A Omengederederel a Satan a Kmedu el Mo Nguemed

“Ngikel dengerenger a diak bo lungilbesul.”​—OLISECHAKL 8:13.

1. Ngera uchul me a merekung el kerrekeriil el kirir a remekngit el chad a kmal ungil el chais?

 NGDI kmedung e a remekngit el chad a mo mukerrekeriil el kirel a omerellir. (Osisechakl 5:22; Olisechakl 8:12, 13) Ngkmal el ungil el chais, el ileakl el kirir tirke el betik a rengrir er a llemalt e dirrek el chilarm a chelebirukel me a mekngit el omerellir a rechad. Me a Satan el Diabelong, el ngii a uchul a rokui el klengit, a di kmedung e ngmo mukerrekeriil el kirel a omerellel.​—Johanes 8:44.

2. Ngera uchul me ngusbechall a klou el taem el mo meketeklii a ultok el dilubech er a chelsel a sers er a Eden?

² Ngar er a sers er a Eden, e a blulekngel a Satan el millisiich er a kldidairreng a mlo uchul me a rechad a mlo oltngakl er sel rolel a longedereder a Jehovah. Me tiang a mlo uchul e tirke el kot el chedam me a chedil a mlo obengkel a Satan el omtok er sel llemeltel a omengederederel a Jehovah, me te rirebet er a klengit. (Rom 5:12-14) Me a Jehovah a mle medengei el kmo ngera mo duubech el mo er tir a lsekum te mo omtok er ngii. Me nguaisei, a tekoi el mo duubech a kirel el obeketakl el mo er a rokui el blebelel, engdi nguluusbech er a klou el taem el mo omeketakl er ngii el kmo a rumtok a kmal cheleuid a uldesuir.

3. Ngkirel mo ua ngerang a uldesued el bedul a kabelment er a rechad?

³ A rechad a mle kirir el melibech er a kabelment er tir er a uriul er a lotngeklii a omengederederel a Jehovah. A apostol el Paulus er a loluches el mo er a rekldemel er a klaumerang er a Rom, e ngmilsaod el kirel aike el kabelment er a klechad el kmo “klisiich el ngar chomerreder.” Sel taem er a Paulus, e a kabelment er a klechad a mla er a cheungel a omengederederel a Emperor el Nero er a Rom, el ngii a milengedereder er a rak er a 54 el mo er a 68 er a taem er kid. A Paulus a dilu el kmo a “rokui el ngarngii lomerreder a meldalem ra Dios.” (Monguiu er a Rom 13:​1, 2.) Tiang ngbelkul a kmo a Paulus a millekoi el kirel a omengederederir a rechad el kmo ngkuk ngar er a bab er a rolel a omengederederel a Dios? Ngkmal diak el uaisei, ngbai melsaod el kmo a lsekum a Jehovah a mechei aika el omengederederir a rechad me ngmelemolem, e a Rekristiano a kirir el mengull aike el bla ‘loterekokl a Dios.’

A Rael el Bedul a Tellemall

4. Ka msodii a uchul me a omengedereder er a klechad a mo nguemed.

⁴ Me nguaisei, a omengedereder el chederedall er a Satan a ulterekokl el mo nguemed. E ngera uchul? A ta er a uchul a ngii el uchetemel a diak el ultuil er a llomeserreng er a Dios. Ngdi ta el Jehovah a uchul a cherrungel el llomeserreng, me ngdi ngii el tang a sebechel el meskid a ulekrael el mo er a melemalt el omengedereder. (Jeremia 8:9; Rom 16:27) A Jehovah a medengelii a kot el ungil el rolel a doruul a tekoi, el diak el ua rechad el blechoel suub a tekoi el oeak a cheleuid el omerellir. A ngii di el omengedereder el diak el oltirakl a ulekrael er a Dios a mo nguemed. Misei a uchul, e a omengedereder er a klechad el chederedall er a Satan, el uldimukl er a mekngit el uldasu, a di mla moterekokl er a uchelel el kmo, ngmo nguemed el rokui.

5, 6. Ngerang a rirellii a Satan el mo omtok er a Jehovah?

⁵ A sekutab el chad a blechoel el kerekikl me lak loruul a tekoi el mo uchul a telemellel. Engdi a lsekum e ngmelemolem el di olsibes er a uldesuel, e ngulterekokl el mo metemall. A reksi a mla meketeklii el betok el taem el kmo ngkmal diak el sebeched el omtok er ngike el Ulemeob. (Monguiu er a Osisechakl 21:30.) Me nguaisei, a kldidiul a rengul a Satan a mla rullii me ngoltngakl er a omengederederel a Jehovah, me chelechang e ngmerael er a rael el bedul a tellemall.

