A Urerel a Chedaol el Reng er a Otutel a Moktek er a Jehovah

“Ng dirrek el mo ua isei ngii el tekingek . . . ng mo remuul a bek el kuldurech er ngii el mo meruul.”​—ISAIA 55:11.

1. Ka msodii a klekakerous er a uldasu me a moktek.

 KA MOLATK er a reteru el chad el dul mengetmokl er tir el mo er a omerael el ngar er a mlai. A ta er tir a ousbech a map el olecholt er a rael el mo er a basio el lebo er ngii. E ngike el kuk tang a ungil el medengelii a rael me a lmuut el bebil er a rael el sebechel el ousbech. Ngkltmokl el mo ngodechii a omerollel a lsekum e ngmo kirel. Me nguaisei, a rolel a loruul a tekoi tirka el teru el chad a olecholt er a klekakerous er a uldasu me a moktek er a chad. A uldasu a sebeched el omekesiu er ngii er a usbechellel a map el ngii a olecholt er a bleketakl el rael, engdi a moktek a sebechel el uldimukl er a kakerous el rolel e a chad a mo er a basio el soal el mo er ngii.

2, 3. (a) Ngerang a moktek er a Jehovah, e ngmilekerang er sera lerebet er a klengit a Adam me a Eba? (b) Ngera uchul me ngkired el kerekikl e meruul a tekoi el oltirakl er a moktek er a Jehovah?

² A Jehovah a mo otaut a moktek er ngii, el diak el okiu a mla meketmokl el uldasu el kmal diak el sebechel el mengodech, ngbai ousbech er a kemanget el taem el meruul er ngii. (Efesus 3:​11) Tia el omeruul a uldimukl er aike el dimla moktek er ngii el kirel a klechad me tia el chutem, el ngii a kirel el mo paradis el sebechir a remecherrungel el chad el kiei er a chelsel el ngar er a budech me a deurreng el diak a ulebengelel. (Genesis 1:​28) Sera lerebet er a klengit a Adam me a Eba, e a Jehovah a kiltmeklii a rolel me bo el  sebechel el motaut a moktek er ngii. (Monguiu er a Genesis 3:​15.) A Jehovah a tilbir a okesiu el redil el mo mechellii a ‘uldidellel a rasech,’ me a lechub e ng Ngelekel, el ngii a mo okngemedii a Satan e sumechokl a rokui el tekoi.​—Hebru 2:​14; 1 Johanes 3:8.

³ Ngdiak a ngii di el klisiich er a eanged me a chutem el sebechel el torebengii a Jehovah me lak lotaut a moktek er ngii. (Isaia 46:​9-​11) Ngera uchul me kede melekoi el uaisei? E le a klisichel a chedaol el reng er a Jehovah a mesisiich el klisiich, el ngii a sebechel el “mo remuul a bek el” moktek er Ngii. (Isaia 55:10, 11) Me ngkired el mo kerekikl e meruul a tekoi el oltirakl er a rolel a loltaut a moktek er Ngii. A klengar er kid er a ngar medad a ultuil er a otutel a moktek er a Jehovah. Ngdirrek el melisiich a klaumerang er kid sel bo dodengelii a rolel a loureor a chedaol el reng er Ngii. Bo dosaod er a rolel a loureor a chedaol el reng er a irechar me a chelechang me a ngar medad, el mo oltaut a moktek er a Jehovah.

A Rolel a Loureor a Chedaol el Reng er a Irechar

4. Ngmilekerang a Jehovah er a lomeketakl er a moktek er ngii?

⁴ A Jehovah a milekekokil el olecholt er a moktek er ngii er a taem er a omelechesel a Biblia. A kot, e ngike el uldidellel a rasech a mle “berrotel.” (1 Korinth 2:7) Ngar er a bekord el 2,000 el rak er a uriul e a Jehovah a liluut el mesaod er ngika el uldidellel a rasech. (Monguiu er a Genesis 12:7; 22:15-​18.) A Jehovah a tilbir el mo er a Abraham el kmo ngmo er ngii a klou el otutel a tekoi el oeak a ‘ruldidellel a rsechel’ el ngii a olecholt er a Ngalek el mo mechell el oeak a klengelakel er ngii. Kede medengei el kmo a Satan a ulterekokl el dirrek el kmal mle semeriar el mesa tia el tekoi el obeketakl. Ngdirrek ngika el Cheraro a mle soal el mo melemall er tia el klengelakel er a Abraham me lak lemutaut a moktek er a Dios. Engdi chouaitia el tekoi a dimlak el sebechel el meketmokl, e le a chedaol el reng er a Dios a uluureor el mesebechakl er ngii. El oeak a ngera el rolel?

5, 6. Ngmilekerang a Jehovah er a lousbech er a chedaol el reng er ngii el omekerreu er a uldedelid el klengelakel er a telbiil?

⁵ A Jehovah a uluusbech er a chedaol el reng er ngii el omekerreu er tirke el chad er a klengelakel er a Abraham el uldedelid el mo er a Ngalek er a telbiil. A Jehovah a dilu er a Abraham el kmo: “Ngak omekreakl el mesebechakl er kau.” (Genesis 15:1) Aike el tekoi a mle meklou a belkul. Ka molatk er a tekoi el dilubech er a bekord el 1919 el rak er a uchei er a taem er kid, er sera lebo lekiei er a beluu er a Kerar a Abraham me a Sara. A king er a beluu er a Kerar el Abimelek a dimlak lodengei, e ngiluu a Sara el bechil a Abraham el mellatk el mo bechil. Omomdasu e a Satan ngmilengeuid a tekoi el melasem el merrob er a Sara me lak bo lomechell er a ngelekel a Abraham? Ngdiak a omesodel er a Biblia, ngbai mesaod el kmo a Jehovah a mlo mesmechokl er tia el tekoi. Me ngngar er a berrous, e ngmilellach er a Abimelek me lak bo lorutech er a Sara.​—Genesis 20:​1-​18.

⁶ Tiang a dimlak di el ta el taem el Jehovah a omekerreu er tir. Ngulelsobel er a Abraham me a telungalek er ngii el betok el taem. (Genesis 12:14-​20; 14:13-​20; 26:26-​29) A ta er a milluches er a Psalm a mesaod er a Abraham me a telungalek er ngii el kmo: A Jehovah a “dimlak le bechere ngii di le chad me lomekcharm er tir, e milengokl er a re king el tir a uchul. Ng dilu el kmo, ‘Lak morutech er a re ngellitel mesiungek; lak momekringel er a re profet er ngak!’ ”​—Psalm 105:14, 15.

7. Nguleak a ngera el rolel e a Jehovah a ulemekerreu er a renged er a Israel?

⁷ Ngoeak a reng er a Jehovah, e ngulemekerreu er a renged er a Israel, el ngike el Ngalek er a telbiil a mle kirel el mo mechell er a delongelir. Ngoeak itia el reng er ngii, e a Jehovah a ulemesterir a Llach a rechad er a Israel, el omekerreu er a mera el omengull, e dirrek el ulemekerreu er a Rechijudea me lak letemellii sel ungil el deleongel er tir el mo uchul a telemellel a omengull er tir. (Exodus 31:18; 2 Korinth 3:3) Sel taem er a Remengeteklel, e a reng er a Jehovah a milsterir a klisichir a rebebil el mo olsobel er a rechad er a Israel er a recherrouir. (Mengeteklel 3:​9, 10) A betok el rak er a uchei er a cherellel a Jesus, e a chedaol el reng a ulterekokl el ulemekerreu er a Jerusalem me a Bethlehem me a templo el ngii a basio el mle kirel el mutaut a ulaoch el kirel ngika el rasech er a telbiil.

