A Rolel a Longedereder a Jehovah a Melemalt!

“Ngii el Kot el Ngarbab el Dios oba klisiich el chodereder a renged er a beluulchad.”​—DANIEL 4:17.

1, 2. Ngera bebil er a uchul me a omengederederir a rechad a diak el oureor?

 OMENGEDEREDER er a klechad a diak el oureor! Chouaitia el tekoi a kmal diak el rrau a rengud er ngii. Sel kmal klou el uchul me ngdiak el oureor ngii el ngesonges a llomeserreng er tir el ungil el mengedereder. A telemellel a omengederederir a rechad a kmal bleketakl er a chelecha el sils sel domes a rebetok el merreder el olecholt el kmo te ‘betik a rengrir ra di tir, e nguibes a udoud, e chemat ra di tir, e kididai a rengrir, e diak le chedaol, e diak le mesumech a rengrir, e melaes, e diak le delodau, e teleberechel, e chetirir a ungil, e keikr, e blkuuk.’​—2 Timoteus 3:2-4.

² A irechar, e a kot el demad me a delad a ultngeklii a rolel a omengederederel a Dios. Sera loruul el uaisei, e te locha ulemdasu el kmo te ngileltii el mo ileakl el di tir el oungerachel er tir. Engdi a mera er ngii, te ulderseterir el mo chederedall er a rolel a omengederederel a Satan. Elolem el telael el rak er a mekngit el omengederederel a klechad el mesisiich el cheltikaik er a “merreder er tial belulechad” el Satan, a mla ngoikid el mei er sel kot el mekngtil a omengedereder er a reksi er a klechad. (Johanes 12:31) A The Oxford History of the Twentieth Century a melekoi el kirel a blekeradel er a klechad er a chelecha el sils el kmo: “Ngdiak a ultutelel el dosiik er a cherrungel el beluulechad.” Ngmesaod el kmo: “Ngdiak el di lak el sebeched el metik er ngii e lemerekong, engdi a skel a chouaisei el tekoi a mo uchul a tellemall, me a meringel el omengedereder el ngar er a eungel a ta el chad el olab a bek el klisiich er a chelsel a beluu, me aike el kot el mekngit el mekemad.” A chouaika el tekoi a bleketakl el kengei el kmo a omengedereder er a klechad a diak el oureor!

3. Ngera sebeched el melekoi el kirel a rolel a Dios a lulengedereder a lsekum me a Adam me a Eba a dimlak el bo er a klengit?

³ Ngklou el chelebuul el kired e le rekot el demad me a delad a ultngeklii sel di chimo el rolel a omengedereder el oureor, el ngii a omengedereder el oeak a Dios! Ngklemerang el kmo ngdiak dodengei el kmo ngmlo ua ngerang a teletelel a omengederederel  a Jehovah er tia el beluulechad a lsekum a Adam me a Eba a millemolem el oba blakerreng el mo er ngii. Engdi ngsebeched el ulterekokl a rengud el kmo a omengederederel a Dios el leblo lekengei er ngii a klechad a ulterekokl el uleak a bltikerreng me a tabesul el omeruul el mo er a rebek el chad. (Rellir 10:34; 1 Johanes 4:8) Me a domes er tia el diak lemokesiu el llemesel a Dios, e ngdirrek el kmal sebeched el oba ulterekokl el reng el kmo omko a chad a millemolem el ngar er a cheungel a omengederederel a Jehovah, e aika el betok el cheleuid el meketmokl el oeak a omengederederir a rechad a mle sebeched el choibngid er ngii. Me a omengederederel a Dios a ulterekokl el uluureor el mo “omotech a rengrir a rokui el di ngar.” (Psalm 145:16, New World Translation) Me a kedeb el omesodel a kmo, ngmle cherrungel el omengedereder. (Duteronomi 32:4) Ngmera el chelebuul e le rechad a ultngeklii ngii el omengedereder!

