriil ngmekerang a bo lemeketmokl? A Jehovah a uluuchais el kmo a tane me a lechub a ngelekel a “redil” a mo rukemii a bdelul a Satan. Ngika el mildung er a  ulaoch el tane a mo rukemii a bdelul a bersoech, e mo choridii sel luchul a ultok me a secher me a kodall. Engdi ngoeak a kengei er a Dios, e a Satan a kirel el kot e ngma rullii a okesiul a blangch el tellemall el mo er a kotel a ochil a tane er a redil.

⁶ A Jehovah a mlekekokil el lomeketakl er a kmo ngtecha ngii el tane me a lechub e ngngalek er a telbiil. Ngrirellii a mesisiich el telbiil el mo er a Abraham el kmo: “Ngoeak a tane er kau e a rokui el renged er a beluulechad a mo mukngeltengat e le kau el ulerrenges er a ngerek.” (Genesis 22:18, NW) A Moses a uluuchais el kmo Ngii el chad a mo “profet” me a omerellel a kuk mo klou er aike el lurruul a Moses. (Duteronomi 18:18, 19) Ngmloterekokl el mo er a David, me a reprofet me te dirrek el millisiich er ngii el tekoi er a uriul el kmo, a Messias a mo mechell el ngar er a klengelakel er a David e mo mudiukes er a kingellel a David er a omengedereder el diak a ulebengelel.​—2 Samuel 7:12, 16; Jeremia 23:5, 6.

Tekoi el Kirel a Jesus el Lomeketakl er a Klemessias er Ngii

7. Ngoeak a ngera el rolel e a Jesus a mla er a buch el dil er a Dios el mei?

⁷ A Dios a uldureklii a Ngelekel, el ngike el kot el ulebeob, el mla er sel ua buch el dil el cheldebechellel er a rechelechad el reng el ngar er a eanged, el mo ngike el mildung er a ulaoch el tane. Me a loruul er tiang e ngmlo kirel ngika el di ta el Ngelekel a Dios el “mechachongii” a klengar er ngii er a eanged e mei er a beluulechad el me mechell el ua cherrungel el chad. (Filipi 2:5-7; Johanes 1:14) A Maria er a ‘lemechucheb’ er a chedaol el reng e ngmloterekokl el kmo a bo lomechell er ngii a ‘mo okedongall el chedaol el Ngelekel a Dios.’​—Lukas 1:35.

8. Ngmilekerang a Jesus er a loltaut er a ulaoch el kirel a Messias er sel taem er a lodersii el kirel a techolb?

⁸ A ulochel a Messias a ullecholt er a kmo ngngar er ker e oingerang e ngme duum a Jesus. Ngmilechell er a Bethlehem el ua aike el mildung er a ulaoch. (Mika 5:2) Ngar er a kot el dart el rak, e a Rechijudea a mle madeltmuil el mengiil er a Messias. Tir el milengiil er a demiel a Messias a uchul e a rebebil a uleker el kirel a Johanes el Techolb el kmo: “Kele le ngii a Kristus.” Engdi a Johanes a ulenger el kmo: “Ngikel kuk misisiich er ngak a merekung.” (Lukas 3:15, 16) A lebo er a Johanes er a mochu er a ulebongel er a rak er a 29 el mo metecholb er a le 30 a rekil, e a Jesus a uldersii el ua Messias el oltirakl er sel mle telutk el taem. (Daniel 9:25) A uriul er isei e ngmlo omuchel er a urerel er a berkel a klumech e melekoi el kmo: “Ngmocha blsechel ma rengedel a Dios a kmedang.”​—Markus 1:14, 15.

9. Me alta e ngdimlak el lecherrungel a klemedengei er tir, engdi a redisaiplo er a Jesus ngmla er ngii a mesisiich el klaumerang er tir el kirel a ngerang?

⁹ Engdi ngmle kirel el semechekill a uldesuir a rechad. Ngmle melemalt el luleldiu el oldanges er a Jesus el ua King, engdi a omengederederel el mo er ngii er a ngar er a medad me a klemedengei el kirel a kmo ngmo mengedereder el ngar er a eanged a blochu lodengelii er a uriul. (Johanes 12:12-16; 16:12, 13; Rellir 2:32-36) Me nguaisei engdi sera loker a Jesus el kmo, “E kemiu a kmo ngak ak techang?” E a Petrus a di mle mereched el onger el kmo: “Ikau a Kristus, el Ngelekel a dingar el Dios.” (Matteus 16:13-16) A Petrus a dirrek el ulenger er a osisiu el tekoi, er sera lemesibas er a osisechakl a rebetok el chad me blo lak lorael el obengterir.​—Monguiu er a Johanes 6:68, 69.

