Ngerang a Osengel a Dios el kirel a Rrom?

A ULEMEOB er kid, el soal a kot el ungil el kired, a diak el lolekebai a tabesul el usbechel a rrom. * Me ngmsa chad a “bilong el meruul er ngii el mo ungil a rengul, ma cheluchul olib el meruul er ngii me ng blekebek a medal ma blauang el omsa klisichel.” (Psalm 104:15) A ta er a taem, e a Jesus Kristus a killungii a deurreng er a merengel a chebechiil er a lebult a ralm el mo “ungil bilong.”​—Johanes 2:3-10.

Ngmelemalt a domdasu el kmo a Ulemeob a ungil el medengei el kmo ngua ngerang a telemellel a rrom er a urerel a bedenged me a no er a bdelud. Ngoeak a Biblia, e a Demad el ngar er a eanged a ‘olisechakl er kid el mo ungilbesud,’ engdi ngmesisiich el mengelechel er kid el kirel a mekngit el usbechel a mesisiich el ilumel. (Isaia 48:17) Ka mutab aika el bleketakl el uleklatk:

“E lako bo mcheltelaol ra bilong, e nguchul a delemumuu.” (Efesus 5:18) “Mar cheltelaol ra rrom . . . a diak bo loudiukes ra rengedel a Dios.” (1 Korinth 6:9-11) A Tekingel a Dios a melekoi el omtok a “cheltelaol ra rrom, ma tametereng el blengur, ma ikel ua ingii.”​—Galatia 5:19-21.

Ka me bo domes a bebil er a telemellel a imis el omelim el rrom.

Telemellel a Imis el Omelim

Alta ngngar er ngii a telkib el klungiolel a rrom, engdi ngngar er ngii a mesisiich el klekedall er a chelsel el sebechel el ngmodech a urerel a uldesued me a bedenged. A imis el usbechel a rrom a sebechel el mekdebechii a ngii di el ta er aika el mondai:

A imis el omelim a tomellii a chad me ng ‘mo diak el sebechel el ungil el omdasu.’ (Osisechakl 23:33) A Allen, el chad er a omelim el dulsaod er ngii er sel suobel er a uchei a mesaod el kmo: “A secherel a omelim el rrom a diak el di el secherel a bedenged, e ngdirrek el secherel a uldesuel me a blekerdelel a chad. Me ngmo diak momdasu a tellemall el moruul el mo er a rebebil.”

A imis el omelim el rrom a dirrek el sebechel el choitechetur a uldesuel a chad. A Bades a omekltak el kmo: “A bilong a merechorech a ultebecherreng er a re chedak!” (Hosea 4:11) El mekerang? Sel lecheltelaol a chad e a uldesuel me a urungulel el leblechoel el orreked a mocha kora di subed me  a lechub e ngungiang el lolecholt. Me a klisichel a rengud el mle soad el melemolem el meruul a melemalt el tekoi a mechitechetong. A rrom a sebechel el choitechetur a uldesued el kirel a omerellel a tekoi er a kldung, me ngsebechel el mo uchul a telemellel a klereng er kid.

El di ua tiang, a John a uluuteketok er a bechil e tilobed el mo melim. A uriul er a lengim a sesei me lechelelleklang a uldesuel e a ta el redil a ulekedii er ngii. Telkib el taem er a uriul e a John a ulebengkel el merael, me ngmlo er a laokreng el obengkel ngii el redil. Uriul er itiang e a John a kmal el uleuuchel er a rengul er a tekoi el rirellii el ngii a ulterekokl el dimlak el omdasu a mo meruul er  ngii omko rrom a dimlak el chitechetur a uldesuel.

A imis el omelim a dirrek el rullii a chad el mo diak el sebechel el mtebechel a tekingel me a omerellel. A Biblia a oker el kmo: “Ngtecha blechoel el ngar er ngii a mondai er ngii? Ngtecha outeketok e okeuad? Ngii di el chad el kiei el mo osoi, el melim er a lmuut el ditang.” (Osisechakl 23:29, 30, Contemporary English Version) A imis el omelim a sebechel el rullau el “cho momelechesiu er kau e ng di ua cho mngar a chetebtel orrakl er a diall el omteuitech er a ringel daob el merecherached a rengum e chetelaol.” (Osisechakl 23:34) A chad el millim el mo imis a sebechel el mekiis el omdasu el kmo “ng locha ngar ngii a chillebedak, ngdi kor a diak kulatk.”​—Osisechakl 23:⁠35.