⁶ A kldidiul a rengul a Satan a mlocholt er a omerellel a king er a Babilon, el medung el ngar er a Isaia 14 el kmo: “Ak ngosechekl el mor a eanged ma  kingellek er omerreder a mo mengaiuechit a btechengel a Dios. Ele kulemdasu el kmo ke mo dengchokl el ua king er a rois er a diluches er sel le kldibel er ngii a re chelid. Ak ngmasech el mor a chetebtel a eabed mak mo ua ngikel Olab a Bek el Klisiich.” (Isaia 14:13-15) A kldidiul a rengul ngika el king a mlo uchul a ngemedel a omengederederel a Babilon. Me ngdi osisiu, a Satan me a beluulechad el longedereder er ngii a di kmedung e ngmo nguemed.

A Uchul me a Dios a Mechei a Bebil el Omengedereder

7, 8. Ngera bebil er a klungiaol el mlo er ngii e le Jehovah el milecherei a mekngit el omeruul me ngmelemolem el telkib el taem?

⁷ A rebebil a locha mo melatk el kmo ngera uchul me a Jehovah a milechititerir a rechad me te mo oltirakl er a Satan el ngar er a cheungel a dereder, el ngii a ulterekokl el mo nguemed. Ngii el Jehovah a Olab a Bek el Klisiich el Dios me ngmle sebechel el torebengii tia el tekoi. (Exodus 6:3) Me nguaisei, engdi ngdimlak lorrob er ngii, e le ngmle medengei el kmo tia el tedeb el ultekengir a rechad a lolemolem e ngmo meketeklii a moktek er a Jehovah er a uriul. Me a omerolel a taem, e ngmo obeketakl el kmo a Jehovah a melemalt e betik a rengul el mengedereder, me a reblak a rengrir el chad a mo ngmai a klungiolir er a telbilel a lsekum te olengesenges er ngii.

⁸ Ngmle sebechel a chelebuul el dimlak el duubech oleko a telungalek er a klechad a dimlak lolilt el mo oltirakl er a Satan e loltngakl er a omengederederel a Dios! Me nguaisei, engdi ngdirrek el mlo uchul a klungiolir a rechad e le Jehovah el kilengei me ngdi tir el mengedereder er tir. Tia el omeruul a uchul me a rebetok el melemalt a rengrir el chad a mla mo medengei el kmo, ngmo uchul a llomeserreng a dolengesenges e dultuil a klaumerang er kid er a Dios. Klteketel a taem el me lmuut er a chelechang, e a rechad a mla melasem a betok el bedengel a kabelment e dirkak a ta er ngii el sebechel el sumechokl a mondai er a klechad. Tia el tekoi a melisiich a uldesuir a remengull er a Dios el kmo, a rolel a omengederederel a Jehovah a kot el ungil el rolel a dereder. Me tia el chebirukel el omengederederel a Satan el lebilecherei a Jehovah me ngngar er ngii el telkib el taem, a mlo uchul a klou el chelebuul el mo er a klechad, el uldimukl er tirke el blak a rengrir el mengull er a Dios. Me nguaisei, engdi tia el tedeb el mekngit el blekeradel a dirrek el mlo uchul a betok el klungiaol el mo er a reblak a rengrir el mengull er a Dios.

A Ultok el Dilubech a Mlo Uchul a Klebkall el Mo er a Jehovah

9, 10. Ka msodii a rolel e a omengederederel a Satan a mlo uchul a klebkall el mo er a Jehovah.

⁹ A blekerdelel a klechad el chederedall er a Satan e melasem el mengedereder el di tir a kmal diak el sebechel el tomellii a omengederederel a Jehovah. A reksi a bai mla meketeklii a mlukreng el tekingel  a Jeremia el kmo, a rechad a diak el sebechir el di tir el mengedereder er tir. (Monguiu er a Jeremia 10:23.) Me a lmuut el tang, a ultekengel a Satan a mla mekengii a techall el mo sebechel a Jehovah el olecholt aike el mekreos el blekerdelel el ngar er a betok el rolel. El mekerang?

¹⁰ Aike el mecherrungel el blekerdelel a Jehovah a lmuut el mla obeketakl el me er kid e le kid el sebeched el mesang el kmo a omengederederel a Satan a kmedu el mo nguemed. Ngoeak itia el rolel e a Jehovah a mla kobkellii er mederir tirke el betik a rengrir er ngii. Me ngdiak lemechas a rengud e le ngsebeched el mesang el kmo a omengederederel a Satan a mera el mla kobkellii a Dios. Ngmla smisichii sel kot el ngar er a bab el rolel e a Jehovah a milsmechokl er a omelsemai el kirel a klisichel a omengederederel. Ngsebeched el mo mesaod a bebil er a blekerdelel a Jehovah el meketeklii a klemerang er tia el tekoi e dirrek el mo mesang el kmo, ngmekerang a omengederederel a Satan a mlo uchul me a Jehovah a mla ocholt aika el blekerdelel el oeak a kuk bebil er a rolel.

