Aike el Lullisechakl a Jesus el Kirel a Dios

“Diak a chad el medengelii a Chedam el kmo ngtechang, ngdi Ngalek me ngikel le ngileltii a Ngalek el lomeketakl ra Chedam er ngii, a medengelii.”​—LUKAS 10:22.

UCHEI er a be el chad er tia el chutem, e a kot el mlechell el Ngelekel a Dios a chilitii a kemanget el taem el obengkel a Demal. (Kolose 1:15) Me seikid, e a Ngalek a mlo medengelii a uldesuel me aike el tekoi el lomelechesiu me a blekerdelel a Demal. Me a uriul er a lemei er a chutem ngii el Ngalek el ua chad el Jesus, e ngmle semeriar el olisechakl er a klemerang el kirel a Demal. Ngsebeched el suub a betok el kirel a Dios sel dorrenges aike el lolekoi ngii el Ngalek.

Ngklel a Dios A chedaol el ngakl, el Jehovah a kmal mle klou a ultutelel el mo er a Jesus. Ngika el betik er a rengul el Ngalek a mle soal a rebebil a bo lodengelii e lousbech er a ngklel a Demal. E a belkul a ngklel a Jesus a kmo “A Jehovah a Osobel.” Sel kesus er a uchei er a kodellel, e ngmle sebechel el melekoi el ngar er a nglunguchel el mo er a Jehovah el kmo: “A kmla ochotii a ngklem.” (Johanes 17:26) Me ngdiak el mechas a rengud el kmo a Jesus a uluusbech er a ngklel a Dios e ullecholt er ngii er a rebebil. E le te mekerang tirke el ulerrenges er a Jesus e mlo medengelii a klemerang el kirel a Jehovah a lsekum te dimlak el bo lodengelii a ngklel me a belkul ngii el ngakl? *

A klou el bltkil a rengul a Dios A Jesus a mle ta el lolekoi el ngar er a nglunguuch el mo er a Dios el kmo: “Chedam, . . . a bltkil a rengum er ngak [a] uchei ra uchelel a belulechad.” (Johanes 17:24) Ngii el millechesuar er a bltkil a rengul a Dios er a lengar er a eanged, a uchul me a Jesus er sera lengar er tia el chutem e ngulsiik a techall el mo olecholt a bek el ungil el telengtengil ngii el bltikerreng.

A Jesus a ulechotii el kmo a bltkil a rengul a Jehovah a diak a telkelel. Ngdilu el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a diak bo lriid, e bai mo oba diak a ullebengelel klengar.” (Johanes 3:​16) A tekoi er a Grik el moiuid el “belulechad” a diak el lolekoi el kirel “tia el chutem.” Ngbai melutk el kirir a rechad​—el mera er ngii a klechad el rokir. A kllungel a bltkil a rengul a Dios el kirel a klechad a uchul me ngmilskid ngike el kot el mekreos er a rengul el Ngelekel, me bo el sebechir a reblak a rengrir el chad el mo mimokl er a klengit me a kodall e bo loba omelatk er a diak a ulebengelel el klengar. Ngkmal diak el sebeched el mo ungil el dobedebii a tengel me a delechel a chouaisei el bltikerreng.​—Rom 8:38, 39.

A Jesus a ulterekeklii a klemerang el tekoi el kmal melisiich a rengud el kmo: A Jehovah a kmal betik a rengul er a derta me a derta el chad el mengull er ngii. Ngullisechakl el kmo a Jehovah a uai a klekerengel a sib el omes er a derta el sib er ngii el ileakl e mekreos. (Matteus 18:12-​14) Ngdilu el kmo ngdiak a ta el chesisebangiau el ruebet er a chutem el lak lodengei a Jehovah. E dilechelii el kmo: “[Ng]mo lmuut ra chui ra bdelmiu me ngdi ulecherangel el rokui.” (Matteus 10:29-​31) A lsekum a Jehovah a sebechel el medengei el kmo a ta el chesisebangiau a mla mo dibus er a lukel, e ngulterekokl el kmal omes e omekerreu er a rederta el mesiungel. E a lsekum a rokui el chui er a bdelud a ulecherangel e meues er a Jehovah el rokui, e ngulterekokl a rokui el tekoi er a klengar er kid​—el ua aike el dousbech me aike el doutekangel me aike el suebek a rengud er ngii el di lodengei.

