“Bo le blak a rengum ra di urerel a ikal tekoi, ma ngelsecheklem bo le bleketakl ra rokuil chad.”​—1 TIMOTEUS 4:15.

1, 2. Ngera kede medengei el kirel a klengar er a Timoteus er a lekekerei el buik me a omelodech el mlo er ngii er a bocha lebekord el 20 a rekil?

 A GALATIA el mle chederedall er a Rom, el chelecha el taem e ngokedongall el Turkey, a mle belual a kekerei el buik el Timoteus. Ngar seikid el beluu, e ngbetok el ongdibel er a Rekristiano a mlukdubech er a uriul er a kodellel a Jesus. A Timoteus me a delal me a delal a delal a rebebil er a remlo mesisiich el Kristiano er a chelsel a ta er aikaikid el ongdibel. (2 Timoteus 1:5; 3:14, 15) A Timoteus a kmal uleldeu a rengul er a klengar er ngii el ua ngeasek el Kristiano e kiei el iliuekl er a tekoi el ble lodengei, engdi ngmla er ngii a lmuut el betok el klengeltengat el dirk mle medechel el mlo kirel.

² Ngrokui el ulemuchel er a taem er a ongerung el odngelel a apostol el Paulus. Seikid el taem e a Timoteus a locha bekord el 20 a rekil. Ngar er a odngelel a Paulus, el locha mlo er a Lystra, e ngrirenges el kmo a Timoteus a mle “ungil a chisel rar udam” er a ongdibel er ngii. (Rellir 16:2) A Timoteus a locha mle ultebechel e ullecholt a blekeradel er a klloulechad. Me ngngar er a eungel a ulekrael er a chedaol el reng, e a Paulus me a remechuodel er a ongdibel a milor a chimorir er bebul a Timoteus, el ileklii el kirel a ileakl el ureor er a ongdibel.​—1 Timoteus 4:14; 2 Timoteus 1:6.

3. Ngera el ileakl el techall er a omesiou a lengiluu a Timoteus?

³ A Timoteus a ngiluu a ileakl el okedong el mo merael el obengkel a Paulus! (Rellir 16:3) Ka molebedebek er a Timoteus el locha kmal mlo mechas a rengul e dmeu a rengul er tia el tekoi! Ngbetok el rak er a uriul, e a Timoteus a merrael el obengkel a Paulus e a lebebil er a taem e ngdirrek el mla er ngii a rengodech el chad el lobengterir, el ngar er a kakerous el oderuchel el lomtechei er a Paulus me a remechuodel er a ongdibel. A Paulus me a Timoteus a dilak el ngar er a omerael el oldingel a ongdibel e ullengeseu el melisiich er a rudam er a tekoi er a klereng. (Monguiu er a Rellir 16:4,  5.) Sei a uchul me a Timoteus a ble lodengelii a rebetok el Kristiano el kirel a ngelsecheklel er a tekoi er a klereng. Uriul er a bekord el teruich el rak el loureor el obengkel a Timoteus, e a apostol el Paulus a milluches el mo er a rechad er a Filipi el kmo: “Le ngdiak a tal chad el ua ingii losisiu ngii ma renguk, el oba meral blakerreng el mo omekerreu er kemiu.  . . . Ngdi blakerreng ra Timoteus cho modengelii, el mla measem lobengkek el mesiou ra evangkelio, el di ua ngalek a lobengkel a demal.”​—Filipi 2:20-22.

4. (a) Ngera el oberaod el ngerachel a mloterekokl er a Timoteus? (b) Ngera el ker a sebeched el loker el kirel aike el tekingel a Paulus el debetik er a 1 Timoteus 4:15?

⁴ Nglocha ngar seikid el taem er a loluches a Paulus el mo er a rechad er a Filipi, e ngulterekeklii er a Timoteus a oberaod el ngerachel, el mlo kirel el melutk er a remo mechuodel er a ongdibel me a rudam el loureor el lolengeseu er tir. (1 Timoteus 3:1; 5:22) Ngbleketakl el kmo, a Timoteus er tiaikid el taem a mla mo odam el sebechel el bekongerachel e sebeched el lotuil a rengud er ngii. Engdi ngngar tiaikid el osisiu el babilengel, e a Paulus a milengelechel er a Timoteus el kmo a “ngelsecheklem bo le bleketakl ra rokuil chad.” (1 Timoteus 4:15) Me ngika el Timoteus, ngdirkak el sal kmal mo bleketakl a  ngelsecheklel er a tekoi er a klereng? A leuaisei, e ngngera mle belkul a tekingel a Paulus, e mekerang e sebeched el ngmai a klungioled er ngii el omellach?