11. Ngoeak a ngera el rolel e a bltkil a rengul a Jehovah a obeketakl?

¹¹ Bltikerreng. A Biblia a kmo a “Dios a bltikerreng.” (1 Johanes 4:8) Ngar er a uchelel, e a omebelir a rechad a mle olechotel a bltkil a rengul a Dios. Me a lmuut el tang, ngoeak a mengasireng el rolel a omebeled e ngolecholt er a bltkil a rengul a Dios. Ngdirrek el uleak a bltkil a rengul a Jehovah e ngmilsang a klechad a klebokel el delengcheklir me aike el rokui el luluusbech el kirel a deurreng er tir. (Genesis 1:29-31; 2:8, 9; Psalm 139:14-16) Me sera lerebet er a klengit tirke el kot el obekel, e a Jehovah a mlo olecholt er a bltkil a rengul el oeak a kuk ta er a rolel. El mekerang? A apostol el Johanes a millekoi a tekingel a Jesus el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.” (Johanes 3:16) A Dios, ngmle sebechel el ochotii a bltkil a rengul el mo er a klechad el okiu a kuk ta er a rolel er a bai lodureklii a di ta el Ngelekel el mo tenget el olubet el kirel a kngtil a klechad? (Johanes 15:13) Tia el klou el olechotel a bltikerreng a dirrek el kerebai el kirir a rechad el oltirakl er ngii, el mesterir a techellir el mo olecholt er a osisiu el bltikerreng el lulechotii a Jehovah, el di ua lurruul a Jesus.​—Johanes 17:25, 26.

12. Nguleak a ngera el rolel e ngmocholt a klisichel a Jehovah?

¹² Klisiich. Ngdi ta el “Dios, el Cherrengelel a klisiich” a ngar er ngii a klisichel el omeob a rokui el klengar. (Chocholt 11:17; Psalm 36:9) Sel lemechell a chad e ngomuchel a klengar er ngii, el ua bechachau el llel a babier. E sel lemad a chad, e ngua bla lokekii tia el llel a babier er a telbiil me a omeruul me a tekoi el dilubech er a chelsel a klengar er ngii, el rullii me ngkuk ngodech er a rebek el chad. Tiaikid el blekerdelel ngika el chad a sebechel el mo medechel er a omeltkel a Jehovah, el diak lobes er ngii. E mo er ngii a taem, e a Jehovah a sebechel el lmuut el okisii ngika el chad er a kodall, el oba sel di mla blekerdelel er a uchei. (Johanes 5:28, 29) Tia el kodall a dimlak el moktek er a Jehovah el kirel a klechad er a kot el uchul. Me nguaisei, engdi a Jehovah el “Cherrengelel a klisiich” a ngar er ngii a klisichel el olekiis er a rulekoad.

13. Ngmekerang e a tengetengel a Jesus a ochotii a cherrungel el llemeltel a Jehovah?

¹³ Llemalt. A Jehovah el Dios a diak lomulak, e dirrek el Dios er a llemalt. (Duteronomi 32:4; Titus 1:2) Ngblechoel el meruul a tekoi el oeak sel kot el ngar er a bab el rolel a klemerang me a llemalt, el mo lmuut er a taem el tekoi el meketmokl a sebechel el mo uchul e ngmo mekngit a rengul. (Rom 8:32)  Ngulterekokl el kmal mle meringel er ngii el omes er a betik er a rengul el Ngelekel el Jesus, el mo mad er a teluo el kerrekar, el ua chad el uleltuub er a Dios! Me nguaisei, engdi ngoeak a bltkil a rengul el mo er a diak el cherrungel el klechad, e a Jehovah a kilengei el mo kutmeklii tia el meringel er a rengul el tekoi, me bo el sebechel el meketeklii a cherrungel el llemeltel. (Monguiu er a Rom 5:18-21.) A beluulechad el mui er a chelebirukel a milekengii a techall el mo sebechel a Jehovah el ochotii el kmo Ngii a Ngike el uchul a kot el ngar er a bab el rolel a llemalt.

14, 15. Ngera bebil er a rolel e a Jehovah a olecholt er a ngar er a bab el llemesel a rengul me a kllourreng er ngii?