 Morrenges er a Messias

10. Ngera uchul me a Jehovah a millisiich er a klungel a ultutelel a dorrenges er a Ngelekel?

¹⁰ Ngar er a eanged, e a di ta el Ngelekel a Dios a mle mesisiich el chelechad el reng. E sera lengar er a chutem, e a Jesus a ‘ulemtechei er a Chedam.’ (Johanes 16:27, 28, NW) Ngmillekoi el kmo: “Chosisecheklek a diak le mlar ngak, ele ng mlar ngikel ulderchak.” (Johanes 7:16) Me a lolterekokl er a Klemessias er a Jesus er sel taem er a lemengodech a teletelel, e a Jehovah a dilu el kmo: “Morrenges er ngii.” (Lukas 9:35) Nguaisei, morrenges, me a lechub e molengesenges, er Ngika el Ngellitel. Tiang a uluusbech er a klaumerang me a ungil el ureor, el ngii a klou a ultutelel el kirel a deuil a rengul a Dios me a ngeiul a diak a ulebengelel el klengar.​—Johanes 3:16, 35, 36.

11, 12. (a) Ngera mle uchul me a Rechijudea er a kot el dart el rak a ultngeklii a Jesus el ua Messias? (b) Te rua techang a uluumerang er a Jesus?

¹¹ Me alta e ngmla er ngii a kmal betok el tekoi el lulemeketakl er a Jesus el kmo ngngii a Messias, engdi a oumesingd er a Rechijudea er a kot el dart el rak a dimlak el kengei el kmo ngngii. E ngera uchul? E le tir el di mla remuul a uldesuir el kirel a Messias, el uldimukl er ngii a kmo ngmo chad er a balatiks el sebechel el mo ngubeteterir er a orimel er a eungel a meringel el omengederederel a Rom. (Monguiu er a Johanes 12:34.) Sei a uchul me ngdimlak el sebechir el kongei er a Messias el uleltaut a ulaoch el kmo ngmo muketui, me a rechad a mengeroid er tir er ngii, e mo mukcharm e teloi er a resmecher, e a uriul e ngmo mokoad. (Isaia 53:3, 5) Ngmo lmuut er a rebebil er a reblak a rengrir el disaiplo er a Jesus me ngmlo moalech a rengrir er ngii el dimlak lotebedii a Israel er a eungel a meringel el omengederederel a Rom. Engdi te millemolem el loba blakerreng el mo er ngii, e a uriul e te ngiluu a mera el klemedengei el kirel tia el tekoi.​—Lukas 24:21.

¹² A osisecheklel a Jesus, el mle meringel er a rebetok el chad el kongei, a mle ta er a uchul me te ultngeklii el ua ngike el ngar er a telbiil el Messias. A bebil er ngii el osisechakl a mle ua aika el kmo a chad el mo soiseb er a Rengedel a Dios a kirel el ‘choitii a klechad er ngii,’ e ‘mengang’ a bedengel e melim a rsechel a Jesus, e “mechell el beches,” e mo “diak le klalo ra belulechad.” (Markus 8:34; Johanes 3:3; 6:53; 17:14, 16) A remekedidai a rengrir me a remerau me a recheblad a ulemes aika el tekoi el kmal meringel a bo loltaut. Engdi a rengariou a rengrir el Chijudea a kilengei er a Jesus el ua Messias, el di uai a rebebil er a rechad er a Samaria el millekoi el kmo: “Ngikang a meral Osobel ra belulechad.”​—Johanes 4:25, 26, 41, 42; 7:31.

13. Ngmilekerang a Jesus e mlo chuarm er sel okesiu el tellemall el ngar er a kotel a ochil?

¹³ A Jesus a millekoi el kmo ngmo motuub er a bderrir a reprist, e a Rechisentail a mo dmelii er a kerrekar, engdi ngngar er a ongedei el klebesei e ngmo mekiis. (Matteus 20:17-19) A tekingel er a lengar er a Sanhedrin el du el kmo ng Kristus el “Ngelekel a Dios,” a lulemes a rechad el kmo ngotuub. (Matteus 26:63-66) A Pilatus a miltik er ngii el kmo ng “dimlak a ngera el le rellii el mo kirel a kodall,” engdi a rechad er a Judea a uleltelechakl er ngii el kmo ngomtok er a kabelment a uchul me a Pilatus a “ulterekeklii [a Jesus] er tir el le bora ikel sorir er ngii.” (Lukas 23:13-15, 25) Alta e ngmla er ngii a betok el olechotel a kmo ngmlodurokl er a Dios el mei, engdi te ‘dimlak lenguu’ e mlo melib a kodellel “ngikel Uchelel a klengar.” (Rellir 3:13-15) Me ngua mildung er a ulaoch, e a Messias a ‘mlokoad’ er a ledelii er a kerrekar er a sils er a Baskua er a rak er a 33. (Daniel 9:26, 27; Rellir 2:22, 23) Ngoeak tiakid el mekngit el kodellel, e ngmlo chuarm er a tellemall el ngar er a “kotel a ochil” el ua lolekoi a Genesis 3:15.

