Ngerang a uchelel tia el delbochel el uldasu? A bleob a dimlak er a chelsel a omengull er a rekot el Kristiano . . . A osisebel a bleob er a chelsel a ikelesia er a 4 me a 5 el dart el rak a lulsosaod el loba uldasu el kmo a rediak a skulir el chad a sebechir el mo medengei a osisechakl er a Klekristiano el kuk ungil er a lorrenges a cheldecheduch me a lechub e longuiu er a babier.”​—Cyclopedia of Biblical, Theological, and Ecclesiastical Literature, loeak a McClintock me a Strong, Volume 4, 503 el mo er a 504 el llel.

Ngerang melekoi a Biblia? “Ng diak moruul a bleob el chedum ma lechub okesiul a ngar a eanged, ma lechub e ng ngar a chutem, ma lechub e ng ngar a ralm er eungel a chutem. Ngdiak mosus er a ngii di el bleob el chelid ma lechub e mongull el meluluuch er ngii.” (Exodus 20:4, 5, The Holy Bible​—New International Version) A Johanes a milluches el mo er a Rekristiano er a kot el dart el rak el kmo: “Rengelekei, bo mkerekikl el mengeroid er kemiu ra bleob el chelid.”​—1 Johanes 5:21.

Me a leuaisei, e a bleob ngmera el ua aike el lolekoi el kmo, te di ousbech el oeak ngii e mengebkall er ngike el lomekesiu er ngii sel bleob? A The Encyclopedia of Religion a melekoi el kmo: “A kot, e a bleob a luluusbech el omeketakl a osisechakl e omesiich, a lekesengil e aikaikid a lolekoi el mesaod a usbechel a bleob. Engdi ngdi mle mereched el ochau a blakerreng er a rechad el mo er ngii. Tia el tekoi a ileakl el klemerang el kirel aike el bleob el blo lousbech er a chelsel a Eastern Orthodoxy.” Engdi a profet el Isaia a mle melemalt er a loker el kmo: “A Dios ng sebeched el mekesiur er techang? Ng mekera e sebechiu el smodii el kmo ng ua ngerang?”​—Isaia 40:18, The New Jerusalem Bible.

Momekesiu aika el bades er a Biblia: Isaia 44:13-19; Rellir 10:25, 26; 17:29; 2 Korinth 5:7

KLEMERANG EL TEKOI:

A Dios a diak el kengei a usbechel a bleob me a bilt

MOTNGAKL A DELBOCHEL EL ULDASU E MORREKED A KLEMERANG

Me ngngera sebeched el kmung el kirel tia el kedeb e blelekl el delbochel el uldasu el dirk lolisechakl a betok el ikelesia? Aika el “melolaok el delbochel cheldecheduch [myʹthos el tekoi er a Gris]” a diak el sebechel el mekesiur a klungiolel a beot e mengelaod er kid el klemerang el debetik er a Biblia.​—2 Petrus 1:16, The New English Bible.

Me seikid e mimokl el omes e morriter a tekoi e lak mokor el mo omekesiu a tekoi el bla mosisechakl er ngii me a Tekingel a Dios, el ngii a uchetemel a klemerang. (Johanes 17:17) E seikid e tia el telbiil a mo klemerang el kirem sel du el kmo: “Me ko mo medengei a klemerang, ma klemerang a meskemiu a ilmokl.”​—Johanes 8:32.

[Credit Line]

Pictorial Archive (Near Eastern History) Est.