Aike el Lullisechakl a Jesus el Kirel a Rengedel a Dios

“A Jesus a merrael el meliuekl a mats ma mekekerel beluu, el . . . omerk a ungil klumech ra rengedel a Dios.”​—LUKAS 8:1.

KID a soad el mesaod a tekoi el kmal kora mekreos er a rengud. Me ngdi ua ledilu Jesus el kmo, a “ikel mo olsibes ra reng a mo mechedecheduch ra ngor.” (Matteus 12:34) E sel bo domes aike el tekoi el lulsaod a Jesus er a chelsel omesiungel, e ngsebeched el mesa el kmo a Rengedel a Dios a kmal mle klou a ultutelel el tekoi er a rengul.

Ngngera Rengedel a Dios? A renged a kabelment el longedereder er ngii a king. Me a Rengedel a Dios a kabelment el mleketmokl er a Dios. A Jesus a kmal mle dmolech el mesaod el kirel a Rengedel a Dios, e rirellii me ngmle dai er a klumech el lulemerk er ngii. Ngngar er ngii a betok er a 110 el taem el lolekoi el kirel ngii el Renged er a chelsel aike el eua el Evangkelio. Engdi a Jesus a dimlak lolisechakl el di ullab a tekoi el merekong. A omerellel a dirrek el kmal betok a lullisechakl el kirel a Rengedel a Dios me aike el bo loruul.

Ngtecha King er ngii? A King er a Rengedel a Dios a diak bo lemengilt el oeak a sengkio er a rechad, e ngbai mo mengilt er a Dios. E ngar er a osisecheklel, e a Jesus a mileketeklii el kmo ngii a ngike el mlengilt er a Dios el mo King.

A Jesus a mle medengei el kmo a ulaoch er a Biblia a uluuchais el kmo ngike el ngar er a telbiil el Messias a mo mengedereder er a diak a ulebengelel el Renged. (2 Samuel 7:12-​14; Daniel 7:13, 14; Matteus 26:63, 64) Molatk el kmo a Jesus a dimle ngii el lomerk el kmo ngii ngike el meldung er a ulaoch el Messias. Me ngbelkul a kmo ngii el Jesus a mle medengei el kmo ngngike el telutk er a Dios el King. (Johanes 4:25, 26) Me ngkmal mle melemalt er ngii el Jesus er a longedecheduch el tela el taem el lousbech er a tekoi el kmo “a rengedek.”​—Johanes 18:36.

A Jesus a dirrek el ullisechakl el kmo te mo er ngii a rebebil el mo mengedereder er a Renged el obengkel. (Lukas 22:28-​30) Ngulemekedong er tirka el mo mengedereder el obengkel el “kekerel delebechel,” e le ulecherengelir el telkael a ildisel. Ngmillekoi el kirir el kmo: “Ngungil besul ra rengul a Demmiu a meskemiu a rengedel.” (Lukas 12:32) Sel ulebongel el babier er a Biblia a olecholt el kmo ngmo er ngii a uldekial a 144,000 el chad el mo er ngii a techellir el mengedereder el obengkel a Kristus.​—Chocholt 5:9, 10; 14:1.

Tia el Renged ngngar er ker? A Jesus a dilu er a merreder er a Rom el Pontius Pilatus el kmo, “A rengedek a diak le ngar tial belulechad.” (Johanes 18:36) A Rengedel a Dios el ngar er a cheungel a Kristus a diak bo longedereder el oeak a cheldebechel er a klechad. E le Jesus a mle mekudem el omekedong er a Rengedel a Dios el kmo “[ng]rengedel a eanged.” * (Matteus 4:17; 5:3, 10, 19, 20) Me seikid e a Rengedel a Dios a kabelment el ngar er a eanged.

A Jesus a mle ungil medengei el kmo uriul er a tedeb el klengar er ngii er a chutem e nglmuut el mo er a eanged. Me ngngar isei e ngdilu el kmo ngmo “mengedmokl er sel kiriu,” e le ngmo mekengii a rael el kirir a rekldemel el mengedereder el mo obengkel er sel lengar er ngii.​—Johanes 14:2, 3.

 Ngera ngmengetmokl tia el Renged? A Jesus a ullisechakl er a rulerrenges er ngii el mo meluluuch el mo er a Dios el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 6:9, 10) A uldesuel a Dios a merellang er a eanged er a chelechang. E oeak tiaikid el Renged e a moktek er a Dios a mo meketmokl er a beluulechad. A bo loruul er tia el tekoi, e tia el Renged a mo meruul er a kmal klou el omelodech el mei er tia el chutem.

Ngera ngmo meruul tia el Renged er tia el chutem? A Jesus a ullisechakl el kmo a Rengedel a Dios a mo okngemed a mekngit el loeak sel lokngemedeterir tirke el durengrir el melemolem el meruul a chelebirukel. (Matteus 25:31-​34, 46) Tiang a mo ulebengelel a rokui el bedengel a chelebirukel me a mekngit el omeruul. A Jesus a ullisechakl el kmo tia el chutem a mo mukeek er a rechad el “medemedemek,” e melemalt e chubechubechad, e “klikiid a rengrir,” e meruul a budech.​—Matteus 5:5-9.