¹⁴ Llomeserreng. Me a uriul er a lerebet er a klengit a Adam me a Eba, e a Jehovah a di mle mereched el ochotii a rolel e ngmo sumechokl a rokui el klengit, el mlukdubech el okiu a ultekengir. (Genesis 3:15) Ngdirrek el ulechotii a llemesel a rengul er a chelsel a chouaitia el omeruul, e dirrek el milekekokil el ochotii a moktek er ngii el mo er a remesiungel. (Rom 11:33) Ngdiak a ngii di el tekoi el torebengii a Jehovah me lak el sumechokl a tekoi el mo er a ungil el urebetellel. Ngdirrek el mla mo betok el taem el lolecholt er a mera el llomeserreng el ngar er a chelsel tia el beluulechad el mui er a deleboes el omeruul, me a mekemad, me a chelebirukel, me a rechad el di orrengesmengoit, me a rediak el chubechubechad, me a omengetukel er a rechad, me a cheleblad. A disaiplo el Jakobus a kmo: “Ngdi llomeserreng el mlar bab el mei a kot e ngklikiid, e sola e soal a budech, e medemedemek, e mechechedereder, e mui ra klechubechub ma ungil rodech, e diak lolekiakl ma diak longesuul.”​—Jakobus 3:17.

¹⁵ Kllourreng. A kllourreng er a Jehovah a ulebeketakl er sel taem er a bocha lekirel el mesmechokl a mekngit el blekerdelir a rediak el mecherrungel el chad. Ngkmal kired el oba omereng el saul el mo er a Jehovah, el ngii a kilengei e mla mo betok el telael el rak el lolecholt aika el mekreos el blekerdelel, el ngar er a cherrungel el rolel. Ngmle melemalt a tekingel a apostol el Petrus el kmo, ngkired el ‘omdasu ra kllourreng ra Rubak er kid el kmo ngkirel osobeled.’​—2 Petrus 3:9, 15.

16. Ngera me nguchul a deurreng sel lekengei a Jehovah el ousubes a kngtid?

¹⁶ Kongei el Ousubes. Kid el rokui a uldiukes er a klengit me kede dirrek el mesibas el betok el taem. (Jakobus 3:2; 1 Johanes 1:8, 9) Kede mera el oba omereng el saul e le Jehovah el kongei el ‘ousubes a kngtid’! (Isaia 55:7) Ka momtab er tia el tekoi: Kid el mlechell el uldiukes er a klengit a uchul me kede mo melechesuar a deurreng sel lousubes a kngtid a Dios. (Psalm 51:5, 9, 17) Me sel bo dolechesuar tia el ungil el blekerdelel a Jehovah, e ngmeleketek er a bltkil a rengud el mo er ngii e rullid el mo soad el oukerebai er ngii sel doruul a tekoi el obengterir a rebebil.​​—Monguiu er a Kolose 3:13.

A Uchul me a Rechad a Chuarm

17, 18. Ngoeak a ngera el rolel e a omengederederel a Satan a kmedu el mo nguemed?

¹⁷ A beluulechad er a Satan el mlukdubech el oeak a omengederederel, a dirkak a ta el bo el ungil el mengedereder er a chelsel aika el mereko el betok el telael el rak. A simbung el The European er a rak er a 1991 a kmo: “A rechad te chuarm? Chochoi, te chuarm . . . el diak el Dios a uchul, a chelebuul a mo er ngii el omerellir a rechad a uchul.” Tiang a klemerang el tekoi! Tirke el mle kot el demad me a delad el mlechetikaik er a Satan, a ngileltii el mo chederedall er a chad er a bai bo lechederedall er a Jehovah. Me te millilt er a rolel a dereder el kmedu el mo nguemed. A ringel me a chelebuul el lechelebangel a rechad er a beluulechad er a chelechang, a olechotel a kmo a omengederederir a rechad a uchul a klou el chelebuul.

¹⁸ A rolel a omengederederel a Satan a melisiich  er a rechorecherreng. Me nguaisei, a rechorecherreng a kmal diak el sebechel el mo mesisiich er a bltikerreng el ngii a uchetemel a omengederederel a Jehovah. A omengederederel a Satan a dirkak a ta el bo el sebechel el meskid a mesisiich el uchetemel a klengar me a deurreng me a ulekerreu. A omengederederel a Jehovah a mera el mla obeketakl el melemalt! Ngngar er ngii a olechotel er a chelecha el taem? Ngkmal ngar er ngii, el sebeched el mo mesang er a ongingil el suobel.

Ngera Kede Siluub el kirel a Dereder el Ngar er a Omengiued er a . . .

• Rom 13:1, 2?

• Osisechakl 21:30?

• Jeremia 10:23?

• Kolose 3:13?

[Aike el Ker er a Suobel]

[Siasing el ngar er a 25 el llel]

A omengederederel a Satan a dirkak a ta el bo el uchul a klungiolel a klechad

[Credit Line]

U.S. Army photo

WHO photo by P. Almasy

[Siasing el ngar er a 26 el llel]

Ngngar er ngii a klisichel a Jehovah el olekiis er a rulekoad

[Siasing el ngar er a 27 el llel]

A bltkil a rengul me a llemeltel a Jehovah a mlocholt el okiu sel tengetengel a Ngelekel