Blekeradel er a Klereng el Mlo Bleketakl

5, 6. Ngmekerang a bliochel el tekoi er a klereng er a ongdibel e ble el soal el metemall, e milekerang a Timoteus a lomekerreu er a ongdibel?

⁵ Ka me bo dorriter a tekoi el medung el ngar er a 1 Timoteus 4:15. (Monguiu er a 1 Timoteus 4:11-16.) A uchei er a loluches aika el tekoi, e a Paulus a mla merael el mo er a Masedonia e dilu er a Timoteus me ngdi kiliei er a Efesus. E ngera uchul? E le te mla er ngii a rebebil el mla er sel mats el lulemekdubech a klekakiakl er a delongelir a rechad er a chelsel a ongdibel el oeak a klsuul el losisechakl el luluusbech. Me ngmle ngerechelel a Timoteus el mo omekerreu er a klereng er a ongdibel me ngdi bliochel. Ngmlekerang a loruul er tiang? A ta er a rolel a uleak a ungil el kerebil el mlo sebechir a rebebil el lomes e oltirakl er ngii.

⁶ A Paulus a milluches el mo er a Timoteus el kmo: “[A] chomelekingem ma blekerdelem, ma bltikerreng, ma kloumerang, ma kllikiid er kau bai bo le kerebai rar uumerang.” Ngdirrek el dilechelii el kmo: “Bo le blak a rengum ra di urerel a ikal tekoi, ma ngelsecheklem bo le bleketakl ra rokuil chad.” (1 Timoteus 4:12, 15) Tia el ngelsecheklel a Timoteus a mle kirel a tekoi er a klereng el dimlak lolekoi el kirel a deruchall er a omerredel. Tiakid sel ngelsecheklel a chad el rokui el Kristiano a sorir el mo olecholt er ngii.

7. Ngera kirir a rokui el ngar er a chelsel a ongdibel el meruul er ngii?

⁷ Ngdi uai a taem er a Timoteus, e chelecha el sils me ngdirrek el ngar er ngii a betok el kakerous el deruchall er a ngerachel er a chelsel a ongdibel. A rebebil a mesiou el ua remechuodel me a lechub e te odam el loureor el lolengeseu er a remechuodel. A rebebil a kuk ngar er a mui el taem el omesiou. A relmuut el bebil a oldeu a rengrir el loureor el lomais el loldingel a ongdibel, me a lechub e te mesiou el ngar er a Bethel, me a lechub e te missionary er a ta er a beluu. A remechuodel a meruul a betok el telengtengil a osisechakl el ua aike el ngar er ngii er aike el meklou el ongdibel er a ta el rak. Engdi a rokui el Kristiano el sechal me a redil me a rengalek, a rokui el sebechir el locholt a ngelsecheklir er a tekoi er a klereng. (Matteus 5:16) E le mera er ngii, ngdi uai a blekeradel el dilubech el mo er a Timoteus, ngmo lmuut er a Rekristiano el ngar er ngii a ileakl el deruchall er a ngerachel el lolab me ngkirir el mo olecholt er a klisichel a klereng er tir er a mederir a rokui el chad.

Bo Mungil el Kerebai er a Rolel a Omengedecheduch

8. Ngua ngerang a klisichel a omelekinged er a chelsel a omengull er kid?

⁸ A ta er a tekoi el mle kirel a Timoteus el olecholt el kmo ngmle ungil el kerebai a uleak a cheldechedechal. Kede mekerang e sebeched el rullii a ngelsechekled el mo bleketakl el oeak tia el rolel? A cheldechedechad a kmal betok a louchais el kired. A Jesus a dilu el kmo: “Ele ikel mo olsibes ra reng a mo mechedecheduch ra ngor.” (Matteus 12:34) A ochellel a Jesus er a Jakobus a dirrek el milechesuar a klisichel a omelekoi er a chelsel a omengull er kid. Ngmilluches el kmo: “Ma chad a di le ngii lomdasu el kmo, ‘Ak meluu ra Dios,’ e lak losirii a chural, e ngdi ngii lomulak ra rengul, ma chomeluu er ngii ra Dios a diak a blkul.”​—Jakobus 1:26.

