NGUA ngera kdemel el momes er kau er a dirk? Oumesingd er kid a blechoel el mekudem el mo omes er a dirk er a chelsel a ta el sils. Ngera uchul? E le ngsoad a leblechoel el ungil el kltmokl a medad me a bedenged.

Ngsebeched el omekesiu er a omengiuel a Biblia el mo er a chad el mekudem el omes er a dirk. (Jakobus 1:23-25) A klumech el llechukl er a Tekingel a Dios a ngar er ngii a klisichel el ngosukid el mo ungil el medengelkid el kmo kede ua ngerang. Ng “merus el ngmoech el imakl a reng ma klereng.” (Hebru 4:12) El ua tiang, ngsebechel el eklii a moes el blekerdeled er sel mera el blekerdeled. Ngsebechel el ocholt aike el tekoi el kired el remuul el mo ungil, el di ua dirk el domes er ngii e mo ungil el kutmeklid.

A Biblia a diak di locholt aike el tekoi el kired el remuul el mo ungil, e ngdirrek el ngosukid el mo medengei, e sumechokl ngii el tekoi. A apostol el Paulus a milluches el kmo: “Ele chedaol Llechukl el rokui a melluches luleak a Reng ra Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt.” (2 Timoteus 3:16, 17) Ka molatk aike el eua el tekoi el sebechel el mo uchul a klungioled, a edei er ngii a omellach me a omekmelemalt me a omekrael el mo er a llemalt, e aika el tekoi a mo uchul e ngsebeched el sumechokl a uldesued me a omerelled. A lsekum e ngklou a ultutelel er kid el blechoel el mo omes er kid er a dirk me bo el sebeched el lungil el kutmeklid, e ngbelkul a kmo ngelmuut el klou a ultutelel el kired el blechoel el menguiu er a Tekingel a Dios el Biblia.

A Jehovah el Dios er a letetkii a Josua el mo omekrael er a renged er a Israel, e ngdilu el kmo: “Ng kmal diak le kirem el obes er a babier er a Llach. Ng kirem el mesuub er ngii er a llomes ma klebesei, e kerekikl el oltaut er a klengar er kau a bek el tekoi el llechukl er a chelsel. Isei e ng di mo ungilbesul a ikel rokui el moruul.” (Josua 1:8) Me nguaisei, a Josua a mle kirel el blechoel el menguiu er a Tekingel a Dios er a “llomes ma klebesei,” me bo el sebechel el mo ungilbesul a rokui el tekoi el loruul.

A kot el psalm a dirrek el lochotii a klungiolel a deblechoel el menguiu er a Biblia. Ngmelekoi el kmo: “Ngeltengat ngikel chad el diak lolab a tekingir a re dengerenger, el diak loltirakl omerellir a re mekngit el chad, ma lechub e le teloi er a re melenguul er a Dios. Ng bai semeriar er a llechul a RUBAK, me ng mesuub er ngii er a llomes ma klebesei. Ingii a mo ua kerrekar el dechor er a tkul omoachel; el ourodech a le belsechel el ourodech; ma llel a diak le moalech. Ng di mo ungil er a ikel bek el loruul.” (Psalm 1:1-3)  Ngulterekokl el kid el rokui a kmal soad el mo ua ngika el chad.

A rebetok el chad a blechoel el menguiu er a Biblia er a bek el sils. A ta el Kristiano a melsaod er sel uchul e ngmle blechoel el menguiu er a Biblia er a bek el sils el kmo: “Ak blechoel el meluluuch el mo er a Dios er a bek el sils, e dirrek el mengerechir er ngii me lorrenges a nglunguchek, me ngkirek el dirrek el orrenges er a Dios loeak sel kunguiu a Tekingel er a bek el sils. A lsekum e ngsoad el mo ungil el sechelei, e ngkired el mecherei a sechelid me ngkuk mengedecheduch.” E tiang a klemerang el tekoi. A omengiuel a Biblia a di ua dorrenges er a Dios el mengedecheduch me bo el sebeched el mo medengei a uldesuel el kirel a bek el tekoi.

Dolemolem er a Omengiued er a Biblia er a Bek el Sils

Ke locha mla melasem el menguiu er a Biblia er a bek el sils. Ke mla choiuii a Biblia er a uchelel el mo er a ulebengelel? Tia el omeruul a kot el lungil el rolel e ngsebeched el mo medengei aike el tekoi el ngar er a chelsel a Biblia. Engdi, a rebebil a mla melasem el betok el taem el menguiu er a Biblia e diak el lemelemii a omengiuir. Ke mla chormii tia el tekoi? Ngera sebechem el remuul me bo el sebechem el choiuii a Biblia el rokir? Ngsebechem el mo melasem aika el eru el tekoi.

Mrellii a Omengiuel a Biblia el mo Ta er a Tekoi el Moruul er Ngii er a Bek el Sils. Moterekeklii a taem er a bek el sils el mo sebechem el menguiu er a Biblia. E mluut el oterekeklii a ta er a taem, me a lsekum ngmo duubech a tekoi el mo uchul e ngdiak el sebechem el menguiu er a Biblia er sel blsechel, e lak lengelakl a ta el sils el diak monguiu er a Tekingel a Dios. Ngoeak tia el rolel e ngsebechem el oltirakl er a kerebai er a rechad er a Beroea er a irechar. Kede menguiu el kirir el kmo: “Te mle blak a rengrir el melai a Tekoi, me te mlerriter a chedaol Llechukl ra bek el sils, el sorir el mo medengei el kmo ngiil tekoi nguaisei ngdiak.”​—Rellir 17:11.

Moterekeklii a ileakl el turrekong er kau. El ua tiang, a lsekum ke chemuiu a edei el mo bedul a eim el bliongel er a Biblia er a bek el sils, e ngsebechem el choiuii a Biblia el rokir er a chelsel a ta el rak. Ngungil a omoterekeklii tiang el mo turrekong er kau.

Ngdiak el kirem el meterob el menguiu er a Biblia. Ngsebechem el choiuii a Biblia el rokir er a bek el rak, el omuchel el oeak a kakerous el rolel. Me a lechub e ke mekekokau el menguiu er ngii, el sebechem el tibir el di menguiu er a tang me a lechub e ngcheru el bliongel er a bek el sils.

Bek el taem el monguiu er a Biblia e ngsebechem el metik a beches el tekoi el dirkak a ta el mues er a uchei, el ngii a sebechem el oltaut er a chelsel a klengar er kau. E ngera uchul? “Le teletael er tial belulechad a mo nguemed,” me a blekerdelel a klengar er kid a di mengedengodech er a bek el taem. (1 Korinth 7:31) Me a leuaisei, e mtibir el mo blechoel el omes er a dirk, el ngii a Tekingel a Dios, el Biblia. Ngoeak tia el rolel, e ngsebechel el mo ulterekokl a rengum el kmo, ke kongei er a Dios me ngmengedecheduch er kau er a bek el sils.​—Psalm 16:8.

[Siasing er a 12 el llel]

Kau ngsebechem el oterekeklii a taem er a bek el sils el mo menguiu er a Biblia?