A Uchul Me a Messias a Mle Kirel el Mad

14, 15. (a) Ngera aike el eru el luchul me a Jehovah a milecherei a Jesus me ngmad? (b) Ngerang mirruul a Jesus er a uriul er a lemokiis er a kodall?

¹⁴ A Jehovah a milecherei a Jesus me ngmlo chormii a kodall el mla er ngii a eru el luchul. A kot, e a blakerreng er a Jesus el mo lmuut er a kodall a silmecheklii a klou a ultutelel el telengtengil a chedaol el “bertelel” a Dios. Ngmlo cherur a kodall el lullecholt el kmo a cherrungel el chad a sebechel el churrengelii a “chomeluu ra Dios,” e melemolem el melisiich er a klisichel a omengederederel a Dios a lechelebangel a meringel el omelsemai el mla er a Satan el mei. (1 Timoteus 3:16) Ongerung, e ngdi ua aike el dilung a Jesus el kmo a “Ngelekel a chad [a] mlei el . . . mengkengkii a klengar er ngii el ngbetir ar betok.” (Matteus 20:28) Tia el osisiu a kerresel el ‘olubet’ a mlo mengkad er sel blsel a klengit el lemludiukes er ngii a klengelakel er a Adam, e milekengii a techall er a diak a ulebengelel el klengar el mo er tirke el rokui el kongei er a Jesus el kmo ngngii a lousbech er ngii a Dios el mo olsobel er a klechad.​—1 Timoteus 2:5, 6.

¹⁵ Uriul er a edei el klebesei el ngar er a debull, e a Jesus a milekiis er a kodall, e mle 40 el klebesei el lomais  el mo duum er a redisaiplo er ngii, el olecholt el kmo ngngar e ulemesterir a lmuut el bebil er a ulekrael el lousbech. (Rellir 1:3-5) A uriul e ngngilasech el mo er a eanged el lulebang a kerresel a tengetengel el mo msa Jehovah e milengiil el mo er sel telutk el taem el bo lomuchel el mengedereder el ua Messias el King. Engdi ngmo lmuut er isei, e ngmla er ngii a betok el mle kirel el meruul.

Ngmerekui er a Urerel el ua Messias

16, 17. Ka basech aike el ngerechelel a Jesus el bo loruul el ua Messias er a uriul er a lengasech el mo er a eanged.

¹⁶ Ngar er aika el betok el dart el rak er a uriul er a okisel, e a Jesus a mle blak a rengul el lomtebechel a urerel a ongdibel er a Rekristiano el ngii a longedereder er ngii el ua King. (Kolose 1:13) Ngar sel telutk el taem, e ngmo omuchel a omengederederel el ua King er a Rengedel a Dios. A ulaoch er a Biblia me a tekoi el dubechang er tia el beluulechad a omeketakl el kmo ngmle duum el ua King er a 1914, e dirrek el ulemuchel a “ullebongel ra taem ra belulechad.” (Matteus 24:3; Chocholt 11:15) Telkib el taem er a uriul er isei, e ngulebengterir a rechedaol el anghel e otebedii a Diabelong me a remekngit el reng er ngii er a eanged.​—Chocholt 12:7-10.

¹⁷ A ureor er a berkel me a osisecheklel a ungil el chais er a Renged el lulechelii a Jesus er a rak er a 29 a olekedang a ulebongel er ngii. Ngdi kmedung e ngmo oukerrekeriil er a rokui el di ngar. Seikid e ngmo kmu er tirke el ua sib el kilengei er ngii el kmo ngii a rolel a osobel el lousbech er ngii a Jehovah me te mo melai a dikesir er a ‘rengedel a Dios el mlekedmokl el kirir era uchelel a belulechad.’ (Matteus 25:31-34, 41) Tirke el ultngeklii a Jesus el ua King a mo metemall sel lebo lobengkel a urrurt er a eanged el mo olekngemed a chelebirukel. E a uriul er tiang, e a Jesus a mo rongedii a Satan me a remekngit el reng er ngii e choititerir er a “diak a btil deliobech.”​—Chocholt 19:11-14; 20:1-3.

