A APOSTOL el Paulus a milluches el milengelechel er a Rekristiano el kiliei er a ulebengelel a kot el dart el rak el kmo: “Bo le blak a rengmiu me lak mudechem ra bechachau lomengeblad el llomeserreng el mengetiit ra belulechad, e tia diak loltirakl ra Kristus, e ngbai di oltirakl a uldedelid el cheldecheduch rar chad el oltirakl a ikel reng ra belulechad.”​—Kolose 2:8.

Me alta e ngmla er ngii aika el omengelechel er a Paulus, engdi ngngar er a melengel a eru el dart el rak, e a rebebil er a Rekristiano a mlo omuchel el mesaod a klaumerang er tir el lolab a uldasu el mlengai er a rechellimosk el chad er a taem er tir. E ngera uchul? E le tir el mle sorir el ngmai a kengei er a remla er ngii a skulir el chad er a Rom me bo lebetok a rechad el mo oumerang er tir.

A Justin Martyr el ta er tirkaikid el Kristiano el mirrael a chisel a uluumerang el kmo, Ngike el Melekingel a Dios a mle kot el mo chemolt er a rechellimosk el chad er a Gris er a uchei er a lemei er a beluulechad el ua Jesus. A doltirakl er a tekingel a Justin me tirke el sensei el di uai a uldesuel, e a ngelsuil a mellomes el omesodel a tekoi me a delbochel el uldasu el loltirakl a Rekristiano, a ngilsuir a choua itia el klechelid el mo mesterir a rechad aike el sal lousbech.

A blekerdelel a Klekristiano el loltirakl er a uldesuel a Justin Martyr a kmal mle mereched el lomult er a rechad. Engdi omeliul a ta el delbochel el uldasu a mlo uchul a oketbechel a kuk bebil e rirellii a loumerang er ngii a rebetok el chad er a chelecha el sils el kmo ngosisechakl er a Klekristiano. Me a domeketakl el lolecholt ngii el delbochel el uldasu, e momekesiu a lolekoi a bebil er ngii el osisechakl el lolab aike el mera el lolisechakl a Biblia.

[Credit Line]

Devil: Barrators​—Giampolo/​The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence