Mosiik a Klemera el Tekoi el Kirel a Eanged

TE BETOK el chad a oba omelatk el mo kiei er a eanged! A omelatk er a uriul er a kodall a ngar er ngii a betok el kakerous el rolel el losaod er ngii a klechelid er a Moslem me a Hindu me a Buddha me a rechedal a Klsuul el Klekristiano, me a dirrek el betok el chad el tir a diak el semeriar a tekoi er a klechelid. Te melatk er a eanged el kmo ngbasio er a klungiaol el debo er ngii e ngsebeched el olengull er a ringel, e dirrek el mo obengterir tirke el “mla mad el betik er a rengud.” Me nguaisei, engdi a ruumesingd el chad a melechesuar a belkul a tekoi el kmo: A rebetok el chad a sorir el mo kiei er a eanged, engdi ngdiak el sorir el mad. Tiang ngera uchul me nguaisei?

A lsekum kid el chad a rruul el kired el mad e mo er a eanged, e a omomdasu e kid ngdiak bai desal semeriar el mengiil er sel taem el ua ngalek el semeriar el mo klou el chad me a dirrek el ngeasek el chad el semeriar er sel taem el bo lebechiil? Me nguaisei, engdi a rechad a chetirir el mad.

Me a remengeteklel a klechelid a melekoi el kmo a uriul er a tedeb el klengar er kid er tia el chutem, e kede mo er a eanged e le sei a kirel el delengchekled. El ua tiang, a tekingel a Theodore Edgar Cardinal McCarrick, el mle bisop er a Washington D.C., a kmo: “Tia el klengar el dengar er ngii a diak el mera el klengar. E le kid a ulebeob el kired el mo kiei er a eanged.” Me a Ted Haggard, el mle president er a U.S. National Association of Evangelicals a melisiich er a osisiu el uldasu el kmo: “A moktek er a klengar a belkul a kmo, ngkired el kobkellii a Dios e mo er a eanged e le a eanged a beluad.”

Tirke el oumerang el kmo a klengar er a uriul er a kodall a mo kiei er a eanged, a ngmai a uchetemel a klaumerang er tir er a di kesai el tekoi. A George Barna el president er a kombalii el merriter a uldasu er a kakerous el klechelid a metik el kmo, a rebetok a oumerang er a uldasu el kmo “a klengar er a chelechang me a uriul er a kodall a mengai a uchetemel er a betok el kakerous el tekoi el ua mubi me a chelitakl me a dirrek el merael a chisel el babier.” Ngar er a beluu er a Florida e a mengeteklel a klechelid er a Episcopal a kmo: “Ngdiak a ngera el dodengei el kirel a eanged, kede di medengei el kmo sei a basio er a Dios.”

Me nguaisei, a eanged a klou a ultutelel el tekoi el ngar er a Biblia. Me ngoeak a Tekingel a Dios e ngua ngera el basio a eanged? A chad ngulebeob el kirel el mo kiei er a eanged? Me a lsekum a rechad a mo er a eanged, e ngera te mo meruul er isei?

[Siasing el ngar er a 3 el llel]

Ngera uchul me a rebetok el chad a sorir el mo kiei er a eanged, engdi te di mekesai a sorir el mad?