18, 19. Ngerang mo kutmeklii a Jesus sel loltaut er a ngerechelel el ua Messias, e tiang mo uchul a ngerang el kirir a rebekongesenges el chad?

¹⁸ Ngar sel Ta el Telael el Rak el Longedereder, e a Jesus a mera el mo oltaut a belkul aike el rokui el dial, el ua “Chellimosk el chad er a Kansol,” e “Mesisiich el Dios,” e “Chedam er a Cherechar,” e “King er a Budech.” (Isaia 9:6, 7) A omengederederel a Rengedel a mo rulleterir a rechad el mo cherrungel, el uldimukl er tirke el mekiis er a kodall. (Johanes 5:26-29) A Messias a mo omekrael er a rebekongesenges el chad el mo er a “madedok el ralm ra klengar,” me bo el luchul e bo loldeu a rengrir er a deleuill er tir el lobengkel a Jehovah el ngar er a budech. (Monguiu er a Chocholt 7:16, 17.) A uriul er a ulebongel el skeng, e a rokui el lomtok, el uldimukl er a Satan me a remekngit el reng er ngii a mo obidokl er a “diosech el ngau,” el ngii sel omerukem er a bdelul a “bersoech.”​—Chocholt 20:10.

¹⁹ Me a Jesus a mera el oltaut er a ngerechelel el uai a Messias el ngar er a kmal mengasireng el rolel el diak a tellemall er ngii! A paradis el chutem a mo mukeek er a rechad el mla mengubet er a klengit el mocha kiei el diak a ulebengelel el cherrungel a klisichel a bedengir e ngar er a deurreng. A chedaol el ngklel a  Jehovah a mla mekikiid er a bek el dellenguul me a llemeltel a klisichel a omengederederel er a uldekial a eanged me a chutem a mla obeketakl. Ngmera el mengasireng el diukes a medechel er a telkib el taem er a medad el kirir tirke el rokui el olengesenges er Ngika el Ngellitel er a Dios!

Kau Ke Mla Metik er a Messias?

20, 21. Ngera ngar er ngii el luchul me ke ouchais er a rebebil el kirel a Messias?

²⁰ Ngar er a 1914 el mei, e kede mlo kiei er a chelsel a taem er a demiel a Kristus. Alta e a omengederederel el ua King el ngar er a Rengedel a Dios a diak desang, engdi tia el tekoi a bleketakl el loeak a otutel a ulaoch. (Chocholt 6:2-8) Me nguaisei, engdi ngdi uai a Rechijudea er a kot el dart el rak, oumesingd el chad er a chelecha el sils a diak lomtab aika el olengchelel a demiel a Messias. Te dirrek el sorir a messias er a balatiks me a lechub e ngchad el ngii a mo oureor el lousbech a omengederederel a balatiks er a klechad. Engdi kau a mla mo medengei el kmo a Jesus er a chelechang a mengedereder el ua King er a Rengedel a Dios. Ngdimlak el sal mo dmeu a rengum er sera bo modengelii tia el tekoi? Me ngdi uai a redisaiplo er a kot el dart el rak, e kau a ulterekokl el mlo soam el melekoi el kmo: “A ki miltik ra Messias.”

²¹ Chelecha el sils, e sel mosaod er a klemerang, e ke omeketakl er sel ngerechelel a Jesus el uai a Messias? Omoruul el uaisei, e ngsebechel el smisichii a omereng el saul er kau el kirel a tekoi el bla loruul el kirem, me a tekoi el loruul er a chelechang, me a tekoi el bo loruul er a ngar er a medad. Ngdi ua Andreas me a Filipus, e ke ulterekokl el mla mengedecheduch er a rechedam me a resechelim el kirel a Messias. Ngera me ngdiak bai mluut el mo mengedecheduch er tir e mochotii el mo er tir el kmo a Jesus Kristus ngngii ngike el mla er a telbiil el Messias, el rolel a osobel el lousbech er ngii a Dios.

Ngsebechem el Mesaod?

• Te milekerang a redisaiplo er a kot el dart el rak e metik er a Messias?

• Ngera aike el eru el meklou a ultutelel el luchul me a Jesus a mlad?

• Ngera dirk kirel el mo meruul a Jesus el mo oltaut er a ngerechelel el ua Messias?

[Aike el Ker er a Suobel]

[Siasing er a 25 el llel]

A rechad er a kot el dart el rak, te milekerang e mo medengei el kmo a Jesus a ngike el mla er a telbiil el Messias?

[Siasing er a 27 el llel]

Sel mongedecheduch er a rebebil, e ke omeketakl er a ngerechelel a Jesus el ua Messias?