4. Ngua klungel a ngerang a kengei e le ngiluu a Satan el mo mengedereder?

⁴ Engdi ngungil el dolemolem el melatk el kmo alta e a Jehovah a milechititerir a rechad me ngdi mlo tir el meruul a omengedereder el kirir, engdi ngdimlak a ta el taem el lechitii a llemeltel a omengederederel er a rokui el blebelel. Ngmo lmuut er a mesisiich el king er a Babilon me ngmlorimel el mo kongei el kmo “ngii el Kot el Ngarbab el Dios oba klisiich el chodereder a renged er a beluulchad.” (Daniel 4:17) E a klemengetel a taem el merael el mei, e a Rengedel a Dios a mo kutmokl a soal a Dios. (Matteus 6:10) Ngklemerang, ngkirel a tedeb el taem e a Jehovah a milecherei a Diabelong me ngua “chelid er tial belulechad” me bo el sebechel el otobed a nger el kirel sel omelsemai el mlukdubech el oeak ngii. (2 Korinth 4:4; 1 Johanes 5:19) Me nguaisei, engdi a Satan a dirkak a ta me loruul a tekoi el engelakl er sel telekael el lekengei er ngii a Jehovah el kirel. (2 Kronika 20:6; momekesiu er a Job 1:11, 12; 2:3-6.) E blechoel el di ngar er ngii a rebebil er a rechad el ta te kiei er a beluulechad el longedereder er ngii ngike el klou el Cherrouel a Dios, engdi te melilt el mo chederedall er a Dios.

Omengederederel a Dios er a Israel

5. Ngera el telbiil a lerirellii a Israel el mo er a Dios?

⁵ Ngar er a taem er a Abel el mo lmuut er a lemeketmokl a renged er a Israel, e te betok el blak a rengrir el chad a milengull er a Jehovah e ullengesenges a llechul. (Hebru 11:4-22) Ngar er a sils er a Moses, e a Jehovah a rirellii a telbiil el obengterir a rengelekir a Jakob, el uriul e te mlo renged er a Israel. Ngar er a rak er a 1513 er a uchei er a taem er kid, e a rechad er a Israel me a klengelakel er tir a tilbir el mo kongei er a Jehovah el ua Merredelir er a ledu el kmo: “Aki mor a ikel rokui el bla ledu RUBAK.”​—Exodus 19:8.

6, 7. A omengederederel a Dios er a Israel ngulebeketakl el kmo ngua ngerang a teletelel?

⁶ A Jehovah a mla er ngii a moktek er ngii er a lolilt er a rengalek er a Israel el mo chedal. (Monguiu er a Duteronomi 7:​7, 8.) Ngmle klou er a di ulekerreuil a klengar er tir a mle uldimukl er tia el omelilt el lerirellii. A meklou a ultutelel el tekoi, el ngklel a Dios me a klisichel a omengederederel a mle  uldimukl er ngii. Me a Israel a mle kirel el mo mesiou el ua sioning el olecholt el kmo a Jehovah a di ngii el tang a mera el Dios. (Isaia 43:10; 44:6-8) Me seikid a uchul me a Jehovah a dilu er ngii el renged el kmo: “Kemiu a chedaol el chedal a RUBAK el Dios er kemiu, ma RUBAK a ngileltemiu er a delongelir a rokui el chad er a beluulchad el mo chedal.”​—Duteronomi 14:2.

⁷ A rolel a Dios er a longedereder er a Rengalek er a Israel a ullecholt el kmo ngmelatk el kmo te diak el mecherrungel. E a osisiu el taem, e a llechul a mle cherrungel el ullecholt a blekerdelel a Dios. Me a llechul a Dios el lebilsterir el oeak a Moses a ulemeketakl er a cheledolel, me a bltkil a rengul el kirel a llemalt, me a kengei er ngii el ousubes, me a kllouerreng er ngii. Uriul, el ngar er a taem er a Josua me a telecheroll el lemla er ngii, e sel renged a ullengesenges a llechul a Jehovah e uleldeu a rengrir er a budech me a klengeltengat er a klereng. (Josua 24:21, 22, 31) Tiaikid el taem er a reksi er a Rengalek er a Israel a mileketeklii el kmo a rolel a omengederederel a Jehovah a sebechel el oureor.

Ngmo er Ngii a Omengederederir a Rechad Engdi Ngmeringel

8, 9. Ngera el ongit el dimlak el olecholt a llomeserreng a lurruul er ngii a Rengalek er a Israel, me ngngera mlo rsel?

