Bo ‘Bekeu el Mengedecheduch a Tikingel a Dios’

“Te rokui el mlokeek ra Chedaol Reng, me te mlo bekeu el mengedecheduch a tikingel a Dios.”​—RELLIR 4:⁠31.

1, 2. Ngera uchul me ngkired el mo ungil el churrengelii a omesiunged?

 EDEI el klebesei er a uchei er a kodellel, e a Jesus a dilu er a redisaiplo er ngii el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” Me a uchei er a lengasech el mo er a eanged, e a mla mekiis er a kodall el Jesus a milsterir a ngerechelir a rulebengkel el mo ‘merael el mora rokuil renged el rulleterir ar chad el mo obengkel.’ Ngtilbir el kmo ngdi mo blechoel el obengterir el “mo lmuut era ullebongel ra belulechad.”​—Matteus 24:14; 26:​1, 2; 28:​19, 20.

² Me kid a Resioning er a Jehovah a ngar er ngii a ngerecheled el teloi er a ureor, el ngii a ulemuchel er a kot el dart el rak. Tia el ureor el mo uchul a osobelir a rechad el oeak a berkel a klumech er a Renged, e meruul er a redisaiplo a kot el klou a ultutelel el ureor. Me ngkmal klou a  ultutelel el bo dungil el churrengelii a omesiunged! Ngar er tia el suobel, e kede mo mesang a rolel a chedaol el reng a lengesukid el mo bekeu el mengedecheduch a Tekingel a Dios sel domerk er a klumech. A erung el ongingil el suobel a mo ochotii a rolel a chedaol el reng er a Jehovah a lomekrael er kid el mo meduch el olisechakl, e dirrek el mo olisechakl el oba blakerreng.

Kede Ousbech a Blekeu

3. Ngera uchul me kede ousbech er a blekeu sel deteloi er a ureor er a berkel a klumech er a Renged?

³ A ureor el kirel a berkel a Renged el lebilskid a Dios a kmal ileakl el techall, engdi lebebil er a taem e ngmo meringel er kid el meruul er ngii. Alta e a rebebil er a rechad a kongei er tia el ungil chais er a Rengedel a Dios, engdi a rebetok er tir a di ua tirke el chad el kiliei er a taem er a Noah. A Jesus a dilu el kmo: Te “dimlak lolechesiu el mo lmuut er sera le me eeleb el okngemedeterir el rokui.” (Matteus 24:​38, 39) E kuk ngar er ngii a rumtok me a remelenguul er kid. (2 Petrus 3:⁠3) A ultok a sebechel el mei el okiu a dereder er a kabelment me tirke el dedak el ngar er a skuul me a lechub e ngureor, el mo lmuut er a rechad er a blid. A omerelled el merur e medakt a loltngakl er kid a rechad a dirrek el sebechel el mengitechut er kid. Ngbetok el tekoi a sebechel el rullii el mo meringel er kid el omeketakl a tekoi e ouchais a tekingel a Dios el oba “blekeu.” (Efesus 6:​19, 20) Kede kmal el ousbech er a blekeu el melemolem el ouchais a tekingel a Dios. Ngerang a sebechel el ngosukid el mo bekeu?

4. (a) Ngerang a blekeu? (b) Ngmilekerang a apostol el Paulus e mlo bekeu el mengedecheduch er a rechad er a Thesalonika?

⁴ A tekoi er a Grik el mloiuid el ‘blekeu’ a belkul a kmo, bleketakl e medemedemek el mengedecheduch. Me tiang a belkul a kmo kede mengedecheduch el oba ulterekokl el reng, el diak el mesisiich a delecherul a ngered. (Kolose 4:⁠6) Me ngsoad el oba blekeu el mengedecheduch er a rechad, engdi ngdirrek el kired el mo budech el mo er a rebek el chad. (Rom 12:​18) Me a leuaisei, e ngkired el mengedecheduch el oba blekeu e osisiu el taem e ngkired el mo kerekikl me ngdiak dolibas er a rechad. Ngkired el omekeroul a ungil el blekeradel me bo lsebeched el smisichii tia el blekeu el reng er kid. E tia  el blekeu a diak el sebeched el nguu el di oeak a klisiched e lemerekong. A uriul er a le ‘mukringel e le motuub er a Filipi’ a Paulus me a rulebengkel, e te milekerang e mlo ‘bekeu’ el mengedecheduch er a rechad er a Thesalonika? A Paulus a milluches el kmo: “A Dios a milskemam a blekeu.” (Monguiu er a 1 Thesalonika 2:⁠2.) A Jehovah el Dios a ngosukid el mo diak demedakt e meskid a blekeu.

