Ngerang a uchelel tia el delbochel el uldasu? “Ngar er a delongelir a rokui el chellimosk el chad er a Gris, e ngike el kot el mle klou a lerellii el lomekrael a uldesuir a rechad el kirel a Beluu er a Ngau a mle Plato.”​—Histoire des enfers (Reksi er a Beluu er a Ngau), el lulluches er ngii a Georges Minois, 50 el llel.

“Ngar er a melengel a eru el dart el rak, e a Rekristiano el tilobed er a omesubel a llomeserreng er a Rechigrik a mlo omuchel el mesaod a klaumerang er tir el loeak a tekoi el lesiluub . . . E sel omesodel a llomes el kmal mle ungil er tir a mle aike el osisecheklel a Plato.”​—The New Encyclopædia Britannica (1988), Volume 25, 890 el llel.

“A osisechakl er a Ikelesia a melisiich el kmo ngngar er ngii a beluu er a ngau el diak a ulebengelel. Me a remekngit el chad sel lemad e ngdi mereched a soul er tir el mo er a beluu er a ngau el lengar er ngii e te mo mukcharm er a ‘ngau el diak a ulebengelel.’ Sel ngar er a bab el kelebsengel a beluu er a ngau a sel bo el meakl a chad el mo cheroid er a Dios el diak a ulebengelel.”​—Catechism of the Catholic Church, el mirruul er a 1994, 270 el llel.

Ngerang melekoi a Biblia? “A re chad a medengei el kmo te mo mad, e ngdi rulekoad a diak a ngeral lodengei. . . . e ng diak le bor ngii a ureor ma uldasu ma lechub e ng klemedengei ma lechub e le llomeserreng er a beluu er a kodall el kau a mor ngii.”​—Olisechakl 9:5, 10, Revised Standard Version.

“A beluu er a kodall” el mlengai er a tekoi er a Hebru el Sheol, a loliuid er ngii a bebil er a Biblia el “beluu er a ngau.” Tia el tekoi ngerang meketeklii el kirel a blekerdelir a rulekoad? Tirka te chuarm el ngar er a Sheol e mengiil el mo er sel lemusubes a kngterir? Ngdiak, e le ng “diak a ngeral lodengei.” Seikid a uchul me a Job er a lsal kmal chuarm er a secherel a bedengel, e ngmiluluuch el lolengit er a Dios el kmo: “Momekerreu er ngak er a beluu er a ngau [Sheol el tekoi er a Hebru].” (Job 14:13, Douay-Rheims Version) Ngmlo ua ngerang a belkul tia el ongtil a lsekum a Sheol a mle basio er a diak a ulebengelel el ringel? A beluu er a ngau el ngar er a Biblia a di melutk el kirel a debull, el ngii a mo ulebongel er a rokui el urerel a chad.

Tia el omesodel a beluu er a ngau ngdiak el sal loeak a ungil el urrebetelel a omesodel a tekoi el loltirakl er a Bades? Ngera el klengit a mo rullii a Dios er a bltikerreng me ngmo omekcharm er a chad el diak a ulebengelel? (1 Johanes 4:8) Me a lsekum a beluu er a ngau a di delbochel el uldasu, e ngkuk mekerang a eanged?

Momekesiu aika el bades er a Biblia: Psalm 146:3, 4; Rellir 2:25-27; Rom 6:7, 23

KLEMERANG EL TEKOI:

A Dios a diak el lomekcharm er a rechad er a beluu er a ngau

[Credit Line]

Barrators​—Giampolo/​The Doré Illustrations For Dante’s Divine Comedy/Dover Publications Inc.