8. Ngera ochotii el kmo a chedaol el reng a uluureor er a chelsel a klengar er a Ngelekel a Dios me a dirrek el omesiungel?

 ⁸ A chedaol el reng a ulemekrael er a klengar er a Jesus me a dirrek el omesiungel. Nguleak a klisichel a chedaol el reng e ngmle sebechel el mo dioll a klikiid el Maria, el ngii el omeruul a ketengel meketmokl el tekoi, el mlo sebechel a diak el cherrungel el redil el mechellii a cherrungel el ngalek el Sechal, el ngii a diak el loudiukes er a belsel a kodall. (Lukas 1:​26-​31, 34, 35) Tia el osisiu el reng a ulemekerreu er a ngalek el Jesus me ngdimlak lokodir. (Matteus 2:​7, 8, 12, 13) Sera bocha el 30 a rekil a Jesus, e a Dios a ulemecheluch er ngii el oeak a chedaol el reng, e tiletkii el mo olisechakl, e dirrek el mo oudiukes er a kingellel a David. (Lukas 1:​32, 33; 4:​16-​21) Nguleak a klisichel a chedaol el reng er a Dios, e ngmlo sebechel a Jesus el meruul a mengasireng el tekoi, el ulemekungil er a resmecher, e ulemekang er a seked, e ullekiis er a rulekoad. Chouaika el omeruul a olechotel a klengeltengat el sebeched el mo ngmai er a cheungel a omengederederel a Jesus.

9, 10. (a) Ngmlekerang a chedaol el reng er a Dios a lomekrael er a redisaiplo er a Jesus er a kot el dart el rak? (b) Ngulebeketakl a ngera el tekoi el kirel a otutel a moktek er a Jehovah er a kot el dart el rak?

⁹ Ngulemuchel er a Pentekost er a rak er a 33, e a Jehovah a uluusbech er a reng er ngii el omecheluch er tirke el mo ongeru el chedal a uldidellel a rsechel a Abraham, el betok er tir a dimlak el chedal a telungalek er a Abraham. (Rom 8:​15-​17; Galatia 3:​29) A chedaol el reng er a Dios a ulemekrael er tirke el disaiplo er a Jesus er a kot el dart el rak, el mo oba blakerreng el olisechakl e milsterir a klisiich el mo meruul a mengasireng el tekoi. (Rellir 1:8; 2:​1-4; 1 Korinth 12:​7-​11) Ngoeak aika el ngat, e a chedaol el reng er a Jehovah a mileketeklii a beches el rolel e ngmo otaut a moktek er ngii. A Jehovah a dikea lekengei er sel rolel a omengull el mileketmokl er a betok el rak er a uchei el ngar er a templo er a Jerusalem. A rengul a mla mosiul el mo er tia el beches el ongdibel er a Rekristiano. Sel taem el me lmuut er a chelechang, e a Jehovah a ousbech er a ongdibel er a rengellitel el Kristiano el oltaut er a moktek er ngii.

¹⁰ A Jehovah a uluusbech er a chedaol el reng er ngii er a taem er a omelechesel a Biblia el oltaut a moktek er ngii el ousbech aikakid el bebil er a rolel el omekerreu, e melisiich, e dirrek el omecheluch. E kuk ua ngerang er a chelechang? Ngmekerang a lousbech er a chedaol el reng er ngii el melisiich a moktek er ngii? Ngkmal kired el mo medengei e le ngsoad el oureor el oltirakl er a chedaol el reng er ngii. Me bo dosaod a eua el rolel el Jehovah a ousbech er a chedaol el reng er ngii er a chelechang.

A Rolel a Chedaol el Reng a Loureor er a Chelechang

11. Ngerang a ochotii el kmo a chedaol el reng a klisiich el melisiich er a rechedal a Dios el mo klikiid a omerellir, e kede mekerang e ochotii el kmo kede kongei er a reng me ngomekrael er kid?