5. Ngoeak a ngera el rolel e a Jehovah a milsang a Johanes me a Petrus me a rebebil el disaiplo a blekeu?

⁵ Sera loker er a apostol el Petrus me a Johanes “ar merreder, mar mechuodel, mar chellimosk ra llach” e te dilu el kmo: “Di le kemiu losiik er ngii, el kmo ngmelemalt er medal a Dios a dolengesenges a tikingiu ra dolengesenges a tikingel a Dios? Ngdiak el sebecham el diak ki molekoi a ikel ki mules ma kim rirenges.” Ngdimlak loluluuch el olengit er a Dios me leterebengii tia el ultok, te bai milluluuch el kmo: “Rubak, me chelecha e meseterir lorrouk, mo mrelleterir ar mesiungem me le bekeu el mengedecheduch a tikingem.” (Rellir 4:​5, 19, 20, 29) Ngmilekerang a Jehovah er a longer er a ongterir? (Monguiu er a Rellir 4:31.) A Jehovah a milsterir a blekeu el oeak a chedaol el reng er ngii, me ngdirrek el sebechel el meskid a blekeu el okiu a chedaol el reng er ngii er a chelecha el taem. Me ngoeak a ngera el rolel e ngsebeched el nguu a chedaol el reng er a Dios el mo omekrael er kid er a omesiunged?

A Rolel a Domekeroul er a Blekeu el Reng

6, 7. Ngerang a kot el ungil el rolel e ngsebeched el nguu a chedaol el reng er a Dios? Mosaod.

⁶ A kot el ungil el rolel e kede nguu a chedaol el reng er a Jehovah a sel debleketakl el olengit er ngii. A Jesus a dilu er tirke el ulerrenges er ngii el kmo: “A lsekum kemiu, el mekngit el chad, a uaisei el medengelii a ngma ungil sengk el mesterir ar ngelekiu, e a Chedam ra eanged ngdiak bai lsal mesterir a Chedaol Reng tirikel olengit er ngii?” (Lukas 11:​13) Ngkmal kired el blechoel el meluluuch el olengit er a chedaol el reng, el ileakl el kirel a omesiunged er sel taem el de kora merur el omerk er a klumech el ngar er a rael, me a ngii di leker, me a basio er a siobai. Ngsebeched el meluluuch el mo er a Jehovah el olengit er a chedaol el reng er ngii me lebeskid a blekeu.​—1 Thesalonika 5:⁠17.

⁷ A Kristiano el Rosa a ngklel a milluluuch el olengit er a chedaol el reng er a Dios. * A ta er a klebesei, e ngulerrenges er ngike el sensei el ledilak loureor el menguiu er a chisel a ta er a skuul el resensei er ngii a mle mekngit a omerellir el mo er a rengalek. Me ngkmal mlo chetil ngika el sensei me ngdilu el kmo: “Tia el beluulechad ngmekeskelang?” Tiang a mlo techellel a Rosa el ousioning el mo er ngika el sensei. Me ngmilekera e mlo bekeu el omuchel er a cheldechedechal? Ngdilu el kmo: “Ak milluluuch el mo er a Jehovah el olengit er a chedaol el reng er ngii me lengesukak.” A Rosa a mlo sebechel el mechelii a ungil el cheldecheduch e kutmeklii a ongingil el techellir el lmuut el mo chadecheduch. Ka molatk er a eim a rekil el ekebil el Milane, el kiei er a mats er a New York. Ngmelekoi el kmo: “Ngak me a delak a blechoel el meluluuch el mo er a Jehovah er a uchei er a kbo er a skuul.” Te meluluuch el kirel a ngerang? Me bo lsebechel a Milane el oba blekeu el ouchais el kirel a Dios er ngii! A delal a melekoi el kmo: “Tiang a mla ngosuir a Milane el mo bekeu el ouchais er a klaumerang er ngii me sel uchul e ngdiak el teloi er a tanziobi me aike el ulengull el sils er a beluu.” Me tiang a ochotii el kmo ngsebeched el nguu a blekeu a lsekum kede meluluuch el mo er a Dios el olengit er ngii.