9. Ngoeak a ngera el rolel e a omelekinged a kirel el lungil el kerebai?

⁹ A cheldechedechad a sebechel el lochotii el mo er a rebebil el ngar er a chelsel a ongdibel sel klungel a bla dolengeriakl er ngii er a klereng. Sei a uchul me a mla mo klou el chad el Kristiano a diak lolekoi a tekoi el luchul a rur, e lolecholt a mekngit el uldasu, e lolemall a rengrir me a lechub e ngmetengel a osengel er a rebebil, e bai melasem el di melisiich e mengelaod e meleketek e meruul er a rechad el mo ungil a rengrir. (Osisechakl 12:18; Efesus 4:29; 1 Timoteus 6:3-5, 20) Sel deblechoel el mereched el mesaod a klaumerang er kid el kirel a ungil el omeruul el lobengterir a rebebil, e dolekoi el mesebechakl a ngar er a bab el blekeradel er a klengar el lekengei a Dios, e ngsebechel el olecholt a blakerreng er kid el mo er a Dios. (Rom 1:15, 16) A remelemalt a rengrir el chad a sebechir el mesa el kmo ngmekerang a dousbech er tia el sengk er a omengedecheduch e mo sorir el loltirakl er a kerebai er kid.​—Filipi 4:8, 9.

Kede Ungil el Kerebai er a Omerelled me a Blekerdeled el Klikiid

10. Ngera uchul me a klaumerang el diak a cheleblad er ngii a klou a ultutelel el kirel a ngelsechekled er a klereng?

¹⁰ A Rekristiano el lungil el kerebai a ousbech er a lmuut el betok er a di omelekoi el melisiich. E le  chad el melekoi a melemalt el tekoi engdi ngdiak loruul a melemalt el omeruul a cheblad. A Paulus a mle ungil el medengei a chelbelderir a Refarisee me a tekoi el mla er ngii el mekngit el omerellir a uchul. Me ngmle betok el taem el longelechel er a Timoteus el mo mengoit a choua isei el blekeradel er a cheleblad. (1 Timoteus 1:5; 4:1, 2) Engdi a Timoteus a dimlak el cheblad. Ngar er a ongeru el babilengel el mo er a Timoteus, e a Paulus a milluches el kmo: “Ak dirrek el mo lotkii sel ngar kau el diak a klsuul er ngii el kloumerang.” (2 Timoteus 1:5) Me a Timoteus a mle kirel el lochotii a blakerreng er ngii el ua Kristiano el mo bleketakl er a mederir a rokui el chad. Ngmle kirel a omerellel el mo ungil el kerebai.

11. Ngmilekerang a Paulus er a loluches el mo er a Timoteus el kirel a kerruul?

¹¹ Ngar er aike el teblo el babier er ngii el mo er a Timoteus, e a Paulus a milengelechel el kirel a kakerous el blekeradel. El di ua tiang, a Timoteus a mle kirel el olechib er ngii er a otirel a tekoi er a kerruul. A Paulus a milluches el kmo: “Ele ngibes el mora udoud a risel a bek el mekngit; el losiik er ngii ar bebil rar chad, me te mla mecheuid ra kloumerang e mla ngma betok el mekloul ringel el di tir ruseterir.” (1 Timoteus 6:10) A ngibes el mo er a udoud a olengchelel a ngelsengesel a tekoi er a klereng er a chad. Engdi, a Kristiano el dmeu a rengul er a beot el rolel a klengar el ‘ngarngii a kelel ma bilel,’ a olecholt er a ngelsecheklel er a klereng.​—1 Timoteus 6:6-8; Filipi 4:11-13.