¹¹ A kot, e a chedaol el reng a ngosuterir a rechedal a Dios el mo klikiid, me ngkirir el mo klikiid. (Monguiu er a 1 Korinth 6:​9-​11.) A rebebil el Kristiano a mirruul aika el tekoi el ua deleboes el omeruul me a laokreng me a menguchet a raod. Me a chouaika el ngibes er a tech a sebechel choitikikii a chad el mo er a klengit. (Jakobus 1:​14, 15) Me nguaisei, engdi chouai tirka el chad a “mla mengatech,” el olechotel a kmo te mla ngmodech a klengar er tir el mo oltirakl a soal a Dios. Ngera el tekoi a rullii a chad el betik a rengul er a Dios el mo oltngakl a mekngit el uldasu? A 1 Korinth 6:​11 a onger el kmo: A ‘reng ra Dios er kid.’ Me a dolemolem el klikiid e ngolechotel a kmo kede mecherei a reng er a Dios me ngomekrael a klengar er kid.

12. (a) A doltirakl er a ues er a Esekiel, e ngmekerang a Jehovah a lomekrael er a cheldebechelel? (b) Kede mekerang e ochotii el kmo kede kongei el mukrael er a chedaol el reng?

¹² A ongerung, a Jehovah a ousbech er a reng er ngii el omekrael er a cheldebechelel el meruul a soal. Ngar er a ues er a Esekiel, e a cheldebechelel a Jehovah el ngar er a eanged a di ua kuruma er a Jehovah el di melemolem el merael el oltaut a moktek er Ngii. Ngerang a omekrael er tia el kuruma? A Esekiel a kmo: “Tia el kuruma a merael el oltirakl er sel soal a chedaol reng a lebo er ngii.” (Esekiel 1:​20, 21, NW) Lak dobes el kmo a cheldebechelel a Jehovah a meteketek el okiu a  eru el cheldebechel, el tang a ngar er a eanged, me a tang a ngar er a chutem. Me a lsekum e sel cheldebechelel el ngar a eanged a mukrael er a chedaol el reng, e ngbelkul a kmo a cheldebechelel el ngar er a chutem a dirrek el mukrael er a chedaol el reng. Me a doba blekongesenges me a blakerreng el oltirakl a ulekrael er a cheldebechelel a Dios el ngar er a chutem, e kede olecholt el kmo kede merael el obengkel a kuruma er a Jehovah, e oureor el oba kltarreng el ngar er a cheungel a ulekrael er a chedaol el reng er ngii.​—Hebru 13:17.

13, 14. (a) Te rua techang a toketekii “tial telecheroll” el lulsaod er ngii a Jesus? (b) Ka mosaod er a rolel a chedaol el reng a loureor el meketakl a klemerang er a Biblia. (Momes er a baks el dai er ngii a kmo “Kau Ke Merael el Obengkel a Obeketeklang el Llomes?”)

¹³ A ongedei, a Jehovah a ousbech er a chedaol el reng er ngii el ngosukid el mo medengei a klemerang er a Biblia. (Osisechakl 4:​18) Tia el makesin a bla lousbech er ngii a “blak a rengul e mellomes a rengul mesiou” el kemanget el taem el mekekokil el olecholt a klemerang er a Biblia. (Matteus 24:45) El ua tiang, ka molatk er tirke el chedal “tial telecheroll” el Jesus a melsaod er tir. (Monguiu er a Matteus 24:32-​34.) A Jesus ngmillekoi el kirel a ngera el telecheroll? A suobel el dai er ngii a kmo “A Demiel a Kristus​—Ngera Belkul el Kirem?” a mesaod el kmo a Jesus a dimlak lolekoi el kirir a remekngit el chad, e ngbai millekoi el kirir a redisaiplo er ngii, el tir a di kmedung e te mo mucheluch er a chedaol el reng er a Dios. * Me a rengellitel el oltirakl er a Jesus er a kot el dart el rak me a chelechang a diak di bo lesa tia el olangch, e te dirrek el mo medengelii a belkul sel tekoi el kmo​—a Jesus a “kmeda ra siseball.”