⁸ Klteketel a taem, e a Rengalek er a Israel a mle blechoel el mo cheroid er a omengederederel a Dios e mlo chuarm er a loridii a ulekerreuil. Uriul, e ngoeak a profet el Samuel e te mlo mengerechiil el lebo er ngii a meues el chad el mo king er tir. A Jehovah a dilu er a Samuel me lekengei er tia el ongterir. Engdi ngdilechelii a tekingel el kmo: “Ng dimlak loltngakl er kau, te bai uleltngakl er ngak el king er tir.” (1 Samuel 8:7) Me alta e a Jehovah a kilengei er a Israel el mo er ngii a meues el king er tir engdi ngulemeklatk er tir el kmo a omengederederir a rechad a mo er ngii engdi ngmo meringel.​—Monguiu er a 1 Samuel 8:​9-18.

⁹ A reksi a mileketeklii a klemerang er aika el omengelechel el mla er a Jehovah. A omengedereder el oeak a chad el king a mlo uchul a meringel el mondai er a Israel, el ileakl aike el taem el ngii el king a mo diak el oba blakerreng el mo er a Dios. Me a dolebedebek er tia el kerebil a Israel, e ngdiak el mechas a rengud el kmo a klemengetel a taem, e a kabelment el ngar er a chimorir a redi chad el diak lodengelii a Jehovah a dimlak el sebechir el kutmeklii a klungiaol er a beluu el kemanget el taem. Ngklemerang, el bebil er a rechad er a balatiks a olengit er a Dios me lomekngeltengat a blakerreng er tir el mo meruul a budech me a ulekerreu, engdi ngmekerang a Dios a lomekngeltengat er a rechad el diak el kengei el mo chederedall er ngii?​—Psalm 2:10-12.

Beches el Renged el Ngar er a Cheungel a Omengederederel a Dios

10. Ngera uchul me a Israel a mlutechei el mlo diak el ngellitel el rengedel a Dios?

¹⁰ A renged er a Israel a mileketeklii el kmo ngdimlak el sorir el mo mesiou er a Jehovah el oba blakerreng. Me te ultngeklii ngike el letiltkii a Dios el Messias, me a Jehovah a ultngeklterir e tilbir el mo omtechei er tir el oba kuk ta er a beches el renged. Me seikid, e sera rak er a 33 e ngulemuchel a ongdibel er a rengellitel el Kristiano el mengull er a Jehovah. Tiaikid el ongdibel a mlo beches el renged el ngar er a cheungel a omengederederel a Jehovah. E a Paulus a melekoi el kirel el kmo “Israel ra Dios.”​—Galatia 6:16.

11, 12. Ngera el klaisisiu er a omengedereder a meues er a delongelel a renged er a Israel me a “Israel ra Dios”?

¹¹ Ngar sel kot el renged er a Israel me a sel beches el Israel er a Dios e ngdul ngar er ngii a klekakerous me a klaisisiu er tir. Ongdibel er a Rekristiano a dimlak el uai a Israel er a irechar e le ngdiak a meues el king er ngii me a diak el ousbech el melenget a charm el kirel a kngterir a rechad. E a ta el klaisisiu er a renged er a Israel me a ongdibel er a Rekristiano a sel oketmeklir a remechuodel er a ongdibel. (Exodus 19:3-8) Chouaisei el mechuodel el Kristiano a diak el lorreder er a delebechel. Te bai klekar er a ongdibel e oba blakerreng el omekrael a tekoi el loruul a Rekristiano. Te olecholt a bltikerreng me a omengull el mo er a derta me a derta el chad er a chelsel a ongdibel.​—2 Korinth 1:24; 1 Petrus 5:2, 3.

¹² Me a lolebedebek a omerellel a Dios el mo er a Israel, e a rechedal a “Israel ra Dios” me a rekuk bebil er a sib a mekeroul a mesisiich el omereng el saul er tir el mo er a Jehovah me a rolel a longedereder. (Johanes 10:16) El ua tiang, a reksi a olecholt el kmo a rechad el milengedereder er a Israel a mle mesisiich el mengetikaik er a rulengedereder er tir  el chad el mlo er a ungil me a lechub a mekngit. A chouaitia el tekoi a smisichii er a uldesuir a rulab a ngerachel er a Rekristiano el kmo, alta e ngdiak longedereder el uai a king er a irechar engdi ngkirir el blechoel el ungil el kerebai er a klaumerang.​—Hebru 13:7.