8. Ngera sebeched el suubii er a blekerdelel a profet el Jeremia el uleba blekeu el omerk a tekingel a Dios?

⁸ Ka molatk er a tekoi el ngilsuir a profet el Jeremia el mo oba blekeu. A Jehovah er a le tetkii el mo profet er a renged er a Israel, e a Jeremia a dilu el kmo: “Ak metitur el mengedecheduch; ak kmal dirk ngeasek.” (Jeremia 1:​4-6) Cherengel a taem e ngkmal mlo blak a rengul er a urerel el olisechakl me te betok a ulemes er ngii el ua chad el di omekringel er a rebebil. (Jeremia 38:⁠4) Ngmle bekeu el ouchais el kirel a kerrekerilel  a Jehovah el betok er a 65 el  rak. Ngkmal mirrael a chisel a blekengel el olisechakl, me a uriul er a 600 el dart el rak, e a rechad el ulerrenges er a Jesus el mle bekeu el olisechakl a ulemdasu el kmo ngii a locha Jeremia el mla mekiis er a kodall. (Matteus 16:​13, 14) Ngmilekerang e ngika el sekemerur el profet el Jeremia e mlo bekeu? Ngdilu el kmo: “Isei e a klmechem a kmard er a renguk el ua ngau; ng chelsimer er a chelsel a chiuesek. Ng mo mechitechut a bedengek a kurreked er ngii, ele ng dikea le sebechel moreked.” (Jeremia 20:⁠9) Nguaisei, a tekingel a Jehovah a milsang a klisichel a Jeremia el mo bekeu el mengedecheduch.

9. Ngera uchul me a klemechel a Dios a klou a lerellii er a klengar er kid el di ua tekoi el dilubech el mo er Jeremia?

⁹ Ngar er a babilengel a apostol el Paulus el mo er a Rechijudea el mlo Kristiano, e ngdilu el kmo: “Ele tikingel a Dios a dingar e ngarngii a klisichel, e kuk kedorm ra ikel rokuil erebita medal saider, e merus el ngmoech el imakl a reng ma klereng, ma ulengeruaol ma cherrengul a chiuis, e kutukel chomelebedebek ma uldesuel a reng.” (Hebru 4:​12) A klemechel a Dios a kmal klou a lerellii er a klengar er kid el ua Jeremia. Lak mobes el kmo a Dios a uluusbech er a rechad el meluches er a Biblia, engdi tia el babier a  dimlak lemeketmokl el di oeak a llemesir a rechad, e ngbai uleak a chedaol el reng er a Dios. Ngar er a  2 Petrus 1:21 e ngkmo: “Ele ulaoch a kmal dimlak el tobed ra uldesuir ar chad, e te chad a lulengedereder er tir a Chedaol Reng, me tuleak a Dios el mengedecheduch.” Me sel dongoit er a klou el taem el mesuub er a Biblia, e a uldesued a mukeek er a mlukreng el klemechel a Dios el okiu a chedaol el reng er ngii. (Monguiu er a 1 Korinth 2:10.) Tia el klumech a sebechel el mo ua “kmard el ngau” er a chelsel a rengud me ngmo meringel er kid el orreked er ngii.

10, 11. (a) A lsekum e ngsoad el mo bekeu el omerk er a klumech, e ngkirel el mo ua ngerang a omesubed er a Biblia? (b) Ka besechii a ta er a rolel a omesuub el molatk el mo meruul er ngii me bo lsebechem el olengeriakl er a omesubem.

¹⁰ A lsekum e ngsoad a lebo er ngii a lerellii er kid a omesubed er a Biblia, e a klumech el ngar er a chelsel a kirel el mo rutechii a rengud. El ua tiang, a profet el Esekiel a milsa ues el mle kirel el mengang er a iluil el babier, el llechukl er ngii a mesisiich el klumech el bo lomerk er ngii el  mo er a rediak el semeriar el chad. Ngmle kirel el mo ungil el medengei aika el klumech e remuul el mo tedebechel a klengar er ngii. A loruul el uaisei, e ngmo sebechel el merkii a klumech el mo ungil, el ua telemtemul a ilaot.​​—Monguiu er a Esekiel 2:​8–3:​4, 7-9.

