Lak Mkingtir a Rengul a Chedaol Reng er a Jehovah

‘Lako mkingtir a rengul a chedaol reng ra Dios, e ko mlutebechel er ngii el kirel a sils ra ngubet.’​—EFESUS 4:30.

1. Ngera ngmla rullii a Jehovah el kirir a rebetok el miliol el chad, e ngera ngerechelir el kirel?

 A JEHOVAH a mla rullii a kmal tokubets el tekoi el kirir a rebetok el miliol el chad el kiei er tia el betok a chelebuul er ngii el beluulechad. Ngmla rullii el mo sebechir a rebetok el chad el lolekeed er tir er ngii el oeak ngike el di ta el Ngelekel, el Jesus Kristus. (Johanes 6:44) Kau a ta er tirkaikid el chad a lsekum ke mla mo er a telbilel a reng el mo mesiou er a Dios e melemolem er ngii el telbilel a rengum. Me a lsekum ke chad el miltecholb el ngar er a ngklel a chedaol reng, e ngngar er ngii a ngerechelem el meruul a blekerdelem me ngoltirakl er ngii el reng.​—Matteus 28:19.

2. Ngera el ker a bo dosaod?

² Kid el kiei el ‘omriid el mora reng’ a oubail er a beches el chad. (Galatia 6:8; Efesus 4:17-24) Engdi a apostol el Paulus a meskid a omellach e omeklatk er kid me lak dekingtir a rengul a chedaol reng er a Dios, me a lechub e lak domtok er a ulekrael er a chedaol reng er a Dios. (Monguiu er a Efesus 4:25-32.) Chelechang e bo dungil el melebedebek er a omellach er a apostol. Ngngera mle belkul a tekingel a Paulus er a lolekoi el kirel a dekingtir a rengul me a lechub e domtok er a ulekrael er a reng er a Dios? Ngmekera e sebechel a chad el mla mo er a telbilel a reng el mo mesiou er a Jehovah el mo rullii a chouaisei el tekoi? Kede mekerang e oibngid el mo diak dekingtir er a rengul me a lechub e domtok er a ulekrael er a reng er a Jehovah?

A Mle Belkul a Tekingel a Paulus

3. Ngmekera omosaod er a belkul a tekoi el medung er a Efesus 4:30?

³ A kot, e mutab a tekingel a Paulus el llechukl er a Efesus 4:30. Ngdilu el kmo: ‘Lako mkingtir a rengul a chedaol reng ra Dios, e ko mlutebechel er ngii el kirel a sils ra ngubet.’ A Paulus a dimlak el soal a rebetik  er a rengul el kldemel er a klaumerang a bo loruul a tekoi el mo uchul a temellel a klereng er tir. Nguleak a chedaol reng er a Jehovah e te “mlutebechel . . . el kirel a sils ra ngubet.” Me a chedaol reng er a Dios sei a mle olangch, me a lechub e ng “olechotel ngiil tekoi” el kirir a reblak a rengrir el ngellitel. (2 Korinth 1:22) Tia el olangch a olecholt el kmo te kloklel a Dios e oba omelatk er a mo nguu a klengar el ngar er a eanged. Sel cherrengelel a ulecherengelir tirke el mo er tir a olangch a 144,000.​—Chocholt 7:2-4.

4. Ngera uchul me ngklou a ultutelel el dolechib er kid me lak dekingtir a rengul me a lechub e domtok er a ulekrael er a reng er a Dios?

⁴ A le kingtir a rengul me a lechub e bo lomtok er a ulekrael er a chedaol reng a sebechel el kot el bakes el mo uchul e ngmoriid a cherrungel el urerel a klisichel a Dios er a klengar er a Kristiano. Sel meketeklii el kmo tia el tekoi a sebechel el duubech a desang er a tekingel a David er uriul er a lrebet er a klengit el lobengkel a Bath-sheba. A David a kmal uluuchel er a rengul e olengit er a Jehovah el kmo: ‘Lak mongeroid er ngak er medam; e lak mcheridii er ngak a chedaol reng er kau.’ (Psalm 51:11) Ngdi tirke el ngellitel el olecholt a ‘blakerreng el mo lmuut ra kodall’ a mo nguu a “krone” er a diak el ngemed el klengar el ngar er a eanged. (Chocholt 2:10; 1 Korinth 15:53) A Rekristiano el oba omelatk er a mo kiei er tia el beluulechad a ousbech er a chedaol reng el mo melemolem a blakerreng er tir el mo er a Dios me bo lenguu a sengk er a klengar el oeak a klaumerang er tir er a olubet el tengetengel a Kristus. (Johanes 3:36; Rom 5:8; 6:23) Me seikid, e ngkid el rokui el kmal kired el kerekikl el klekar me lak de kingtir a rengul me a lechub e bo domtok er a ulekrael er a chedaol reng er a Jehovah.

