A Biblia a Mera el Mlukreng el Tekingel a Dios

NGERA mle belkul a tekingel a Paulus er a ledu el kmo a Biblia a “melluches luleak a Reng ra Dios”? (2 Timoteus 3:16) A Paulus a milluches el uluusbech er a tekoi er a Grik el belkul a kmo “a Dios a ulemekreng.” A belkul a tekingel a kmo a Dios a uluusbech er a chedaol reng er Ngii el ulemekreng er tirke el milluches er a Biblia el mo meluches aike el soal el tekoi.

A apostol el Petrus a millekoi el kirir tirka el milluches er a Biblia el kmo ‘te chad a lulengedereder er tir a  chedaol el reng, me tuleak a Dios el mengedecheduch.’ (2 Petrus 1:21) Me nguaisei, a apostol el Paulus a dirrek el milsaod er a Biblia el kmo ng “chedaol Llechukl [el], . . . ingii a sebechel mekllemesau el mor cholsobel loeak sel kloumera loumera ra Kristus Jesus.”​—2 Timoteus 3:15.

A rebetok el chad a omdasu el kmo a Biblia a diak el babilengel a Dios. A rebebil a melekoi a betok el tekoi el omtok er a klemerang er a Biblia e kmo “ngdiak a ultutelel el babier,” el ua losaod a hakase el Sir Charles Marston. E a rekuk bebil a omes er ngii el kmo “ngchuodel el babier el di mesaod a cheldecheduch el chelid e merekong.”

A Olechotel

Ngsebeched el ultuil a klaumerang er kid er a Biblia? Ngklou a ultutelel el kirem el mo kerekikl el merritel er tia el tekoi. E ngera uchul? E le a lsekum a Biblia a mera el cheldechedechal a Dios, e ngkmal klebelung el tekoi a lak doltirakl er ngii. A lsekum e ke mecherei me ngomekrael a omerellem me a klaumerang er kau, e ngrullau el mo omes er ngii el Tekingel a Dios, el diak el tekingir a rechad.​—1 Thesalonika 2:13.

Ngua ngerang a osengem er a Biblia? A ker a kmo, ke mekerang e mo oumerang er a chad el ketengem el mo medengelii? A ta el tekoi a klemerang el kmo, ngmeringel el bo doumerang er a chad el diak de sal medengelii. Ngdi sel bo dungil el medengelii, e seikid e ngmo sebeched el mo medengei el kmo kede oumerang er ngii me a lechub e ngdiak. Ngdirrek el oeak tiaikid el rolel e ngsebeched el mo medengelii a Biblia. Lak mkengei a ngii di el uldasu me a omelekoi el sebechel el tomellii a klaumerang er kau er a Biblia. Mongoit a temem el mesuub a bleketakl el olechotel el kmo a Biblia a mera el “mlukreng ra Dios.”

A Ultok el Mla er Tirke el Leko Te “Sechelil” a Biblia

Lak bechei a blekerdelir tirke el omtok er a Biblia e meruul er tir el leko te “sechelil” me  longitechut er a klaumerang er kau er sel bleketakl el olechotel a klemerang er a Biblia. A babier el New Dictionary of Theology a melekoi el kirir a rechad el mesaod er a Biblia el leko te Kristiano el kmo, “te oumerang el kmo a Biblia a di tekingir a rechad.”

A rebetok el mesuub a tekoi er a klechelid a kaititekangel el kirir tirke el chad el milluches a babier er a Biblia. A rebebil a melekoi el kmo a profet el Isaia a dimlak loluches er a babier er a Isaia. Te kmo tia el babier a milluches er a uriul er a taem er a Isaia. El ua tiang, a Lowther Clarke a melluches el ngar er a babilengel el Concise Bible Commentary el kmo, a Biblia a “babier el lulluches er ngii a rebetok el chad er a irechar.” Ngdi chouaika el tekoi a mengemikr a tekingel a Jesus me a redisaiplo er ngii el ulemelekl el mesaod aike el ulochel a Isaia.​—Matteus 3:3; 15:7; Lukas 4:17; Johanes 12:38-41; Rom 9:27, 29.

Me a lmuut el tang, a rebebil el sorir el mesaod a Biblia el ua J. R. Dummelow, a melekoi el kirel a ulaoch el debetik er a babier er a Daniel el kmo, “ngtekoi er a irechar engdi a chad el milluches a riruul el mo ua ulaoch.” Me tiang a olechotel a kmo ngdirrek el mengemikr a tekingel a Jesus Kristus. A Jesus a ulemeklatk el kirel a “melemall a chedaol el meldu ra profet el Daniel, el mocha dechor ra chedaol.” (Matteus 24:15) Ngsebechel a Kristiano el mo oumerang el kmo a Jesus Kristus a uluumulak er a rechad, el melisiich aika el leko ngulaoch? Ngkmal diak.