12. Kede mekerang e remuul a ngelsechekled el mo bleketakl er a klengar er kid er a bek el sils?

¹² A Paulus a dilu er a Timoteus el kmo ngua ngerang a klungel a ultutelel el kirir a Rekristiano el redil el mo ‘medengei a rur e ulserechakl el blsiochel ra ungilbesul bail.’ (1 Timoteus 2:9) A redil el medengei a rur e olecholt er a ulserechakl el reng a lolilt a bail el loubail me a longetmokl er tir me a lmuut el bebil er a tekoi el loruul el di kirel a klengar er tir, a mengetmokl er a kmal el ungil el kerebai. (1 Timoteus 3:11) Tia el omellach a dirrek el motaut el mo er a Rekristiano el sechal. A Paulus a milellach er a ruungerachel er a ongdibel el odam el kmo ngkirir el mo ‘kilmekl a rengrir, e ulserechakl a rengrir, e ungil a blekerdelir.’ (1 Timoteus 3:2) Sel dolecholt aikaikid el blekeradel er a klengar er kid er a bek el sils, e a ngelsechekled a mo bleketakl er a mederir a rokui el chad.

13. Ngdi ua Timoteus, kede mekerang e mo ungil el kerebai el kirel a klikiid el omeruul?

 ¹³ A Timoteus a dirrek el mle kirel el mo kerebai er a klikiid el omeruul. Sera lolekoi el kirel tia el blekeradel a Paulus, e ngmle ileakl el mesaod el kirel a uldesuel a chad el kirel a tekoi er a durs. A omerellel a Timoteus el mo er a redil a mle kirel el diak el bo luchul a ngii di el lotuub. Ngmle kirel mengedecheduch er a re ‘mechudelal redil le ua lomengedecheduch ra delal, mar mekekerel dil loba meral klikiid luldasu el mengelechel er tir el ua lochedal.’ (1 Timoteus 4:12; 5:2) A berrotel el omerellel a deleboes a lodengei a Dios e ulterekokl el bo lodengei a rebebil er a rechad er a uriul. Engdi ngdirrek el klemerang el kmo a ungil el lomerellel a Kristiano a diak el sebechel el obart. (1 Timoteus 5:24, 25) A rokui el ngar er a chelsel a ongdibel a ngar er ngii a techellir el olecholt a ngelsecheklir el oeak a omerellir me a klikiid el blekerdelir.

Bltikerreng me a Klaumerang a Usbechall

14. Ngmekerang a Bades a lolisiich er a klungel a ultutelel a bo dekaubltikerreng?

¹⁴ A klou el telengtengil a mera el Klekristiano a bltikerreng. A Jesus a dilu er a redisaiplo er ngii el kmo: “Cho bo mkaubltikerreng, e te mo medengelkemiu a rokuil chad el kmo kom Obengkek.” (Johanes 13:35) Ngmekerang a dolecholt er tia el bltikerreng? A Tekingel a Dios a mengelechel er kid el kmo “mdul kilmekl a rengmiu loba bltikerreng,” e “bo bekokuii e mchubechub ra delongeliu, e mdul kausubes” e ‘mometechakl rar ngar chomerael.’ (Efesus 4:2, 32; Hebru 13:1, 2) A apostol el Paulus a milluches el kmo: “Bo mungil kaubltikerreng loba bltikerreng ra klodam.”​—Rom 12:10.

15. Ngera uchul me a bltikerreng a klou a ultutelel el kirir a rokui el chad, el ileakl a Rekristiano el lomtebechel er a ongdibel?

¹⁵ A lsekum a Timoteus a mle meringel a tekingel e diak lechubechub a omerellel el mo er a rebebil er a Rekristiano, e tia el tekoi a mle sebechel el tomall aike el lungil el mleketmokl el lokiu a osisecheklel el ua sensei e odam el lomtebechel er a ongdibel. (Monguiu er a 1 Korinth 13:1-3.) Engdi aike el mera el ochotel a bltkil a rengul a Timoteus el mo er a rudam er ngii, el obengkel a omerellel el lomtechakl er a remerael me a ungil el omerellel el kirir, a mera el ulemeketakl er a ngelsecheklel er a klereng. Me ngkmal mle rredemelel sel babier el lulluches er ngii a Paulus el mo er ngii, el ngar er a chelsel e a Paulus a mle ileakl el mesaod er a bltikerreng el ngii a mle ta er a blekeradel el Timoteus a mle ungil el kerebai el kirel.