¹¹ Kid a kiei er a taem el blekeradel er a chelsel a osisiu el ua taem er a Esekiel. Te betok el chad er a chelechang a diak el semeriar el orrenges er a klumech el ngar er a Biblia. A lsekum e kede outekangel el ouchais a tekingel a Dios, e ngkired el mo ungil el medengei e oumerang a klumech el lolekoi a Biblia. Ngklou a ultutelel a bo lulterekokl⁠​—a temel a omesubed. A urunguled a kirel el mo ua lolekoi a Psalm el kmo: “A tekingek ma uldesuek bo le betechii a rengum, RUBAK el cheuotelek!” (Psalm 19:​14) Me ngkmal kired el menguiu e melebedebek a klemerang el tekoi el ngar er a Biblia me bo lsebechel el mo medechel er a chelsel a rengud! Me ngklou a ultutelel el dolengeriakl er a omesubed el di kid el tang. *

12. Ngera uchul me a miting er a Rekristiano a sebechel el meskid a ulekrael el okiu a chedaol el reng?

¹² A ta er a rolel e ngsebeched el ngmai a klungioled el okiu a chedaol el reng er a Jehovah a “bo de kasisiich el omekses a bltikerreng ma ungil lomeruul, e lak de ua blekerdelir a bebil rar chad el mengoit chongdibel er kid.” (Hebru 10:​24, 25) A deblechoel el mo er a bek el miting er a Rekristiano e leblak a rengud el orrenges e doltaut er a chelsel a klengar er kid aike el tekoi el desuub, e nguchul e ngsebeched el mukrael er a chedaol el reng. Me nguaisei, a chedaol el  reng er a Jehovah a meskid a ulekrael el okiu  a  ongdibel er ngii.​—Monguiu er a Chocholt 3:⁠6.

A Klungiolel a Blekeu el Reng

13. Ngerang a sebeched el suubii er a ureor er a berkel a klumech el lurruul er ngii a Rekristiano er a kot el dart el rak?

¹³ A chedaol el reng er a Dios a kot el mesisiich el klisiich er a eanged me a chutem, e sebechel el rulleterir a rechad el mo meruul a soal a Dios. A Rekristiano er a kot el dart el rak a mirruul er a klou el ureor er a berkel a klumech el oeak a ulekrael er a chedaol el reng. Te ulemerk er a ungil el chais er “a ikel rokuil dingar el bleob el ngar cheungel a eanged.” (Kolose 1:​23) Me kid el medengei el kmo tirka el chad a “diak a skulir, el uar di chad” a uchul e ngmo bleketakl el kmo te mlukrael er a kot el mesisiich el klisiich, el ngii a chedaol el reng er a Dios.​—Rellir 4:⁠13.

14. Ngerang a sebechel el ngosukid el mo ‘kmard er a klereng’?

¹⁴ Me a dekiei el oltirakl a ulekrael er a chedaol el reng e ngsmisichid el mo churrengelii a omesiunged el oba blekeu. Ngbetok a klungiaol  el sebeched el ngmai sel de blechoel el meluluuch el olengit er a chedaol reng er a Jehovah, el blak a rengud el mesuub el di kid el tang, e de blechoel el melebedebek aike el dosuub, e de ngar er a bek el miting er a Rekristiano me bo lsebeched el mo ‘kmard ra klereng.’ (Rom 12:​11) Sel dolatk er a chad er a Judea, el Apollos, e a Biblia a kmo: “Ngikal chad a dimla mosisechakl ra rolel a Rubak; e mekeald a rengul e melemalt el mengedecheduch e olisechakl a tekoi ra Jesus.” (Rellir 18:​24, 25) Me kid a dirrek el sel bo ‘dekard er a klereng,’ e kede mo bekeu el mengedecheduch er a rechad er a obliil me a bek el techall.​—Rom 12:⁠11.

