Ngerang a uchelel tia el delbochel el uldasu? “Ngsebechel el mo er ngii a uldasu el kmo a osisechakl el kirel a Trinidad a tekoi el ulebeob er a ulebengelel a 4 el dart el rak. E a domes er ngii e ngmera el uaisei . . . A okedbechel a ‘kldei el chelechad el uldekial a di ta el Dios’ a dimlak el bo lemesisiich, me a dirrek el dimlak el mecherrungel el murachem er a klengar er a Rekristiano me a klaumerang er tir, er a uchei er a ulebengelel a 4 el dart el rak.”​—New Catholic Encyclopedia (1967), Volume 14, er a 299 el llel.

A Kansol er a Nicaea a mlo kldibel er a May 20, er a rak er a 325. A Constantine a uluungerachel er tia el kldibel, me ngulemekrael a cheldecheduch me a omesodel a tekoi el mileketmokl, e di mle ngii el otebedii a uldesuel . . . er a kmal klou a ultutelel el tekoi el mo omeketakl er a deleuill er a Kristus el mo er a Dios er a chelsel a mloterekokl el osisechakl el kmo ‘ngdi tang a bedengel ngii me a Demal.’ . . . A omengull er tir er ngika el emperor a uchul, me alta e tia el tekoi a ulemtok a klaumerang er a ruumesingd el bishop el mle kldibel er isei, engdi ngdi mle terung a dimlak, e tir el rokui a mle saing er tia el telbiil el bla el rellii el olterekokl a osisechakl el bo lolab.”​—Encyclopædia Britannica (1970), Volume 6, er a 386 el llel.

Ngerang melekoi a Biblia? “A Stefanus a mle mui er a Chedaol Reng, me ngmlo ngellomel er a eanged e milsa klebkellel a Dios, me a Jesus el dechor er a kidekmel a Dios; me ngdilu el kmo, ‘Mesang, ak umes er a eanged el blkais, me a Ngelekel a chad el dechor er a kidekmel a Dios.’”​—Rellir 7:55, 56, The New Jerusalem Bible.

Tia el ues ngera ngullecholt er ngii? A Stefanus a mle ulekeek er a chedaol el reng me ngulemes er a Jesus el “dechor er a kidekmel a Dios.” Me ngbleketakl el kmo a Jesus a dimlak bo el Dios er a uriul er a okisel e ngbai, mlo ta er a ileakl el chelechad el reng. Ngdiak a ngii di el tekoi el medung el kirel a ongedei el chad el dechor el kmeed er a Dios el lolekoi er ngii tia el bades. Me alta ngblak a rengrir a rechad el osiik a tekoi er a Bades el mo olengeseu el melisiich er a osisechakl er a Trinidad, engdi a Marie-Émile Boismard el prist er a Dominica a milluches el ngar er a babilengel el dai er ngii a À l’aube du christianisme​—La naissance des dogmes (Ngar er a Uchelel a Klechelid er a Klekristiano​—A Cherellel a Osisechakl) el kmo: “Sel tekoi el kmo ngngar er ngii a tedei el chelechad el uldekial a di ta el Dios . . . a diak el sebeched el choieuii er a ngii di el ker er a chelsel a Beches el Testament.”

A osisechakl el lullisiich a Constantine a mle kirel el merrob er a klautok e omudech er a rechedal a Ikelesia er a ongeuang el dart el rak. Engdi tiang a dirrek el milekedbechii a ta er a ker el kmo: A Maria el milechellii a Jesus, ng “Delal a Dios”?

Momekesiu aika el bades er a Biblia: Matteus 26:39; Johanes 14:28; 1 Korinth 15:27, 28; Kolose 1:15, 16

KLEMERANG EL TEKOI:

A osisechakl er a Trinidad a ulebeob er a ulebengelel a ongeuang el dart el rak

[Credit Line]

Museo Bardini, Florence