A Mondai er a Beluulechad el Rokir me a Semecheklel

NGSEBECHED el mes a ringel er a ngii di el ker, e betok a mekngit a rengrir me te melasem el mo mesmechokl ngii el ringel. El ua tiang, a rechad er a ukeruul a oureor el kemanget el taem er a osbitar el lolengeseu er a resmecher me a retelemall. A rumekoad a seseb me a rebulis me a rechad er a llach me a rechad er a siik a melasem el merrob a ringelir a rebebil. A chouaisei el ngeso a kmal klou a lerellii el mo er a rederta el chad, engdi ngdiak el sebechel a ngii di el chad me a lechub a cheldebechel el torob a ringel er a beluulechad el rokir. Engdi Dios a sebechel el mo sumechokl a blekeradel er a beluulechad el rokir.

A oterekeklel a tekoi a debetik er sel ulebongel el babier er a Biblia el melekoi el kmo: “[A Dios a] mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 21:⁠4) Ka molebedebek er a klungel a otutel tia el telbilel a Dios el mo merrob a rokui el ringel. Ngmo rullii tiang sel bo lecheroid er tia el beluulechad a mekemad me a klengerenger me a secher me a chelebirukel me a dirrek el rokui el meruul a delengerenger. Ngdiak a ngii di el chad el sebechel el remuul aikang.

 Aike el Bo Loruul a Rengedel a Dios

A Dios a mo oltaut a telbilel el loeak ngike el ongeru el mesisiich el chad er a uldekial a eanged me a chutem, el ngike el mlokiis el Jesus Kristus. Ngmereku sel taem el Jesus a mo mengedereder er a bebul tia el chutem el ua King el diak a omtok er ngii. Me a rechad a mo diak el chederedall er a rechad el king me a re president me a rengar er a balatiks, e te bai mo chederedall er a di ta el King me a ta el kabelment, el ngii a Rengedel a Dios.

Sel Renged a mo tomall a rokui el kabelment er a klechad. A irechar, e ngmildung er a ulaoch el ngar er a Biblia el kmo: “A Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.” (Daniel 2:​44) Me a rechad er a beluulechad el rokir a mo chederedall er a di ta el melemalt el kabelment, el Rengedel a Dios.

Sera lengar er a beluulechad, e a Jesus a mle betok el taem el losaod el kirel sel Renged. Ngmellekoi el kirel el ngar er a chelsel sel kerebil a nglunguuch e ullisechakl er a redisaiplo er ngii el mo meluluuch el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 6:​10) Ka mutebengii tia el kmo a Jesus a ulechotii el kmo ngii el Renged a ngar er ngii a lerellii er a oketmeklel a soal a Dios er tia el chutem, me a dirrek el soal a Dios el mo olekngemed a rokui el ringel er a beluulechad el rokir.

A melemalt el kabelment er a Dios a mo uchul a klengeltengat el diak a ngii di el kabelment er a klechad el sebechel el remuul. Molatk el kmo a Jehovah a uldureklii a Ngelekel me bo el sebechir a rechad el mo nguu a diak a ulebengelel el klengar. Ngar er a cheungel a omengederederel a Renged, e a rechad a mo mecherrungel. Ngera mo rsel tiang? A Jehovah a “mo okngemedii a kodall me ng mo diak el mo cherechar. Ng mo mesuld a iuechel a mederir a re bek el chad.”​—Isaia 25:⁠8.

A rebebil a locha mo oker el kmo: ‘Ngera me ngdimlak a ngera el loruul a Dios el me lmuut er a chelechang? Ngerang mengiil er ngii?’ A Jehovah a mle sebechel el torob a rokui el ringel er a irechar. Engdi ngmilechei me ngmelemolem el ngar er ngii, el dimlak el blechelechelingaol el reng a uchul, e ngbai mle kirel a diak a ulebengelel el klungiolir a rengelekel el ngar tia el chutem. A betik a rengrir el chedam me a rechedil a mo kongei er a rengelekir me te mo chuarm el tedeb el taem a lsekum e te medengei el kmo ngmo uchul a klungiolir. Me ngngar er a osisiu el rolel, e ngngar er ngii a ungil el uchul me a Jehovah a milechititerir a rechad me te mo chuarm a ringel el tedeb el taem, e a Biblia a ouchais er kid el kmo ngngerang aika el uchul. Nguldimukl er ngii a tekoi el ua ilmokl el omelilt, klengit, me a tekoi el kirel a llemeltel a omengederederel a Jehovah. A Biblia a dirrek el mesaod el kmo a remekngit el reng a lebilechititerir me te mengedereder er tia el beluulechad. *

Alta e ngdiak el sebeched el smaod er tiang aike el rokui el uchul me a Dios a mirruul el uaisei, engdi ngngar er ngii a teblo el tekoi el sebechel el meskid a omelatk e melisiich er kid. A kot er ngii a kmo: A Jehovah a mo omekngeltengat er kid el engelakl er a ngii di el ringel el bo decharm. A Dios a dirrek el kilou a rengud sel ledu el kmo: “A ikel dilubech el tekoi er a ngar a mong a kmal di mo diak a melatk.” (Isaia 65:​17) A Dios a mo choroid el diak a ulebengelel a chelebuul me a ringel el dilubech el tiakid el tedeb el taem el lebilechei a mekngit me ngngar er ngii.

E a ongerung a ua tia el kmo: A Dios a mla kutmeklii a ulterekokl el taem el bo lorob a ringel. Molatk er a profet el Habakuk er a loker er a Jehovah el kmo ngua klteketel a ngera el momechei a uldikel me ngngar er ngii. Me a Jehovah a ulenger el kmo: “Ng dirkak bo le temel el mo tmaut . . . [ng] diak bo le meoud.” (Habakuk 2:⁠3) Ngdi ua aike el bo domes er a ongingil el suobel, a telutk el taem a kmedang.

[Footnote]

 [Baks el ngar er a 7 el llel]

Bades el Melutk el kirel a Ungil el Klengar er a Ngar er a Medad

NGMO DIAK A MEKEMAD:

“Mei, e mesa bla le rellii a RUBAK! Mesal kmo ng meral mengasireng el tekoi a bla leruul er a beluulchad. Ng merrob a mekemad er a beluulchad el rokir.”​—Psalm 46:​8, 9.

BETIK ER A RENGUD A LMUUT EL ME NGAR:

“Ngmorngii chokiis rar melemalt mar diak le melemalt.”​—Rellir 24:⁠15.

NGMO ER NGII A KALL EL KIRIR A ROKUI EL CHAD:

“Bo le betok a redechel a wheat er a beluu; ma ikel bukl di bo le medekedek er a dellomel el kall.”​—Psalm 72:⁠16.

NGMO DIAK A SECHER:

“Ng mo diak a tal chad el kiei er a beluad el lmuut el mo mengeremrum el kmo ng smecher.”​—Isaia 33:⁠24.

A REDENGERENGER A MO DIBUS:

“Ngdi Dios a mo melai er a re dengerenger el oltobed er tir er a beluu, e mengurs er a re mekngit el chad el oltobed er tir er ngii el ua lomadel a dellomel er a chutem.”​—Osisechakl 2:⁠22.

A LLEMALT A OBERK ER A BELUU:

“A tar a klebesei e ng mor ngii a king el oba bliochel blakerreng, e mor ngii a re mengeteklel a beluu el mo mengedereder el oba llemalt.”​—Isaia 32:⁠1.

[Aike el siasing el ngar er a 7 el llel]

A Rengedel a Dios a mo sumechokl a ngii di el ringel el bla decharm