Demad el Ngar er a Eanged El di ua lulsaod sel luleak uchei el suobel, a Jesus a di ta el Ngelekel a Dios. Me ngdiak el mechas a rengud, e le ngika el betik er a rengul el Ngalek a mle blechoel el omekedong e mesaod er a Jehovah el kmo ng  “Demal.” Ngdirrek el ngar er aike el kot el llechukl el tekingel a Jesus, el lullekoi er a lengar er a templo er a le 12 a rekil, e ngmillekoi er a Jehovah el kmo ng “Demak.” (Lukas 2:49) A tekoi el “Chedam” a debetik er ngii el 190 el taem er a chelsel a Evangkelio. A Jesus a millekoi el kirel a Jehovah el ngar er a kakerous el rolel el kmo “Demmiu,” “Demmam,” me a “Demak.” (Matteus 5:​16; 6:9; 7:​21) Me a Jesus er a lemimokl el lousbech aika el tekoi, e ngulechotii el kmo ngsebechir a rengar er a klengit e diak el cherrungel el chad el mo er ngii a ungil e kmes el deleuill er tir el obengkel a Jehovah.

Chubechub e kongei el ousubes A Jesus a mle medengei el kmo a rediak el cherrungel el chad a ousbech er a klou el klechubechub er a Jehovah. Ngar er a cheldechedechal el kirel a ririid el ngalek, e a Jesus a ulemekesiu er a Jehovah el mo er a chubechub e mereched el ousubes el chedam el outkeu er a mla mo er a bult el ngelekel. (Lukas 15:11-​32) A tekingel a Jesus a oterekeklii er kid el kmo a Jehovah a omes a ngii di el ngeldechel a rengul a diak el cherrungel el chad me bo el sebechel el ochotii a klechubechub el mo er ngii. A Jehovah a kmal kongei el ousubes er a mla mo er a bult el chad. A Jesus a milsaod el kmo: “Ak dmu er kemiu el kmo, nguaisei el lobult a ta rar mekngit e ngmo klou a deourreng ra eanged el kirel, el kuk ngaruchei ra deourreng el kirir tirikel oketiu ma tetiu el melemalt el chad el diak lousbech ra bult.” (Lukas 15:7) Me ngtecha diak el soal el mo kmeed er ngika el Dios er a klechubechub?

Ngorrenges a nglunguuch Sera lengar er a eanged er a uchei er a lemei er tia el chutem, e a Jesus a milsa el kmo a Jehovah a “onger a nglunguuch” e kmal dmeu a rengul er a nglunguchir a reblak a rengrir el mesiungel. (Psalm 65:2) Me sera lengar er a omesiungel, e a Jesus a ullisechakl er a rullerrenges er ngii el kmo ngmekerang a loluluuch e ngerang a loluluuch el kirel. Ngmilellach el kmo: ‘Me sel moluluuch e lak . . . momelekl a diak a blkul tekoi.’ Ngmilengelechel er a rullerrenges er ngii el mo meluluuch me a soal a Dios “le meruul ra belulechad el ua chomerellel ra eanged.” Ngdirrek el sebeched el meluluuch el kirel a keled er a bek el sils, me a klausubes er a kngtid, me a klisiich el mo outekangel a ongetikaik. (Matteus 6:​5-​13) A Jesus a ullisechakl el kmo a Jehovah a onger a nglunguchir a remesiungel el ua lechedam, e onger a ongterir el lolengit el lokiu a klaumerang er tir.​—Matteus 7:​7-​11.

Ngulterekokl a Jesus el mle blak a rengul el olisechakl a klemerang el kirel a Jehovah el Dios me a blekerdelel. Engdi ngmla er ngii a lmuut el ta er a tekoi el kirel a Jehovah el kmal mle soal a Jesus el ouchais el kirel, e tiang a sel rolel a Jehovah a bo lolodech a blekeradel er a beluulechad el mo oltaut er a moktek er Ngii el kirel me a rechad el kiei er ngii. Me nguaisei, tia el tedebechel a klemechel a Jesus a mle dai er a urerel er a berkel a klumech.

[Footnote]