Ngmekerang e Sebechel a Kristiano el Kingtir a Rengul a Chedaol Reng?

5, 6. Ngmekerang a Kristiano e kingtir a rengul me a lechub e ng mo omtok er a reng er a Jehovah?

⁵ A bla demetecholb el Kristiano e ngsebeched el oibngid me ngdiak dekingtir a rengul me a lechub e domtok er a ulekrael er a chedaol reng. Tiang a sebeched el meruul er ngii a lsekum kede melemolem el ‘merael el ngara reng,’ le seikid e ngmo diak de meelb er a ngelbesel a tech me a mo diak dengar er a mekngit el blekeradel. (Galatia 5:16, 25, 26) Engdi tia el tekoi a kmal sebechel el mengodech. Ngsebeched el kingtir a rengul me a lechub e domtok er a ulekrael er a reng er a Dios a debechikid e domechakl el mekekokid, el locha diak dolechesuar er ngii, el mo bedul a blekeradel el lomtok a mlukreng el tekingel a Dios.

⁶ A dolemolem el meruul a tekoi el omtok er a ulekrael er a chedaol reng el ua dongit er a rengul, e kede mengit er a rengul a Jehovah el ngii a uchul ngii el reng. A omerriter er a Efesus 4:25-32 a mo ochotii er kid el kmo ngkirel el mo ua ngerang a blekerdeled, e sebechel el ngosukid el oibngid el mo diak dongit er a rengul a reng er a Dios.

Kede Mekerang e Oibngid el mo Diak Dekingtir a Rengul a Chedaol Reng

7, 8. Mosaod er a uchul me ngkired el melekoi a klemerang.

⁷ Ngkired el mo melekoi a klemerang. A doltirakl er a Efesus 4:25 e a Paulus a milluches el kmo: “Misei e mchitii a blulak, ma derta er kemiu bo longedecheduch a klemerang el mora ngar bita er tir, e kede mla mo dul kauklekedall.” Me chelechang el de “dul kauklekedall” e ngkmal diak el kired el mengeblad me a lechub el durengud el melasem el mengeuid a uldesuir a rekldemed er a klaumerang, e le tia el omeruul a di osisiu ngii me a domulak er tir. A ngii di el chad el melemolem el meruul aika el tekoi a di ngii el tomellii a deleuill er ngii me a Dios.​—Monguiu er a Osisechakl 3:32.

⁸ A blulak el tekoi me a omeruul a sebechel el tomellii a kltarreng er a ongdibel. Me ngkmal kired el mo ua melemalt el profet el Daniel el dimlak a chad el sebechel el metik a kngtil me a telemellel. (Daniel 6:4) Ngdirrek el kired el mo melatk a omellach er a Paulus el mo er a Rekristiano el olab a omelatk er a klengar el mo er a eanged el kmo a rederta er tir a “chelechedal a Kristus” me te dul kauklekedall me ngkirir el melemolem el ngar er a kltang el lobengterir a remera el ngellitel el obengkel a Jesus. (Efesus 4:11, 12) Me a lsekum a omeltked a kuk mo kiei el diak a ulebengelel el ngar er a Paradis el chutem, e ngkmal kired el melekoi a klemerang, el mo uchul e kede melemolem el melisiich er a kltang er a klodam el meliuekl er a beluulechad el rokir.

9. Ngera uchul me ngklou a ultutelel el dotirakl a tekoi el medung er a Efesus 4:26, 27?

⁹ Ngkired el omtok er a Diabelong, el diak debsa techall me ltemellii a klereng er kid. (Jakobus 4:7) A chedaol reng a ngosukid el omtok er a Satan. El ua tiang, ngsebeched el meruul el uaisei sel dekerekikl el omtebechel a ngesechel a rengud. A Paulus a  milluches el kmo: “Lak bora klengit a bo le kesib a rengmiu; e lak di le kesib a rengmiu el mo ngmelt a sils, e lako bsa techellel a diabelong.” (Efesus 4:26, 27) A lsekum ngmo er ngii a ungil el uchul e ngmo kesib a rengud, e a demereched el meluluuch el di ngar er a chelsel a rengud a kmal sebechel el ngosukid el “di lmuk,” el olecholt a ulserechakl el reng er a bai bo doruul a tekoi el mo omtok er a ulekrael er a reng er a Dios. (Osisechakl 17:27) Me lak lolemolem el kesib a rengud me debsa Satan a techall el rullid el mo meruul a mekngit. (Psalm 37:8, 9) A ta er a rolel e kede omtok er ngii a demereched el sumechokl a chetituokel el tekoi er a delongeled el oltirakl a omellach el mla er a  Jesus.​—Matteus 5:23, 24; 18:15-17.