A imis el omelim a sebechel el tomellii a klisichel a bedengem. “A bo le kukuk er a tutau e komelechesiu a bedengem el ua cho mulebangch er omekodall el bersoech.” (Osisechakl 23:32) A remesuub a ukeruul a mla oterekeklii a llomeserreng er tia el osisechakl. A usbechel a betok el rrom a uai a omekodall el kar el sebechel el mo uchul a bebil er a rakt el uaikang, ngmekdubech a bek el bedengel a kasinoma, chedengaol el mengai er a rrom, medul a chedengal me ngmo er ngii a ultil a tellemall er ngii, oburk a aibuchel, mo kesai a sukal er a bedengel a chad, cheltelaol el ngalek el dirk ngar er a diil, meloched, me a lechub e ngmo diak el loureor a chaidirengul a chad. A chad a sebechel el di ta el bo el iis el melim me a lechub e ngmelim el kemanget el taem el diak el olengull e ngsebechel el di stob loureor a no er a btelul me ngdi mo mechiuaiu el diak lodengelii a rengul me a lechub e ngmad. Engdi sel kot el mekngit el telemellel a imis el omelim a diak a omesodel er a babier er a ukeruul.

A klou el telemellel. Alta e a chad a diak el bo el cheltelaol engdi a diak el ultebechel el omelim a sebechel el mo uchul a telemellel a klereng er ngii. A Biblia a bleketakl el melekoi el kmo: “Te chebuul a rumkokl el mo melim a mesisiich el ilumel e tal kesus el longetelaol er tir.” E ngera uchul? A Isaia a mesaod er a telemellel a diak el ultebechel el omelim el mo er a klereng er a chad el kmo: “Ng diak  lomekerreu a omerellel a RUBAK, ng diak lodengei a urerel.”​—Isaia 5:11, 12.

A Tekingel a Dios a melisiich er kid el mo diak ‘dobengterir a re chad el sekengim er a mesisiich el ilumel.’ (Osisechakl 23:20) A remechuodel el redil a lomeklatk er tir el diak “bo lsibil a chomelim el bilong.” (Titus 2:⁠3) E ngera me ngdiak? E le rechad a blechoel el diak lolechesuar, e di mekekokterir el merael el mo mekudem el melim e mo melim a betok. Me ngdi telkib, e ngika el chad a di mo omdasu a omelim me ngmechiuaiu e melebedebek el kmo: “Ngera uchul me ng diak el sebechek el mekar? Ak bai lmuut el mo nguim a sesei.” (Osisechakl 23:35) A remelim a mo engelakl er a chouaitia el meringel el blekeradel el bo loureng a ilumel el olekar er tir a letutau el meruul a tsios er tir er a imis el omelim el lemla er ngii er sel kesus er a uchei.

A Biblia a mengelechel el kmo a rechad el “cheltelaol ra rrom” me a rengar er a “tametereng el blengur, ma imis lomelim, . . . [a] kirir el mesaod er tir er ngikel mla mekedmokl el oukerrekeriil rar dingar mar mla mad.” (1 Petrus 4:3, 5) A Jesus a milengelechel el kirel aika el meringel el taem el dekiei er a chelsel el kmo: “Mkekerengemiu ma rengmiu lak bo loberaod er chomelechemakl, ma cheltelaol ra rrom, ma ulekerreu er tial klengar, me lak dilemereched el mer kemiu sel sils el ua bedikl.”​—Lukas 21:34, 35.

A leuaisei, e ngera sebechir el meruul er ngii a rediak el ultebechel a omelmir er a rrom me ngmo diak el oberaod er a imis el omelim el rrom?

[Footnote]

[Siasing el ngar er a 4 el llel]

A imis el usbechel a rrom a sebechel el mekdubech a betok el mondai