¹⁴ Ngera belkul tia el omesodel a tekoi el kired? Me alta e ngdiak dodengelii a mera el temel “tial telecheroll,” engdi ngsebeched el melatk a bebil er a tekoi el kirel tia el “telecheroll.” Ngblechoel el melutk el kirir a rekakerous a rekrir el chad el kiei er seikid el taem; el diak el kemanget el taem; e dirrek el ngar er ngii a ulebengelel. (Exodus 1:6) Me kede mekerang e mo medengei a belkul a tekingel a Jesus el kirel “tial telecheroll”? Ngmilsaod el kmo a klengar er tirke el ngellitel el kiliei er a rak er a 1914 er sera lomuchel tia el tekoi, a melemolem el mo lmuut er a klengar er tirke el ngellitel el kuk kiei el mo mesang a uchelel a klou el ringel. Me tia el telecheroll a ngar er ngii a uchelel, e ulterekokl el mo er ngii a ulebengelel. A otutel a kakerous el olangch a meketeklii el kmo a klou el ringel a kmedang. Me ngkired el melemolem el mekar, e le kede medengei el kmo ngorechudel el taem er a chelechang, e a doruul el uaisei e ngmekekokil el  obeketakl a klemerang er a Biblia er a chelsel a rengud, e melemolem el merael el oltirakl a ulekrael er a chedaol el reng.​—Markus 13:37.

15. Ngera ochotii el kmo a chedaol el reng a meskid a klisiched el mo omerk er a ungil el chais?

¹⁵ A ongeuang, a chedaol el reng a meskid a klisiich el mo omerk er a ungil el chais. (Rellir 1:8) Tiaikid el chedaol el reng a uchul me ngsebechel el oberk a ungil el chais er a beluulechad. Ka di molatk. Kau me ke locha ta er tirke el mle merur el mo oldingel a obliil e ulemdasu el kmo, ‘Ngkmal diak el sebechek el mo oldingel a obliil!’ Engdi chelechang e ngkmal blak a rengum el teloi er tia el ureor. * Te ngar er ngii a rebetok el blak a rengrir el mesiungel a Jehovah el dirk melemolem el omerk er a klumech alta e te chelebangel a odechelakl me a ultok. Ngdi ta el chedaol el reng er a Jehovah a sebechel el smisichid el mo outekangel a omelsemai, el ngii a diak el sebechel el di klisiched e outekangel. (Mika 3:8; Matteus 17:20) Me a deteloi er a ureor er a berkel a klumech, e ngbelkul a kmo kede kongei a ulekrael er a chedaol el reng.

A Rolel a Chedaol el Reng a Loureor er a Ngar Medad

16. Ngera uchul me ngulterekokl a rengud el kmo a Jehovah a mo omekerreu er a rechedal er a taem er a klou el ringel?

¹⁶ Ngar medad el sils e a Jehovah a mo ousbech er a chedaol el reng er ngii el ngar a betok el rolel el oltaut a moktek er ngii. Bo dosaod er a tekoi el ulekerreu. Ngsebeched el mesang er a tekoi el dilubech el mo er a renged er a Israel el kmo a Jehovah a uluusbech er a reng er ngii el omekerreu er a derta el chad. Me nguaisei, e ngngar er ngii a ungil el uchul e ngsebeched el oumerang el kmo ngdirrek el mo ousbech er a mesisiich el chedaol el reng er ngii el mo omekerreu er a rechedal er a taem er a klou el ringel. Ngdiak a belkul el dorriter el kmo ngmo ua ngerang a Jehovah a lomekerreu er a rechedal. Ngbai sebeched el oba ulterekokl el reng el omes el beduluchei e medengei el kmo tirke el rokui el betik a rengrir er a Jehovah a mo er tir a chedaol el reng.​—2 Kronika 16:9; Psalm 139:​7-​12.