Blekerdelel a Omengederederel a Jehovah er a Chelecha el Sils

13. Ngera el klou a ultutelel el tekoi a mleketmokl er a 1914?

¹³ A Rekristiano a ouchais er a beluulechad el kmo a omengederederir a rechad a di kmedung e ngmo metemall. Ngar er a 1914, e a Jehovah a kiltmeklii a Rengedel el ngar er a eanged el ngar er a cheungel a telutk el King er ngii, el Jesus Kristus. Seikid el taem, e ngmilsa a Jesus a klisichel a omerreder el “mo kats e lmuut el mo kats.” (Chocholt 6:2) Ngika el beches el mlo dengchokl er a kingall er a Kleking a ledilu er ngii el kmo: “Mongedereder er a re cherrouem.” (Psalm 110:2) Engdi ngklengiterreng, e le aika el renged er a beluulechad a melemolem el diak el kengei el mo chederedall er a omengederederel a Jehovah. Me a omerellir a melemolem el ua lolekoi el kmo “ng diak a Dios.”​—Psalm 14:1.

14, 15. (a) Kede mekerang e chederedall er a Rengedel a Dios er a chelecha el sils, e ngera el ker a kired el di kid el oker er kid? (b) Ngmekerang e sebechel el meues a klengarbab el klungiolel a omengederederel a Dios er a chelecha el sils?

¹⁴ Ngdirk ngar er ngii a rebebil er a rengellitel el chedal a “Israel ra Dios” el dirk ngar tia el chutem, me te odam er a Jesus a uchul e te melemolem el ua “odruchel ra Kristus.” (2 Korinth 5:20) Te mla mengilt el ua delebechel er a blak a rengul e mellomes a rengul el mesiou, el omekerreu e oltobed a kall er a klereng el kirir a rengellitel me a klou el seked er a Rekristiano el di merael el mo obdois a ildisir, el oba omelatk el kiei el ngar tia el chutem el diak a ulebengelel. (Matteus 24:45-47; Chocholt 7:9-15) Aike el betok el klungiaol er a klereng el loldeu a rengrir er ngii a Rekristiano er a chelecha el sils a olecholt el kmo a Jehovah a omekngeltengat a tekoi el loruul.

¹⁵ A derta me a derta er kid a kmal ungil a di el ngii el oker er ngii el kmo: ‘Ngak ak mera el medengei a ngerachel el kirek el oltoir er a chelsel a ongdibel er a Rekristiano? Ngak ak mera el melisiich er a rolel a omengederederel a Jehovah? Ngak ak mera el dmeu a renguk el chederedall er a Rengedel a Jehovah? Ngak ak mla tibir a renguk el mo melemolem el ouchais er a rebebil el kirel a Rengedel a Dios el mo er sel sebechek?’ Ngua ta el delebechel, e kede kongei el mo oltirakl er a ulekrael el lomeskid a Chelechad er a Ruungerachel e mo oureor el obengterir a retelutk el mechuodel er a ongdibel er kid. Ngoeak aikaikid el rolel, e kede olecholt el kmo kede kongei er a rolel a longedereder a Jehovah. (Monguiu er a Hebru 13:17.) A kengei er kid el mo chederedall a mo uchul a kltarreng el meliuekl er a beluulechad el rokir el ngii a kmal kesiokel er a chelsel tia el klou a klekakiakl er ngii el beluulechad. Ngdirrek el mo uchul a budech me a  llemalt e mengebkall er a Jehovah, el olecholt el kmo a rolel a longedereder a kot el ungil.