16. Ngera uchul me a Timoteus a mle kirel el olecholt a mesisiich el klaumerang?

¹⁶ Sel taem er a lekiei er a Efesus, e a klaumerang er a Timoteus a mleasem. Te mla er ngii a rebebil el melisiich a osisechakl el dimlak el redemii a klemerang el osisecheklir a Rekristiano. A rebebil a ulemerk a “delbochel cheldecheduch” me a lechub e te mlerritel a uldasu el dimlak a ngera el ngesuir er a klereng er a ongdibel. (Monguiu er a 1 Timoteus 1:3, 4.) A Paulus a milsaod er tirkaikid el chad el kmo te “blkuuk, e diak a ngeral lodengei; ngdi smecher ra klaititekangel ma klautoketok ra tekoi.” (1 Timoteus 6:3, 4) Ngmle ungil er a Timoteus a bo lolasem el mo omtab aike el kengaol el uldasu el mla soiseb er a chelsel a ongdibel? Ngdiak, e le Paulus a milengelechel er a Timoteus el kmo, “mokoad el ngara ungil klakoad ra kloumerang” e bo mcheroid er a “delebeseaol el diak a blkul cheldecheduch ma klaititekangel el lomngakl el kmo klemedengei, e alechub e ngklsuul.” (1 Timoteus 6:12, 20, 21) Ngkmal diak a rraurreng er a rengud el kmo a Timoteus a mle kerekikl el lomtab aika el mellomes el ulekrael el mla er a Paulus.​—1 Korinth 10:12.

17. Ngmekerang a klaumerang er kid a lemeasem er a chelecha el sils?

¹⁷ Ngsoad el mtebengii a tekoi el ngmildung el mo er a Timoteus el kmo, “sel uriul blsechel e ar bebil rar chad a mo merodel a rengrir ra reng el mengeuid ma chosisechakl rar mekngit el reng, me toberuud el mo cheroid ra kloumerang.” (1 Timoteus 4:1) A rokui el ngar er a chelsel a ongdibel el luldimukl er tirke el lolab a ngerachel a kirir el mo  uai a Timoteus el lolecholt er a mesisiich el diak el lolmesim el klaumerang. A dedechor el mesisiich e doruul a ulterekokl el tekoi el lomtok er a rumtok a osisechakl, e ngkmal sebeched el rullii a ngelsechekled el mo bleketakl er a osengir a rechad e mo kerebai er a klaumerang.

Bo er Sel Tkul er a Bab el Sebechem el Meruul er a Ngelsecheklem el Mo Bleketakl

18, 19. (a) Ke mekerang e rullii a ngelsecheklem el mo bleketakl er a mederir a rokui el chad? (b) Ngera ongingil el tekoi el mo soadel?

¹⁸ Ngbleketakl el kmo a ngelsecheklel a mera el Kristiano er a tekoi er a klereng a diak a rorodel el mo er a teletelel ngii el chad me a kldachelbil me a lechub a deruchellel. Ngdirrek el sebechel el diak el lobeketakl el oeak a klemengetel a rak el losiou el obengkel a ongdibel. A mera el ngelsechekled er a klereng a bai mocholt el oeak a dolengesenges er a Jehovah er a uldesued me a omelekinged me a blekerdeled. (Rom 16:19) Ngkmal kired el lotireklii sel llach el mo kaubltikerreng e mo omekeroul er a mesisiich el klaumerang. Nguaisei, mei me bo dekerekikl el melebedebek aika el tekingel a Paulus el mo er a Timoteus e bo doruul, me bo el sebechel a ngelsechekled el mo bleketakl er a mederir a rokui el chad.

¹⁹ A lmuut el ta er a blekeradel el mocholt el oeak a ngelsechekled er a tekoi er a klereng me a klloulechad er kid el Kristiano a deurreng, el ngii a ta er a telengtengil a rodech er a reng er a Dios. (Galatia 5:22, 23) A ongingil el suobel a mo mesaod el kmo kede mekerang e omekeroul e melisiich er a deurreng er kid er a chelsel aika el meringel el taem.

Ngmekerang a Omonger?

• Ngera sebechir a rebebil el suub el kired el oeak a omelekinged?

• Ngmekerang a ngelsechekled a lobeketakl el oeak a omerelled me a klikiid el blekerdeled?

• Ngera uchul me a Rekristiano a kirir el mo kerebai el kirel a bltikerreng me a klaumerang?

[Aike el Ker er a Suobel]

[Siasing er a 13 el llel]

A ngeasek el Timoteus a ullecholt er a teletael er a klloulechad

[Siasing er a 15 el llel]

A ngelsecheklem er a tekoi er a klereng ngbleketakl el mo er a rebebil?