Ngera el osengel a chebechiil a odeu a rengrir a rechedal a telungalek?

A chebechiil a chedaol el deleuill. A loker er ngii el kmo ngdi subed a dertel a chebechiil, e a Jesus a dilu el kmo: “Ngdirekak mchiuii a kmo ngikel ulemeob a rirelleterir ar chad ra kot luchul el sechal ma redil, e sola e dula el kmo, ‘Mitiai a uchul ma chad a mecherei a demal ma delal e mo obengkel a bechil, me tir el terung a mo tal chelechad’? Me ngdikea lterung, ele te ta ku el chelechad. Misei a uchul a ikel bla lodak a Dios, lak a chad el smaod.” Ma kdmu er kemiu el kmo: ngikel mengoit ra bechil el diak el laokerreng a uchul, e mo bechil a ngodech el redil, a mocha ra laokerreng.” (Matteus 19:4-6, 9) A rebechiil el chad sel loltirakl a omellach er a Jesus e lolab a blakerreng el mo er a rebecherir, e a rokui el ngar er a chelsel a telungalek a mo melechesuar a ulekerreu e mo dmeu a rengrir.

Ngera me a bltikerreng el mo er a Dios a remuul a telungalek el mo er ngii a deurreng er ngii?

A Jesus a dilu el kmo: “Bo le betik a rengum ra Rubak el Dios er kau era rengum el rokir, ma chomeltkem el rokir, ma chomelebedebekem el rokir. Tiaikid a kot el klou a blkul e ngarbab el llach.” E ngera sel ongerung el klou a ultutelel el llach? A Jesus a dilu el kmo: “Bo le betik a rengum era ngar bita er kau [el luldimukl er tirkei el kiei el kmeed er kau​​—el tir a chad er a telungalek er kau] el ua le betik a rengum er kau.” (Matteus 22:37-39) Me sel kiis el mo er a mera el deurreng er a telungalek a sel ungil el deleuill er kid me a Dios e le bltikerreng er kid el mo er ngii a rullid el mo betik a rengud er a rebebil.

Ngmekerang e a bechiil el sechal me a bechiil el redil e kebotech a rengrir?

A rebechiil el sechal a oldeu a rengrir a rebecherir el redil el oeak sel loltirakl a ungil el kerebil a Jesus.  A Jesus a di mle ngii el oeak a bltikerreng e odersii el kirel ngike el okesiul a bechil, el ngii a ongdibel er a Rekristiano. (Efesus 5:25) A Jesus a dilu el kmo: ‘A Ngelekel a chad a mlei el diak el kirel siungel, e ngbai kirel mesiou.’ (Matteus 20:28, The Holy Bible​—New International Version) A Jesus a dimlak a ta el lemeringel a tekingel me a lechub el mekngit el melekoi el mo er tirke el chad el mla er a eungel a ulekerreuil, ngbai mle blechoel el uchul a ongelaod el kirir. “Mer ngak, kemiu el rokui el merengela ra ureor el mengol er choberaod el chellungel, me kungellemiu.” (Matteus 11:28) Me seikid, e a rebechiil el sechal a kirir el mo olecholt a klisichel a omerrederir el loeak a klechubechub el mo uchul a klungiolir a rokui el chad el ngar er a chelsel a telungalek.

A rebechiil el redil a sebechir el dirrek el ngmai a klungiolir er a kerebil a Jesus. A Biblia a melekoi el kmo: “A bderrir ar bek el sechal a Kristus, ma bdelul a redil a sechal.” (1 Korinth 11:3) A Jesus a dimlak lomes el kmo ngkora kmal ngariou el tekoi a bo lechederedall er a Dios, e le nguleba dmolech el omengull el mo er a Demal. Ngii el Jesus a dilu el kmo: “Kdiblechoel meruul a ikel soal.” (Johanes 8:29) A bechiil el redil el kongei el mo oltirakl er a omengederderel a bechil el oeak a bltikerreng me a omengull el mo er a Dios, a kmal klou a lengesuir el mo melisiich er a deurrreng er a telungalek er ngii.

Ngera sebechir a rechedam me a rechedil el suubii er a osengel a Jesus el kirir a rengalek?

A Jesus a milengoit a taem el lobengterir a rengalek, e mle semeriar el mo medengei a uldesuir me a tekoi el lomelechesiu. A Biblia a melekoi el kmo: “Ma Jesus a ulekerterir ar mekekerel ngalek el mer ngii, e dmu el kmo, ‘Bechiiteterir ar ngalek me le mer ngak.’” (Lukas 18:15, 16) Ngar er ngii a ta el taem el rechad a uluungeroel er a rebebil er a remekekerei el ngalek el sechal el milengedecheduch er a Jesus el kirel a klaumerang er tir. Engdi a Jesus a chilat er tir el mekekerei el ngalek, e dilu er tirke el chad el kmo: “Ngdirekak mchiuii a kmo, ‘Ngmlekedmokl chodanges er a ngerir ar mekekerel ngalek mar tmut’?”​—Matteus 21:15, 16.

Ngera sebechir a rengalek el suubii er a Jesus?

A Jesus a milsterir a rengalek a kmal ungil el kerebai el kirel a klemeriarreng el kirel a tekoi er a klereng. Sera dirk el 12 a rekil e te miltik er ngii el “ngara chelsel a templo, el dengchokl ra delongelir ar sensei, el orrenges a cheldechedecherir e okerker.” Me ngngera dilubech? “Ar chad el rokui el orrenges a mlo medul a rengrir era llemesel a rengul ma nger er ngii.” (Lukas 2:42, 46, 47) Engdi a klemedengei er a Jesus a dimlak el rellii el mo kedidai a rengul, e ngbai di millemolem el mengull er a demal me a delal. A Biblia a melekoi el kmo: “Ngii a millemolem el chederedall er tir.”​—Lukas 2:51, NW.

Kirel a lmuut el betok el omesodel, e momes er a 29 el bliongel er a babier el Ng Sebechem el Kie er a Paradis er tia el Chutem el mo Cherechar a

[Footnote]