Tirka el blak a rengrir el chad te mo kiei er a beluulechad el kmal mla metemall er a betok el mekikiongel? Ngkmal diak! A irechar, e a ulaoch er a Biblia a uluuchais el kmo a ngar er a telbiil el Merreder a mo olutii a blekeradel er a beluulechad el mo Paradis el mo osisiu ngii me a blekeradel el mla er ngii er a sers er a Eden. (Isaia 11:1-9) A Jesus a ulterekeklii el kmo a Rengedel a Dios a mo meruul er a mengasireng el omelodech el mei er tia el chutem. A chad el dirrek el mlo okodall el mla er a bita er a Jesus er a lolengit er a Jesus me lletkii sel bo el lsiseb er a rengedel, e a Jesus a dilu er ngii el kmo: “Ak mera el dmu er kau er a chelecha el sils el kmo, Ke mo obengkek el ngar er a Paradis.” (Lukas 23:42, 43, NW) Nguaisei, a Rengedel a Dios a mera el mo ngodechii tia el chutem el mo Paradis el rokir. *

 Ngera lmuut el bebil er a tekoi el bo loruul a Renged el kirir a rechad? A Jesus a kuk betok a lriruul el dimlak di lolekoi a telbiil el kirel a bo loruul a Rengedel a Dios. Ngdirrek el ullecholt el kmo ngngerang mo meruul. A Jesus a mirruul a betok el ongasireng el omekungil er a rechad, el lullecholt el ngar er a kekerei el rolel aike el meklou el tekoi el bo loruul er a ngar er medad sel bo longedereder er a Rengedel. A mlukreng el Evangkelio a melekoi el kirel a Jesus el kmo: “Ma Jesus a merrael el meliuekl ra Galilea el rokir, el olisechakl a ikel blil chongdibel er tir e omerk ra evangkelio ra rengedel a Dios e ulemekungil a bek el rakd ma bek el chelitechut ra delongelir er chad.”​—Matteus 4:23.

A Jesus a betok el kakerous el rakt a lulemekungil. Ng “milok a medal a mlechell el meiko.” (Johanes 9:1-7, 32, 33) Nguleak a klechubechub e a Jesus a ulemekungil er a chad el mle smecher el kemkom. (Markus 1:40-42) Sera lenguu a “tal mechad e bangengei” e a Jesus a ulechotii el kmo ngmle sebechel el ‘rulleterir a remechad el mo orrenges me a rebangengei el mo mengedecheduch.’​—Markus 7:31-37.

Ngmo lmuut er a kodall me ngdimlak el sebechel el lolutii a chimal ngika el telutk el King er a Dios. Ngar er ngii a llechukl el chisel el mle edei el taem el lulekiseterir a rechad el mlad. Ngulekisii a di mle ta el ngelekel a melakl el dil me a 12 a rekil el ekebil me a kmal sechelil er a Lazarus.​—Lukas 7:11-15; 8:41-55; Johanes 11:38-44.

Me a losaod el kirel sel mengasireng el blekeradel el mo er ngii er a ngar er medad el kirir a rechederedellel a Rengedel a Dios, e a Jesus a melekoi el okiu a apostol el Johanes el kmo: “Mesang, a blil a Dios chobenterir ar chad. Me ngii me ngmo obenterir el kiei, me te mo chad er ngii, ma Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 1:1; 21:3, 4) Ka di bo molebedebek er tiang​—ngbeluulechad el diak a klengiterreng, me a ringel, me a kodall! Me a nglunguuch el kirel a soal a Dios a mera el mo meketmokl er a beluulechad el ua omerellel er a eanged.

Oingerang e ngmei a Rengedel a Dios? A Jesus a ullisechakl el kmo a uchelel a omengederederel el ua king a mo osisiu ngii me a taem el lomekedong er ngii el kmo ‘demiel.’ A Jesus a milskid a komakai el ulaoch el mo olecholt el kmo ngoingerang e ngme duum el ngar er a klisichel a kleking. Tiaikid el taem er a reksi a mo obeketakl el oeak a chelebuul el mo er ngii er a beluulechad el rokir, el uldimukl er ngii a betok el mekemad, bosech, desiu, bekoiueiuul el rakt, me a dirrek el delengerenger el merael el mo obdois. (Matteus 24:3, 7-12; Lukas 21:10, 11) Aikaikid me a lmuut el bebil er a blekeradel el lullekoi a Jesus a kmal mlo bleketakl el meues er a 1914 el mei, el ngii sel rak er a lomuchel a Kot el Mekemedil a Beluulechad. Me a leuaisei e a Jesus a mengedereder el King er a chelechang. Ngdi kmedung e ngmei sel taem el mei a Renged el mo meruul a soal a Dios er tia el chutem. *

A mei er a Rengedel a Dios ngngera mo belkul el eko er kau? Aika rokui el di mo ultuil er a kmo ngmekera omonger er tia el klemechel a Jesus.

[Footnote]