A Tekoi el Mleketmokl Ngngar ngii a Lerellii?

Ngsebeched el di kid el oker el kmo, “ngngar er ngii a lerellii er kid a bo dodengelterir a remilluches aike el babier er a Biblia?” Chochoi, ngkmal klou a lerellii. Ngsebechem el mo oumerang a tekoi el llechukl er a babilengel a sechelim el kirel a dikesel, a lsekum ke mo medengei el kmo ngii a dimlak loluches er tia el babier? Oleko a remeduch el merritel a tekoi a subedau el kmo tia el babier a dimlak loluches er ngii a sechelim, e te rechad el di milluches aike el tekoi el luluumerang el kmo ngurungulel a sechelim. Tiang ngdiak lerellii tia el babier el mo diak a ultutelel? Ke kongei el kmo a tekoi el llechukl er tia el babier a mera el urungulel a sechelim?

A uldesuir a rechad el kirel a Biblia a kmal klou a lerellii e le ngmla rulleterir tirke el leko te Kristiano el mo mengemikr a tekoi er a llemalt me a llach el kirel durs me a lmuut el bebil. Ke locha mla orrenges er a rechad el melekoi el kmo, “a ilechang a di tekoi er a Chuodel el Testament e merekong!” el ua le belkul a kmo ngdikea ultutelel el tekoi. A chouaika el uldasu a omtok er sel tekingel a apostol el Paulus el kmo a “chedaol Llechukl el rokui a melluches luleak a Reng ra Dios.”

Ke locha mo melekoi el kmo “ngdiak el sebeched el omtok a bleketakl el ocholt er a remellomes a rengrir el chad.” Nguaisei! Kede mereng a sulir tirke el mellomes a rengrir el chad el mla ngosukid el meketakl aike el tekoi er a Biblia. Kede medengei el kmo ngulterekokl el ngar er ngii a mekekerei el cheleuid el tekoi el siliseb er a Biblia el oeak a kakerous el omelechesel, er aika el merekong el betok el rak. Lak mobes el kmo: Ngngar er ngii a  klekakerous er a domes aike el mekekerei el cheleuid el tekoi el siliseb er a Biblia me a uldasu el kmo a Biblia a di tekingir me a uldesuir a rechad.

Molemolem el Oumerang er a ‘Chedaol Llechukl’

A Paulus er a uchei er a louchais er a Timoteus er a klungel a ultutelel a mlukreng er a Dios, el Biblia, e ngdilu el kmo: “A ikel uriul sils [e a re] mekngit el chad mar mengeblad a mengal mora mekngit, e mengeuid rar chad, mar chad a mo mengeuid er tir.” (2 Timoteus 3:1, 13) Sel taem er a Paulus, e tirke el leko te “mellomes a rengrir” a uluusbech a ‘melolaok el cheldecheduch’ el mengeuid e mengitechut a klaumerang er a rechad el kirel a Jesus Kristus. (1 Korinth 1:18, 19; Kolose 2:4, 8) Misei a uchul e a Paulus a milengelechel er a Timoteus el kmo: “Ngdi ikau multerekokl ra ikel bla mosuub [er a] chedaol Llechukl [el tekingel a Dios] er cho mkekerei el mei.”​—2 Timoteus 3:14, 15.

Ngklou a ultutelel el dolemolem el oumerang er a Chedaol Llechukl er aika el “uriul sils.” Bo mkerekikl me lak mecheblad er aike el “melolaok” el tekingir a rechad. E bai bo mua Rekristiano er a kot el dart el rak el mo ultuil a klaumerang er kau er aike el tekoi el omsuub er a Biblia, el ngii a babier el mera el mlukreng el Tekingel a Dios.

A Resioning er a Jehovah a kmal dmeu a rengrir el ngosukau el mo toketekii a klaumerang er a kau er a Biblia. Ngsebechir el ochotii er kau el kmo ngmekerang a omellach er a Biblia el ngii a bleketakl el ulekrael el ngar er a reksi el kmal sebeched el mo oumerang er ngii; me a rolel e a Biblia a osisiu a omesodel ngii me a tekoi er a science; e dirrek el kmal ungil el beldebades a tekoi er a chelsel er a uchelel el mo er a ulebengelel; me a ulaoch er a chelsel a mla mutaut, me a lmuut el betok. A lsoam, e moluches el mo er tirke el ultebedii tia el babier, el kirel a tekoi el mla ngosuterir a rebetok el miliol el melemalt a rengrir el chad, el mo medengei el kmo a Biblia a mera el Tekingel a Dios.

[Blurb el ngar er a 5 el llel]

Ke mekerang e mo oumerang er a chad el mongedecheduch er ngii?

[Blurb el ngar er a 6 el llel]

Kede mereng a sulir tirke el chad el mla ngosukid el meketakl aike el tekoi er a Biblia