10, 11. Ngera uchul me ngdiak dorechorech me a diak doruul a diak el melemalt el tekoi el omulak?

¹⁰ Ngkmal diak el kired el mo mechitechut er a ongetikaik el mo merechorech me a lechub e kede omulak. A Paulus a milluches el kirel a omerechorech el kmo: “Me ngikel mlerechorech lekea lluut el mo merechorech, e bai lolab a chimal loureor el meruul a ungil tekoi, me lsebechel meliukes rar mechebuul.” (Efesus 4:28) A lsekum a mla metecholb el Kristiano a mo merechorech, e a mera er ngii ngmla ‘otubii a ngklel a Dios.’ (Osisechakl 30:7-9) Ngmo lmuut er a techerelbesul a chad me ngdiak el bsa ungil el uchul e bo lorechorech. Me tirke el betik a rengrir er a Dios me a rengar bita er tir a ungil el medengei el kmo ngdiak a ta el taem el bo el lungil el tekoi a omerechorech.​—Markus 12:28-31.

¹¹ A Paulus a diak di lolekoi aike el diak el kired el meruul, e ngbai melekoi aike el kired el meruul el tekoi. Me a lsekum kede kiei e merael el oltirakl er a chedaol reng, e kede mo meringel el oureor me ngmo sebeched el olengeseu er a telungalek er kid e dirrek el mo ngar er ngii a sebeched el lolab el olengeseu er tirke el ousbech a ngeso. (1 Timoteus 5:8) A Jesus me a rechapostol er ngii a ulecheuekl a udoud el mo olengeseu er a remechebuul, engdi ngike el ulterekeklii el Judas er a Iskariot a rirechorech a bebil er ngii el udoud. (Johanes 12:4-6) Ngulterekokl el kmal dimlak lomekrael er ngii a chedaol reng. Me ngdi ua Paulus, e kid el mukrael er a reng er a Dios a soad el mo “melemalt loureor el kirel a ngiidil tekoi.” (Hebru 13:18) E a doruul el uaisei e ngmo diak dongit er a rengul a chedaol reng er a Jehovah.

Bebil er a Rolel e Kede Oibngid el Diak Dongit er a Rengul a Reng

12, 13. (a) Ngua lolecholt er ngii a Efesus 4:29, e ngua ngera el rolel a cheldecheduch a kired el olechib er kid er ngii? (b) Ngkirel el mo ua ngera teletelel a cheldechedechad?

¹² Ngkired el kerekikl a blekerdelel a cheldechedechad. A Paulus a dilu el kmo: “Lak motebedii a mekngit el tekoi ra ngeriu, ngdi lsekum ngkirel e moltobed a ungil tekoi el toketekii a klungiaol el morar chad el orrenges, me le nguu a klengeltengat.” (Efesus 4:29) Ngar er tiang e a apostol a dirrek el diak lolekoi er kid er a tekoi el diak el kired el meruul, ngbai melekoi er kid aike el kired el meruul. Ngar er a cheungel a ulekrael er a reng er a Dios, e kede mo modubech el mo melekoi “a ungil tekoi el toketekii a klungiaol el morar chad el orrenges.” Ngdirrek el kired el diak debechei a “mekngit el tekoi” me be el tobed er a ngered. A tekoi er a Grik el loleiuid er ngii el “mekngit” a  luluusbech el mesaod a mechut el rodech, ngikel, me a techel a charm. Me ngdi uai kid el merecherached a rengud er a uaisei el kall, me ngkmal kired el mo ouketui a teletelel a cheldecheduch el lomes a Jehovah el kmo ngmekngit.

¹³ A omelekinged a kirel el mo ungil, e medemedemek, “el ulsar.” (Kolose 3:8-10; 4:6) A rechad a kirir el sebechir el mesang el kmo kede ngodech sel lorrenges a tekoi el dolekoi. Me a leuaisei e dengesuterir a rebebil loeak sel dongedecheduch er tir aike el “ungil el kirel omeleketek.” Me a uldesued lebo leua cheliteklel a milluches er a psalm el kmo: “A tekingek ma uldesuek bo le betechii a rengum, RUBAK el cheuotelek!”​—Psalm 19:14.