17. Ngmekerang a bo lousbech er a chedaol el reng er ngii a Jehovah er a chelsel a beches el beluulechad?

¹⁷ Ngmekerang a Jehovah a bo lousbech er a chedaol el reng er ngii er a chelsel tia el merael el mei el beches el beluulechad? Ngii el chedaol el reng a mo ngubetii a kedekedel a beches el iluil el babier er sel telutk el temel er a Jehovah. (Chocholt 20:12) Ngerang a ngar er a chelsel aika el babier? Ngellechukl er a chelsel aike el tekoi el soal a Jehovah a bo doruul er a chelsel a tal telael el rak. Kau ke semeriar el mo medengei aike el tekoi el llechukl er a chelsel aika el babier? Kede mera el semeriar el mengiil er tia el beches el beluulechad. Ngdiak a tekoi el sebechel el smodii a klengar er a taem el Jehovah a mo omekngeltengat er kid, el ousbech er a chedaol el reng er ngii el otaut a moktek er ngii el kirel tia el chutem me a klechad el mo kiei er a chelsel.

18. Ngerang a omeltkem?

¹⁸ Misei e lak dobes el kmo a moktek er a Jehovah a ulterekokl el mo mutaut e le ngousbech er a chedaol el reng er ngii, el ngii a kot el mesisiich el klisiich er a eanged me a chutem. Kau me ke uldimukl er a chelsel a moktek er a Jehovah. Me a leuaisei, e moterekeklii a rengum el mo meluluuch el olengit er a reng er a Jehovah me bo el sebechem el oureor el oltirakl er ngii. (Lukas 11:13) Sel moruul el uaisei, e ngbelkul a kmo ke melatk el mo kiei er a chelsel a beches el beluulechad el diak a ulebengelel, el ngii a moktek er a Jehovah.

[Footnote]

Ke Dirk Melatk?

• Ngoeak a ngera el rolel e a Jehovah a uluusbech er a chedaol el reng er ngii er a taem er a omelechesel a Biblia el mo oltaut a moktek er ngii?

• Ngmekerang a Jehovah a lousbech er a chedaol el reng er ngii er a chelechang?

• Ngmekerang a Jehovah a lousbech er a chedaol el reng er ngii el mo oltaut a moktek er ngii er a ngar medad el taem?

[Aike el Ker er a Suobel]

[Baks el ngar er a 22 el llel]

Kau Ke Merael el Obengkel a Obeketeklang el Llomes?

A Jehovah a melemolem el omeketakl a klemerang er a Biblia el mo er a rechedal. Ngera bebil er a tekoi el mla obeketakl e motobed er a A Ongkerongel?

▪ A okesiu er a Jesus el kirel a ongemim ngochotii a ngerang el kirel a okurulel a tekoi er a klereng? (Matteus 13:33)​—July 1, 2008 er a 25-26 el llel er a parakurab 9 el mo er a 14.

▪ Ngoingerang e ngmlo er ngii a okedong er a mur er a chebechiil?​—January 1, 2008 er a 31 el llel, er a suobel el dai er ngii a kmo: Ker er a Biblia a Mlonger.

▪ Ngera kede ousbech a lsoad el mengull er a Dios el “oba reng”? (Johanes 4:24)​—November 1, 2002, er a 21 el llel.

▪ Ngkeskelel a mekesekesel a templo a lebo er ngii a klou el seked e mesiou? (Chocholt 7:15)​—December 1, 2006 er a 17 el llel er a parakurab 15.

▪ Ngoingerang e ngulebeketakl a bingel a sib me a kaming? (Matteus 25:31-33)​—May 1, 2006 er a 17 el llel er a parakurab 19 el mo er a 20.