15. Ngmekerang e mo uchul a klungioled sel domerk er a klumech el oba blekeu?

¹⁵ Ngmo uchul a klungioled sel debekurulii a blekeu el reng. Ngsebechel el mo ungil a blekerdeled e le kede mo medengelii a klungel a ultutelel me a klungiolel a ureor el doruul er ngii. A klemeriarreng er kid a mukeroul e lekid el melechesuar a deurreng sel doruul er tia el ureor er a berkel a klumech. A blakerreng er kid a lmuut el mo mesisiich e lekid el melechesuar el kmo tia el ureor er a berkel a klumech a kmal orechudel.

16. Ngera kired el meruul a lsekum a blakerreng er kid er a omesiunged a dikea le ua ngar er a mong?

¹⁶ E kuk mekerang a lsekum sel blakerreng er kid er a omesiunged er a ngar er a mong a dikeang? Ka di lekau el merriter er kau. A Paulus a kmo: “Di le kemiu el merriter er kemiu el kmo, kom ngara kloumerang ngdiak.” (2 Korinth 13:⁠5) A ker el kired el di kid el melatk a kmo: ‘Ngak ak dirk kmard er a klereng? Ak meluluuch el mo er a Jehovah el olengit er a chedaol el reng er ngii? A nglunguchek ngolecholt el kmo ak ultuil a klaumerang er ngak er a Dios e meruul a soal? A nglunguchek ngolecholt a omereng el saul er ngak el kirel a ureor el bla loterekeklii er ngak a Dios? Ngua ngerang a omesubek el di ngak el tang? Ak mengoit er a ua ngera klungel el taem el menguiu e melebedebek a suobel? Ngak ak blechoel el mo er a miting e dirrek el onger er a miting?” Me sel dolatk aika el ker e ngsebechel el ngosukid el mo  tichiir aike el chelitechetud e sumechokl el mo  ungil.

Becherei a Chedaol el Reng er a Dios Me Lerellau el mo Bekeu

17, 18. (a) Ngua ngera klungel a ureor er a berkel a klumech el meketmokl er a chelecha el taem? (b) Kede mekerang e olecholt el kmo ngdiak de “mokebai” el omerk er a ungil el chais er a Rengedel a Dios?

¹⁷ A mla mekiis er a kodall el Jesus a dilu er a redisaiplo er ngii el kmo: “Kom di mo nguu a klisiich sel be le metengel er kemiu a Chedaol Reng; me ko mo ochotek ra Jerusalem, ma Judea el rokir, ma Samaria el mo lmuut ra bek lullebongel ra belulechad.” (Rellir 1:⁠8) Tia el ureor a ketengel el meketmokl el mo ua tiang er a chelecha el taem. Te betok er a euid el miliol el Sioning er a Jehovah a omerk er a klumech er a Renged er a chelsel a betok er a 230 el beluu, el mengoit er a bekord el 1.5 el biliol el sikang er a bek el rak. Ngkmal dmeu a rengud el ngar er ngii a techelled el teloi er tia el di ta el lemeketmokl e diak el luut el mo er ngii el ureor!

¹⁸ Ngdi ua kot el dart el rak, a ureor er a berkel a klumech el meliuekl er a beluulechad a meketmokl el oeak a ulekrael er a chedaol el reng er a Dios. A lsekum e kede kongei el oltirakl er a ulekrael er a chedaol el reng, e kede olecholt el kmo ngdiak de “mokebai” el omerk er a Rengedel a Dios. (Rellir 28:​31) Me a leuaisei, e bo leblak a rengud el omerk er a ungil chais er a Rengedel a Dios, el okiu a ulekrael er a chedaol el reng er ngii!

[Footnote]

Ngera Ke Siluub?

• Ngera uchul me ngkired el mo bekeu el ouchais a tekingel a Dios?

• Ngerang a ngilsuterir a redisaiplo er a irechar el mo bekeu el mengedecheduch?

• Kede mekerang e mo bekeu el mengedecheduch?

• Ngmekerang a blekeu el reng e sebechel el mo uchul a klungioled?

[Aike el Ker er a Suobel]

[Siasing el ngar er a 13 el llel]

Te mekerang a rechedam me a rechedil e ngosuterir a rengelekir el mo oba blekeu el mengedecheduch?

[Siasing el ngar er a 14 el llel]

A kedeb el nglunguuch a sebechel el ngosukau el mo bekeu el omerk er a klumech