14. A doltirakl er a Efesus 4:30, 31, e ngngera el tekoi a kired el choroid er a klengar er kid?

¹⁴ Ngkirel el mo diak a cheluached, ngasechereng, teloketok, me a rokui el mekngit el uldasu. Uriul er a lomeklatk el kirel me lak bo doruul a tekoi el omtok er a ulekrael er a reng er a Dios, e a Paulus a milluches el kmo: “Mchoit a rokuil cheluached, ma ngasechereng, ma klsiberreng, ma teloketok, ma chomelaes, ma ikel rokuil mekngit luldasu el bedul a chad” (Efesus 4:30, 31) Ngdiak demecherrungel a uchul, e kede rokui el kired el loureor el meringel el omtebechel a uldesued me a omerelled. E le a lsekum kede di beot el olecholt a “cheluached, ma ngasechereng, ma klsiberreng” er a blekerdelel a cheldechedechad e kede mengit er a rengul a chedaol reng er a Dios. A osisiu el tekoi a mo klemerang a dolemolem el omechur a mekngit el leriruul a rechad el mei er kid, e chemolt a omerelled el checherd a rengud er tir, me a lechub e ngdiak dekengei el mo mesumech er a deleuill er kid me a chad el tilemellii a rengud. Me a lsekum kede omuchel el mo ousumengoit a omellach er a Biblia, e ngsebeched el mo omuchel el omekeroul a blekeradel el ngii a mo uchul e kede mo er a klengit el omtok er a chedaol reng me ngsebechel el mo uchul a telemelled.

15. A lsekum ngngar er ngii a cheleuid el merruul el mei er kid, e ngkired el mekerang?

¹⁵ Ngkired el mo bekokeuii, chubechub, e sebeched el ousubes. A Paulus a milluches el kmo: “Bo bekokuii e mchubechub ra delongeliu, e mdul kausubes el ua Dios el ngara Kristus el uluusubes a kngtmiu.” (Efesus 4:32) A lesal kmal miltemall a rengud er a mekngit el omerellir a rechad el mlei er kid, e dousubes el ua Dios el ousubes. (Lukas 11:4) Omko ngmla er ngii a kldemed er a omengull el dillii a diak el sal ungil el tekoi el mei er kid. Me kede melasem el mesmechokl a tekoi, me kede mlo er ngii el mo mengedecheduch er ngii. E ngii a kmal ulechotii el kmo ngkmal mlo mekngit e olengit a klausubes er kid. E kede ousubes er ngii, engdi ngngar er ngii a lmuut el betok el kired el meruul. A Levitikus a 19:18 a melekoi el kmo: “Lak molaitechei er a ngii di le chad, ma lechub e di mouketui er ngii, e bai bo le betik a rengum er a re ngodech el chad el di ua le betik a rengum er kau. Ngak a RUBAK.”

Ngkired el Kerekikl el Klekar

16. Ka mochotii a ta er a kerbai el lolecholt el kmo ngkired el mesmechokl a tekoi el doruul me bo el luchul e lak dekingtir a rengul me a lechub e bo domtok er a ulekrael er a reng er a Jehovah.

¹⁶ Ngdirrek el sel di lekid el tang, me kede dirrek el measem el mo meruul a tekoi el diak loldeu er a rengul a Dios. El di ua tiang, a odam sel di lengii el tang e ngsebechel el orrenges a ongngak el diak el ungil el kirir a Rekristiano. A lorael a taem el mong, e a ukeltkel a mocha mekngit e le ngii el ousumengoit a omellach er a Biblia el loltobed a “blak a rengul e mellomes a rengul mesiou” er a chelsel a babier el dosuub. (Matteus 24:45) Ngsebechel el meluluuch el kirel tia el mondai e mo dobedebek a tekingel a Paulus el ngar er a Efesus 4:30. Ngblak a rengul el diak bo loruul a ngii di el ngerang el mo kingtir a rengul me a lechub e ngmo omtok er a ulekrael er a reng er a Dios, me ngtibir a  rengul er a chelecha el mong el mo omekiai er ngii er a ngii di el ongngak el diak el ungil el kirir a Rekristiano. A leuaisei e a Jehovah a mo omekngeltengat er sel uldesuel a rengul ngii el odam. Me seikid, e dolemolem el klekar er kid me lak bo domtok er a ulekrael er a reng er a Dios.