A Omerredelel a Jehovah a Mo Mesisiich

16. Ngera el omelilt a lechelebangel er ngii a rokui el chad er a chelecha el sils?

¹⁶ Ngmereched el olekedang a taem el aike el tekoi el mlukdubech er a sers er a Eden a mo mesmechokl. Sei a uchul, e chelecha el taem e ngkirir a rechad el meruul a ulterekokl el uldesuir. Derta me a derta el chad a kirir el tuib a rengrir el mo kongei er a rolel a omengederederel a Jehovah me a lechub e te di urrekodel a omengederederir a rechad. Me ngklou el techall a dobang el mo olengeseu er a remedemedemek a rengrir el mo meruul a melemalt el omelilt. Me ngdi kmedung el ngar er a Armageddon, e a rolel a omengederederel a Jehovah a mo mtechei a kabelment er a klechad el ngar er a cheungel a ongetikaik er a Satan. (Daniel 2:44; Chocholt 16:16) A omengederederir a rechad a mo meterob, e a Rengedel a Dios a mo mengedereder er a beluulechad el rokir. E seikid, e sel rolel a longedereder a Jehovah a mo obeketakl el kot el ungil.​—Monguiu er a Chocholt 21:​3-5.

17. Ngera el tekoi a sebechel el ngosuterir a remedemedemek a rengrir el chad el mo meruul a ungil el omelilt el kirel a omengedereder?

¹⁷ Tirke el dirkak el rruul a ulterekokl el uldesuir el mo er a Jehovah a kirir el oeak a nglunguuch e mo melatk aike el klungiaol el mei er a rechad el oeak a rolel a longedereder a Dios. Omengederederir a rechad a diak el sebechel el sumechokl a mondai er a delengerenger, el uldimukl er ngii a tekoi er a terrorism. A omengederederel a Dios a mo choroid a rokui el mekngit er tia el beluulechad. (Psalm 37:1, 2, 9) Omengederederel a chad a mlo uchul a mekemad el di blechoel el ngar er ngii, engdi a omengederederel a Dios a mo “merrob a mekemad er a beluulchad el rokir.” (Psalm 46:9) Omengederederel a Dios a dirrek el mo olutii a budech er a delongelir a rechad me a recharm! (Isaia 11:6-9) Chelebuul me a klengerenger a ngar er ngii er a cheungel a omengederederir a rechad, engdi a omengederederel a Dios a mo choroid aikang. (Isaia 65:21) Ngmo lmuut er a rechad el mengedereder el kmal ungil a uldesuir me ngdirrek el diak el sebechir el choroid a secher me a kodall, engdi ngar er a cheungel a omengederederel a Dios, e a remechuodel me a resmecher a mo oldeu a rengrir er a klisichel a klengeasek er tir. (Job 33:25; Isaia 35:5, 6) Ngmera el uaisei, a beluulechad a mo paradis, el ngar er a chelsel e ngdirrek el mo er ngii a okiis el kirir a rulekoad.​—Lukas 23:43; Rellir 24:15.

18. Kede mekerang e ochotii el kmo kede oumerang el kmo a rolel a omengederederel a Dios a kot el ungil?

¹⁸ Nguaisei, a omerredelel a Dios a mo sumechokl aike el rokui el tellemall el dilubech er a Satan er a lechitikikterir a rekot el demad me a delad el mo cheroid er a Ulemeob er tir. Ka bo molatk er tiang, ngmla mo bekord el 6,000 el rak el lomekdubech a tellemall a Satan, engdi Dios a okiu a Kristus e ousbech er a di 1,000 el rak el mo sumechokl a rokui el chetituokel el mo ungil! Tia el tekoi a kot el ngar er a bab el ochotel a klengarbab er a rolel a omengederederel a Dios! Me kid el Sioning el kirel a Dios er kid a uchul, e kede kongei er ngii el Merreder er kid. Me seikid, e bo dolecholt er ngii er a klengar er kid er a bek el sils me a bek el sikang el kmo kede mengull er a Jehovah e chederedall er a Rengedel e dmeu a rengud el Sioning er ngii. Me dousbech a bek el techelled el mo ouchais er a ngii di el chad el soal el orrenges el kmo a rolel a longedereder a Jehovah sei a kot el ungil el omengedereder.

Me a Dosaod el kirel a Omerredelel a Dios, e Ngera Kede Siluub er a Omengiued er Aika el Bades . . .

• Duteronomi 7:7, 8?

• 1 Samuel 8:9-18?

• Hebru 13:17?

• Chocholt 21:3-5?

[Aike el Ker er a Suobel]

[Siasing el ngar er a 29 el llel]

A Jehovah a di mle blechoel el mengedereder

[Siasing el ngar er a 31 el llel]

A dekengei el chederedall er a rolel a omengederederel a Jehovah a mo uchul a kltarreng er a beluulechad el rokir