Ngerang a uchelel tia el delbochel el uldasu? “A rechellimosk el Kristiano er a uchelel a kilengei er a uldesuir a Rechigrik el kirel a soul el kmo ngdiak el ngemed, me te ulemdasu el kirel a soul el kmo ngulebeob er a Dios e mlosiseb er a bedengel a chad er a lomuchel a klengar er ngii er a diil.”​—The New Encyclopædia Britannica (1988), Volume 11, 25 el llel.

Ngerang melekoi a Biblia? “A klengar . . . el mor a klengit, ngikei a mo mad.”​—Esekiel 18:4, King James Version.

Me a losaod er a omebelel a kot el chad, e a Biblia a melekoi el kmo: “Misei e a Jehovah el Dios a milebii a chad er a chebechab er a chutem e dilekeuii el losisebii er a isngel a telil a klengar me a chad a mlo ngar el soul [neʹphesh el tekoi er a Hebru].”​—Genesis 2:7, New World Translation.

A tekoi er a Hebru el neʹphesh el loliuid er ngii el kmo “soul” a belkul a kmo ‘outeliil el chelechad.’ Me a Dios er a lebebii a kot el chad el Adam e ngdimlak losisebii er a chelsel a bedengel a diak el ngemed el soul, e ngbai milsa klisichel a klengar el mle kirel el lolemolem er ngii el loeak a louteliil. Me seikid, e a soul el lolekoi er ngii a Biblia a melutk el kirel a di ngar el louteliil el chelechad. Me a lemeakl er a klisichel a klengar el lebilsa Dios, e a soul a mad.​—Genesis 3:19; Esekiel 18:20.

A osisechakl el kirel a soul el kmo ngdiak el ngemed a mekdubech a ker el kmo: Aika el soul ngmo er ker er a uriul er a kodall? Ngera duubech el mo er a soul er a remekngit el chad? A rukedongall el Kristiano er a lekengei er a delbochel el uldasu el kmo a soul a diak el ngemed, e ngmlo uchul e ngmlo kirir el mo kongei er a lmuut el ta er a delbochel el uldasu el ngii a osisecheklel a beluu er a ngau.

Momekesiu aika el bades er a Biblia: Olisechakl 3:19; Matteus 10:28; Rellir 3:23

KLEMERANG EL TEKOI:

A lemad a chad, e ngdiak el bo er a ngii di el ker

[Baks er a 4 el llel]

Oltoir a Diak a Ultutelel el Tekoi

Ngar er a November 9, 1949, e a James Kidd el 70 a rekil el mengiis a sintsiu, a ririid er a delongelel a rois er a Arizona, U.S.A. Sesei el rak er a uriul er a lemoterekokl a tekoi el kmo ngmla mad, e te miltik er a llechukl er a oluches el iukong er ngii el lobengkel a kloklel el mle betok el dart el telael el kluk a orekemel. Ngar tia el iukong er ngii, e a Kidd a dilu el kmo ngsoal a ududel a bo lousbech el merriter e osiik el loeak a “omesubel a tekoi er a science el mo omeketakl el kmo ngngar er ngii a soul el tuobed er a bedengel a chad sel lemad.”

Telkib el taem er a uriul er tiang, e te betok er a dart el leko te chad el merriter a tekoi me a rehakase a mlo melasem el melai a bebil er aika el udoud el lousbech. Ngmlo er ngii a betok el buil el lorael a kerrekeriil me a rebetok el telael el mellekoi a kakerous el omesodel a diak el moues el soul el kmo ngmera el ngar er ngii. A uriul, e aika el udoud a uleak a kerrekeriil e ngmloterekokl er a teblo el ungil a chisel el cheldebechel el merriter a tekoi. Okeim el rak er a uriul, e tirka el chad el merriter a tekoi a dirrek el dirkak lebeketeklii el loeak a “omesubel a tekoi er a science el kmo ngngar er ngii a soul el tuobed er a bedengel a chad sel lemad.”