17. Ngera sebechel el duubech a bo lak de kerekikl el klekar e doluluuch?

¹⁷ A lak dekerekikl el klekar e deblechoel el meluluuch, e ngsebeched el mo mechitechut er a diak el klikiid me a lechub a cheleuid el omeruul el sebechel el mo uchul e kede mo omtok er a ulekrael er a chedaol reng. E le chedaol reng a oltobed a blekeradel el ochotel a blekerdelel me a uldesuel a Demad el ngar er a eanged a uchul, me ngsebeched el kingtir a rengul me a lechub e kede mo omtok er a ulekrael er ngii​—e tiang a tekoi el ulterekokl el kmal diak el soad el mukngerachel er ngii. (Efesus 4:30) A rechellimosk er a llach er a Judea er a kot el dart el rak a millekoi a ongasireng el lurruul a Jesus el kmo ngmla er a Satan el mei. (Monguiu er a Markus 3:22-30.) Tirka el cherrouel a Kristus a ‘uleltuub ra chedaol reng’ me te mirruul a klengit el diak el sebechel el musubes. Ngkmal kired el kerekikl me lak debo er a chouaisei el tekoi.

18. Kede mekerang e sebeched el mo medengei el kmo ngdirkak derellii a klengit el diak el musubes?

¹⁸ Me a lsekum e ngdiak el soad el mo ruebet er a klengit el diak a klausubes el kirel e ngkired el mo melatk a tekingel a Paulus e diak dekingtir a rengul me a lechub e bo domtok er a ulekrael er a chedaol reng. Engdi kede mo mekerang a lsekum kede tilemellii a oberaod el tekoi? A lsekum kede mla mo er a bult, e mla mongeseu er a remechuodel, e ngsebeched el melatk el kmo a Dios a mla ousubes er kid me ngdirkak debo er a klengit el omtok er a chedaol el reng. Me ngoeak a ngelseuil a Dios, e ngsebeched el olechib er kid me ngdiak bo doruul a ngii di el tekoi el mo kingtir a rengul me a lechub e kede mo omtok er a ulekrael er a chedaol reng.

19, 20. (a) Ngera bebil er a tekoi el kirel el olechib er kid er ngii? (b) Ngkirel el mo blak a rengud el meruul a ngerang?

¹⁹ Ngoeak a chedaol reng er ngii, e a Dios a melisiich er a bltikerreng, deurreng, me a kltarreng er a rechedal. (Psalm 133:1-3) Me ngkmal kired el diak dekingtir a rengul me a lechub e bo domtok er a ulekrael er a chedaol reng e le kid el teloi er a omelaes me a lechub e kede melekoi a tekoi el melemall er a omengull el mo er tirke el meltutk er a chedaol reng el klekar. (Rellir 20:28; Judas 8) Ngbai kired el melisiich er a kltarreng me a omengull el mo er a tang me a tang er a chelsel a ongdibel. Ngkmal diak el kired el lomuchel a mekekerei el cheldebechel er a delongelir a rechedal a Dios el kuk di kirir a rechad el losisiu a tekoi el sorir me a loruul. A Paulus a milluches el kmo: “E ngak, e rudam, a mengelechel er kemiu loeak a ngklel a Rubak er kid el Jesus Kristus el kmo, le bo lta ikel mongedecheduch e bo lak chomelekiakl ra delongeliu, e bai bo lta rengmiu el ta uldesuiu el mo kadibuk.”​—1 Korinth 1:10.

²⁰ A Jehovah a soal e sebechel el ngosukid el oibngid me ngdiak dekingtir a rengul me a lechub e bo doruul a tekoi el mo omtok er a chedaol reng er ngii. Me dolemolem el meluluuch el kirel a chedaol reng e debo er sel tkurrebab el klisiched el kerekikl melak dekingtir a rengul me a lechub e doruul a tekoi el mo omtok er a ulekrael er a chedaol reng. Me dolemolem el ‘omriid el mora reng’ el blak a rengud el osiik a ulekrael er chelechang me a ngar er medad el klebesei.

Ngmekerang A Omonger?

• Ngera belkul sel dekingtir a rengul a me a lechub e ke domtok er a ulekrael er a chedaol reng er a Dios?

• Ngmekera chad el mla tibir er a rengul el mo mesiou er a Jehovah a lekingtir a rengul me a lechub e bo lomtok er a ulekrael er a chedaol reng?

• Ngoeak a ngera el rolel e ngsebeched el oibngid el mo diak dekingtir a rengul me a lechub e domtok er a ulekrael er a chedaol reng?

[Aike el Ker er a Suobel]

[Siasing el ngar er a 30 el llel]

Mereched el sumechokl a klautok el ngar er ngii

[Siasing el ngar er a 31 el llel]

Ngera el rodech a ungil el smodii a blekerdelel a cheldechedecham?